Murli du jour du lundi 19 septembre 2022

19-09-2022 praatahmurli om shanti "baapdaada"' madhuban

“meethe bachche - tum phir se raajayog seekh rahe ho, tumhein bhagwan phir se padhaate hain, tum raajaai ke liye yeh padhaai padh rahe ho, apni em-object sada yaad rakho''

prashn:- abhi tum bachche kaun si taiyaari bahut khushi se kar rahe ho?

uttar:- tum apna yeh puraana shareer chhod baap ke paas jaane ki taiyaari bahut khushi-khushi se kar rahe ho। ek baap ki hi yaad mein shareer chhoote, ghutka na khaana pade - aisi practice yahaan hi karni hai। tumhaari abhi student life beparvaah life hai, isliye ghutka proof banna hai।

geet:- raat ke raahi…

om shanti। roohaani bachche padh rahe hain। student jab padhte hain to yeh jaante hain ki ham kya padhte hain। padhaane vaale ko bhi jaante hain aur em-object uddeshya aur praapti kya hai, woh bhi achhi tarah se jaante hain। abhi tum sab jaante ho ki ham manushya se devta ban rahe hain। is samay ham brahma mukh vanshaavli brahman bane hain। tum kya padhte ho? raajayog। yeh bhi jaante ho ham phir se raajayog seekh rahe hain aur padhne vaale kabhi aise nahin kahenge ki ham phir se padh rahe hain। yahaan tum bachchon ko nishchay hai ki ham phir se raajayog seekh rahe hain। jo 5 hajaar varsha pahle bhi seekha tha। yeh gyaan sirf tumhaare hi paas hai। bhagwan phir se aakar padhaate hain। yeh koi kam baat thode hi hai। yeh bhi bachchon ko pata hai ki bhagwan ek hai aur bhagat anek hain। isse siddha hota hai - baap ek aur bachche anek hote hain। baap ko creator to sab maanenge। rachna ko rachta dvaara varsa milta hai। raat ko prashn poochha tha na - baap ko kaise pahchaana jaae? baap khud kehte hain hamne tumko bachcha banaaya hai tab to saamne baithe ho। ham tumko phir se manushya se devta bana raha hoon, raajayog sikha raha hoon - jisse tum so lakshmi-naaraayan banenge। em-object buddhi mein rahni chaahiye na। tumhaari buddhi mein hai lakshmi-naaraayan ka raajya tha to ek hi raajya tha। saare vishwa par raajya tha। to tum bachchon ko chitron par baith samjhaana hai। ham kya padh rahe hain। yeh hai em-object, school mein bachche padhte hain to maat-pita bhi jaante hain kya padh raha hai। yahaan tum phir se raajaai ke liye padh rahe ho। to tumko mitra sambandhiyon ko bhi batlaana pade। ham is geeta paathshaala mein raajayog seekhte hain, jisse ham raajaaon ka raaja banenge। is paathshaala mein boodhe javaan bachche sab padhte hain। yeh wonder hai na। paathshaala mein to aisa hota nahin isliye isko satsang bhi kaha jaata hai। satsang mein to sab jaate hain। parantu woh aise nahin kahenge ki ham raajayog seekhne jaate hain। unko koi bhagwan to nahin padhaate hain। tumko to bhagwan khud padha rahe hain। yeh chitra to ghar-ghar mein hona chaahiye। maata-pita, mitra sambandhi jo bhi aayen unko samjhaana hai ki ham yeh padh rahe hain। yeh padhaai to bahut sahaj hai। naam hi hai sahaj gyaan, sahaj raajayog। raaja janak ko bhi second mein gyaan mila aur jeevanmukta hua। manushya bhi kehte hain hamko janak misal gyaan chaahiye, jo ham grihastha mein rehte pa saken। yeh to bahut oonch padhaai hai। manushya se devta banna hai। devtaaon ki mahima kitni oonchi hai, sarvagun sampanna... yeh hai mrityulok। woh hai amarlok। patit duniya aasuri, paavan duniya hai daivi duniya। paavan duniya mein jaane liye pavitra banna hai। lakshmi-naaraayan paavan the na। abhi to woh hain nahin। yeh to patit raajya hai phir se paavan banna hai। lakshmi-naaraayan ka chitra bahut achha hai। lakshmi-naaraayan mein sabhi ka pyaar rehta hai, tab to bade-bade aaleeshaan mandir banaate hain। shreekrishna ka to chhota-chhota mandir banaate hain। jaise bachchon ka hota hai unko yeh pata hi nahin ki raadhe-krishna hi lakshmi-naaraayan bante hain। tum samjha sakte ho ki aaj se 5 hajaar varsha pahle in lakshmi-naaraayan ka raajya bhaarat mein tha aur koi ke chitra hain nahin। sooryavanshi dynasty mashhoor hai।

