Murli du jour du samedi 20 mai 2023

20-05-2023 praatahmurli om shanti "baapdaada"' madhuban

“meethe bachche - yeh gyaan bade maje ka hai, tum harek apne liye kamaai karte ho। tumhein aur kisi ka bhi khyaal nahin karna hai, apni is deh ko bhi bhool kamaai mein lag jaana hai।''

prashn:- avinaashi kamaai karne ki vidhi kya hai? is kamaai se vanchit kaun rah jaata hai?

uttar:- yeh avinaashi kamaai karne ke liye raat ko va amritvele jaagkar baap ko yaad karte raho, vichaar saagar manthan karo। kamaai mein kabhi ubaasi ya neend nahin aati। tum chalte-phirte bhi baap ki yaad mein raho to har second kamaai hai। tumhein independent apne liye kamaai karni hai। jo us vinaashi kamaai ke lobh mein jyaada jaate, woh is kamaai se vanchit ho jaate hain।

geet:- jaag sajniyaan jaag…

om shanti। bachchon ne geet suna। buddhi mein baitha। saajan kaho ya baap kaho, unko patiyon ka pati kyon kaha jaata hai? angreji mein brides bhi kehte hain। saajan ko bridegroom kehte hain। woh hai niraakaari saajan। yahaan saakaari saajan ki koi baat nahin। niraakaari saajan ko bhi sajni zaroor chaahiye। nahin to niraakaar saajan bhi sajni bigar rachna kaise rache। bachche jaante hain ki woh niraakaar kis sajni dvaara rachna rachte hain। woh parampita paramatma ismen pravesh kar sabhi ko jaga rahe hain। barobar navayug arthaat satayug sachkhanda mein jaane liye ham yahaan aaye hain। puraana yug kaha jaata hai kaliyug ko। to tum bachchon ko anubhav ho raha hai ham yahaan aaye hain gyaan saagar ke paas refresh hone ke liye, sammukh dhaarna ke liye। bachchon ko sammukh jitna maja aata hai utna centres par nahin। tum bachche sammukh ho aur centres vaale door hain। yeh bachchon ko samjhaaya hai ki har ek aatma rathi hai aur parampita paramatma is tan mein rathi hai। unko kaha jaata hai parampita param aatma। hai to aatma na। woh sadaiv pare te pare rahne vaala hai। bhagwan ko jab yaad karte hain to nazar zaroor oopar hi jaayegi। O parampita paramatma raham karo। sabhi ko pata hai ki woh oopar rahne vaala hai। baap apne mukrar kiye hue rath mein aaye hain। kehte hain main kalpa-kalpa ismen rathi hoon kyonki is brahma rath dvaara brahman kul sthaapan karta hoon। agar shreekrishna ke tan mein aaye to phir daivi kul ho jaae। satayug ho jaaye। shreekrishna ka shareer satayug mein hota hai। bachche samajhte hain hamko behad ka baap baith teenon kaalon ka gyaan de trikaaldarshi bana rahe hain। drama ke aadi-madhya-ant ka gyaan de rahe hain। jo ghadi beet chuki woh hu-ba-hu repeat hogi। jaise lakshmi-naaraayan ka raajya tha phir repeat hoga। Christ ko bhi apna part repeat karna hai। phir us hi naam, roop, desh, kaal mein aane vaale hain। baap kehte hain - main bhi apna niraakaar roop badalkar saakaar roop mein aaya hoon। zaroor manushya tan mein aayega tab to sunaayega। shaastron mein to kachchha-machchha avtaar likh diya hai। sarvavyaapi ke gyaan se samajhte hain ki woh sabmen pravesh karta hai।

