Murli du jour du lundi 10 octobre 2022

10-10-2022 praatahmurli om shanti "baapdaada"' madhuban

“meethe bachche - is naapaak (patit) bhaarat ko paak (paavan) banaane ki seva par rehna hai, vighnon ko mitaana hai, dilshikasta nahin hona hai''

prashn:- grihastha vyavhaar mein rehte kaun si smriti mein rehna bahut zaroori hai?

uttar:- grihastha vyavhaar mein rehte yeh smriti rahe ki ham godly student hain। student ko padhaai aur teacher sada yaad rehta hai। woh kabhi gaphlat mein apna time vesta nahin karte, unhein samay ka bahut kadar rehta hai।

prashn:- manushyon mein sabse bade te bada agyaan kaun sa hai?

uttar:- jiski pooja karte hain use hi naam roop se nyaara kah dete hain - yeh sabse bade te bada agyaan hai। pukaarte hain, mandir banaakar poojte hain, to bhala woh naam roop se nyaara kaise ho sakta hai। tumhein sabko paramatma ka satya parichay dena hai।

geet:- bachpan ke din bhula na dena…

om shanti। yeh behad ke baap ne bachchon ko shiksha di athva saavdhaan kiya jabki raam ke bane ho to is bachpan athva eeshvareey bachpan ko bhula nahin dena। aise na ho ki raam ke bachpan se hatkar raavan ki taraph chale jaayen। phir to bahut-bahut pachhtaana padega। yeh bhi samjhaaya hai ki agar mahaan te mahaan moorkha dekhna ho to yahaan dekho jo padhaai chhod dete hain। to tum samajh sakte ho ki unki kya gati hogi। yahaan ke mahaarthi hain gaj, unko graah roopi maaya kha leti hai। yeh baap sammukh baith samjhaate hain - meethe-meethe sikeeldhe bachche maaya badi dushtar hai। aisa na ho kahaan behad ke baap ka haath chhod do। yeh hai parampita pare te pare rahne vaala pita, patit-paavan। aise baap ka haath kabhi chhodna nahin। nahin to bahut rona padega। bahut achhe-achhe bachche jinko baba bade-bade title dete, woh bhi haath chhod dete hain। baba koi ko jaasti pyaar karte hain ki kahaan gir na jaaye। geet bhi gaaya hua hai। aisa na ho maaya tumko ghaseet le phir bahut pachhtaana padega। vaastav mein sachchi-sachchi yuddha tumhaari hai, tum maaya par jeet paate ho।

abhi tum naapaak se paak bane ho। patit sthaan ko tum paavan sthaan banaate ho। paak sthaan to yahaan hai nahin। is samay saari duniya naapaak sthaan hai। paavan to hain devi-devtaayen। tum naapaak (patit) bhaarat ko paavan bana rahe ho। yeh jo pradarshani aadi karte ho, naapaak ko paak banaane। tum bhaarat ki sachchi seva karte ho na। haan vighnon ko bhi mitaana hota hai, ismen heartfail athva susta nahin hona hai। koi bhi haalat mein service zaroor karni hai, patiton ko paavan banaane ki। tumhaara dhandha hi yeh hai aur koi baaton se tumhaara tailuk nahin। dekhna hai hamne kitnon ko naapaak se paak banaaya hai। yeh bhaarat svarga tha, paavan duniya thi। is samay naapaak aur paak ka kisko bhi gyaan nahin hai। paak sthaan hai hi nai duniya, phir puraani hone se naapaak, patit tamopradhaan ban padte hain।

