Murli du jour du lundi 22 mai 2023

22-05-2023 praatahmurli om shanti "baapdaada"' madhuban

“meethe bachche - baap ki madad ya poora varsa lene ke liye sage bachche bano, sage arthaat poora sannyaas kar pavitrata ki pratigya karne vaale''

prashn:- baap full merciful hai - kaise? kaun-sa raham bachchon par sada hi karte hain?

uttar:- koi bachcha kitna bhi vighna daalta, maaya ke vash ho ulta karma kar leta, lekin phir bhi agar koi bhool mahsoos karta hai to baap use sharan le kehte hain - achha, phir se trial karo। avgunon ko nikaal gunvaan bano। baap full merciful hai, kyonki jaante hain bachche aur kahaan jaayenge। sada sukhi rahen - yahi baap ki aash rehti hai।

geet:- tumhaare bulaane ko ji chaahta hai…

om shanti। meethe-meethe bachche, tumhein gop-gopiyaan bhi kaha jaata hai। satayug mein gop-gopiyaan nahin hote hain। vahaan to raajdhaani chalti hai। gop-gopiyaan sangamayug par hain jabki gopi vallabh bhi aate hain। vallabh baap ko kaha jaata hai। bachche yaad karte hain ki baba phir se aao। sabhi centres ke bachche honge। sabko pata hai ki baba is samay murli bajaata hoga। woh murli tape mein bharti hogi, likhte bhi honge। litho hogi phir hamaare paas aayegi। ham dhaarna karenge phir ham dhaarna karaayenge। yeh sab samajhte honge ki madhuban mein to gop-gopiyaan gopi vallabh se sammukh sunte honge। vo hi murli phir ham 4-5 din ke baad sunenge। aise khyaalaat chalte honge na। kehte hain - baba, aap aao to ham sadaiv muskaraane lag jaaven। jaise devtaayen sadaiv harshit rehte hain। vahaan yatha raaja raani tatha praja sab harshit rehte hain। duhkh ka naam-nishaan nahin rehta। yahaan to hai hi praja ka raajya। to bachche jaante hain baba aakar hamko padhaate hain। yahaan gareeb hi achhi reeti padhte hain। jaise ve gareeb bhi koi em.L.A., koi em.pi. ban jaate hain na। yahaan gareeb hi padh sakte hain। vaaris bhi gareeb hi bante hain। saahookaaron ko laphda bahut rehta hai। ek to dhan ka nasha, doosra phir phursat nahin milti। bali bhi nahin chadh sakte। yahaan bali chadhna padta hai tan-man-dhan sahit। saahookaaron ka hriday videeran hota hai। phurna bahut rehta hai isliye gareeb jhat bali chadhte hain। ismen bhi pahle number mein kanyaayen jaati hain। mama bhi kanya hai na। baap ki bani aur kahenge - bas, mera to shivbaaba doosra na koi। isko bali chadhna kaha jaata hai। grihastha vyavhaar mein rehte hue jaise ki vahaan nahin hain। buddhi mein shantidham, sukhdhaam hi basta hai। ab ham jaate hain sweet hom, phir sweet raajaai mein। grihastha vyavhaar mein rehte rachna ki bhi paalna karni hai, parantu shreemat se। shreemat tab mile jab bali chadhe। sarvashaktimaan ke saath yog lagaane se hi shakti milti hai। baap ka nahin bante hain to shakti nahin milegi। sage aur lage hote hain। un sannyaasiyon mein bhi sage aur lage hote hain। koi to gharbaar chhod jaakar kaphni pahante hain। woh thahre sage। koi phir followers hote hain। woh rehte hain grihastha mein। unko kehte hain sautele। sage nahin kahenge। unhein phir varsa mil na sake kyonki apvitra rehte hain। yahaan bhi koi to sage hain jo pavitrata ki raakhi baandhate hain। baaki jo pavitra nahin rehte hain unko sage kah na saken। yeh hai raajayog dvaara sannyaas। woh hai hathayog dvaara sannyaas। baba ne samjhaaya hai - kaise apne ko sannyaasiyon ke followers kahlaate hain। parantu rehte hain ghar grihastha mein। to unko vaastav mein followers va sannyaasi kah na saken। sannyaas karne ka purushaartha karne chaahte hain parantu bandhan hai। jinhonne kalpa pahle sannyaas kiya hai vahi chhodte hain। woh ho jaate hain sage aur woh lage। yahaan jo bhi baap ke bante hain vahi sage thahre। madad aur varsa bhi sage ko hi milega। lage ko madad mil na sake।

