Murli du jour du dimanche 7 mai 2023

07-05-23 praatahmurli om shanti ''avyakt-baapdaada'' revise 26-11-94 madhuban

parmaatma paalna aur parivartan shakti ka pratyaksha swaroop - sahajyogi jeevan

aaj baapdaada har ek bachchon ke mastak par vishesh shreshtha bhaagya ki teen lakeeren dekh rahe hain। sarva bachchon ka bhaagya to sada sarvashreshtha hai hi lekin aaj vishesh teen lakeer chamak rahi hain। ek hai parmaatma paalna ke bhaagya ki lakeer aur doosri hai behad ke oonche te oonche padhaai ke bhaagya ki lakeer। teesri hai shreshtha mat praapta hone ke bhaagya ki lakeer। chaahe laukik, chaahe alaukik, har ek ko is jeevan mein ye teen praaptiyaan hoti hi hain। paalna bhi milti, padhaai bhi milti aur mat bhi milti hai। in teenon dvaara hi har aatma apna vartamaan aur bhavishya banaane ke nimitta banti hain। aap sabhi shreshtha aatmaon ko kiski paalna mil rahi hai? parmaatma paalna ke andar har second pal rahe ho। jaise param aatma oonche te oonche hain to parmaatma paalna bhi kitni shreshtha hai! aur is parmaatma paalna ke paatra kaun bane hain aur kitne bane hain? saare vishwa ki aatmaayen ‘baap' kehti hain lekin paalna aur padhaai ke paatra nahin banti hain। aur aap kitni thodi-si aatmaayen is bhaagya ke paatra banti ho! saare kalpa mein yahi thoda-sa samay parmaatma paalna milti hai। daivi paalna, maanav paalna ye to anek janma milti hai lekin ye shreshtha paalna ab nahin to kab nahin। aise shreshtha bhaagya ki shreshtha lakeer sada apne mastak mein chamakte hue anubhav karte ho? koi bhi praapti sada karna chaahte ho ya kabhi-kabhi karna chaahte ho? to praapti ka purushaartha bhi sada chaahiye ya kabhi-kabhi chaahiye? aur sada teevra chaahiye ya kabhi saadhaaran, kabhi teevra? practical kya hai? chaahna aur practical mein antar ho jaata hai na! sochte to bahut ho lekin smriti mein kam rakhte ho। sochna swaroop banna hai ya smriti swaroop banna hai? smriti swaroop banne vaale ho na! to ek baat bhi smriti mein rakho ki amritvele aapko uthaane vaala kaun? baap ka pyaar uthaata hai। din ka aarambha kitna shreshtha hai! aur baap svayan milan manaane ke liye bulaate hain, ruhrihaan karte hain, shaktiyaan bharte hain! to har din ka aadi kitna shreshtha hai! baap ki mohabbat se uthte ho ki kabhi-kabhi mazboori se bhi uthte ho? yathaartha to mohabbat ke geet aapko uthaate hain। amritvele se baap kitna sneh se bulaate hain, uthaate hain - meethe bachche, pyaare bachche, aao…। to jiska aadi itna shreshtha hai to madhya aur ant kya hoga? shreshtha hoga na!

