Murli du jour du mardi 6 juin 2023

06-06-2023 praatahmurli om shanti "baapdaada"' madhuban

“meethe bachche - ashareeri banne ki mehnat karo, ashareeri arthaat koi bhi daihik dharma nahin, sambandh nahin, akeli aatma baap ko yaad karti rahe''

prashn:- tum bachchon mein 100 percent bal kab aayega, uska purushaartha kya hai?

uttar:- tum bachche jab yaad ki daudi lagaate antim samay par pahunchenge, tab 100 percent bal aa jaayega, us samay kisko bhi samjhaayenge to phauran teer lag jaayega। iske liye dehi-abhimaani banne ka purushaartha karo, apne dil darpan mein dekho ki puraane sab khaate yaad dvaara bhasma kiye hain!

geet:- tu pyaar ka saagar hai …

om shanti। ab bachche jaante hain, alpha (baap) aaya hua hai। gaayan bhi hai na - baap se ek second mein jeevanmukti arthaat svarga ki baadshaahi milti hai kyonki baap hai svarga ka rachayita। second mein jeevanmukti baap se hi milti hai। manushya ko manushya se nahin milti। bachcha paida hua aur vaaris bana। pahle-pahle jab koi aate hain to unse form bharaaya jaata hai ki aatma ka baap kaun hai? kaha bhi jaata hai jeevaatma, punya aatma.....। aise nahin kaha jaayega - jeev paramatma, paap paramatma, punya paramatma। nahin, mahaatma, punyaatma kaha jaata hai। gaaya bhi jaata hai aatma paramatma alag rahe bahukaal.... to zaroor paramatma ko hi aana hai duhkh se liberate karne। to pahle-pahle koi aaye to unse form bharaaya jaata hai - tumhaari aatma ka baap kaun hai? shareer ka baap kaun hai? do cheej alag-alag hain - main aur mera। main aatma, mera shareer। aham aatma ka rahne ka sthaan kahaan hai? phir tumhaari aatma ka baap kaun hai? aise nahin kaha jaayega paramatma ka baap kaun hai? pahle alpha ko jaanna hai। woh hai truth। gyaan ka saagar। woh sabka baap hai। koi manushya, judge aadi ko bhi pata nahin ki ham aatma hain। aatma hi shareer ke organs dvaara kehti hai - main judge hoon, main surgeon hoon। aatma-abhimaani ek baap hi banaate hain। abhi tum jaante ho ham aatma hain। baaki yeh sab shareer ke sambandh hain। shareer ke sambandh mein bhi yeh maa, yeh baap.... lagte hain। aatma ke sambandh mein bhaai-bhaai hain। pahle to yeh samjhaana chaahiye। gaaya bhi jaata hai second mein jeevanmukti ka varsa। jeevanmukti kaun dene vaala hai? satayug mein hai jeevanmukti, kaliyug mein hai jeevan-bandha। yeh bhi samjhaana pade। to yahaan form bharaane ka kaayda bada achha hai।

tum bachche jaante ho ham aatmaon ke baap ka yahaan yaadgaar hai। woh niraakaar ham aatmaon ka baap hai। ham saakaar hain। niraakaar ka bhi yaadgaar hai। to zaroor aaya hoga na। patit ko paavan banaane vaala, puraane ko naya banaane vaala। duniya nai se phir puraani hoti hai। duniya ek hi hai। zaroor duniya ka rachayita ek hoga, do nahin ho sakte। god is creator। woh puraani duniya ko naya banaate hain। nai duniya athva bhaarat svarga tha। god is one। world is one। satayug tha, ab kaliyug hai। praacheen bhaarat tha to zaroor nai duniya rachne vaale ne bhaarat ko naya banaaya hai। pahle jab koi aate hain to unko yeh raaz samjhaana hai। tum aatma ho, aatma punarjanma leti rehti hai। baap aakar dehi-abhimaani banaate hain। main judge hoon, barrister hoon athva main Christian dharma ka hoon। yeh sab shareer ke dharma hain। aatma ashareeri hai to koi sambandh nahin hai। koi dharma nahin hai। aatma alag karmaateet ho jaati hai। phir naye sir maa-baap aadi sambandh bante hain। chola badla, part badla, maa-baap sab naye ban jaate hain। aatma punarjanma leti rehti hai। vaastav mein aatma niraakaar hai, niraakaari duniya mein rehti hai। phir aatma shareer dhaaran karti hai to kehte hain yeh mera naam roop hai। ab baap baith bachchon ko samjhaate hain - tum apne ko aatma samjho। tumko vaapis jaana hai। tumne 84 janmon ka part bajaaya, tum barrister bane, raaja bane। ab tum vishwa ke maalik bante ho। aatmaon se baat parampita paramatma hi kar sakte hain। yeh baaten koi ki buddhi mein nahin hain। woh to kah dete aatma so paramatma hai। baap aakar srishti ke chakra ka raaz samjhaate hain। abhi tum jaante ho ki barobar hamne 84 janmon ka chakra lagaaya hai। ab yeh antim janma hai, vaapas ghar jaana hai। manushya koshish bhi muktidhaam mein jaane ki karte hain। ham aatma muktidhaam ki rahvaasi hain। parantu deh-abhimaan hone ke kaaran jaante nahin। ham aatma niraakaari duniya mein rehte hain। vahaan se aaye hain part bajaane। ab bhagwan ko yaad karte hain, bhagwan ke paas jaane ke liye। to pahle-pahle yeh samjhaana hai - aatma aur shareer do cheezen hain। aatma mein man-buddhi hai, chaitanya hai। aatma avinaashi hai। shareer to vinaashi hai। sab aatmaon ka baap woh niraakaar parampita paramatma hai knowledgeful। unko hi geeta ka bhagwan kaha jaata hai। sab bhakton ka pyaar hai, pyaar ke saagar paramatma se। bhakton ko kitna khainchate hain। bhagwan to ek hona chaahiye। itne sab bhakta hain। sabhi patit hain। patit-paavan ko yaad karte hain, to zaroor ek niraakaar hoga na। baaki sab unki rachna hain। brahma, vishnu, shankar bhi rachna hain। manushya srishti bhi rachna hai। oonch te oonch baap paramdham ka rahne vaala hai। jaise aatma star hai, vaise parampita paramatma bhi star hai।

