Murli du jour du mardi 24 janvier 2023

24-01-2023 praatahmurli om shanti "baapdaada"' madhuban

“meethe bachche - yahi sangamayug hai jab aatma aur paramatma ka sangam (mel) hota hai, satguru ek hi baar aakar bachchon ko satya gyaan de, satya bolna sikhaate hain''

prashn:- kin bachchon ki avastha bahut first class rehti hai?

uttar:- jinki buddhi mein rehta yeh sab kuchh baba ka hai। har kadam shreemat lene vaale, poora tyaag karne vaale bachchon ki avastha bahut first class rehti hai। yaatra lambi hai isliye oonche baap ki oonchi mat lete rehna hai।

prashn:- murli sunte samay apaar sukh kin bachchon ko bhaasta hai?

uttar:- jo samajhte hain ham shivbaaba ki murli sun rahe hain। yeh murli shivbaaba ne brahma tan se sunaai hai। most beloved baba humein sada sukhi manushya se devta banaane ke liye yeh suna rahe hain। murli sunte yeh smriti rahe to sukh bhaasega।

geet:- preetam on milo…

om shanti। yeh duhkhiya jiya to duhkhadhaam mein hi hota hai। sukhi jeev aatmaayen sukhdhaam mein hoti hain। sabhi bhakton ka preetam ek hai, jisko hi yaad kiya jaata hai। unko preetam kaha jaata hai। yaad karte hain, jab duhkh hota hai। yeh kaun baith samjhaate hain? sachcha-sachcha preetam। sachcha baap, sachcha teacher, sachcha satguru... sabhi ka preetam woh ek hai। parantu preetam aata kab hai, yeh koi nahin jaante hain। preetam khud aakar apne bhakton ko, apne bachchon ko bataate hain ki main aata hi hoon sirf sangamayug par ek baar। mera aana aur jaana uska jo beech hai usko sangam kaha jaata hai। aur sabhi aatmaayen to bahut baari janma-maran mein aati hain, main ek hi baar aata hoon। main satguru bhi ek hi hoon। baaki guru to anek hain। unhon ko satguru nahin kahenge kyonki woh koi satya nahin bolte, woh sat paramatma ko jaante hi nahin। jo sat ko jaan jaate hain woh hamesha satya bolte hain। woh satguru hai hi sat bolne vaala sachcha satguru। sachcha baap, sachcha shikshak khud aakar bataate hain ki main sangamayug par aata hoon। meri aayu itni hi hai, jitna samay main aata hoon। patiton ko paavan banaakar hi jaata hoon। jab se mera janma hua, tab se main sahaj raajayog sikhaana aarambha karta hoon phir jab sikhaakar poora karta hoon to patit duniya vinaash ko paati hai, aur main chala jaata hoon। bas main itna hi samay aata hoon। shaastron mein to koi time hai nahin। shivbaaba kab janma lete hain, kitna din bhaarat mein rehte hain, yeh baap svayan hi baith bataate hain ki main aata hi hoon sangam par। sangamayug ki aadi, sangamayug ka ant goya mere aane ki aadi jaane ki ant। baaki madhya mein baith main raajayog sikhaata hoon। baap khud hi baith bataate hain ki main inki hi vaanaprastha avastha mein aata hoon - paraaye desh aur paraaye tan mein, to mehmaan hua na। main is raavan ki duniya mein mehmaan thahra। is sangamayug ki mahima badi bhaari jabardasta hai। baap aate hi hain raavan raajya ka vinaash kar raamraajya ki sthaapna karne। shaastron mein danta kathaayen bahut likh di hain। raavan ko jalaate aate hain। saari srishti is samay jaise lanka hai। sirf Ceylon ko lanka nahin kaha jaata। yeh saari srishti raavan ke rahne ka sthaan hai va shokvaatika hai। sabhi duhkhi hain। baap kehte hain main isko ashok-vaatika athva heaven banaane aata hoon। heaven mein sabhi dharma to hote nahin। vahaan tha ek hi dharma, jo abhi nahin hai। ab phir se devta banaane raajayog sikhla raha hoon। sabhi to nahin seekhenge। main bhaarat mein hi aata hoon। bhaarat mein hi svarga hota hai। Christian log bhi heaven ko maante hain। kehte hain left for heavenly abode। god father ke paas gaya। baaki heaven ko thode hi samajhte hain। heaven alag cheez hai। to baap samjhaate hain ki main kab aur kaise aata hoon। aakar trikaaldarshi banaata hoon। trikaaldarshi aur koi hota nahin। srishti ke aadi-madhya-ant ko main hi jaanta hoon। ab kaliyug ka vinaash hona hai। aasaar bhi dekhne mein aa rahe hain। samay vahi sangam ka hai। accurate time kuchh nahin kah sakte। baaki haan raajdhaani poori sthaapan ho jaayegi, bachche karmaateet avastha ko paayenge to gyaan khatma ho jaayega। ladaai aarambha ho jaayegi। main bhi apna paavan banaane ka part poora karke jaaoonga। devi-devta dharma sthaapan karna - yeh mera hi part hai। bhaaratvaasi yeh kuchh bhi nahin jaante। ab shivraatri manaate hain to zaroor shivbaaba ne koi kaarya kiya hoga। unhonne phir krishna ka naam daal diya hai। yeh to common bhool dekhne mein aati hai। shiv puraan aadi kisi shaastra mein bhi yeh nahin hai ki shivbaaba aakar raajayog sikhaate hain। vaastav mein harek dharma ka ek-ek shaastra hai। devta dharma ka bhi ek shaastra hona chaahiye। parantu uska rachayita kaun! ismen hi moonjh gaye hain।