baapdaada dekh rahe the ki kitna paalna ka bhaagya vartamaan samay bachchon ko praapta hai! jitna praapta hai utna phaayda uthaate ho? svapna mein bhi sankalp maatra nahin tha ki itne bhaagya ke paatra banenge! sochne se baahar tha lekin mila kitna sahaj! baap ke pyaar ki paalna ka practical swaroop hi hai ‘sahaj yogi jeevan'। jisse pyaar hota hai uske liye mushkil paristhiti ya mushkil koi bhi baat dekhi-suni nahin jaati। to baap ne bhi mushkil ko sahaj banaaya hai na! sada sahaj hai। to sada hi purushaartha ki gati teevra ho। aaj bahut achha purushaartha hai aur kal thodi percentage kam ho gai to kya sada sahaj kahenge? sada mushkil kaun banaate hain? svayan hi banaate ho na? kaaran kya? sochne ki to aadat hai lekin smriti swaroop ke sanskaar kabhi emerge rakhte ho, kabhi merge ho jaate hain kyonki smriti swaroop so samartha swaroop। sochna, yeh samarthi swaroop nahin hai। smriti samarthi hai। vismriti mein kyon aa jaate ho? aadat se majboor ho jaate ho। agar majboot nahin to majboor ho jaayenge। jahaan majboot hain vahaan majboori nahin hai। jab original aadat vismriti ki nahin hai। aadi mein smriti swaroop praalabdha praapta karne vaali devaatmaayen ho, yog lagaane ka purushaartha nahin karte lekin smriti swaroop ki praalabdha praapta karte ho। to aadi mein bhi smriti swaroop ka pratyaksha jeevan hai aur anaadi aatma, jab aap paramdham se aai to aap vishesh aatmaon ke sanskaar svatah hi smriti swaroop hain। aur ant mein sangam par bhi smriti swaroop bante ho na! to anaadi, aadi aur ant - teenon hi kaal smriti swaroop hain। vismriti to beech mein aai। to aadi, anaadi swaroop sahaj hona chaahiye ya madhya ka swaroop? sochte ho ki haan, main aatma hoon lekin smriti swaroop ho chalna, bolna, dekhna usmein antar pad jaata hai। to yeh smriti mein rakho ki ham parmaatma paalna ki adhikaari aatmaayen hain।

baapdaada chart check karte hain to lakeer kabhi oonchi, kabhi neechi hoti hai, kabhi koi daag hota hai, kabhi jeevan ke kaagaj mein koi daag nahin bhi hota hai aur koi samay daag hi daag, ek peechhe doosra, doosre ke peechhe teesra daag hi nazar aate hain। kyon? ek to galti ho jaati hai lekin galti hone ke baad bhi usi galti ko sochte rehte ho। kyon, kya, kaise, aise nahin, vaise.... kai roop se baat ko chhodte nahin ho। baat aapko chhod kar chali jaati hai lekin aap baat ko nahin chhodte ho। jitna samay sochne swaroop bante ho, yathaartha smriti swaroop nahin bante ho, to daag ke oopar daag lagte jaate hain। paper ka time kam hota hai lekin vyartha sochne ka sanskaar hone ke kaaran paper ka time badha dete ho। second poora hua aur nirvikalp sthiti ban jaaye yeh sanskaar emerge karo। nirvikalp banna aata hai na? apne shreshtha bhaagya ko smriti mein laakar sada harshit raho। apne parmaatma paalna ko sada baar-baar smriti mein laao। sunna bhi aata hai, sochna bhi aata hai lekin pharka kya pad jaata hai? baapdaada bachchon ka khel dekhte rehte hain। saare din mein kya-kya khel karte ho - ye raatri ko check karte ho na? maaya ke khilaune bade aakarshan vaale hain। to un khilaunon se khelne lag jaate ho। pahle to bahut pyaar se maaya khel karaati hai aur khel karaate-karaate jab haar khilaati hai tab hosh mein aate hain। majority mein ek vishesh shakti ki kami rah jaati hai। kabhi bahut achhe chalte ho, kabhi chalte ho, kabhi udte ho, aage badhte ho lekin phir neeche kyon aa jaate ho? iska vishesh kaaran kya? parivartan shakti ki kamjori hai। samajhte bhi ho ki ye yathaartha nahin hai lekin parivartit hone ki kami ho jaati hai। brahman jeevan mein parivartan mein aa gaye, ab koi kahenge ki main brahman nahin hoon? sabhi apne ko bi.ke. likhte ho na! ham brahman hain, yeh samajhte ho na? brahman jeevan mein jo pareekshaayen aati hain usmein parivartan karne ki shakti aavashyak hoti hai। jab vyartha sankalp chalte hain to samajhte bhi ho ki ye vyartha hain। lekin vyartha sankalpon ka bahaav itna tez hota hai jo apne taraph kheenchata jaata hai। jaise nadi ka va saagar ka bahut force hota hai to kitna bhi apne ko rokne ki koshish karte hain lekin phir bhi bahte jaate hain। samajhte bhi ho, sochte bhi ho ki ye theek nahin hai, isse nuksaan hai phir bhi bahaav mein bah jaate ho iska kaaran kya? parivartan shakti ki kami। pahla vishesh parivartan hai swaroop ka parivartan। main shareer nahin, lekin aatma hoon, yeh swaroop ka parivartan hai। yeh aadi parivartan hai। ismen bhi check karo to jab dehbhaan ka force hota hai to aatma abhimaan ke swaroop mein tik sakte ho ya bah jaate ho? agar second mein parivartan shakti kaam mein aa jaaye to samay, sankalp kitne bach jaate hain। vesta se best mein jama ho jaate hain।

