Murli du jour du jeudi 9 février 2023

09-02-2023 praatahmurli om shanti "baapdaada"' madhuban

“meethe bachche - is puraani duniya mein aur koi bhi aash na rakh bhavishya oonch pad paane ke liye sirf nashtomoha bano, baap ko yaad karo aur pavitra raho''

prashn:- baap kaun sa seedha saral raasta bataate hain, kis baat se baap ka tailuk nahin?

uttar:- baap bachchon ko shantidham, sukhdhaam chalne ka seedha-saada raasta bataate - bachche sirf baap ko yaad karo aur pavitra raho। baaki tumhaare saamne koi vipda aati, duhkh va beemaari aati, devaala maarte… yeh sab tumhaare apne hi karmo ka hisaab hai, inse baap ka koi tailuk nahin। baap yuktiyaan bataate hain, karmabandhan se chhootna harek bachche ka kaam hai।

prashn:- koi-koi bachche kis ek kaaran se service laayak nahin bante?

uttar:- familiarity ka halka nasha hai, maaya ka andar keeda laga hai - is kaaran service laayak nahin ban sakte।

geet:- laut gaya gam ka jamaana...

om shanti। khushi aur gam। abhi to hai raavanraajya। manushya to jaante nahin ki raavan raajya kisko kaha jaata hai। baap aakar bachchon ko samjhaate hain ki gam kab hota hai aur khushi kab hoti hai। is raavan raajya mein gam bhi hai to khushi bhi hai। abhi-abhi khushi, abhi-abhi gam। bachcha janma to khushi, mar gaya to gam। sannyaasi bhi kehte hain - yahaan ka sukh kaag vishta ke samaan hai। to zaroor kahenge yeh gam ki duniya hai। parantu unhon ko yeh pata hi nahin ki sada sukh, jahaan gam ka naam nishaan bhi na ho, woh hota hi hai satayug mein। yeh tum bachche abhi jaante ho ki barobar abhi raat hai। raat duhkh ki hoti hai, isko raavan ki raat kaha jaata hai। raavan ke aane se bhakti aarambha hoti hai। vikaar aarambha ho jaate hain। abhi tum bachche samajhte ho ki ham sada khushi mein rahne ka abhi purushaartha kar rahe hain। baap samjha rahe hain ki bachche bhavishya oonch pad paane ka purushaartha karo aur koi bhi aash nahin rakhni hai। bachchon ko to yeh pata hi nahin hai ki behad ke baap se kya milta hai। baap hi aakar bataate hain। duniya yeh nahin jaanti ki paramatma se kya milta hai। samajhte hain duhkh-sukh vahi deta hai। baap kehte hain main to sada sukh dene aata hoon। tum sirf shreemat par chalo। main to tumko shantidham aur sukhdhaam ka raasta bataane aaya hoon। us raaste par chalna to tumhaara kaam hai aur kya jhanjhat saamne aata hai? jhanjhaton mein to saari duniya hai। baap kehte hain main to seedha-saada raasta bataata hoon। woh to bahut sahaj hai। baaki jo vipdaayen jhanjhat aate hain, duhkh aata hai, beemaari aadi hoti hai, devaala maarte hain.. yeh sab hai tumhaare karmo ka hisaab। so har ek ko bhogna hi hai, inse hamaara koi tailuk nahin hai। is samay bhi koi aisa paap karte hain to duhkh bhogna padta hai। main to tumko raasta bataane aaya hoon। mera pharmaan hai mujh baap ko yaad karo kyonki vaapas jaana hai। baaki ladaai-jhagde mein to saari aayu ganvaai। main to seedha raasta bataata hoon ki mujhe yaad karo aur pavitra raho। kaise raho, yeh bhi yuktiyaan bataate hain। baaki maatha maarna purushaartha karna to tumhaara kaam hai। yeh sab karmabandhan tum bachchon ka hai। baap kehte hain grihastha vyavhaar mein rah pavitra rehna hai। baap jaante hain stri ka pati mein, bachchon mein moh bahut rehta hai, unse chhutkaara paana, nashtomoha banna... yeh to bachchon ka kaam hai।

