Murli du jour du mercredi 22 juin 2022

22-06-2022 praatahmurli om shanti "baapdaada"' madhuban

“meethe bachche - baap svarga ka foundation laga rahe hain, tum bachche madadgaar ban apna hissa jama kar lo, eeshvareey mat par chal shreshtha praalabdha banaao''

prashn:- baapdaada ko kin bachchon ki sada talaash rehti hai?

uttar:- jo bahut-bahut meethe sheetal svabhaav vaale serviceable bachche hain। aise bachchon ki baap ko talaash rehti hai। serviceable bachche hi baap ka naam baala karenge। jitna baap ka madadgaar bante hain, aagyaakaari, vaphaadaar hain, utna woh varse ke hakdaar bante hain।

geet:- om namo shivaae…

om shanti। om ka arth kisne bataaya? baap ne। jab baba kaha jaata hai to uska naam zaroor chaahiye। saakaar ho va niraakaar ho, naam zaroor chaahiye। aur jo aatmaayen hain un par kabhi naam nahin padta। aatma jab jeev aatma banti hai tab shareer par naam padta hai। brahma devtaae namah kehte, vishnu ko bhi devta kehte kyonki aakaari hain to aakaari shareer ka naam pada। naam hamesha shareer par padta hai। sirf ek niraakaar parampita paramatma hai, jiska naam shiv hai। ek hi is aatma ka naam hai, baaki sabka deh par naam padta hai। shareer chhoda to phir naam badal jaayega। paramatma ka ek hi naam chalta hai, kabhi badalta nahin। isse siddha hota hai ki woh kabhi janma-maran mein nahin aata hai। agar khud janma-maran mein aave to auron ko janma-maran se chhuda na sake। amarlok mein kabhi janma-maran nahin kaha jaata। vahaan to badi sahaj reeti se ek shareer chhod doosra lete hain। marna yahaan hai। satayug mein aise nahin kehte ki phalaana mar gaya। marna shabd duhkh ka hai। vahaan to puraana shareer chhod doosra kishor avastha ka shareer le lete hain। khushi manaate hain। puraani duniya mein kitne manushya hain, yeh sab khatma hone vaale hain। dikhaate hain yaadav aur kaurav the, ladaai mein woh khatma ho gaye to kya paandavon ko ranj hua hoga? nahin। paandavon ka to raajya sthaapan hua। is samay tum ho brahma vanshi brahman, brahmaakumaar aur kumaariyaan। brahma ko itne bachche hain to zaroor prajaapita thahra। brahma vishnu shankar ka baap hai shiv। unko hi bhagwan kaha jaata hai। is samay tum jaante ho ki ham eeshvareey kul ke hain। ham baba ke saath, baba ke ghar nirvaandhaam mein jaane vaale hain। baba aaya hua hai, unko saajan bhi kaha jaata hai। parantu accurate sambandh mein woh baap hai kyonki varsa sajniyon ko nahin milta hai। varsa bachche lete hain to baap kehna right hai। baap ko bhool jaane se hi manushya naastik bane hain। krishna ke charitra gaaye jaate hain। parantu krishna ka charitra to koi hai nahin। bhaagvat mein krishna ke charitra hain lekin charitra hona chaahiye - shivbaaba ka। woh bhi baap, teacher, satguru hai, ismen charitra ki kya baat hai। krishna ke bhi charitra nahin hain। woh bhi bachcha hai। jaise chhote bachche hote hain। bachche hamesha chanchal hote hain, to sabhi ko pyaare lagte hain। krishna ke liye jo dikhaate hain ki matki phodi, aisa to kuchh bhi hai nahin। shivbaaba ka kya charitra hai? woh to tum dekhte ho ki padhaakar patit se paavan banaate hain। kehte hain bhakti maarga mein main tumhaari bhaavna poori karta hoon। baaki yahaan to main padhaata hoon। is samay jo mere bachche hain, vahi mujhe yaad karte hain। aur sabki yaad ko bhool ek baap ki yaad mein rahne ka prayatna karte hain। aise nahin ki main sarvavyaapi hoon। mujhe jo yaad karte hain, main bhi unko yaad karta hoon। so bhi yaad to bachchon ko hi karenge। mukhya baat to ek hai। bahaadur to kisi ko tab kahenge jab koi bade aadmi ko samjhaakar dikhaao। saara madaar hai geeta par। geeta niraakaar parampita paramatma ki gaai hui hai, na ki manushyon ki। bhagwan ko roodra bhi kaha jaata hai। krishna ko roodra nahin kahenge। roodra gyaan yagya se hi vinaash jvaala nikli hai।