pahli parivartan shakti hai swaroop ka parivartan aur svabhaav ka parivartan। puraana svabhaav purushaarthi jeevan mein dhokha deta hai। samajhte bhi ho ki yeh mera svabhaav yathaartha nahin hai aur yeh svabhaav samay prati samay dhokha bhi deta hai - yeh bhi samajhte ho, lekin phir bhi svabhaav ke vash ho jaate ho। phir apne bachaav ke liye kehte ho ki mera bhaav nahin tha, mera svabhaav aisa hai, main chaahta ya chaahti nahin hoon lekin mera svabhaav hai। brahman ban gaye to janma badal gaya, sambandh badal gaya, maa-baap badal gaye, parivaar badal gaya lekin svabhaav nahin badla। phir royal shabd kehte ki meri nature hai। to pahli kamjori swaroop ka parivartan, doosra svabhaav ka parivartan, teesra sankalp ka parivartan। second mein vyartha ko samartha mein parivartan karo। kai samajhte hain bas aadha ghante ka toofaan tha, aadha ghanta, 15 minute chala, lekin aadha ghanta va 15 minute ki kamjori sanskaar bana deti hai na? jaise shareer mein agar koi baar-baar kamjor hota rahe to sada ke liye kamjor ban jaate hain। to 15 minute koi kam nahin hain। sangamayug ka ek-ek second varshon ke samaan hai। to aise albele nahin bano। bhal thoda hi chala lekin ganvaaya kitna? jab kadam mein padam kehte ho to 15 minute mein kitne kadam uthenge aur kitne padam ganvaaye? jama mein to hisaab achha rakhte ho ki kadam mein padam jama ho gaya lekin ganvaane ka bhi to hisaab rakho। to na chaahte hue bhi sanskaar kheenchate hain। jo bhi baat baar-baar hoti vo sanskaar roop mein bhar jaati hai। to sankalp parivartan karo। sirf sochte nahin raho - karna nahin chaahiye, ho gaya, kya karun? nahin, socho aur karke dikhaao। kehte ho beeti ko bindi lagaao, ek-do ko gyaan dete ho na - koi aakar baat karenge to kahenge theek hai, bindi laga do, lekin svayan bindi lagaate ho? bindi lagaane liye kaun-si shakti chaahiye? parivartan shakti। parivartan shakti vaala sada hi nirmal aur nirmaan rehta hai। jaise pahle bhi baapdaada ne sunaaya hai ki mould hone vaala hi real gold hai। real gold ki nishaani hai vo mould ho jaayega। to check karo ki parivartan shakti samay par kaam aati hai ya samay beet jaane ke baad sochte hi rehte hain? to parivartan shakti ko badhaana hai। jismen parivartan shakti hai vo sabka pyaara banta hai। vichaaron mein bhi sahaj rahega, aage badhte seva mein rehte ho na? seva mein bhi vighna roop kya hota hai? mera vichaar, mera plan, meri seva itni achhi hote hue bhi mera kyon nahin maana gaya? to usko real gold kahenge? meraapan aa gaya, mera-pan aana arthaat alloy mix hona। jab real gold mein alloy mix ho jaata hai to vo real rehta hai? uska moolya rehta hai? kitna pharka pad jaata hai! to samay aur vaayumandal ko parakhkar apne ko parivartan karna, iski aavashyakta hai। moti-moti baaton mein parivartan karna to sahaj hai lekin har paristhiti mein, har sambandh, samparka mein samay aur vaayumandal ko samajh svayan ko parivartan karna, yahi number one banna hai। ye nahin socho ki phalaana bhi samjhe na, ye bhi to parivartan kare na, sirf main hi parivartan karun kya? jo ote so arjun, ismen agar aapne apne ko parivartan kiya to ye parivartan hi vijayi banne ki nishaani hai। samjha। achha।