baap samjhaate hain mujhe zaroor brahma dvaara brahman dharma rachna pade। brahma mukh vanshaavli brahmaakumaar kumaariyaan thahre। bahuton ke naam badli hue, unse bahut bhaaganti ho gaye। saath mein replace bhi hote hain। baaki dekha gaya naam se koi phaayda nahin। woh to bhool bhi jaate hain। vaastav mein tumko yog lagaana hai baap se। naam shareer ka milta hai। aatma ka to naam hai nahin। aatma 84 janma leti hai। har janma mein naam roop desh kaal sab badal jaata hai। drama mein koi ko bhi jo ek baari part mila hua hai, usi roop mein phir kabhi part baja na sake। vahi part phir 5 hajaar varsha ke baad bajaayegi। aise nahin krishna usi naam roop se phir koi aa sakta hai। nahin। yeh to jaante hain aatma ek shareer chhod doosra leti hai to feature aadi ek na mile doosre se। 5 tatvon ke anusaar features badalte jaate hain। kitne features hain। parantu yeh sab pahle se hi drama mein noondh hai। naya kuchh nahin banta hai। ab shivraatri manaai jaati hai। zaroor shiv aaya hai। vahi saari duniya ka preetam hai। lakshmi-naaraayan va raadhe krishna va brahma vishnu aadi koi preetam nahin hain। god father hi preetam hai। baap to zaroor varsa dete hain, isliye baap pyaara lagta hai। baap kehte hain mujhe yaad karo kyonki mere se tumko varsa paana hai। bachche jaante hain is padhaai anusaar jaakar sooryavanshi devta va chandravanshi kshatriy banenge। vaastav mein sabhi bhaaratvaasiyon ka dharma ek hona chaahiye। parantu devta dharma naam badal hindu naam rakh diya hai kyonki woh daivi gun nahin hain। ab baap baith dhaaran karaate hain। kehte hain apne ko aatma samajh ashareeri ho jaao। tum koi paramatma nahin ho। paramatma to ek shiv hai। woh sabhi ka preetam ek hi baar sangamayug par aate hain। yeh sangamayug bahut chhota hai। sabhi dharmon ka vinaash hoga। brahman kul bhi vaapis jaayega kyonki unhon ko phir daivi kul mein transfer hona hai। vaastav mein yeh padhaai hai। sirf bhent ki jaati hai। woh vishay vikaar hain jahar। yeh gyaan hai amrit। yeh to manushya ko devta banaane ki paathshaala hai। aatma mein jo khaad padi hai, ekdam mulamma ban gai hai। usko baap aakar heere jaisa banaate hain। shiv raatri kehte hain। raatri mein shiv aaya। parantu kaise aaya, kiske garbha mein aaya? ya kis shareer mein pravesh kiya? garbha mein to aate nahin hain। unko shareer ka loan lena padta hai। woh zaroor aakarke narka ko svarga banaayenge। parantu kab aur kaise aate hain, yeh kisko pata nahin hai। shaastra to bahut padhte hain parantu mukti-jeevanmukti to kisko milti nahin hai aur hi tamopradhaan ban gaye hain। so to sabhi ko zaroor banna hai। sabhi manushyon ko stage par zaroor haazir hona hai। baap aate hi ant mein hain। unki hi sab mahima gaate hain ki tumhari gati mat tum hi jaano। tumhaare mein kya gyaan hai, kaise tum sadgati karte ho so to tum hi jaano। to woh shreemat dene aayega to zaroor na! parantu kaise aate hain, kis shareer mein aate hain। woh koi jaante nahin। khud kehte hain saadhaaran tan mein mujhe aana hai। mujhe brahma naam bhi zaroor rakhna pade। nahin to brahman kaise paida hon! brahma kahaan se aaye? oopar se to nahin aayega! woh hai sookshmavtanvaasi avyakt, sampoorn brahma। yahaan to zaroor vyakta mein aakar rachna rachni pade। ham anubhav se bata sakte hain। itna samay aate aur jaate hain। baap kehte hain main bhi drama mein baandha hua hoon, aur mera part bhi sirf ek baar aane ka hai। bhal duniya mein upadrav bahut hote rehte hain। us samay kitna eeshvar ko pukaarte hain। parantu mujhe to apne samay par hi aana hai aur aata bhi hoon vaanaprastha avastha mein। yeh gyaan to bada sahaj hai। parantu avastha jamaane mein mehnat hai, isliye kahenge manzil badi oonchi hai। baap knowledgeful hai to zaroor usne bachchon ko knowledge di hai tab to unka gaayan hai - tumhari gat mat tum hi jaano।

