Murli du jour du mercredi 8 mars 2023

08-03-2023 praatahmurli om shanti "baapdaada"' madhuban

“meethe bachche - sabko sukh dene vaala bhola vyaapaari ek baap hai, vahi tumhaari sab puraani cheejen lekar nai dete hain, unki hi pooja hoti hai''

prashn:- tumhaari godly missionary ka kartavya kya hai? tumhein kaun si seva karni hai?

uttar:- tumhaara kartavya hai - sabhi manushyamaatra ka kalyaan karna। sabko tamopradhaan se satopradhaan banaane ke liye baap ka sandesh dena। tum sabko bolo ki svarga sthaapan karta baap ko yaad karo to tumhaara kalyaan hoga। tumhein sabko lakshya dena hai। jo devtaaon ko maanne vaale, tumhaare kul ke honge woh in sab baaton ko samjhenge। tumhaari hain roohaani baaten।

geet:- bholenaath se niraala…

om shanti। bholaanaath shivbaaba baith samjhaate hain। bholaanaath sirf ek shivbaaba hai। gaureenaath jo kehte hain, gauri koi ek paarvati nahin hoti। gaureenaath ya babulnaath arthaat babul jaise kaanton ko phool aur jo saanvare ban pade hain unko gora banaane vaale hain। mahima saari hai hi ek ki। yeh hai manushya srishti roopi jhaad va drama। jab drama kaha jaata hai to unmein jo mukhya actors hain woh zaroor yaad aate hain। mukhya zaroor hero heroine ki jodi hoti hai। yahaan bhi mukhya koi zaroor chaahiye। maat-pita naameegraami hain। sookshm vatan mein kehte hain shankar paarvati hain। brahma ka kisko poora maaloom nahin hai। brahma sarasvati kah dete hain, parantu woh koi jodi hai nahin। vaastav mein shankar paarvati ki bhi jodi hai nahin। vishnu ko bhi duniya nahin jaanti। unko jo alankaar dikhaate hain woh bhi unke nahin hain। yahaan lakshmi-naaraayan ki jodi kahenge। ab sabhi se bholaanaath unko kaha jaata hai jo bahut sukh dene vaala hai। bholaanaath vyaapaari bhi hai। hamse puraani cheez lekar nai deta hai। pahle-pahle buddhi mein aana chaahiye - sabhi se oonch te oonch kaun? sabse adhik sukh dene vaala kaun? jo bahuton ko sukh dete hain unki pooja bhi hoti hai। to yeh sab vichaar saagar manthan karne ki baaten hain। vichaar saagar manthan ka naam bahut baala hai। to vichaar kiya jaata hai manushyon mein oonch te oonch hain lakshmi-naaraayan, achha unhonne kya sukh diya hai, jo manushya unka naam lete hain ya unki pooja karte hain? vaastav mein unhonne sukh to koi bhi nahin diya hai। haan ve sukhdhaam ke maalik the, parantu unhon ko aisa banaaya kisne? inke pahle woh kahaan the? agar baba unhon ko aisa nahin banaata to ve kahaan hote! yeh sab to bachchon ko maaloom hai। aatma to kabhi vinaash hoti nahin। unhon ko aisa kaam kisne sikhlaaya jo itna oonch banen? zaroor koi shiksha mili hai! duniya nahin jaanti woh past mein kaun the। tum ab jaante ho lakshmi-naaraayan 84 janma bhog ant mein brahma sarasvati bante hain। to kya lakshmi-naaraayan ki mahima gaai jaae ya unhon ko jo purooshaartha karaane vaala hai athva praalabdha dene vaala hai unki mahima ki jaae? kitni guhya baaten hain। samjhaana hai ki lakshmi-naaraayan kya karke gaye? unki bhi saari raajdhaani chali hai। parantu gaayan sirf ek ka hi chala aata hai। shankaraachaarya ne aakar sannyaasiyon ki rachna rachi, phir unhon ki paalna bhi ki। phir jab tamopradhaan avastha ko paate hain to unhein satopradhaan kaun banaaye? maaya ne sabko tamopradhaan banaaya hai। lakshmi-naaraayan jo satopradhaan the phir chakra lagaakar tamopradhaan mein aate hain। har ek ka aise hota hai। bhal kitne bhi bade martabe vaala ho - sato, rajo, tamo se har ek ko paas karna hai। is samay sab patit hain। to tamopradhaan duniya ko phir se satopradhaan kaun banaaye? pahle-pahle satopradhaan sukh mein aate hain phir duhkh mein jaate hain। yeh raaz ab tum bachchon ko samjhaaya jaata hai। 84 janma lena hota hai to zaroor satopradhaan se tamopradhaan banna hi hoga। har cheez sato rajo tamo zaroor hoti hi hai। preceptors ka bhi aise hota hai। woh bhi ab tamopradhaan hain। to phir bhi ab sabse oonch te oonch kaun hai, jo kabhi bhi tamopradhaan nahin banta? agar woh bhi tamopradhaan ban jaae to phir unko satopradhaan kaun banaaye? phir balihaari unki ho jaae। aise-aise vichaar saagar manthan karne se dil mein jo point janchati hai, achhi lagti hai to sunaai jaati hai। bholaanaath parampita paramatma hi sabka sadgati daata, satopradhaan banaane vaala hai। sab durgati se nikal gati sadgati ko paate hain। nambarvaar jo bhi pahle-pahle aayenge woh satopradhaan, sato, rajo se hokar phir tamopradhaan banenge zaroor। pahle-pahle jab aatma neeche aati hai to unko sukh bhogna hai। duhkh bhog na sake। manushya pahchaan nahin sakte ki yeh naya soul hai isliye itna sukh hai, maan hai। ab sabki tamopradhaan avastha hai। tatva, khaaniyaan aadi sab tamopradhaan hain। nai cheezen thi, ab puraani ho gai hain। vahaan ka anaaj phal phool aadi kaise achhe hote hain, woh bhi bachchon ko saakshaatkaar karaaya hua hai। sookshm vatan mein bachchiyaan jaati hain, kehti hain baba ne shoobeeras pilaaya। zaroor oonch baap, cheez bhi oonchi dete honge। bachchon ko yeh buddhi mein rehna chaahiye - oonch te oonch ek bhagwan hi hai। yaad bhi sab unko karte hain। god father kehte hain, god rehte hi hain oopar mein। aatma god father ko yaad karti hai kyonki aatma ko duhkh hai to bholaanaath baap aakar phir sukh dete hain। to unko kyon nahin yaad karenge? aatma kahegi ham shareer ke saath jab duhkhi hota hoon to baap ko bahut yaad karta hoon। raavan dushman duhkh dete hain to baap ko yaad karte hain। duhkh mein ham sabhi aatmaayen paramatma ko simran karti hain। phir jab ham aatma svarga mein rehti hain to baap ko yaad nahin karti। yeh aatma kehti hai, baap ko hi pukaaregi na। manushya to unka occupation, biography kuchh nahin jaante। na drama ka raaz jaante hain ki kaise aatma chakra mein aati hai। tum bachche ab jaante ho - maaya raavan duhkh dene vaali hai। yeh raavan raajya shuru hua hai dvaapar se। yeh bhi samjhaana hai kyonki yeh kisko pata nahin hai ki sabse puraana dushman raavan hai। unki hi mat par yeh partition aadi hua hai।