chaaron or ke sarva sada smriti swaroop aatmaon ko, sada second mein parivartan shakti dvaara sva parivartan karne vaali shreshtha aatmaon ko, sada sahaj yogi anubhav karne vaale anubhvi aatmaon ko, sada baap ke sameep aur samaan banne ke umang-utsaah mein rahne vaali sarva aatmaon ko baapdaada ka yaad-pyaar aur namaste।

teachers:- sabhi teachers to sada hi gyaan swaroop, smriti swaroop hain hi kyonki jaise baap shikshak bankar aate hain to baap samaan nimitta shikshak ho। baap jaise nahin ho, lekin nimitta shikshak ho। to teachers ki visheshta nimitta bhaav aur nirmaan bhaav। saphal teacher vahi banti hai jiska nirmal svabhaav ho। abhi nirmal svabhaav ke oopar vishesh underline karo। kuchh bhi ho jaae lekin apna svabhaav sada nirmal rahe। yahi nirmal svabhaav nirmaanta ki nishaani hai। to underline karo ‘nirmal svabhaav'। bilkul sheetal। sheetalta ka gaayan sheetla devi hai। to nirmal svabhaav arthaat sheetal svabhaav। baat josh dilaane ki ho lekin aap nirmal ho tab kahenge saphal teacher। to baap-daada phir bhi underline kara raha hai kis par? nirmal svabhaav। samjha? achha!

prashn:- sabse bada khazaana kaun sa hai? jisse hi gyaan aur yog ki parakh hoti hai?

uttar:- sabse bada khazaana hai khushi। chaahe kitna bhi gyaan ho, yog ho lekin khushi ki praapti nahin to gyaan theek nahin। koi bhi paristhiti aa jaae khushi gaayab nahin ho sakti। avinaashi baap ka avinaashi khazaana mila hai isliye khushi kabhi gaayab nahin ho sakti। yog lagaate lekin khushi nahin to yog theek nahin। aapki khushi dekh doosre aapse poochhen ki kya aapko mila hai, yahi gyaan aur yog ki pratyakshata ka saadhan hai।

prashn:- kis lagan ke aadhaar par vighnon ki samaapti svatah ho jaati hai?

uttar:- ek baap doosra na koi, isi lagan mein magan raho to vighna tik nahin sakta। vighna hai to lagan nahin। vighna bhal aayen lekin uska prabhaav na pade। jab svayan prabhaavshaali aatma ban jaate to kisi ka prabhaav nahin pad sakta। jaise soorya ko koi kitna bhi chhipaaye to chhip nahin sakta! sada chamakta rehta hai। aise hi prabhaavshaali aatmaon ko koi bhi prabhaav apne taraph kheench nahin sakta। to sada ek baap doosra na koi, isi lagan mein magan rahne vaale, yahi vishesh sangamayug ka anubhav hai।

vardaan:- sneh ki lift dvaara udti kala ka anubhav karne vaale avinaashi snehi bhav

mehnat se mukta hone ke liye baap ke snehi bano। yeh avinaashi sneh hi avinaashi lift ban udti kala ka anubhav karaata hai। lekin yadi sneh mein albelaapan hai to baap se current nahin milti aur lift kaam nahin karti। jaise light banda hone se, connection khatma hone se lift dvaara sukh ki anubhooti nahin kar sakte, aise sneh kam hai to mehnat ka anubhav hota hai, isliye avinaashi snehi bano।

slogan:- shubh sankalp aur divya buddhi ke yantra dvaara teevragti ki udaan bharte raho।