ab baap svayan kehte hain - sajniyaan, main aaya hoon tumko jagaane, nai duniya sthaapan karne। jo satayug tha woh ab phir repeat hoga। ab navayug aane vaala hai। duniya samajhti hai navayug aane mein 40 hazaar varsha pade hain। yeh manushyon ki badi bhool hai। abhi bachche nishchaybuddhi ho gaye hain। duniya vaalon ke liye zaroor naya gyaan hai। satayug mein devi-devta honge aur dharmon ka pata bhi nahin rahega। abhi aur sab puraane dharma hain। naya devi-devta dharma gum ho gaya hai phir ab us naye dharma ki sthaapna hoti hai। devtaaon ke kuchh na kuchh chitra hain। samajhte hain satayug mein barobar raajya karte the। vahaan tumko yeh pata nahin rahega ki lakshmi-naaraayan ke baad koi raam ka raajya aane vaala hai। jo kuchh hota jaayega tum dekhte jaayenge। phir kahenge Edward di first, second.. peechhe vaalon ko yeh maaloom rahega ki first, second Edward hokar gaye hain। aage phir kab honge - yeh nahin jaanenge। drama ka part emerge hota rahega। drama ki knowledge baba hi samjhaate hain। woh bhakti maarga ki teertha yaatra bilkul hi nyaari hai। yeh hai gyaan - baap aur varse ko yaad karna। abhi tum jaante ho satayug mein itna samay raajya hoga phir treta mein raam-seeta raajya karenge। bachchon ko scene-scenery dekhne mein aati hain। tumne 84 janma poore kiye - yeh buddhi mein hai। yeh hai nai knowledge। baap kehte hain main kalpa ke sangamayug par aata hoon। is sangam par parampita paramatma rathi bana hai, ham rathi aatma ko vaapis le jaane। ham sab rathi hain। apne ko aatma samajhna hai। tum bachche ghadi-ghadi bhool jaate ho। ham aatmaon ne 84 janma ka part bajaaya। ab baba aaya hai - hamko saara raaz samjhaate hain। patit se aap samaan paavan banaate hain। yeh behad ka ek hi baap hai jo bachchon ko aap samaan banaate hain। laukik baap kabhi bachchon ko aap samaan nahin banaate hain। ek hi baap ke bachche koi carpenter honge to koi surgeon, koi engineer honge। yahaan aisa nahin hai। yahaan tum sabhi manushya se devta bante ho। tum barrister, surgeon aadi nahin bante ho। tum jaante ho parampita paramatma hamko padhaate hain, jisse ham padhkar so devta bante hain। aisa school kahaan bhi nahin dekha hoga, jo sab kahen ham so devta pad paane liye padh rahe hain। din-pratidin vriddhi hoti rehti hai। phir makaan bhi vriddhi ko paate jaayenge। bachchon ka prabhaav niklega to bahut bulaayenge। yahaan aakar hamko manushya se devta banaane ka raajayog sikhaao। bahut vriddhi hoti jaayegi। baap phir bhi bachchon ko kehte hain - raat ko athva amritvele jaago, ismen bahut kamaai hai। manushya jo bahut kamaai karne ke shaukeen hote hain unko raat ko bhi graahak mil jaate hain to jaagte hain। manushya ko sampatti 24 ghante mil jaae to apni neend bhi phita dete hain। kamaai mein phir neend nahin aati। kamaai nahin hoti to phir ubaasi, neend aa jaati hai। kamaai mein bahut khushi hoti hai। paise badhaane ka hi manushya prayatna karte hain ki ham sukhi rahen। baaki pet to ek paav roti hi maangata hai।

tum bachchon ko is duniya mein mamatva nahin rakhna hai। jyaada lobh mein nahin jaana hai। usmein bhi buddhi-yog bhaagta hai, phir avinaashi kamaai se vanchit ho jaate hain। nahin to is kamaai ka bahut khyaal rakhna hai। tumhaari kamaai second by second hai। phir agar chalte-phirte baap ko yaad karo to bahut bhaari kamaai hai। aur kamaaeeyaan aise chalte-phirte hoti hain kya? yeh to wonderful kamaai hai। independent apne liye kamaai karte ho। laukik baap ko bachchon ka khyaal rehta hai - bachche sukhi rahen, khaate rahen। ismen baal-bachchon ka khyaal nahin rehta। apne liye 21 janmon ki kamaai karen। kaisa maze ka gyaan hai! harek bachche ko apne liye kamaai karni hai। baal-bachche, mitra-sambandhiyon ko bhi yaad nahin karna hai। apni deh ko bhi yaad nahin karna hai। baba ko bhale is deh mein aana padta hai parantu hai to dehi-abhimaani। is samay deh mein aate hain, aakar tum aatmaon ko knowledge dete hain athva sahaj kamaai ka raasta bataate hain। agar tum practice karte raho to bahut kamaai kar sakte ho। baba bhi practice karte hain baap ko yaad karen to aadat pad jaati hai। apne ko bhool shivbaaba yaad rehta hai kyonki shivbaaba ki ismen praveshta hai। yeh baba samajhta hai main brahmaanda ka maalik hoon। laukik baap ke bachche ko rehta hai na ki ham baap ki milkiyat ke hakdaar hain। to is brahma baba ko bhi rehta hai ki ham brahmaanda ke maalik hain। baba ki praveshta hai na। to woh nasha rehta hai - ham brahmaanda ke maalik hain, property ka bhi maalik hoon। shivbaaba khud to vishwa ka maalik nahin bante hain। main brahmaanda ka maalik to vishwa ka bhi maalik banta hoon। baba sirf brahmaanda ka maalik hai। tum bhi vishwa ke maalik bante ho na। raaja chaahe praja - samajhte hain ham vishwa ke maalik hain, jaan gaye hain ham vishwa ke maalik hain। yeh samajhne se bhi khushi ka paara chadha rahega। gaaya hua bhi hai - ateendriy sukh poochhna ho to gopi-vallabh ke gop-gopiyon se poochho। aise nahin ki gopi-vallabh se poochho। vallabh baap ko kaha jaata hai। vallabh (baap) ko to vishwa ke maalikapne ka sukh paana nahin hai। baap kitna ooncha uthaate hain। yeh (brahma) kehte hain main bhi apne ko brahmaanda ka maalik samajhta hoon। saari duniya mein yeh koi bhi samajh nahin sakte ki main brahmaanda ka maalik hoon। aise nahin ki brahm mein leen ho jaayenge। kahaan brahm mein leen hona, kahaan brahmaanda ka maalik banna - bahut farka hai। tum jaante ho baba hamko vishwa ka maalik banaate hain। khud baap kehte hain jaago sajniyaan। main har ek baat tumko nai samjhaata hoon। kya tum brahmaanda ke maalik nahin bane the? phir part bajaaya, ab phir tum brahmaanda ke maalik bante ho, phir tum vishwa ke maalik banne vaale ho - yeh yaad sthaai rakhni hai। isko kaha jaata hai vichaar saagar manthan। isse tumko khushi ka paara bahut chadhega। yeh to nishchay karna chaahiye ki yeh hamaara baap hai। baap ke sivaae aisi baaten koi samjha na sake। dil mein note karna chaahiye। yahaan notes lete hain smriti mein rakhne ke liye। phir yeh kaam nahin aayenge। barrister ke paas bahut kitaab rehte hain। shareer chhoota, khalaas। pata nahin doosre janma mein kya banenge। tum bachchon ki to ek hi padhaai hai। tum jaante ho svayan brahmaanda ka maalik baap, hamko brahmaanda aur vishwa ka maalik banaate hain। phir bhi khushi ka paara kyon nahin chadhta? baba ne samjhaaya hai yeh geet ghar mein apne ko refresh karne liye rakhne chaahiye।