bachchon ko samjhaaya hai world bhi ek hai, unko repeat karna hai। jo bhi dharma hain sabko chakra lagaana hai। sab actor paartadhaari hain। koi ka bhi part badal nahin sakta। to part bajaana hi hai। pahle-pahle yeh samjhaana bahut zaroori hai ki aatma ka baap kaun hai? kehte hain O god father। yeh kisne kaha? aatma shareer dvaara bolti hai। aatma ka baap parampita paramatma hai। yeh hai mukhya baat। tumhein koi se jaasti debate aadi nahin karni hai। hai hi second mein jeevanmukti। baap bachchon ko samjhaate hain - bachche, tum dehi-abhimaani bano। is samay yeh patit duniya hai, god father ko na jaanne kaaran orphan ban pade hain। satayug mein to praalabdha bhogte hain। vahaan baap ko yaad karne ki koi darkaar hi nahin। duniya ko yeh pata nahin ki bhaaratvaasiyon ko baap se praalabdha milti hai। bhaarat svarga ban jaata hai। narka banaane vaali hai maaya (raavan)। bhaarat ko naye se phir puraana hona hi hai। samjho makaan ki aayu 100 varsha hogi to 50 varsha ke baad puraana kahenge। vaise duniya naye se puraani banti hai। phir nai kaun banaayenge? repeat kaise hoti hai? duniya paavan thi, kisne to banaaya hoga। patit-paavan ek hi baap hai। vahi paavan banaayenge। patit kaun banaate hain? paavan kaun banaate hain? yeh koi bhi samajh nahin sakte। abhi tum baap ke bane ho। baap maana baap। baap ko aadha pauna thode-hi maana jaata hai। parantu maaya deh-abhimaan mein le aati hai। mehnat saari ashareeri ban baap ko yaad karne mein hai। nahin to maaya badi dushman hai। yaad ke bal se hi tum raajya lete ho। yaad dvaara hi tum baap se varsa lete ho। yaad ka hi bal hai। baap kehte hain deh sahit sabhi sambandhon ko bhool mere ko yaad karo kyonki mere paas vaapis aana hai। satayug hai jeevanmukta, kaliyug hai jeevan bandha। paanch vikaaron roopi raavan ka bandhan hai। vahaan yeh hota nahin। baap aakar liberate karte hain।

tum jaante ho - bhaarat mein supreme pees-prosperity thi। ab nahin hai। to zaroor supreme father ne sthaapan kiya hoga। aaya hoga। sangam par aakar bhaarat ko jeevanmukta banaate hain। baaki sab dharma to by-plots hain। yeh bhaarat old hai। naye bhaarat mein devi-devtaaon ka raajya tha, ek dharma tha। usko svarga kaha jaata hai। to pahle-pahle baap ka parichay dene se phir argue nahin karenge। baap to sat hi bataate hain। unki hai shreemat। next hai brahma ki mat। zaroor baap se brahma ko mat milti hai। brahma ab raat mein hai। din mein tha। brahma ka din aur raat to brahmaakumaar aur kumaariyon ka bhi din aur raat। prajaapita brahma ki raat to zaroor bachchon ki bhi raat hogi। baap samjhaate hain main aata hoon, brahma ke mukh se pahle-pahle braahmanon ko rachta hoon। brahman varna chaahiye। yeh yagya racha hai na। shreekrishna yagya nahin kahenge। yeh hai rudra gyaan yagya। rudra maala। baap shiv ne is samay yagya racha hai। yeh baap baith padhaate hain। bachche, ham tumko nar se naaraayan, raajaaon ka raaja banaata hoon। yeh hai raajayog। shreekrishna ko paramatma nahin kahenge। paramatma raajayog sikhaate hain jisse tum shreekrishna ke samaan bante ho। mukhya baat hai pahle-pahle bachchon ko dehi-abhimaani banna hai। nahin to kisko teer laga nahin sakenge। dehi-abhimaani ho baap ko yaad karne se hi bal milega। jab tum achhi reeti pahalvaan ho jaayenge to bheeshma pitaamah aadi ko baan lagenge। dheere-dheere hona hai। abhi tumhaare mein bal aata jaata hai। ant tak 100 percent banna hai। daudi lagaani hai। abhi tum padh rahe ho। bahut pahalvaan ho jaayege। samjhaana chaahiye tum to jeev aatma ho, paramatma to father ek hai। phir tum log aatma so paramatma kyon kehte ho? patit-paavan paramatma to ek hi hai। tum to punarjanma lene vaale ho। paramatma ko to apna shareer nahin hai। woh hai rudra shiv। manushya ko paramatma kah nahin sakte। aatma ke shareer ka naam padta hai। aatma to sabki ek jaisi hai। kahaan aatma ne barrister ka shareer liya hai। baaki aise nahin aatma kutta, billi aadi banti hai। baap kehte hain - laadle bachche, manushya, manushya hi bante hain। jaanavron ki variety alag hai। is samay manushya jaise jaanvar se bhi badtar hain। maaya ne khaana kharaab kar diya hai drama anusaar, ab baap aakar khaana aabaad karte hain।

