Murli du jour du dimanche 28 mai 2023

28-05-23 praatahmurli om shanti ''avyakt-baapdaada'' revise 23-12-94 madhuban

apne teen swaroop sada smriti mein rahen -

1- sangamayugi brahman, 2- brahman so farishta aur 3- farishta so devta

aaj baapdaada chaaron or ke bachchon ke teen roop dekh rahe hain। sabse shreshtha swaroop hai brahman aur brahman so farishta aur farishta so devta। brahman swaroop, farishta swaroop aur devta swaroop। brahman swaroop ki visheshta sarva shaktiyon sampanna swaroop ki hai kyonki brahman arthaat maayaajeet। to sarva shakti sampanna banna hi maayaajeet banna hai। pahla swaroop brahman svayan ko dekho ki brahman swaroop ki visheshta (sarva shaktiyaan) dhaaran hui hain? sarva shaktiyaan hain va koi-koi shakti hai? agar ek shakti bhi kamjor hai va kam hai to brahman swaroop ke badle baar-baar kshatriy arthaat yuddha karne vaale ban jaate hain। kshatriy ka kartavya hai yuddha karna aur brahman ka kartavya hai sada aur sahaj maayaajeet banna। brahman arthaat vijayi, sada sarva shaktiyon arthaat sarva shastron se sampanna hain। aur kshatriy arthaat kabhi vijayi aur kabhi haar khaane vaale kyonki shaktiyaan milte hue bhi dhaaran nahin kar sakte isliye samay aur paristhiti pramaan sada vijayi nahin ban sakte। brahman swaroop arthaat sada taaj, takhta aur tilakdhaari। vishwa kalyaan ki zimmedaari ke taajdhaari, sada svatah smriti ke tilakdhaari, sada baap ke dil takhtansheen। kshatriy ekras, achal, adol na hone ke kaaran kabhi achal, kabhi halchal, kabhi adhikaari aur kabhi baap se shakti maangane vaale royal bhikhaari। brahman arthaat sada alaukik mauj ke jeevan mein rahne vaale। sada roohaani seerat aur soorat vaale। kshatriy arthaat kabhi kaise, kabhi kaise। to apne se poochho main kaun? kabhi brahman, kabhi kshatriy ya sada brahman jeevan ki visheshtaaon se sampanna hain? lakshya brahman jeevan ka hai lekin kabhi brahman, kabhi kshatriy - aise lakshan to nahin hain? lakshya aur lakshan samaan hain va antar hai? bol aur karma samaan hain va antar hai? sabhi brahmaakumaar-brahmaakumaari kahlaate ho na? ki kshatriy kahlaate ho? chandravanshi kahlaana bhi pasanda nahin karte na? koi kahe aap chandravanshi hain to pasanda aayega? nahin। aur karma kya hai? jis samay yuddha mein lage hue ho us samay ka photo apna nikaalo। photo nikaalne ka shauk bahut hota hai na? to apna photo nikaalna aata hai ya doosron ka photo nikaalna aata hai? to apna photo nikaalo ki main kaun hoon? agar photo bhi koi ka achha nahin nikalta hai to pasanda nahin karte ho na? to saare din mein va kitne baari samay prati samay brahman ke bajaay kshatriy ban jaate hain - ye check karo aur check karke change karo। sirf check nahin karna। check kiya jaata hai change karne ke liye। to sabhi ke paas parivartan shakti hai? ki koi ke paas nahin hai? ye to bahut achhi khushi ki baat hai ki sabhi ke paas hai। ab samay par kaam mein lagaana aati hai ya kabhi nahin bhi lagti hai? kyonki shakti hai to samay par kaam aave। dushman hai hi nahin aur shastra bahut badhiya hain mere paas aur jab dushman aave to shastra kaam mein hi nahin aaven, to kya usko shaktishaali kahenge? sirf ye check nahin karo ki shakti hai lekin karma mein samay pramaan jo shakti chaahiye vahi shakti kaarya mein lagaana aata hai? ki dushman vaar kar deta, peechhe shakti yaad aati hai? to brahman jeevan ki visheshtaaon ko check karo। brahman so farishta banega। kshatriy so farishta nahin।

