Murli du jour du lundi 19 juin 2023

19-06-2023 praatahmurli om shanti "baapdaada"' madhuban

“meethe bachche - mukh mein muhalra daal lo arthaat apne shanti svadharma mein sthit ho jaao to maaya kuchh bhi kar nahin sakti''

prashn:- ek shivbaaba hi bholaanaath hai, doosra koi bhi bholaanaath nahin ho sakta - kyon?

uttar:- kyonki ek shivbaaba hi hai, jise apne liye koi bhi tamanna (ichchha) nahin। woh aakar bachchon ka sevaadhaari bante hain। bachchon ko maaya ki gulaami se chhudaate hain। har bachche ko aap samaan master gyaan saagar banaate hain। gyaan ratnon se jholi bharte hain। aisa nishkaam sevaadhaari doosra koi bhi ho nahin sakta isliye bholaanaath ek shivbaaba ko hi kahenge।

geet:- bholaanaath se niraala …

om shanti। bhakti maarga mein jo hokar gaye hain, unki mahima gaate hain ki aisa tha। jo yahaan hain, unko kahenge ki aise hain। shareer chhod gaye to kahenge-aisa tha। zaroor paramatma ki bhi mahima karte hain। nahin to mahima kyon hoti। abhi practical mein hain। sab bhakton ka bhagwan ek hai। bhakton ka rakshak va bhakton ko sadgati dene vaala, usko hi jaadoogar kahenge। gaaya bhi jaata hai sarva ka sadgati-daata। sarva ko sadgati abhi milti hai। nambarvaar jo variety dharma vaale manushya hain, sabko gati-sadgati dete hain zaroor। sab manushyamaatra muktidhaam mein jaate hain zaroor। phir aate hain satopradhaan mein। nambarvaar hi aayenge na। pahle devtaayen, phir kshatriy, phir vaishya... aayenge। varna badlenge zaroor। koi achha kaam karke jaate hain to unki mahima karenge। woh to alpakaal ke liye mahima chalti hai kyonki bachche jaante hain - vinaash saamne khada hai। sabse jaasti mahima unki hoti hai, jo pahle-pahle aate hain। bhakti maarga mein pahle-pahle shivbaaba ki hi pooja shuru hoti hai। abhi hokar jaate hain। inka gaayan poojan phir bhakti-maarga mein hota hai। satayug mein to bhakti hoti nahin। unhon ko yeh bhi pata nahin hota ki pahle kya tha athva satayug ke baad treta hoga। ismen buddhi se kaam lena hota hai। bhakti maarga shuru hota hai dvaapar se। jo buddhivaan bachche hain woh achhi reeti samajh sakte hain। jinko gyaan ki kanthi padi hui hai। hain sab parrots (tote)। koi ko achhi kanthi rehti hai, koi to kuchh bhi samajhte nahin hain। kabootar hain। tote ko sikhlaaya jaata hai, woh repeat karte hain। kabootar seekh nahin sakte hain। amarnaath mein kabootar dikhaate hain। kabootar sirf paigaam pahunchaate hain। tote jo suna woh repeat karte hain। kabootar repeat nahin kar sakte। yahaan bhi aise hain jo sunkar repeat nahin kar sakte, unko kabootar kahenge। is samay anusaar human tote bhi hain aur human kabootar bhi hain। is samay ke jo bhi manushya hain, jo kuchh bolte hain - woh koi kaam ka nahin।