abhi tum bachche samajhte ho ham shreemat se bhaarat ko svarga banaate hain। vahi sadgati daata sabka hai। woh jab aaye tab hi brahma, vishnu, shankar se kaarya karaaye। oonch te oonch woh ek hi hai, unki biography ko koi nahin jaante। yeh khel hi aisa bana hua hai। to baba samjhaate hain sabse bada dushman raavan hai। us par jeet paani hai। samjhaate bhi unko hain jinhonne kalpa pahle samjha tha। vahi aakar shoodra se brahman bante hain। ab vichaar karo satayug se treta ant tak kitni sampradaay vriddhi ko paati rahegi। to itne sabko gyaan dene ki service karni hai। itne sabmen gyaan ka beez bharna hai। gyaan ka vinaash to nahin hota। ladaai vaalon ka bhi uddhaar karna hai। hamaare daivi sampradaay vaale jahaan honge woh nikal aayenge। un ladaai karne vaalon ko kaha jaata hai jo yuddha ke maidaan mein marenge woh svarga mein jaayenge parantu unke kahne se svarga mein ja nahin sakte, jab tak tum lakshya na do। lakshya sirf brahman hi de sakte hain, marna to hai hi। musalmaan allaah ko yaad karenge, sikkha log guru naanak ko yaad karenge, parantu svarga mein thode hi ja sakte hain। svarga mein jaana hota hai sangam par। to in ladaai aadi vaalon ko bhi sivaae tum braahmanon ke yeh mantra koi de na sake। svarga ka maalik banaane vaala sabse oonch hai woh baap। yeh to theek hai bhagvaanuvaach ki yuddha mein marne se svarga mein jaayenge। parantu kaun si yuddha? yuddha hain do। ek hai roohaani, doosri hai jismaani। un goli chalaane vaalon ko bhi tum gyaan de sakte ho। geeta mein bhi hai manamnaabhav। apne baap aur svarga ko yaad karo to svarga mein jaayenge। jab sangamayug ho tab hi tum svarga mein ja sakte। woh hain jismaani baaten, yeh hain sab roohaani baaten। hamaari hai maaya par jeet paane ki yuddha। marne samay manushya ko mantra diya jaata hai। yeh jaate hi hain marne ke liye to baap ka sandesh dena hai। ek din government bhi tumko kahegi ki yeh knowledge sabko do। tum ho godly missionary। tumhaara kaam hai bahuton ka kalyaan karna, bolo, bhagwan ko yaad karo। ab svarga sthaapan ho raha hai to sunkar bahut khush honge। jo is kul ke honge vahi maanenge। devtaaon ko maanne vaale hi in baaton ko samjhenge to sabka kalyaan karna hai। bigar baap ko yaad karne svarga mein ja nahin sakte। svarga sthaapan karta baap ko jab yaad karenge tab hi kalyaan hoga। baba ne samjhaaya hai ladaai vaale woh sanskaar le jaate hain to phir ladaai mein hi aa jaate hain। aatma sanskaar le jaati hai na। svarga mein to ja na saken। jo bhaarat ki seva karte hain unko phal to milna chaahiye na। to unhon ki bhi service karni hai, bado-badon ko samjhaana hai। tumhaara prabhaav niklega। tumko kahenge yahaan aakar bhaashan karo। jaise major ne baba ko mangaaya। jahaan-tahaan samjhaane ke liye ghusna padta hai। bade ko samjhaane se phir chhote bahut aate hain। parantu guru ko tum pahle samjhaao to chele log unka maatha hi kharaab kar denge phir unko nikaal doosre ko gaddi de denge kyonki yeh bilkul nai baaten hain na। saari duniya mein ek bhi manushya geeta ko poora samajhte nahin। kehte hain barobar roodra gyaan yagya se vinaash jvaala prajvalit hui thi phir kya hua, yeh nahin jaante। manushya kuchh bhi nahin jaante। is samay sab