koi-koi samajhte hain gyaan mein aane se hamko ghaata pada hai। ghaata-faayda to puraani duniya mein hai hi। aaj koi vajeer hai, kisi ne shoot kiya to khalaas। sabko ghaata padta rehta hai। kinki dabi rahi dhool mein... sabko ghaata hai। sirf tum bachchon ko sadaakaal ke liye faayda hai bhavishya mein। so bhi 21 janma ke liye। baaki saari duniya hai ghaate mein। yeh sab hai runya ke paani misal (mrigtrishna samaan)। kisko bhi maaloom nahin yeh sab mitti mein mil jaana hai। sab kabradaakhil bhasmeebhoot hue pade hain। tum yeh sab kuchh jaante ho। tumhaare mein bhi jo bahut hoshiyaar hain unko maaloom hai yeh duniya jaise bhambhor hai। sab kabradaakhil ho jaayenge। yaadav-kaurav sab kabradaakhil hue the। baaki paandavon ki vijay hui thi। vishwa par arthaat nai duniya par vijay paai kyonki tum paandav eeshvar ko jaante ho। usse preet rakhte ho। jitna jo preet rakhte hain, jitna jo yaad karte hain utni woh kamaai karte hain - aisa kabhi suna? bhaarat ka praacheen yog bahut naameegraami hai। yeh baba bhi nahin jaante the, ab sab baaten buddhi mein aa gai hain। baba kehte hain - srishti ke aadi-madhya-ant ka gyaan jo tumko sunaata hoon woh satayug mein nahin rahega। vahaan to tumhaari praalabdha ke sukh ka part jo kalpa pahle chala tha vahi chalega। yeh gyaan baap ek hi baar aakar dete hain aur ant tak dete hi rahenge। tum bhal kahaan bhi ho, shareer chhoote to shivbaaba ki yaad ho, trikaaldarsheepne ka gyaan ho। gyaan-amrit mukh mein ho, svadarshan-chakra yaad ho tab praan tan se nikle। kahaan woh bhaktimaarga ki kahaavat, kahaan yeh gyaan ki baaten। manushya jab marne par hote hain to haath mein maala dete hain। kehte hain raam-raam kaho to sadgati ho jaayegi। parantu raam kaun hai, kahaan hai - koi jaante nahin। koi raam ko, koi hanoomaan ko yaad karte hain। anekon ko yaad karna - isko bhakti kaha jaata hai। ab tum ek ko hi yaad karte ho - jo tumko gyaan de, tumhaari sadgati karte hain। achha।

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sthaai khushi mein rahne ke liye vichaar saagar manthan karna hai। nashe mein rehna hai ki ham brahmaanda aur vishwa ke maalik banne vaale hain।

2) ek baap se sachchi preet rakh kamaai karni hai। ham aatma is deh mein rathi hain। rathi samajh dehi-abhimaani banne ka abhyaas karna hai।

vardaan:- naye te naye, oonche te ooche sankalp dvaara nai duniya ki jhalak dikhaane vaale shreshtha aatma bhav

naya din, nai raat to sab kehte hain lekin aap shreshtha aatmaon ka har second, har sankalp naye te naya, oonche te ooncha, achhe te achha rahe to chaaron or se nai duniya ki jhalak dekhne ka aavaaj phailega aur nai duniya ke aane ki taiyaari mein jut jaayenge। jaise sthaapna ke aadi mein svapna aur saakshaatkaar ki leela vishesh rahi, aise ant mein bhi yahi leela pratyakshata karne ke nimitta banengi।

slogan:- maayaajeet banna hai to ek baap ko hi apna companion banaao aur usi ki company mein raho।