paramatma ko maat-pita bhi bhaaratvaasi kehte hain। baahar vaale kehte hain O god father। achha, father hai to saath mein mother bhi honi chaahiye। Eve kehte hain। parantu woh kaun hai? Eve kisko kaha jaaye? mama ko Eve nahin kahenge। mama to jagdamba hai। Eve inko (brahma) hi kahenge kyonki inke mukh dvaara rache, tab to tum maat-pita siddha ho। ek ko hi maat-pita kaha jaata hai। jagat amba ki bhi maa honi chaahiye। woh bhi human hai। yeh sab baaten dhaaran tab hon, jab nirantar dehi-abhimaani banne ka purushaartha kare। yaad nahin to dhaarna ho nahin sakti। maaya badi jabardasta hai, yaad nahin karenge to ghoonsa maarti rahegi। das-baarah varsha vaale ko bhi maaya ghoonsa maar deti hai। munh phira deti hai। bhool jaate hain। phir kehte hain takdeer mein nahin tha। geet hai na - aaye hain takdeer bana karke.. kaunsi takdeer banaakar aaye ho? lakshmi ko varne ki। baapdaada kehte hain dil darpan mein dekho - tum laayak ho? baap misal meethe bane ho? baap kehte hain dehi-abhimaani bano। jitna mujh baap ko yaad karenge, utna jama hoga। yaad nahin karenge to jama nahin hoga। yaad se hi puraana khaata bhasma hota jaayega। yog agni maana yaad। aham aatma paramatma ko yaad karti hain। baap bhi kehte hain apne ko aatma nishchay kar mujhe yaad karo। aatma so paramatma kehna bhool hai। paramatma kabhi punarjanma nahin lete hain। tum to sada punarjanma lete ho। mera janma divya alaukik hai। main saadhaaran tan mein pravesh karta hoon। nahin to brahman kahaan se aayen। prajaapita brahma bhi bujurga chaahiye। chhota bachcha to nahin chaahiye। raadhe-krishna ko chhota hi dikhaate hain। chhote bachche ko itne sab prajaapita kaise kah sakte hain। tum maat-pita shreekrishna ko kaise kahenge। abhi parampita paramatma guide bankar aaya hai, sab aatmaon ko le jaayenge। baap to achhi reeti samjhaate hain। pahle-pahle form bharaao। mool baat hai geeta ka bhagwan kaun hai? yeh yagya kisne racha? rudra yagya va gyaan yagya kahenge। paramatma to hai gyaan saagar, sabka father। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dehi-abhimaani ban, deh ke sab dharma bhool ham aatma bhaai-bhaai hain - yeh pakka karna hai। baap misal meetha banna hai।

2) dehi-abhimaani ban baap ka parichay dena hai। second mein jeevanmukti ka varsa baap se milta hai। debate kisse bhi nahin karni hai।

vardaan:- himmat aur utsaah dvaara har kaarya mein saphalta praapta karne vaale mahaan shaktishaali aatma bhav

bhakti mein kehte hain - himmat, utsaah dhool ko bhi dhan bana deta hai। aapmen yadi himmat aur utsaah hai to doosre bhi aapke sahayogi ban jaayenge। dhan ki kami hogi to utsaah kahaan na kahaan se dhan ko bhi kheenchakar laayega, saphalta ko bhi kheenchakar laayega। to jo nimitta mahaan aatmaayen hain unka kaam hai svayan utsaah mein rehna aur doosron ko utsaah dilaana। jab abhi aap aise utsaah mein rahe ho tab jad chitron mein sada muskaraata hua, shaktishaali chehra dikhaate hain।

slogan:- bhaagyavaan aatma woh hai jis par baapdaada ke sneh ki chhatrachhaaya hai।