kai log paramatma ko maalik kahkar yaad karte hain। kehte hain us maalik ka naam nahin hai। achha bhala woh maalik kahaan hai? kya woh vishwa ka, saari srishti ka maalik hai? parampita paramatma to srishti ka maalik nahin banta hai, srishti ka maalik to devi-devta bante hain। parampita paramatma to brahmaanda ka maalik hai। brahm tatva baap ka ghar to ham bachchon ka bhi ghar hai। brahmaanda hai baap ka ghar, jahaan aatmaayen ande misal dikhaate hain। aise koi hain nahin। ham aatmaayen jyotirbindu vahaan nivaas karti hain, phir brahmaanda se ham neeche utarte hain part bajaane ke liye, ham ek-do ke pichhaadi aate rehte hain। jhaad vriddhi ko paata rehta hai। baba hai beejroop, foundation devi-devtaaon ka kahen va braahmanon ka kahen। brahman beej daalte hain। brahman hi phir devta ban raajya karte hain। ab hamaare dvaara shiv-baba foundation laga rahe hain। Deityism arthaat svarga ka foundation lag raha hai। jitna jo madadgaar banenge utna woh apna hissa lenge। nahin to sooryavanshi kaise banen! abhi tum woh oonch praalabdha bana rahe ho। har ek manushya purushaartha se praalabdha banaate rehte hain। praalabdha banaane liye achha kaam kiya jaata hai। daan-punya karna, dharmashaala aadi banaana। sab eeshvar arth hi karte hain kyonki unka phal dene vaala woh hai। tum ab shreemat par purushaartha kar rahe ho। baaki saari duniya manushya mat par purushaartha kar rahi hai। so bhi aasuri mat hai। eeshvareey mat ke baad hai daivi mat, phir ho jaati hai aasuri mat। ab tum bachchon ko eeshvareey mat milti hai। baba mama bhi unki mat se shreshtha bante hain। koi manushya devtaaon jaise shreshtha ho hi nahin sakte। devtaaon ko shreshtha banaane vaala kaun? yahaan to koi shreshtha hai nahin। shri shri hai hi ek vahi sabse oonch te oonch baap, teacher, satguru hai। vahi phir shri lakshmi-naaraayan banaate hain। bhal raam ko bhi kehte hain shri seeta, shri raam। parantu unke pichhaadi add ho jaata hai kshatriy, chandravanshi। woh lakshmi-naaraayan to 16 kala sampoorn sooryavanshi devta kul hua aur raam-seeta 14 kala chandravanshi। do kala kam hui hai na। so to hona hi hai zaroor। manushya yeh nahin jaante hain ki srishti ki girti kala hoti hai। 16 kala se 14 kala hui to degrade hui na। is samay to bilkul degrade hai। yeh hai raavan sampradaay। raavan raajya hai na। raavan mat ko kaha jaata hai aasuri mat। sab patit hain। paavan koi is patit duniya mein nahin ho sakta। bhaaratvaasi jo paavan the vahi phir patit bane hain phir unhon ko hi main aakar paavan banaata hoon। patit-paavan krishna nahin gaaya jaata hai। na charitra ki baat hai। patit-paavan ek paramatma ko hi kahenge। pichhaadi mein sab kahenge aho prabhu aapki gat mat nyaari। aapki rachna ko koi nahin jaante। so to ab tum jaan gaye ho। yeh gyaan hai bilkul naya। nai cheez jab nikalti hai to pahle thodi hoti hai phir badhti jaati hai। tum bhi pahle ek kone mein pade the। ab desh-deshaantar vriddhi ko paate rahenge। raajdhaani sthaapan zaroor honi hai। mool baat to yeh siddha karni hai ki geeta ka bhagwan shreekrishna nahin hai। varsa baap denge, krishna nahin। lakshmi-naaraayan bhi apne bachchon ko varsa denge। woh bhi yahaan ke purooshaartha ki praalabdha milti hai। satayug, treta mein behad ka varsa hai। golden, silver jubilee manaate hain। yahaan to ek din manaate hain। ham to 1250 varsha golden jubilee manaate hain। khushiyaan manaate hain na। maalaamaal ban jaate hain। to yeh andar mein badi khushi rehti hai। aise nahin ki sirf baahar se battiyaan aadi jalaate hain। svarga mein ham bilkul sampattivaan, bahut sukhi ho jaate hain। devta dharma jaisa sukhi aur koi hota nahin। phir silver jubilee aadi ko bhi poora samajhte nahin hain। abhi tum aadhaakalpa ki jubilee