lakshmi-naaraayan aur seeta-raam ki dynasty thi phir dvaapar kaliyug hota hai। abhi kaliyug ka ant hai। ham phir se vahi raajayog seekh rahe hain। paanch hajaar varsha pahle raajayog seekh raajaai praapta ki thi। barobar woh sampoorn nirvikaari the। abhi patit duniya hai isliye parampita paramatma ko aana hota hai। gaate bhi hain patit-paavan aao, woh to niraakaar thahra na। shreekrishna to prince hai satayug ka। woh kaise aakar paavan banaayenge। to samjhaana pade ki saakaar ko bhagwan nahin kahenge। doosre dharma vaale paramatma ko niraakaar maante hain। vahi liberator, guide, blissful, god father, sarva ka duhkh harta sukh karta hai। baap jab duhkh harte hain to sukh bhi dete honge na। tum mitra sambandhiyon aadi ko samjha sakte ho। vahaan to ved shaastra anek manushya sunaate hain। yahaan to sab sunte hi ek se hain। baap kehte hain tum mere se hi suno। bhagvaanuvaach - zaroor kis tan mein aayega na। gaaya hua hai brahma dvaara brahman rache। ham brahmaakumaar kumaariyaan hain - 5 hajaar varsha pahle bhi sangam par brahma mukh kamal se brahman rache gaye, jo brahman phir devta bane the। abhi ham shoodra se brahman ban phir devta banenge। ham phir se raajayog seekh rahe hain। kalpa pahle bhi seekhe the। samjhenge yeh to bade nishchay se bolte hain। bhagvaanuvaach - main tumko phir se raajaaon ka raaja banaata hoon। akshar to barobar geeta mein hain। raajayog se hamne raajaai paai phir dvaapar mein raavanraajya shuru hua। abhi raavan raajya poora hota hai, ham phir se raajayog seekh rahe hain, aur paathshaalaaon mein aise nahin kehte hain ki ham phir se padh rahe hain। yeh to bachchon ki hi buddhi mein hai। kehte hain ki main phir se raajayog sikhaane aaya hoon। us samay mahaabhaarat ladaai lagi thi। paandav geeta sunte the।

tum ho roohaani pande। he roohaani bachche athva roohaani pande thak mat jaana। baap kehte hain na -geeta zaroor bhagwan hi sunaayenge na। hai bhi bhagvaanuvaach। tum jaante ho ham svarga ke sukh paane ke liye raajayog seekh rahe hain। bhagwan hai hi niraakaar। shiv jayanti manaate hain to zaroor janma lekar kuchh kiya hoga na। varsa diya hoga। barobar satayug mein sooryavanshi devta the। dynasty mein to bahut hote hain na। jaise Edward di first, second, third... unhon ki bhi dynasty chalti hai। yeh bhi aise hai। tum bachche chitron par achhi reeti samjha sakte ho। yeh (brahma) kehte hain - main thode hi bhagwan hoon। banaane vaala to doosra hoga na। main kahaan se seekha? agar hamaara manushya guru hota to guru se laakhon karodon seekhne vaale chaahiye। sirf yahi seekha kya? aur sab chele kahaan gaye? yahaan to hai hi bhagvaanuvaach। usne yeh raaz samjhaaya hai। yeh chitra kaise baith nikalvaaye hain। lakshmi-naaraayan bachpan mein raadhe-krishna the। geeta ka bhagwan kehte hain - main kalpa-kalpa, kalpa ke sangamayug par aata hoon। pralay ki to baat hi nahin। tum bhi kehte ho ham phir se devta ban rahe hain। shiv jayanti bhi gaai jaati hai। laakhon varsha to nahin hue। baap baith samjhaate hain in shaastron aadi mein koi saar nahin hai, yeh padhte-padhte tumhaari kala utarti gai hai। abhi to koi kala nahin rahi hai। baap kehte hain bhakti se koi bhi mere se mil nahin sakta। mujhe aana hi padta hai। tum kehte ho bhagwan kis na kis roop mein aayega। shreekrishna to hai hi satayug ka prince। shiv to hai niraakaar। woh zaroor kismen aaya hoga। patit-paavan hai to zaroor kaliyug ke ant mein aaya hoga। shreekrishna ko dvaapar mein le gaye hain, yeh to shobhta nahin। baap kehte hain main aata hi hoon sangam par। is boot (brahma) mein main fit hota hoon। drama mein koi change nahin ho sakti। rola kitna kar diya hai isliye prashn poochha jaata hai - geeta ka bhagwan kaun? yeh badi zaroori baat hai। isi mein saara rola hai। narka ko palatne aur svarga banaane vaala kaun? baap hi kar sakte hain। lakshmi-naaraayan kitne active the। baap kehte hain sirf mujhe yaad karo to is yog agni se vikarma vinaash ho jaayenge। sab to nahin samjhenge। koi ko achha lagta hai parantu pavitra rahne ki himmat nahin rakhte hain। abhi devi-devta dharma ka sapling lag raha hai। jo kalpa pahle brahman bane honge, vahi banenge। yeh kalam baap ke sivaae koi laga nahin sakta। devta dharma vaalon ko shoodra se brahma mukh vanshaavli brahman zaroor banna padega। nahin to devta kaise banenge। viraat roop par samjhaana hota hai। choti ke oopar shiv bhi dikhaate hain। unhonne shiv ko aur brahman varna ko uda diya hai। baaki devta, kshatriy... dikha diye hain। viraat roop dikhaate bhi vishnu ke roop mein hain। yeh knowledge samajhne ki hai। manushya kaise 84 janmon ka chakra lagaate hain, aur koi yeh knowledge nahin jaante hain। baap kehte hain yeh knowledge hi praayahlop ho jaati hai, parampara chal na sake। svadarshan chakra devtaaon ko nahin hai। yeh tumko hai। parantu tum to sampoorn bane nahin ho। to nishaani devtaaon ko de di hai। svadarshan chakra phiraate, kamal pushpa samaan bante, shankhadhvani karte tum devta ban jaayenge। shivbaaba brahma dvaara vishnupuri sthaapan kar rahe hain। yeh baaten koi ki buddhi mein nahin hain। bhagwan padhaate hain, ham vishwa ke maalik bante hain to kitna na harshit hona chaahiye। student life is di best। padhaai ki life beparvaah achhi rehti hai। peechhe to jaal mein phans jaate hain। kitne duhkh ki jaal hai। satayug mein koi baat nahin। khushi-khushi se shareer chhodte hain। ghut-ghut kar marna raavanraajya mein hota hai। tum khushi se taiyaari kar rahe ho ki ham kab baba ke paas jaayen, baithe hi isliye hain। puraana shareer chhod jaayen। phir 21 janma ghutka khaane ki baat nahin। is janma mein ghutka bilkul nahin khaana hai, patit se paavan ban rahe hain। bahut khushi mein rehna hai।