to roohaani baap baith roohaani bachchon ko sammukh samjhaate hain। ab tumhaari buddhi mein hai barobar ham pavitra sthaan sthaapan kar rahe hain। pavitra sthaan bhaarat tha, ab apvitra sthaan bana hai। makaan naya hai phir puraana zaroor banega। yeh samajh nai duniya mein nahin rehti। abhi tum bachchon ko samajh mili hai। bhal laakhon varsha kehte hain aakhir puraana to hoga na। puraana naam hi kaliyug ka hai। navayug aur puraane yug ko sirf tum jaante ho। abhi nav yug aa raha hai। ham phir se yeh knowledge baap dvaara le rahe hain, pavitra ban svaraajya paane ke liye। student kabhi padhaai aur teacher ko bhool sakte hain kya? tum bhi student ho, grihastha vyavhaar mein rehte yeh yaad rahe ki ham padh rahe hain। is padhaai mein time bahut lagta hai। beech mein koi gir padta hai, koi hara deta hai। mukh se kehte, likh bhi dete hain shivbaaba care of brahma। baap ko bade prem se patra likhte hain, ham jeev ki aatma parampita paramatma ko patra likhti hain। woh pukaar rahe hain he paramatma raksha karo, shanti do। sivaae baap ke koi shanti de na sake। baba ko to aana hi hai। bhakton ka rakshak bhi gaaya hua hai। jeevanmukti do, shanti do, mukta karo, ham jeete ji mukta hon। woh to satayug mein hote hain। yahaan to jeevanbandh hain। in baaton ko tum achhi tarah samajhte ho aur svayan baap samjha rahe hain, aur koi ki buddhi mein drama ka raaz nahin hai। teenon kaalon, aadi-madhya-ant ko koi nahin jaante hain। tum sab kuchh jaante ho parantu ho saadhaaran, gupta, woh baahar mein jaakar jismaani drill karte hain, seekhte hain। tumhaari drill hai roohaani। koi ko pata hi nahin hai ki yeh koi warriors hain, ladaai karne vaale। mahaabhaarat ki ladaai dikhaate hain, woh kaise hui? mahaabhaarat ki ladaai bhagwan ne karaai hai, aise kehte hain। ab bhagwan hinsak yuddha kaise karaayega। bhagwan ne yuddha sikhlaai hai, raavan par jeet paane ki। samjhaate hain tum 16 kala sampoorn the। tum mool-vatan se ashareeri aaye phir yahaan chola dhaaran kar pahle satayug mein raajya kiya। smriti mein aata hai na? kehte hain haan baba, ab hamko smriti aai hai ki barobar ham daivi raajya ke maalik the। phir haraaya। ab ham yuddha ke maidaan mein khade hain। maaya par jeet zaroor paayenge। kaam chita par chadhne se manushya ka munh kaala ho jaata hai। kaala akshar kada hai isliye saanvara kaha jaata hai। krishna aur naaraayan ko saanvara rang dete hain, aisa koi manushya hota nahin। manushya to gore saanvare hote hain। iron aged ko saanvara kahenge। laukik baap bhi kehte hain tum kaala munh karke kul ko kalank lagaate ho। behad ka baap kehte hain tumne aasuri mat par chalkar daiveekul ko kalankit kiya hai, isliye tum saanvare ban gaye ho। poora saanvara banne mein aadhaakalpa lagta hai aur gora banne mein second। bachchon ko drama ke aadi madhya ant ki smriti aai hai aur dharma vaalon ko smriti nahin aa sakti। vismriti bhi tumko hui, smriti bhi tumko aai। tum daivi raajya sthaan ke maalik the। yahaan raajaayen dher the, isliye naam rakha hai raajasthaan। abhi yeh panchaayti raajya hai। abhi tum purooshaartha kar rahe ho - mahaaraani mahaaraaja banne ka। drama plan anusaar aise hi hua tha। svarga chakra lagaae narka banta hai। ab tum naapaak se paak sthaan mein jaakar raajya karne ka purooshaartha kar rahe ho। tumhaari padhaai simple hai। alpha be ko yaad karna hai। baba kehte hain maamekam yaad karo to tumhaare vikarma vinaash honge। raajaai ko yaad karo to raajaai milegi। woh log kehte hain kaho main bhains hoon, bhains hoon.. yeh baat to satya nahin hai। tum aatma kehti ho ham vishnu banenge, kaise banenge? kehte hain mujhe yaad karo aur vishnu-puri raajdhaani ko bhi yaad karo। pravritti maarga hone kaaran vishnu ka naam liya jaata hai। vahaan bhi lakshmi-naaraayan ke takhta pichhaadi vishnu ka chitra nishaani rehti hai। chitron mein bhi aise-aise banaate hain। baba ne raaz samjhaaya hai - vahaan ki aisi rasam-rivaaz hai phir woh lakshmi-naaraayan chakra lagaae brahma sarasvati va jagat pita, jagat amba bante hain। brahma ko kehte hain great-great grand father। shiv ko father kahenge। sabhi aatmaayen brothers hain। great-great grand father manushya bante hain। to ab deh-abhimaan nikaal aatma-abhimaani banna hai। aatma-abhimaani paramatma baap banaate hain। yahaan tumko double light hai, knowledge hai। aatma-abhimaani bhi bante ho phir baap ko bhi yaad karte ho kyonki varsa lena hai। devtaaon ne purushaartha kar past janma mein baap se varsa liya hai। unko yaad karne ki darkaar nahin। to bachchon ko nai-nai points buddhi mein dhaaran karni hai। yuktiyaan bahut milti rehti hain। pahle-pahle buddhi mein yeh baat bithaao ki oonche te ooncha kaun sa sthaan hai? nirvaandhaam। ham aatmaayen nirvaandhaam ke nivaasi hain। parampita paramatma hai oonche te oonch। unka oonch te oonch sthaan hai। oonche te ooncha naam hai। oonche te oonchi unki mahima hai। woh aaya bhi bhaarat mein hai, tab to yahaan yaadgaar bana hai na। jiska koi naam roop hi nahin to woh cheez kahaan se aayegi jo unko poojenge। to yeh bhi bhool hai na। paramatma ko naamroop se nyaara kehna, yeh to agyaan ho gaya। shiv-raatri bhi bhaarat mein manaate hain। bhaarat hi praacheen satayug tha, ab nahin hai। to zaroor baap ne hi satayug ki sthaapna ki hogi। phir duhkh kaun deta hai? kab se shuru hota hai? yeh koi nahin jaante। baap baithkar samjhaate hain। ab woh 21 peedhi ka phir se tumko behad ka varsa dene aaya hoon। tumne kalpa-kalpa yeh purooshaartha kiya hai। behad sukh ka varsa, behad ke baap se liya hai, jabki yeh antim janma hai to kyon na pavitra ban bhavishya ke liye poora varsa lena chaahiye। bhakta bhagwan ko yaad karte hain to zaroor varsa paane ke liye। bhagwan hai hi patit-paavan, sadgati daata। nar se naaraayan banaane vaala aur koi to bana na sake। satayug mein phat se lakshmi-naaraayan ka raajya hota hai to zaroor kahenge pichhle janma mein purushaartha kiya hai isliye baap ab tumko purushaartha kara rahe hain, bhavishya mein aisa pad paane liye। patit duniya ki ant mein hi aakarke paavan banaayenge na। woh hai viceless world। phir kalaayen kamti hoti jaati hain। ab hai vicious world।