doosra swaroop hai farishta। sabhi ko farishta banna hi hai na? ki farishta banna mushkil hai? sahaj hai ya mushkil? ya kabhi mushkil, kabhi sahaj? to farishta swaroop ki visheshta sabhi jaante bhi ho ki farishta arthaat double light? to double light hain? ki kabhi bojh uthaane ko dil karti aur utha lete ho? va uthaane nahin chaahte ho lekin maaya sir par tokri rakh deti hai? maaya apni artificial temporary shakti aisi dikhaati hai jo majboori se bhi bojh uthaana na chaahte bhi utha lete hain kyonki kamjor hone ke kaaran kamjor sada paraadheen hota hai। to maaya bhi adheen bana deti hai। adhikaareepan bhool jaata hai aur adheen ban jaate। us samay bhaasha kya hoti hai? chaahte to nahin hain lekin pata nahin…। har baat mein ‘pata nahin', ‘pata nahin' kehte rahenge। adhikaari arthaat sada svatantra aur adheen arthaat sada parvash। to parvash kabhi bhi mauz ki jeevan mein nahin rah sakte। brahman arthaat mauz ki jeevan। agar koi bhi samay mauj ke bajaay moonjhate ho ye kya hai, ye kaisa hai, kya yahi hota hai... to ye mauj nahin, ye moonjhane ki jeevan hai। agar koi bhi samay mauj ki kami anubhav karte ho to phir se ye paath pahla yaad karo ki main kaun hoon? sirf aatma nahin lekin kaun-si aatma hoon? iske kitne javaab aayenge? lambi list hai na! roz ki murli mein ‘main kaun' ka bhinna-bhinna paath padhte rehte ho, sunte rehte ho।