manaane ke liye baap se varsa pa rahe ho। to mukhya baat yeh samajhne ki hai ki geeta ka bhagwan shiv hai। usne hi raajayog sikhlaaya tha, so phir se ab sikhla rahe hain। sikhlaate bhi tab hain jab raajaai hai nahin। praja ka praja par raajya hai। ek do ki topi utaarne mein deri nahin karte hain। tum bachche unki mat par chalne se sukhdhaam ke maalik banenge। aise bahut hain jo gyaan ko poora dhaaran nahin karte, parantu centre par aate rehte hain। andar dil bitta-bitta karti ki ek bachcha paida kar den। maaya ki temptation hoti hai ki shaadi kar ek bachche ka sukh le leven। are guarantee thode hi hai ki bachcha sukh hi dega। do chaar varsha mein bachcha mar jaaye to aur hi duhkhi ho padenge। aaj shaadmaana karte hain kal chita par chadhte to rona peetna padta hai। yeh hai hi duhkhadhaam। dekho, khaana bhi kaisa khaate hain! to baap samjhaate hain ki bachche aisi aashaayen nahin rakho। maaya bada toofaan mein le aayegi। jhat vikaar mein gira degi। phir aane mein bhi lajja aayegi। sab kahenge kul ko kalankit kiya hai to varsa kya lenge। baba mama kehte ho to brahmaakumaar kumaariyaan aapas mein ho gaye bhaai-behen। phir agar vikaaron mein gir pade to aise kul kalankit aur hi sau guna kadi saja khaayenge aur pad bhi bhrashta hoga। koi to vikaar mein jaate phir batlaate nahin to bahut danda ke bhaagi bante hain। dharmaraaj baba to kisi ko chhodte nahin hain। vo log to saja khaate jel bhogte hain। lekin yahaan vaalon ke liye to badi kadi saja hai। aise bhi centres par bahut aate hain। baap samjhaate hain ki aise kaam nahin karo। kehte ho ki ham eeshvareey aulaad hain aur phir vikaar mein jaana, yeh to apni satyaanaash karni hai। koi bhi bhool ho to jhat baap ko bata do। vikaar bigar rah nahin sakte ho to yahaan nahin aao to behtar hai। nahin to vaayumandal kharaab ho jaata hai। tumhaare beech mein koi bagula va ashuddha khaane vaala baithe to kitna kharaab lage। baap kehte hain ki aise ko le aane vaale par dosh aa jaata hai। duniya mein aise satsang to bahut hain, jaakar vahaan bhakti karen। bhakti ke liye ham mana nahin karte hain। bhagwan aate hain pavitra banaane ke liye, pavitra vaikuntha ka varsa dene ke liye। baap kehte hain ki sirf baap aur varse ko yaad karo। bas aur khaan-paan ke parhez ki yuktiyaan bhi bataate hain। parhej ke liye bahut prakaar ki yuktiyaan bhi rakh sakte hain। tabiyat theek nahin hai, doctor ne mana ki hai। achha aap kehte ho to ham phal le lete hain। apna bachaav karne ke liye aisa kehna koi jhooth nahin hai। baba mana nahin karte hain। aise bachchon ki talaash mein baba hai, jo bilkul meethe hon, koi puraana svabhaav nahin hona chaahiye। serviceable, vaphaadaar, pharmaanvardaar hon। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is maayaavi duniya mein har baat mein duhkh hai isliye is puraani duniya mein koi bhi aash nahin rakhni hai। bhal maaya ke toofaan aayen lekin kabhi bhi kul-kalankit nahin banna hai।

2) khaan-paan ki bahut parhej rakhni hai, party aadi mein jaate bahut yukti se chalna hai।

vardaan:- buraai mein bhi buraai ko na dekh achchhaai ka paath padhne vaale anubhvi moorta bhav

chaahe saari baat buri ho lekin usmein bhi ek do achchhaai zaroor hoti hain। paath padhaane ki achchhaai to har baat mein samaai hui hai hi kyonki har baat anubhvi banaane ke nimitta banti hai। dheeraj ka paath padha deti hai। doosra aavesh kar raha hai aur aap us samay dheeraj va sahansheelta ka paath padh rahe ho, isliye kehte hain jo ho raha hai woh achha aur jo hona hai woh aur achha। achchhaai uthaane ki sirf buddhi chaahiye। buraai ko na dekh achchhaai utha lo to number one ban jaayenge।

slogan:- sada prasannachit rehna hai to silence ki shakti se buraai ko achchhaai mein parivartan karo।