baap to sirf do baaten kehte hain - agar poora varsa lena hai to ek pavitra zaroor banna hai aur doosra yog mein rehna hai। koi baat mein tumse agar koi ladte hain to yeh hua tumhaara karmo ka hisaab-kitaab। baaki tum pavitra raho uske liye government bhi rok nahin sakti। baap to raasta bataate hain ki tumko gharbaar nahin chhodna hai। grihastha vyavhaar mein rehte pavitra rehna hai aur yog mein rehna hai। manushya samajhte hain pavitra rehna bada mushkil hai kyonki aisi shiksha kisi ne kabhi nahin di hai। bhal kitne bhi brahmachaari rehte hain parantu yahaan to kaayda hai grihastha vyavhaar mein rahkar pavitra rehna hai। kumaari to pavitra hi hai, uske liye to bahut sahaj hai, pavitra hi raho। grihastha mein na jaao। ismen sirf himmat chaahiye। tum kah sakti ho ki ham bhaarat ko svarga banaane ke liye pavitra rehna chaahte hain, ismen bhaarat ka hi kalyaan hai। pavitrata ka varsa hamko mil jaayega। yeh hai varsa lene ki baat। satayug mein thi hi pavitra duniya। sangam par jo pavitra bante hain vahi pavitra duniya ke maalik banenge। ismen saari duniya ka to prashn nahin hai ki sab kaise pavitra banenge। abhi sabki kayaamat ka samay hai। ab sabhi ko hisaab-kitaab chuktu kar vaapis jaana hai। sab to aakar gyaan lenge nahin। jo sahaj raajayog seekhenge woh varsa paayenge। saari duniya to kya saara bhaarat bhi yeh gyaan sun dhaaran nahin kar sakta hai। baaki koi jhagda hai woh to tum bachchon ko mitaana hai yogbal se। maar unhein khaani padti hai jinhon ka kuchh mamatva hai, nashtomoha nahin bane hain, woh taakat nahin hai। baba ke paas samaachaar aaya ki ek gopika ne bahut aansu bahaaye। parantu rone se kya hoga? baap ne yuktiyaan to bahut bataai hai। pati ko bolo ham pavitra rahne chaahti hain aur baaki sab service karne ke liye taiyaar hain। yukti se apne ko chhuda sakti hain। parantu pahle apni dil ka mamatva tootna chaahiye। maataaon ka pati aur bachchon mein bahut moh hota hai। phir kehti hai koi chhudaave। parantu ismen chillaane va rone ki koi darkaar nahin। yeh samajh ki baat hai। samjho koi achhe aadmi ki stri hai, bachche bhi first class hain, baba to kahenge grihastha vyavhaar mein rahkar pavitra rahkar dikhaao, is antim janma ke liye। to pati ko samjhaakar vash karna pade। nahin to javaab dena pade। parantu jab nashtomoha ban sake tab। koi chaahe to ek second mein nashtomoha ho jaae, nahin to jeevan bhar bhi na ho sake। bahuton ko chhodne baad bhi mamatva nahin mitta phir rag jaati rehti hai, to woh avastha nahin rehti, isliye baap kehte hain pahle nashtomoha ho jaao। baaki sirf karma kootte rahenge to baap kya karenge? sabke liye raasta ek hi hai pavitra zaroor banna hai। agar pavitra nahin rahne dete to apne paanv par khadi ho koi na koi service mein lag jaao। yahaan to saaph dil chaahiye। aise nahin, ghar chhodkar aaye phir brahman kul mein rah koi na koi se familiarity mein phansi rahe। aise bhi bahut hain jinko familiarity ka halka nasha rehta hai। unhon ki avastha nahin chadhti। service laayak nahin bante kyonki andar keeda laga hua hai। maaya chhodti nahin hai। likhte hain baba bahut maaya ke toofaan lagte hain। to zaroor halka nasha aata hoga। yahaan kamal phool samaan rehna hai। murjhaane ki baat nahin। sabko apna-apna karmabandhan hai, to davaai bhi apni-apni hai। koi kamaai liye poochhte hain to baba unka potaamel dekh raay dete hain। kai hain jinka dhandha aisa hai ki paap karne bigar shareer nirvaah chal nahin sakta। aajkal samay hi aisa ho gaya hai। koi paas bahut paise hain to paap karne ki darkaar nahin hai। baba kehte hain shant mein baith yog ki kamaai karo parantu kaam karne se pahle raay leni hoti hai। aise nahin kaam karne ke baad bole is baat mein phans gaya hoon - kya karun? baba samjhaate rehte hain, agar dhan bahut hai to shant mein baith baba se varsa lo, dhandhedhori ka jhanjhat chhodo। kadam-kadam par shreemat par chalna zaroori hai। aapas mein bahut meetha rehna hai। nahin to baapdaada ka naam badnaam karenge। baapdaada va satguru ki ninda karaane vaala oonch thaur nahin paayega। apne haath mein law nahin uthaana chaahiye। nahin to sab kahenge eeshvareey kul ke bhi aise bachche hote hain kya? baap kehte hain kisko duhkh mat do। savere uth baba ko yaad karo। baba aap kitne meethe ho, aap hamko raajaaon ka raaja svarga ka maalik banaate ho। ham aapki shreemat par zaroor chalenge। ham aasuri mat par nahin chalenge। baap ko yaad nahin karte hain to baap samajh jaate hain inke ajun puraane aasuri sanskaar hain। yeh kya svarga ka raajya bhaagya lenge। apni chalan to dekho। nahin to tum bachchon jaisa takdeervaan duniya bhar mein koi nahin। baap to kahenge - sage bachche bano। aisi chalan dikhaao jo baap bhi khush ho। baap ko bachchon ka bahut khyaal rehta hai ki kaise bachchon ko duhkh se chhudaae oonch pad praapta karaayen।