baba ne samjhaaya hai - yeh hai gyaan indra sabha। yahaan sab gyaan pukhraaj pari... hain। nau ratnon ki bhi bahut mahima hai। nau ratna ki angoothi bhi pahante hain। brahman log kehte hain yeh pahnon to tumhaari dasha badlegi। pattharon ki bhi mahima kar di hai। ve hi to tum bachche ho। jitne jo serviceable bachche hain ve vijay maala mein aate hain। oonch te oonch hai heera banaane vaala baba। unko beech mein rakhte hain। manushya to in baaton ko jaante hi nahin। nau ratna kaun hain? patthar se bhent kyon karte hain? jaise nadiyon se bhi bhent karte hain, tum ho gyaan nadiyaan। woh hai paani ki। to kehte hain - baba aao to ham sadaiv harshit rahenge। aapki murli sunkar auron ko sunaayenge। phir haan, prince-princess ban ratna jadit murli bhi bajaate hain। murli bajaane ka shauk rehta hai। shreekrishna ko bhi murli thi zaroor। jabki woh prince tha, raas karta tha। baaki gyaan murli sunaana ya bajaana to gyaan saagar ka hi kaam hai। woh gyaan murli baap aakar chalaate hain। gyaan ki baat yahaan hi hoti hai। vahaan gyaan ki baat nahin hoti hai। ab murli bajaane vaali tum bachchiyaan ho। satayug mein trikaaldarsheepne ka gyaan nahin hota। vahaan yeh knowledge praayahlop ho jaati hai। parampara nahin chal sakti। peechhe to hoti hai praalabdha। gyaan ek hi baar milta hai। abhi tum 21 janmon ke liye praalabdha pa rahe ho। praalabdha milegi phir to baba bhi paramdham mein jaakar baith jaate hain। tumko gyaan-yogbal se vishwa ka maalik banaakar ham vaani se pare ho baith jaate hain। phir vahaan mere ko koi nahin jaante। mujh rachayita aur meri rachna ko koi jaan nahin sakte। na baap ko jaante, na srishti ke aadi-madhya-ant ko jaante hain। vahaan yeh gyaan nahin rehta hai। raadhe-krishna ko vahaan yeh pata ho ki phir 14 kala banna hai to raajya, taaj ki khushi hi gum ho jaaye। yeh gyaan vahaan rehta hi nahin। baap har baat clear samjhaate hain। tum bhi sannyaasi ho, ve bhi sannyaasi hain। vo hai hathayog ka sannyaas। sannyaasi had ka ghar baar chhod jaate hain। vahaan hai shankaraachaarya aur yeh hai shivaachaarya। shivbaaba gyaan ka saagar hai na। unko aachaarya kaha jaata hai। shreekrishna aachaarya nahin। bhagwan shivaachaarya baith tum bachchon ko samjhaate hain। raajayog sikhlaate hain। woh hathayogi hain। woh raajayog sikhla na sake। yeh behad ka baap hi satayug ka raajya praapta karaane raajayog sikhlaate hain। tum ab baap ke paas aaye ho। ve janma by janma sannyaas lete hain। tum 21 janma phir sannyaas nahin lete ho। tum jaante ho yeh puraani duniya hai, ham isko thokar maarte hain।

