Murli du jour du mardi 11 octobre 2022

11-10-2022 praatahmurli om shanti "baapdaada"' madhuban

“meethe bachche - tum roohaani braahmanon ka aapas mein bahut-bahut pyaar hona chaahiye। aapas mein milkar raay nikaalo ki kaise sabhi ko satya baap ka parichay den''

prashn:- bachche kis nishchay ke aadhaar par apna bhaagya ooncha bana sakte hain?

uttar:- pahle jab buddhi mein yeh nishchay baithe ki yahaan padhaane vaala svayan paramatma hai, unse hi humein saubhaagya lena hai tab padhaai roz padhen aur apna saubhaagya ooncha bana saken। baap ki shreemat hai ki bachche tumhein kisi bhi haalat mein roz padhna hai। agar class mein nahin aa sakte ho to bhi ghar mein murli padho।

geet:- tu pyaar ka saagar hai…

om shanti। aatmaayen arthaat bachche jaan gaye hain ki ham aatma bindi misal hain। ek star muaaphik hain। lekin jo aatma hai woh self ke baap ko kaise realise kare। duniya mein koi bhi na apne ko, na baap ko jaante hain। tum jaante ho ham aatma bindi hain। kitni chhoti hain, baap bhi itna chhota hai। aatma se paramatma baap koi bada nahin hai। shareer to chhota bada hota hai। ab tum shivbaaba ki yaad mein baithe ho। bhal koi yeh jaan bhi jaaye ki aatma chhoti bindi hai, parantu usmein 84 janmon ka part hai, wonder hai na। jab tak aatma shareer ka aadhaar na leve tab tak part baja na sake। vaise paramatma bhi ham aatma ke muaaphik chhota hai parantu baap kyon kaha jaata hai? kyonki woh sada paavan hai। woh paramatma ko na jaante bhi unko baap kehte hain। jaise tum samajh se yaad karte ho vaise woh bhi yaad karte hain। itne jo bhagat hain, sabka bhagwan ek hai, jisko patit-paavan kaha jaata hai। to patit hain anek aur patit-paavan hai ek। saadhu santa mahaatma bhi bulaate hain, unko god father kehte hain। to sabka father thahra na। father ko patit se paavan banaane aana padta hai। paavan banne ka upaay vahi bataate hain kyonki aatma par paapon ka bojha chadha hua hai। ham sirf likh den ki bi holi, parantu aise slogan lagaane se koi phaayda nahin kyonki baahar vaale to samajh na saken। baaki tumko to samjhaaya hua hai, tumko slogan ki kya darkaar hai। iska arth hai pavitra bano, baba ko yaad karo। jab tak kisko samjhaaya nahin jaaye tab tak kuchh samajh na saken। yog mein rahne se pavitra ban sakte hain। kehte hain his-holiness। yeh pavitrata ka title hai। sannyaasiyon ko holi kehte hain kyonki vikaar mein nahin jaate hain। bhal woh pavitra rehte hain, brahm ko yaad karte hain parantu janma vikaariyon ke paas lena padta hai। tumko to kaha jaata hai pavitra raho aur shivbaaba ko yaad karo। sannyaasi apne ko karma sannyaasi kahlaate hain parantu karma ka sannyaas hota nahin। karma sannyaas tab ho jab deh na ho। deh bigar to ghar mein (paramdham mein) rehte hain। yahaan karma ka sannyaas kaise ho sakta hai? yeh kehna bhi jhooth hai। woh kehte jo grihasthi karma karte woh ham nahin karte। grihasthiyon ka karma to bahut hai - yagya, tap, teertha aadi karte hain। woh sannyaasi bhi karte hain। baaki farka sirf yeh hai ki woh kamaai kar khaana ghar mein pakaate hain, sannyaasi yeh nahin karte hain। woh maangakar khaate hain kyonki unka hathayog hai। hathayog se paramatma se mil nahin sakte। jab baap aaye tab to unse koi mil sake aur jab tak baap na aaye tab tak paavan duniya ki sthaapna bhi ho na