baba samjhaate hain din mein bhal gorakhdhandha karo parantu brahm-mahoorta mein uth baba se meethi-meethi baaten karni chaahiye। baba aapne to kamaal kiya hai! 21 janmon ke liye svarga ki baadshaahi to aap dete ho! ham to aap par balihaar jaaoon। to balihaar jaana hai, sirf kehna nahin hai। jitna samay yaad mein rahenge uska asar saara din chalega। bahut bi.ke. hain jo subah ko uthte nahin hain, to dhaarna bhi nahin hoti hai। savere jaagne ki aadat pad jaae phir dekho kaise serviceable ban jaate hain। jisko service ka shauk hai woh kahaan bhi service karega। gaali to milegi। sau mein se ek niklega। ismen lajja nahin honi chaahiye। service to jahaan tahaan hai, sirf karne vaala ho। baba yuktiyaan to bataate rehte hain। nasha hona chaahiye। aur sabhi nashon mein hai nuksaan, bigar nashe nar ko naaraayan banaane ke। yeh nasha baap chadhaate hain। baaki koi ke paas gyaan ka nasha hai nahin। patit duniya aur paavan duniya ka bhi kisko pata nahin hai। patit duniya mein zaroor patit honge tab jo paavan devtaaon ko poojte hain। satayug, treta mein to paavan mahaaraaja, mahaaraani hokar gaye hain। raavan ki raajdhaani shuru hoti hai dvaapar se।

bachche jaante hain ki shivbaaba hamko achhe karma sikhlaate hain aur phir pad ka bhi saakshaatkaar karaate hain। yeh hai pratyakshaphal ka saakshaatkaar। to jabki baap svayan aaye hain sikhlaane ke liye to seekhne ki kitni utkantha honi chaahiye। karmabandhan hai sirf aise kehna, isko bhi kamjori kaha jaata hai। karmabandhan se chhootne ki yuktiyaan bhi baba batlaate rehte hain। parantu aisi raay pakke ko hi de sakte hain, na ki kachche ko। kai baandheliyaan bhi purushaartha kar gyaan yogbal se pati ko vash kar unko le aati hain, maar bhi bahut khaati hain। kaha jaata hai na dharat pariye dharma na chhodiye। to yeh bhi pratigya ki jaati hai aur us par kaayam rehna chaahiye। amal karna chaahiye। maaya badi prabal hai un par vijay paani hai, poora purushaartha karna hai। aise nahin ki svarga mein kya bhi pad paayen। nahin, purushaartha oonch banne ka karna chaahiye। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apne haath mein law nahin uthaana hai। aapas mein bahut-bahut meetha rehna hai। kisi ko bhi duhkh nahin dena hai। brahm muhoorta mein uth baap se meethi-meethi baaten karni hai।

2) second mein nashtomoha banna hai। pavitra rahne ki yukti nikaalni hai। himmat rakhni hai। gyaan-yogbal se hisaab-kitaab chuktu karne hain।

vardaan:- seva ke kshetra mein sva-seva aur sarva ki seva ka balance rakhne vaale maayaajeet bhav

sarva ki seva ke saath-saath pahle sva seva aavashyak hai। yeh balance sada sva mein aur seva mein unnati ko praapta karaata hai isliye seva ke kshetra mein bhaag-daud karte donon baaton ka balance rakho to maayaajeet ban jaayenge। balance rakhne se kamaal hoti hai। nahin to seva mein baahyamukhta ke kaaran kamaal ke bajaae apne va doosron ke bhaav-svabhaav ki dhamaal mein aa jaate ho। seva ki bhaag-daud mein maaya buddhi ki bhaag daud kara deti hai।

slogan:- apni visheshtaaon ke beej ko sarvashaktiyon ke jal se seench kar unhein phaldaayak banaao।