tamopradhaan hain। Christian bhi yeh maante hain ki Christ yahaan beggar roop mein hai। phir beggar se ameer kaun banaaye? sabka sadgati daata to ek hi paramatma hai to tum bachche agar achhi reeti baith samjhaao to bahuton ka kalyaan kar sakte ho। baap svarga ka rachayita hi patit-paavan hai, to unki shreemat par chalna pade। jo laayak honge vahi niklenge। jinko svadarshan chakra ka va manamnaabhav ka arth buddhi mein hai unko hi brahman kahenge। brahman banne bigar devta nahin ban sakte। praja to bahut banni hai। treta ant tak jo aane vaale hain unko yeh mantra milna hai। teer unko hi lagega jo hamaare kul ka hoga। tumhaare teer mein ab jauhar bharta jaata hai। phir pichhaadi mein bahut teekhe baan lagenge। sannyaasiyon ko bhi baan lage hain na। phir samjha hai barobar yeh bhagwan hi baan maarte hain। tumhaare gyaan baan ab jauhardaar refine bante jaate hain। mukhya baan ek hi hai manamnaabhav। yathaartha reeti samjhaaya hai ki yahi sangamayug hai jahaan se svarga ja sakenge। mahaabhaarat ladaai bhi saamne khadi hai। woh bhi yuddha ka maidaan hai, yeh bhi yuddha ka maidaan hai। maaya par jeet paane mein mehnat lagti hai। saadhaaran praja bhi bahut banni hai। jo is kul mein aane vaala nahin hoga unko yaad hi nahin padega। service ke liye vichaar saagar manthan karte rahenge to tumko gyaan ki points aayengi। us yuddha mein bhi vichaar saagar manthan chalega - aise karenge to jeet paayenge। buddhi to chalti hai na। practice bhi karte hain। jab teekhe ho jaate hain to maidaan par ladne jaate hain। tumhaare paas bahut dher aayenge। bhagwan ke dar par bhakton ki bheed honi hai, machchharon muaaphik aayenge। prime minister va king queen ke aage itni bheed nahin hoti jitni bhagwan ke paas bhakton ki bheed hogi। phir us bhaavna se aayenge। koi kharaab vichaar nahin rahega। yeh to niraakaar baap hai na। to samajh mein aata hai bhagwan ke aage bhakton ki bheed honi chaahiye, aana bhi sabko yahaan padega। yahaan apna jad yaadgaar ekdam accurate hai। shivbaaba ka bhi chitra hai, jagatpita, jagat amba bhi hai। yeh abhi ka tumhaara group hai - shakti sena ka। achha!

meethe meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) brahman so devta banne ke liye svadarshan chakra ka aur manamnaabhav ka arth buddhi mein yathaartha reeti rakhna hai। sabko lakshya dene ki seva karni hai।

2) maaya par jeet paane ke liye vichaar saagar manthan kar gyaan ki gahraai mein jaana hai। ratna nikaalne hain।

vardaan:- pavitrata ki stage dvaara avinaashi eeshvareey masti ka anubhav karne vaale holeehans bhav

holi par sabhi bade chhote ke bhaan ko bhool aapas mein ek samaan samajh masti mein khelte hain, dushmani ke sanskaar bhool mangal milan manaate hain। yeh rasma bhi abhi ki hai। aap bachche jab holi arthaat pavitrata ki stage par thaharte ho, baap ke sang ke rang mein range hue hote ho tab eeshvareey masti mein deh ka bhaan va bhinna-bhinna sambandh ka bhaan, chhote bade ka bhaan vismrit ho ek hi aatma svarup ka bhaan rehta hai। yahi holeehans sthiti hai। isi ka yaadgaar har varsha holi utsav ke roop mein manaate hain।

slogan:- jinke jeevan mein sheetalta hai ve doosron ke jalte hue chit par vijay praapta kar sakte hain।