sake। kitna samjhaate hain phir bhi samajhte nahin hain। bachche samaachaar likhte hain - itne-itne aaye। ab dekhen kaun-kaun apna saubhaagya lete hain। aate bahut hain parantu buddhi mein yeh nahin baithta ki inhen padhaane vaala parampita paramatma hai, hamko unse saubhaagya lena hai। baap register bhi dekhte hain। koi maas mein 8-10 din bhi aate hain, koi nahin bhi aate hain to woh nahin likhte। agar koi nahin aata hai to woh murli padhta hai va nahin। kisi bhi haalat mein roz padhna pade। jaise jap saaheb, sukhamni chhote-chhote banaate hain, samajhte hain kaise bhi padh saken। tum samajhte ho, us padhne se kya praapti hogi। kuchh nahin। karke thode samay ke liye buddhi theek hogi parantu baap se koi mil na sake। aur phir vikaaron mein phans jaate hain to phir unse koi praapti nahin। kehte hain vinaash kaale vipreet buddhi, barobar ab vinaash ka samay hai aur koi bhi paramatma ko nahin jaante। kehte bhi hain ham rachta aur rachna ke aadi madhya ant ko nahin jaante hain parantu drama ke aadi madhya ant ko jaanna chaahiye na। baap samjhaate hain satayug hai aadi, kaliyug hai ant। to teenon kaal, teenon lokon ko samajhna hai। teen lok hain sthool vatan, sookshm vatan... kehte hain - shaastra anaadi hain parantu baap samjhaate hain jab se raavan raajya shuru hota hai tab se shaastra bhi shuru hote hain, to dvaapar yug madhya ho gaya। aadhaakalpa satayug, aadhaakalpa kaliyug। aadha ka hisaab hai। woh madhya ko nahin jaan sakte kyonki kalpa ki aayu laakhon varsha kah dete hain। kehna chaahiye ki baap ko jaano, brahmaakumaar kumaari bano tab varsa milega। pahle koi aate hain to poochho - kahaan aaye ho? kehte hain bi.ke. ke paas। tum kaho vichaar karo - itne brahmaakumaar kumaariyaan hain, to brahma baap bhi hoga! kitne centres hain, dheron ke dher brahmaakumaar kumaariyaan hain। bhala itne bachche ek baap ko kaise ho sakte! likha hai prajaapita to itne brahmaakumaar kumaariyaan hain। aise-aise samjhaakar khada karna chaahiye। phir bhala khyaal karo prajaapita brahma kiska bachcha? itne bachche rachna to paramatma ka kaam hai na। to paramatma aata hoga na। gaaya hua hai tum maat-pita... to baap brahma ho gaya na। to paramatma brahma dvaara rachte hain, convert karte hain। adopt karte hain, varsa dene। paavan banaate hain kaise? yaad se। kehte hain sab dharmo ko bhool maamekam yaad karo। sabhi bulaate hain main knowledgeful, blissful, liberator, guide hoon। to sukhdhaam mein le jaata hoon। sukh kahaan hai? sukhdhaam mein। abhi baap le jaata hai shantidham mein, phir aate hain sukhdhaam mein। yeh baaten kaise yaad karen। roz-roz bolte rahen, auron ko samjhaate rahen to points buddhi mein aati rehti hain। jab kisko samjhaao to unse likha lena chaahiye। paramatma jo aatmaon ka pita hai - unki address likhaani chaahiye ki baap shiv hai to baap se varsa lenge। to mehnat karni chaahiye parantu mehnat kare kaun? isliye bachchon ko khud khada hokar phir auron ko bhi khada karna chaahiye aur service ke liye plans bana dene chaahiye। jaise military ke bade commanders aapas mein milte hain na। to yahaan bhi bachchon ko milna chaahiye parantu kya karen aapas mein milte nahin hain। vaastav mein tum braahmanon ka aapas mein bahut pyaar hona chaahiye। koi raay nikaalni chaahiye - kaise kisko samjhaayen।