to farishta arthaat double light। light arthaat halka-pan। halkaapan ka arth hai sirf paristhiti ke samay halka nahin lekin saare din mein svabhaav, sanskaar, sambandh, samparka mein light rahe? vaise theek hain lekin svabhaav-sanskaar mein bhi agar halkaapan nahin hai to farishta kahenge? aur halke ki nishaani hai halki cheez sabhi ko pyaari lagti hai। koi bojh vaali cheez aapko deve to pasanda karenge? aur halki badhiya cheez ho to pasanda karenge na? to jo svabhaav, sanskaar, sambandh, samparka mein halka hoga uski nishaani vo sarva ke pyaare aur nyaare honge kyonki brahman svabhaav hai, alag svabhaav nahin। brahman arthaat sabke dil pasanda svabhaav-sanskaar va sambandh-samparka vaale ho। majority 95 pratishat ke dilapsanda zaroor ho itni result zaroor honi chaahiye। 5 pratishat abhi bhi margin de rahe hain, ant tak nahin hai lekin abhi de rahe hain। 95 pratishat sarva ke dil pasanda arthaat sarva se light। aur vo halkaapan bol, karma aur vritti se anubhav ho। aise nahin, main to halka hoon lekin doosre mere ko nahin samajhte, pahchaante nahin। agar nahin pahchaante to aap apne will power se unhon ko bhi pahchaan do। aapke karma, vritti usko parivartan kare। ismen sirf parivartan karne mein sahanshakti ki aavashyakta hoti hai। aur farishta arthaat jiska puraani deh aur puraani duniya se rishta nahin। ye sabhi ko yaad hai na? ki abhi bhi vo raha hua hai? puraani deh se lagaav hai kya? deh ke sambandh se halke ho gaye ho ki nahin? kaaka, chaacha, maama, usse nyaare ho gaye ho na? ki abhi bhi hain? nyaare aur pyaare hain? pyaare hain lekin nyaare hokar ke pyaare bante hain, ye galti ho jaati hai। ye miss ho jaata hai। ya to nyaare ho jaana sahaj lagta hai ya to pyaara hona sahaj lagta। lekin ye deh ke sambandh kaaka, chaacha, maama, ye phir bhi sahaj hain। sahaj hain ya thoda-thoda svapna mein, sankalp mein aa jaata hai? jab brahman parivaar mein koi paristhiti aati hai to chaacha, kaaka, maama yaad aate hain? baap-daada dekhte hain ki paristhiti ke samay kai aatmaon ko brahman parivaar ke bajaay laukik sambandh jaldi smriti mein aata hai। paristhiti kinaare ke bajaay sahaara anubhav karaati hai। jab marjeeva ban gaye to agle janma ke sambandhi kaaka, chaacha, maa, baap, yaad hain kya? svapna mein bhi aate hain kya? to sambandh, janma badal gaya na। to farishta arthaat puraane se rishta nahin, yahi paribhaasha bolte ho na? phir samay par kahaan se nikal aate hain? toota hua rishta jud jaata hai? mare hue se jinda ho jaate ho? farishta arthaat puraane se rishta nahin, sab naya। baapdaada ne dekha ki farishta banne mein jo rookaavat hoti hai uska kaaran ek pahli seedhi hai deh bhaan ko chhodna, doosri seedhi jo aur sookshm hai vo hai deh abhimaan ko chhodna। deh bhaan aur deh abhimaan। deh bhaan phir bhi common cheez hai lekin jitne gyaani tu aatma, yogi tu aatma bante hain utna deh abhimaan rookaavat daalta hai। aur abhimaan anek prakaar ka aata hai apne buddhi ka abhimaan, apne shreshtha sanskaar ka abhimaan, apne achhe svabhaav ka abhimaan, apni visheshtaaon ka abhimaan, apni koi vishesh kala ka abhimaan, apni seva ki saphalta ka abhimaan। ye sookshm abhimaan deh bhaan se bhi bahut maheen hain। abhimaan ka darvaaja to jaante ho na? main-pan, meraapan ye hai abhimaan ke darvaaje। to farishta ka arth ye nahin ki sirf deh bhaan va deh ke aakarshan se pare hona va deh ke sthool sambandh se pare hona, lekin farishta arthaat deh ke sookshm abhimaan ke sambandh se bhi nyaare hona। aur abhimaan ki nishaani jahaan abhimaan hota hai vahaan apmaan bhi jaldi feel hota hai। jahaan abhimaan hota hai vahaan apmaan ki feeling bahut jaldi hoti hai kyonki ‘main' aur ‘mere' ke darvaaje khule hue hote hain। farishte ka yathaartha swaroop hai deh bhaan aur deh ke sambandh se, deh abhimaan se nyaara। agar koi gun hain, koi shakti hai to daata ko kyon bhool jaate hain? aur doosri baat isse sahaj nyaare hone ka raasta va vidhi bahut sahaj hai, ek akshar hai। ek akshar mein itni taakat hai jo deh abhimaan aur deh bhaan sada ke liye samaapta ho jaata hai। vo ek shabd kaun-sa hai? karnakraavanhaar baap kara raha hai। ‘karnakraavanhaar' shabd bhaan aur abhimaan donon ko mita deta hai। ek shabd yaad karna to sahaj hai na? aur saari points bhool bhi jaao, bhoolna to nahin hai lekin agar bhool bhi jaao to ek shabd to yaad kar sakte ho na? karnakraavanhaar baba hai। to dekho, farishte jeevan ka anubhav kitna sahaj anubhav hota। brahma baap farishta bana kis aadhaar se? sada karnakraavanhaar ki smriti se samartha ban farishte bane। follow father hai na? ya follow maaya hai? kabhi maaya bhi mother father ban jaati hai, badi achhi paalna aur praapti karaati hai। lekin vo sab hai dhokhe ki praapti। pahle praapti, phir dhokha। parakhne ki shakti to hai na? maaya hai ya baap hai isko samay par parakhna hai। dhokha khaakar parakhna, yeh koi samajhdaari nahin hui। dhokha khaakar to sab samajh jaate hain lekin gyaani tu aatma pahle yeh parakhkar svayan ko bacha leta hai। to samjha farishta kisko kehte hain?