baap kehte hain mere paas jo sukh-shanti ka khajaana hai woh bachchon ko hi aakar deta hoon। yeh jo maataaon par atyaachaar aadi hote hain, yeh bhi drama mein noondh hain, tab to paap ka ghada bharega। kalpa-kalpa aise hi repeat hota hai। yeh baaten bhi tum abhi jaante ho phir bhool jaayenge। yeh gyaan satayug mein hota nahin। agar hota to parampara chalta। vahaan to praalabdha hai jo abhi ke purushaartha se paate hain। yahaan ke purushaartha vaali aatmaayen vahaan hoti hain, doosri aatmaayen vahaan hoti nahin, jinko gyaan ki darkaar rahe। yeh bhi jaante hain koi virla niklega। bahut achha-achha bhi karenge। samjho vilaayat vaala koi bada aadmi nikalta hai, samajhta hai। parantu kahaan bhatthi mein rahenge, kya samjhenge! kahenge baat to theek hai parantu pavitra nahin rah sakte, are itne sab pavitra rehte hain। shaadi kar ikatthe rahkar bhi pavitra rehte hain to unhon ko inaam bhi bahut milta hai। yeh bhi race hai। us race mein first number jaane se 4-5 laakh milenge। yahaan to 21 janmon ke liye poori raajaai milti hai। kam baat hai! yeh murli to sab bachchon ke paas jaayegi। tape mein bhi sunenge। kahenge shivbaaba brahma tan se murli suna rahe hain athva bachchiyaan sunaayengi to kahengi shivbaaba ki murli sunaate hain to buddhi ekdam vahaan jaani chaahiye। woh sukh andar mein bhaasna chaahiye। most beloved baba hamko sada sukhi manushya se devta banaate hain, to unki yaad bahut rahni chaahiye। parantu maaya yaad ko thaharne nahin deti। tyaag bhi poora chaahiye। yeh sab kuchh baba ka hai, yeh avastha first-class rahni chaahiye। bahut bachche hain jo shreemat lete rehte hain। shreemat mein zaroor kalyaan hi hoga। mat bhi oonchi hai, yaatra bhi lambi hai phir tum is mrityulok mein nahin aayenge। satayug hai hi amarlok।

us din baba ne bahut achhi reeti samjhaaya ki vahaan tum marte nahin ho। khushi se puraana chola badal naya lete ho। sarpa ka misaal tumhaare liye hai। bhramri ka bhi tumhaare oopar misaal hai। kachhue ka bhi tumhaara misaal hai। sannyaasiyon ne to kaapi ki hai। bhramri ka misaal achha hai। vishta ke keede ko gyaan ki bhoon-bhoon kar paristaani pareezaada banaate ho। abhi purushaartha achhi tarah karna hai। oonch pad athva achha number lena hai to mehnat bhi karni hai। bhal dhandha aadi bhi karo woh time chhoot hai। phir bhi time bahut milta hai। apna yog ka chart dekhna chaahiye kyonki maaya bahut vighna daalti hai।

baba bachchon ko baar-baar samjhaate hain meethe bachche, bhoole-chooke bhi aise most beloved baap va saajan ko phaarakti shal (kabhi) koi na deve, itna mahaamoorkha koi na bane। parantu maaya bana deti hai। ab aage chalkar tum dekhenge jo kurbaan jaate the, bahut achhi service karte the unhon ka bhi maaya kya-kya haal kar deti hai kyonki shreemat chhod dete hain isliye baba kehte hain aisa bade te bada mahaamoorkha nahin banna। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap dvaara jo sukh shanti ka khajaana mila hai woh sabko dena hai। gyaan se apni avastha jamaane ki mehnat karni hai।

2) daivi gun dhaaran karne ke liye dehbhaan ko bhool apne ko aatma samajh ashareeri ban ek preetam ko yaad karna hai।

vardaan:- visheshta ke beej dvaara santushtata roopi phal praapta karne vaali vishesh aatma bhav

is vishesh yug mein visheshta ke beej ka sabse shreshtha phal hai “santushtata''। santushta rehna aur sarva ko santushta karna - yahi vishesh aatma ki nishaani hai, isliye visheshtaaon ke beej athva vardaan ko sarva shaktiyon ke jal se seencho to beej phaldaayak ho jaayega। nahin to vistaar hua vriksha bhi samay prati samay aaye hue toofaan mein hilte-hilte toot jaata hai arthaat aage badhne ka umang, utsaah, khushi va roohaani nasha nahin rehta। to vidhipoorvak shaktishaali beej ko phaldaayak banaao।

slogan:- anubhootiyon ka prasaad baantakar asmartha ko samartha bana dena - yahi sabse bada punya hai।