dekho, lakshmi-naaraayan ke kitne mandir hain। to mandir banaane vaalon ko milna chaahiye ki aapne yeh mandir banaaya hai parantu jaante ho ki inhonne raajya kaise paaya? phir raajya kaise ganvaaya? shreekrishna ka chitra bahut achha hai, ismen 84 janmon ki kahaani badi achhi hai। sirf yeh chitra bada banaana chaahiye। baba kehte hain koi aaye to yukti se poochhna chaahiye ki aapne geeta padhi hai? phir bhala bataao geeta ka bhagwan kaun hai? to aise yukti se samjhaana chaahiye। kehte hain na tum maat-pita....to yeh brahma maata ho gai to unke saath sambandh rakhna chaahiye। agar unse pyaar gaya to khel khalaas, baap se varsa kaise paayenge। tumhaari ladaai puraane dushman se hai। koi ko maaloom nahin hai ki raavan se bhi koi yuddha hoti hai। kehte hain sach ki naanv dolegi lekin doobegi nahin। to hilti kitni hai। doosre satsangon mein to hilne ki baat hi nahin hai। yahaan to maaya se yuddha hai। jab tak baap ko nahin samjha hai tab tak bhal likhkar den, parantu tota kanthi vaala nahin bana hai। jangali tota aaya aur gaya। alpha ko samajhna hai। aise praja to dher hai, baaki raajaai ke liye koi khada nahin hota hai। batti par phida ho jaae so bada mushkil hota hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

raatri-class:-

tum bachchon ko baap ka direction mila hua hai ki bachche baap ko yaad karo। bachche kehte hain baba phursat nahin milti hai। ab phursat kahaan chali jaati hai? zaroor maaya tumhaara samay le leti hai। maaya bhi jabardasta teekhi hai, jo tumko baap ko yaad karne ki phursat nahin deti, tab to kehte ho baba saare din mein aadha ghanta, 20 minute yaad mein rahe, koi mushkil hi saare din mein do ghanta baap ko yaad karte honge। jo samajhte hain ham 2 ghanta yaad karte hain, woh haath uthaao। woh sthool yaad, puraani yaad to chalti aati hai। yeh to hai incorporeal, inko apna okh, kaan to hai nahin। bachchon ko kehte hain maamekam yaad karo। apne ko aatma samjho। to baba poochh rahe hain ki kitna ghanta yaad mein rehte ho? bachche khelne jaate hain to teacher ko yaad karte hain। ghar mein padhte hain to bhi teacher yaad rehta hai। to woh hai sthool yaad। ismen hai thodi difficulty, to baba poochhte hain ki apne ko aatma samajh baap ko 2 ghanta jo yaad kar sakte hain, woh haath uthaao। lajja nahin karo, accurate bataao।

tum yahaan baithte ho, baba murli chalaate hain to buddhi doosre taraph chali jaati hai na! itna buddhi mein dhaaran bhi nahin hota hai। jaise yahaan subah mein ek ghanta baba samjhaate hain, to kya woh ek ghanta baba ko yaad karte ho ya buddhi baahar mein chali jaati hai? barobar nambarvaar purushaartha anusaar buddhi kahaan na kahaan chali jaati hai। saara nahin sunte hain। agar saara baith karke sunen aur note karte rahen to baba kahega haan, inka yog theek hai। to sunte samay attention dena hai aur points poora likhna hai। agar link tootegi to point bhool jaayegi।