achha yahaan se sookshm vatan mein jaate hain, woh bhi achha hai। pharishta to banna hai। aadhaakalpa to ghutka khaate aaye hain। ab baba ke paas jaayen। khushi se taiyaari kar rahe hain। ghutka proof yahaan banna hai। aise sannyaasi bhi bahut hote hain jo baithe-baithe shareer chhod dete hain। sannaata ho jaata hai। samajhte hain ham brahm mein leen ho jaayenge। jaate to koi nahin - jab tak baap na aaye। shivbaaba ka bhandaara bharpoor hai। kehte hain na - jis bhandaare se khaaya, woh bhandaara bharpoor kaal kantak door... yahaan to akaale mrityu hoti rehti hai। patit-paavan shivbaaba ke bhandaare mein jo aata hai woh paavan ban jaata hai, isliye isko brahma bhojan kaha jaata hai। inki badi mahima hai। yog bhi bada achha chaahiye। yog mein rah bhojan banaao aur khaao to tumhaari bahut achhi unnati hogi। us bhojan mein bahut taakat aa jaati hai। yog mein rah tum bhojan khaao to bahut taakat milegi aur tandaroosta bhi rahenge। baba khud kehte hain ki ham baba ki yaad mein baithe jaise ki ham aur baba khaate hain, parantu phir bhi bhool jaata hoon। ek baap ki yaad mein hi shareer chhoote, koi ghutka nahin aaye, aisi practice karni chaahiye। baba ki yaad mein rahne se ek to shanti rahegi aur healthy banenge। bhojan pavitra ho jaayega। ant ka gaayan hai ateendriy sukh gop-gopiyon se poochho। jhaad mein samjhaani bahut achhi hai। trimoorti aur gola bhi zaroori hai। din-pratidin tumhaara naam bahut baala hota jaayega। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada tandaroosta rahne ke liye yaad mein rahkar bhojan banaana va khaana hai। bhojan karte samay smriti rahe - ham baba ke saath kha rahe hain to bhojan mein taakat bhar jaayegi।

2) devta banne ke liye shankhadhvani karni hai। svadarshan chakra phiraate rehna hai। kamal phool samaan pavitra jeevan banaana hai।

vardaan:- brahman janma ki visheshta ko natural nature banaane vaale sahaj purooshaarthi bhav

jaise kisi ka janma raaj parivaar mein ho, to baar-baar smriti mein laate hain ki main raajkumaar ya raajkumaari hoon, chaahe karma roochi ke kaaran saadhaaran bhi ho lekin apne janma ki visheshta ko nahin bhoolte। aise brahman janma hi vishesh janma hai, to janma bhi shreshtha, dharma bhi shreshtha aur karma bhi shreshtha hai। isi shreshthata arthaat visheshta ki jeevan smriti mein natural rahe to sahaj purooshaarthi ban jaayenge। vishesh jeevan vaali aatmaayen kabhi saadhaaran karma nahin kar sakti।

slogan:- double light rehna hai to vighna-vinaashak bano।