shivbaaba ne do prakaar ki yaatra samjhaai hai - ek roohaani yaatra, doosri jismaani। supreme baap kehte hain main tumko yaatra par le jaata hoon। phir tum mrityulok mein nahin aayenge। baap hai supreme panda। unke bachche bhi pande thahre। tum ho roohaani pande, roohaani yaatra karaane vaale। yeh dhaaran karne ki baaten hain। bachche achhi reeti dhaarna kar samjhaate hain। koi phir aise bhi hain jinka yog poora nahin rehta hai। bhal gyaan ki dhaarna achhi rehti hai। yog nahin thaharta hai। gyaan mein maaya interfere nahin karti hai। yog mein maaya interfere karti hai। jaise radio mein speech karte hain to ladaai jab lagti hai to ek do ka aavaaj sunne nahin dete hain। khit-khit karte hain to yog mein maaya bhi interfere karti hai। bhaarat mein yog ka naam mashhoor hai। praacheen yog kisne sikhaaya? unhonne shreekrishna bhagvaanuvaach kah diya hai। shreekrishna to hai satayug mein phir unka naam, roop, desh, kaal badalte-badalte yeh hai antim janma। phir usmein baap pravesh kar unko yeh bana rahe hain। tum jaante ho brahman so devta bane, phir kshatriy so vaishya so shoodra banen। baap baith samjhaate hain main jo bhi tumko knowledge deta hoon woh praayahlop ho jaati hai। is dvaara sunaata hoon। to pahla number nadi brahma। mela lagta hai na - brahmaputra aur saagar par। yeh brahmaputra hai badi nadi। jo dhaarna karke karaate hain। barobar bhagwan roop badalkar aaya hai। jo niraakaar roop hai woh badal kar saakaar mein aate hain। braahmanon ka sabse oonch kul hai। baap brahma mukh kamal dvaara braahmanon ko gyaan de devi-devta dharma aur kshatriy dharma ki sthaapna karte hain। satayug-treta mein aur koi dharma hota nahin। ab sthaapna ho rahi hai। raadhe-krishna jo hain woh lakshmi-naaraayan bante hain। jinhonne bhi padhaai ki hai woh satayug mein to zaroor aayenge kyonki avinaashi gyaan ka vinaash nahin hota hai। praja to bahut banti hai na। koi chale jaate hain phir chakra lagaakar aa jaate hain। jaayenge kahaan, shama to ek hi hai। parvaane anek hain। to shama par aate rahenge। bhaaganti ho jaane vaale bhi aayenge। satguru ki ninda karaai hai phir bhi baba ke paas aate hain to samjhaaya jaata hai phir se tum yeh gyaan utha sakte ho। woh feel karte hain barobar hamaari hi bhool hai। to unko bhi sharan lena padta hai। phir unki bhi seva karenge। ant tak full raham karna hai। kitna bhi vighna daalte hain। phir bhi kahenge bhal aao, trial karo। mana nahin hai। baap hai hi full merciful। tum unke bachche ho na। kehte hain maaya ne bhatkaaya hai। phir bhi unki service ki jaati hai। sharan mein aate hain to phir uthaana hai। avgun ko nikaal gun-vaan banaana chaahiye। baap kabhi dushman nahin ban sakta। behad ka baap kahenge ki bachche sukhi raho। raham aata hai। kahaan jaayenge aur to koi jagah hai nahin, jahaan baap se varsa le saken। baap sab baaten samjhaate hain। bahut nahin dhaarna kar sakte hain to phir thoda hi sahi। achha, manmanaabhav। baap ki yaad mein raho। aatma ka svadharma hai shant। attention please, saavdhaan - apne baap ko yaad karo। baap ko yaad karne se varsa zaroor yaad aayega। aise ho nahin sakta varsa yaad na aaye। baap aur varse ko yaad karne se tum jeevanmukta bante ho। kitni sahaj baat hai। naam hi rakha hai - ‘sahaj raajayog।' yog kahne se hi moonjhate hain। yeh to baap ko yaad karna hai na।

baba kehte hain - are bachche, tum baap ko bhool jaate ho! jis baap se heere jaisa janma mila hai, tum unko bhool jaate ho! laukik baap ko kab bhoolte ho? baba ko bhoola to varsa gum। apne ko aatma nishchay kar baap ko yaad karna hai। aatma-abhimaani badle deh-abhimaani banne se dhokha khaate hain। sannyaasiyon ka hai nivritti maarga। bhaarat patit banna shuru ho jaata hai to yeh aakar marammat karte hain। apvitra banne se thaamte (rokte) hain। unmein purity ki taakat rehti hai। purity hai to pees prosperity bhi hai। kanya bhi pavitra hai, tab to unko maatha tekte hain। devtaayen pavitra hain to sab unko maatha tekte hain। satayug mein maatha tekne ki baat nahin hai kyonki sab pavitra rehte hain। apne darpan mein dekhna chaahiye ki hamaare mein koi bhoot to nahin hai? laayak bane hain lakshmi-naaraayan ko varne ke? apne ko laayak banaana hai। tum bachche jaante ho oonch te oonch hai shivbaaba। brahma, vishnu, shankar aur lakshmi-naaraayan aadi sabse shivbaaba oonch hai। ek shivbaaba hi heere jaisa hai। baaki is samay sab tamopradhaan kaudi jaise hain। mahima saari ek hi baap ki hai। saare srishti ko svarga banaana - yeh baap ka hi kaam hai। achha।

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap par poora bali chadh, baap ka saga bachcha ban baap se poora varsa lena hai। poora pavitra banna hai।

2) apne ko darpan mein dekh bhooton ko nikaal gunvaan banna hai। baap ki murli sun dhaaran kar auron ko karaani hai।

vardaan:- parmaartha ke aadhaar par vyavhaar ko sahaj banaane vaale bhaagyavaan aatma bhav

aadhaakalpa vyavhaar mein, bhakti mein, dharma ke kshetra mein sabmen mehnat ki aur abhi mehnat se chhoot gaye। abhi vyavhaar bhi parmaartha ke aadhaar par sahaj ho gaya। nimitta maatra kar rahe ho। nimitta maatra karne vaale ko sada sahaj anubhav hoga। vyavhaar nahin hai lekin khel hai। maaya ka toofaan nahin lekin drama anusaar aage badhne ka tohpha hai। to mehnat chhoot gai na। aise mehnat se apne ko bachaane vaali shreshtha bhaagyavaan aatma hoon -isi smriti mein raho।

slogan:- jeevan mein madhurta ka gun dhaaran karna hi mahaanta hai।