baap samjhaate hain bachche, heart fail ka maut bahut meetha maut hai। ismen tera mera phera kuchh bhi nahin hai। baithe-baithe yeh gira, behosh hua, khalaas। bas। phir hosh mein aaye hi nahin। yeh bahut achha maut hai। baaki manushya to rote peette hain aur tum to khush honge are vaah! inka maut bada sahaj hua, inko koi duhkh nahin hua। agar maut ho to aisa ho, nahin to dava, nurse yeh woh bahut hote hain na isliye jo baithe-baithe apni is puraani jutti ko chhod de, karmaateet avastha ho, aise hi shareer chhode, to vo sabse achha hai। tum aage chal karke dekhenge, anaayaas bombs chhootenge aur sab baithe-baithe chale jaayenge। chehra bhi harshit hoga। jaise kabhi-kabhi achhe maut hote hain to dekhne vaale kehte hain ki yeh to jaise jaagta hai, yeh to harshit hai, aise to koi kah nahin sakenge ki yeh mar gaya hai। aatma harshit hoke jaati hai na, to aatma mein agar harshitapna hoga to chehre par baahar se dikhaai to padega na! aatma koi khatma to nahin hoti hai, aatma shareer chhodti hai। to badi khushi se yeh shareer hansate hue chhod degi, isko kaha jaata hai - karmaateet avastha। vahi itna oonch gaaye jaate hain। tum bachchon ko aise hi jaana hai, shareer ki koi parvaah hi nahin hai, aur doosri koi cheez yaad nahin aave, isko kahenge sabse meetha, aapehi shareer chhodna isliye sarpa ka misaal bhi dete hain। satayug mein aise hota hai jo khushi se shareer chhodte hain। to practice yahaan se hogi, peechhe woh practice chalti rahegi।

tum bachche baap ko kitna pyaar se yaad karte ho। angreji mein kaha jaata hai most beloved, param priy, bahut meetha। logon ko to parmapriy, most beloved kah nahin sakte। baap kehte hain bachche main tumhaara baap bhi hoon, teacher bhi hoon, guru bhi hoon। tum kabhi teacher ko bhoolo to baap ko yaad kar sakte ho। baba guide hai, guide ko panda bhi kaha jaata hai। woh duhkh se liberate karne vaala, shantidham mein le jaane vaala hai, uske peechhe hai sukhdhaam। to tumko yeh gyaan ghaas milta hai phir isko vichaar saagar manthan karte raho। jaise gaay ka mukh chalta rehta hai। tumhaara mukh to chalne ki darkaar nahin hai, baaki andar mein sabkuchh yaad karna hai। jaise tum ho, aise ham hain। hamko to aur bhi kam ghante milte hain, kyonki hamaara buddhiyog baahar mein bahut jaata hai, kabhi koi ki chitthi aai, phalaane ki khitpit hai, yeh hai, woh hai.. to saara din us taraph buddhi jaati hai parantu shaayad bachchon se jaasti baba ko sahaj hai kyonki bagal mein (saath mein) rehta hai। jab baba bhojan khaane ke liye baithte hain to sochte hain, achha main baba ko yaad karta hoon, 2-3 minute yaad rehti hai phir bhool jaata hoon। yaad hava muaaphik ud jaati hai, bachche try karke dekho। sahaj hote bhi yaad mein time to lagta hai na। achha!

meethe-meethe sikeeldhe roohaani bachchon prati roohaani baap va daada ka dil va jaan, sik va prem se yaadapyaar aur good night। meethe meethe sikeeldhe roohaani bachchon prati roohaani baap ki namaste।

dhaarna ke liye mukhya saar:-

1) aapas mein bahut pyaar se rehna hai, milkar raay nikaalni hai ki kis yukti se har ek tak baap ka sandesh pahunchaayen।

2) yeh vinaash ka samay hai isliye ek baap se sachchi preet rakhni hai। yog se aatma ko paavan banaana hai।

vardaan:- svaraajya ke saath behad ki vairaagya vritti ko dhaaran karne vaale sachche-sachche raajarishi bhav

ek taraph raajya aur doosre taraph rishi arthaat behad ke vairaagi। aise raajarishi ka kahaan bhi - chaahe apne mein, chaahe vyakti mein, chaahe vastu mein..... lagaav nahin ho sakta kyonki svaraajya hai to man-buddhi-sanskaar sab apne vash mein hain aur vairaagya hai to puraani duniya mein sankalp maatra bhi lagaav ja nahin sakta, isliye svayan ko raajarishi samajhna arthaat raaja ke saath-saath behad ke vairaagi banna।

slogan:- samajhdaar woh hai jo sab aadhaar tootne ke pahle ek baap ko apna aadhaar bana le।