teesra hai farishta so devta। abhi devta banna hai ya bhavishya mein banenge? devta arthaat sarva gunon se saje-sajaaye। ye divyagun sangam ke devta jeevan ke shrringaar hain। is samay divya gunon se saje-sajaaye hote ho tab hi bhavishya mein sthool shrringaar se saje-sajaaye rehte ho। to devta arthaat divyagunon se saje-sajaaye। aur doosra devta arthaat dene vaala। levta nahin, lekin devta। to master daata ho? va kabhi levta, kabhi devta? check karo ki divya gunon ka shrringaar sada rehta hai va kabhi koi shrringaar bhool jaata hai, kabhi koi shrringaar bhool jaata hai? sampoorn sarva gun sampanna... yahi devta jeevan ki nishaani hai। ye gun hi gahne hain। to dekho ki brahman swaroop ki sarva shaktiyaan, pharishte swaroop ki double light sthiti aur devta swaroop ki daataapan ki nishaani aur divya gunon sampanna bane hain? teenon swaroop anubhav karte ho? jaise baap ke teen sambandh baap, shikshak, sadguru sada yaad rehte, aise ye teen swaroop sada yaad rakho। samjha? banna to aapko hi hai ya aur koi aane vaale hain? aapko hi banna hai na? aaj brahman, kal farishta aur kal devta। apne farishte swaroop ko gyaan ke darpan mein dekho। farishte sada udte rehte hain aur message dete rehte hain। farishta aaya, sandesh diya aur uda। to vo pharishte kaun hain? aap hi ho na? falak se kaho ham hi the, ham hi hain aur ham hi rahenge। pakka hai na? isko kaha jaata hai nishchaybuddhi vijayi। kshatriy ho va vijayi ho? kshatriy koi to banega? vo doosre banenge! to aap brahman ho। chalte-chalte kabhi kshatriy nahin banna। agar baar-baar kshatriy bante rahenge, yuddha karte rahenge to yuddha ke sanskaar le jaane vaale kahaan pahunchenge? chandravanshi mein ya sooryavanshi mein? to chandravanshi to pasanda nahin hai na, ki kabhi-kabhi ho gaye to bhi harja nahin? to sab kaun ho? brahman? pakke brahman ho ya thode-thode kachche? shaktiyaan pakki hain? paandav pakke hain? agar pakke hain to sada khushkhabri ke patra aaven। maaya aa gai, ye ho gaya, pata nahin kya ho gaya, kaise ho gaya - ye sankalp mein bhi nahin ho। baap to kehte hain svapna maatra bhi nahin। svapna mein bhi kyon, kya nahin, aise pakke ho? shaktiyaan maha pakki ho? kaho, paandav pakke to ham maha pakke kyonki shaktiyon ko hi nimitta banaaya hai। to nimitta vaale hi kachche-pakke honge to auron ka kya haal hoga! paandav backbone hain। backbone banna achha lagta hai na? ya saamna karna achha lagta hai? backbone banna achha hai, safe ho bahut, nahin to maar khaate। achha।

sabhi apne sweet hom mein pahunch gaye। sankalp tha jaana hai, jaana hai aur abhi phir kya sankalp hai? abhi bhi jaana hai na? seva arth ja rahe hain isliye khushi-khushi se jaate hain। seva par jaayenge ya dukaan par jaayenge, ghar mein jaayenge, daphtar mein jaayenge? chaahe daphtar ho, chaahe ghar ho, lekin sabhi seva ke sthaan hain। sevaadhaariyon ki har jagah seva hai। to madhuban mein aana aur umang-utsaah ka khajaana bharna aur phir seva par jaana। khushi-khushi se jaate ho na? ki majboori se jaate ho? seva maana khushi। hisaab-kitaab hai, karz chukaane ja rahe hain, aise nahin। farja chukaane ja rahe hain। ghar mein bagule bahut hain। agar bagule nahin honge to gyaan kisko denge? hans ko hans banaayenge kya? bagulon ko hi to hans banaayenge na? to kya yaad rakhenge? brahman so farishta, farishta so devta। pakka rahega na? ki train mein jaate-jaate ek bhool jaayega? apne sthaan par jaate-jaate baaki ek rah jaaye aise to nahin hoga na? achha।

chaaron or ke sarva brahman so farishta, farishta so devta, teenon swaroop ke smriti swaroop aatmaon ko, sada ek shabd ‘karnakraavanhaar' ki smriti se svayan ko double light banaane vaale shreshtha aatmaon ko, sada devta arthaat daata ban dene vaale, sarva khajaanon se sampanna aatmaon ko, sada vardaanon ko karma mein laane vaale karmayogi aatmaon ko baapdaada ka yaad-pyaar aur namaste।

vardaan:- divya buddhi dvaara divya siddhiyon ko praapta karne vaale siddhi swaroop bhav

jaisa samay us vidhi se divya buddhi ko use karo to sarva siddhiyaan aapki hatheli par hain। siddhi koi badi cheez nahin hai sirf divya buddhi ki saphaai hai। jaise aajkal ke jaadoogar haath ki saphaai dikhaate hain, yeh divya buddhi ki saphaai sarva siddhiyon ko hatheli mein kar deti hai। aap brahman aatmaon ne sab divya siddhiyaan praapta ki hain isliye aapki moortiyon dvaara aaj tak bhi bhakta siddhi praapta karne ke liye jaate hain।

slogan:- jinke paas sarvashaktimaan baap ki sarvashaktiyaan hain unki haar kabhi ho nahin sakti।