baap kehte hain in 5 vikaaron ka daan do aur pavitra bano। yaad bhi karo aur pavitra bhi bano। bi holi, bi raajayogi। grihastha vyavhaar mein rehte ek shiv baba ko yaad karo aur kab kisko yaad kiya to vyabhichaari banen। bhakti maarga mein grihastha vyavhaar mein rehte bhi kab kisi ko, kab kisi ko yaad karte hain। to woh vyabhichaari yaad ho jaati hai aur phir woh pavitra bhi nahin rehte hain to baap kehte hain ki grihastha vyavhaar mein yaad mujh ek baap ko karo। yeh antim janma mere naam par kamal phool samaan pavitra ban sirf mujhe yaad karte raho। yeh ek janma mere madadgaar bano, jo madad karenge vahi phal paayenge। tum ho gaye eeshvareey khudaai khidmatgaar। baap bhaarat ki khud khidmat karte hain na। baap kehte hain bachche tumko laayak banna hai। gun bhi zaroor chaahiye। yahaan gunvaan banna hai। phir 21 janmon ke liye devta ban raajya karenge। baba ne samjhaaya hai krishna ka chitra bada achha hai। narka ko laat maarte hain, svarga haath mein hai। bhaarat mein hi yeh kaayda hai। koi marta hai to munh shahar ki taraph, pair shamshaan taraph karte hain। phir jab shamshaan ke najdeek aate hain to munh phiraakar shamshaan taraph karte hain। abhi to tum jeete ji jaane ke liye taiyaar ho to tumhaara munh nai duniya taraph hona chaahiye। sukhdhaam jaana hai via shantidham। yeh hai behad ki baat। puraani duniya ko laat maar rahe ho, nai duniya mein ja rahe ho isliye duhkhadhaam ko bhoolna padta hai। sukhdhaam aur shantidham ko yaad karna hai। duhkhadhaam mein bhal tum rahe pade ho, parantu yaad unko karo। avyabhichaari yog chaahiye, ek baap doosra na koi। samjhaani to bahut sahaj achhi milti hai। arjun bahut shaastra padha hua tha, to unko kaha yeh sab bhool jaao aur padhaane vaalon ko bhi bhool jaao। baap bhi aise kehte hain। abhi jo kuchh suna hai sab bhoolo। ham tumko sabhi shaastron ka saar samjhaate hain। sachkhanda ka maalik banaate hain। woh tumko jhoothkhanda ka maalik banaate hain। baap kehte hain ab judge karo ki ham right hain ya woh tumhaare chaache, maame va shaastravaadi right hain? woh ladaai hai had ki, tumhaari hai behad ki। jisse tum behad ki raajaai lete ho। baap kehte hain yeh vikaar ab daan mein de do। abhi purushaartha nahin karenge to bahut-bahut pachhtaayenge isliye gaphlat chhodo, service mein lag jaao, kalyaankaari bano। is kaliyug mein mahaan duhkh hai। ab to ajun bahut duhkh ke pahaad girne vaale hain phir satayug mein sone ke pahaad khade ho jaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) alpha aur be ko yaad karne ki simple padhaai padhni aur padhaani hai। avyabhichaari yaad mein rehna hai। is jhoothkhanda ko buddhi se bhool jaana hai।

2) khudaai khidmatgaar ban bhaarat ko naapaak se paak banaane ki seva karni hai। baap ka poora-poora madadgaar banna hai।

vardaan:- har ghadi ko antim ghadi samajh sada ever ready rahne vaale teevra purooshaarthi bhav

jo bachche teevra purooshaarthi hain woh har ghadi ko antim ghadi samajhkar ever ready rehte hain। aisa nahin sochte ki abhi to vinaash hone mein kuchh time lagega, phir taiyaar ho jaayenge। us antim ghadi ko dekhne ke bajaae yahi socho ki apni antim ghadi ka koi bharosa nahin isliye ever ready, apni sthiti sada upraam rahe। sabse nyaare aur baap ke pyaare, nashtomoha। sada nirmohi aur nirvikalp, niravyartha, vyartha bhi na ho tab kahenge ever ready।

slogan:- naajuk samay par paas with honour banna hai to adjust hone ki shakti ko badhaao।