baap hai roop-basanta। baba ne samjhaaya hai inka koi bada roop nahin hai। koi poochhe shiv baba ka roop kya hai? to samjhaana chaahiye - shivbaaba ka roop aise hai jaise aatma ka hai। jaisa baap vaise bachche। aatma koi chhoti-badi nahin hoti hai। na baap koi bada hai। woh hai parampita param aatma। vahi hamko samjhaate hain। unka naam hi hai bholaanaath। woh bahut bholaanaath hai। apne liye ek kaudi ki bhi tamanna nahin rakhte hain। bachche nishchay karte hain parampita paramatma ne is shareer dvaara samjhaaya hai। organs bigar to aatma bol na sake। baap khud baith samjhaate hain। kehte bhi hain ki paramatma aate hain, unka nandeegan bhi hai। unhonne bail rakh diya hai। jaanvar to nahin ho sakta। aise thode-hi hai ki chhalaang lagaakar bail par chadhte hain। kehte bhi hain bhaageerath, bhaagyashaali rath। parantu koi ko bhi pata nahin hai। woh patit-paavan kaise aate hain, narka ko svarga banaane zaroor aaya hoga, tab gaate hain। bhakti bhi pahle-pahle shivbaaba ki karenge। number one vaastav mein sachchi mahima unki hi hai। ab to kutte-billi aadi sabki mahima karte rehte hain। nandeegan banaate hain। bail ko lekar ghoomte hain। ab yeh shivbaaba is nandeegan mein aakar tumko gyaan suna rahe hain। gyaan doodh de rahe hain। unki mahima kitni hai! bholaanaath bhagwan hai sabki jholi bharne vaala। shiv ke aage nahin kahenge ki jholi bhar do kyonki samajhte hain woh niraakaar hai। shankar ke aage jholi le jaate hain bharne liye। vishnu aur brahma ke paas nahin jaate hain। shankar ke paas jaate hain kyonki shiv aur shankar ko mila diya hai। samajhte hain ki shiv, shankar ka roop hai। pooja karne vaale kuchh bhi occupation ko nahin jaante hain kyonki pahle-pahle jo pujaari bana hai, unko hi kuchh pata nahin tha। inko kahenge aaphi poojya devi-devta, aaphi pujaari। abhi tum samajhte ho ham hi poojya devi-devta the। ham hi pujaari bante hain। shiv to hai mool vatan vaasi। parantu mandir to hain na। sookshmavtanvaasi brahma-vishna-shankar ka bhi part hai kyonki aate to hain na। shiv ko bhi aana to padta hai। shankar ka yahaan kaam nahin। trimoorti maarga bhi naam rakhte hain। trimoorti ka stamp bhi banaate hain। usmein phir sher dikhaate hain। neeche likha hai - ‘satyamev jayte'। aise theek hai। sirf shiv ka naam-nishaan nahin rakha hai। ‘satyamev jayte' - jaanvar ke neeche nahin likha jaata hai। satya to ek baap hi hai। jo sachchi katha sunaakar hamko vijayi banaate hain। sab baaten achhi reeti samjhaate hain। tum master knowledgeful bante jaate ho। jab se knowledge sunna shuru kiya hai, inki sab murliyaan rakhen to saara makaan hi bhar jaaye। kitne kaagaj khalaas karte honge aur phir khalaas karte rahenge। murli bachchon ke paas zaroor jaayegi। bahut kaapiyaan niklengi। jhaad vriddhi ko paata rehta hai।

bachche jaante hain maaya ke toofaan to bahut aate hain। muhalra mukh mein pada hua ho to maaya kuchh nahin kar sakti hai। baba ko yaad karna bahut sahaj hai। ham aatma hain, aatma kehti hai - mera svadharma hai shant। ham sab pardeshi hain। is maaya ke desh mein aate hain। ek geet hai na - O door desh ke rahne vaale..... sab aatmaayen door desh ki rahne vaali hain। tum ab jaan gaye ho - barobar ham pardesh mein hain। bahut doordesh se aate hain, jisko niraakaari duniya kaha jaata hai। duniya mein to bahut honge na। tum jaante ho ham sab pardeshi hain। bhakti maarga mein bhakta bhagwan ko yaad karte hain। bhakta chaahte hain ki bhagwan aaye। to aakar kya kare? tum bachchon ko pata hai ki baba paramdham se aate hain। kehte hain - mujhe kaliyugi patit duniya se svarga paavan duniya banaana hai। tumko koi manushya nahin padhaate hain। manushya na apni sadgati kar sakte hain, na auron ko de sakte hain। ab naatak poora hota hai। ant mein sab actors ko haajir hona hai। geeta mein bhi hai। sirf shivbaaba ke badle shreekrishna bhagvaanuvaach kah diya hai। shreekrishna to hai first prince। unke liye samajhte hain hamko raajayog sikhaaya tha। parantu abhi tum jaante ho raajayog sikhaane vaala bholaanaath aaya hai। bholaanaath, knowledgeful baap ko kaha jaata hai। phir shreekrishna ke oopar kalank laga dete hain। vaastav mein woh shreekrishna ke oopar nahin lagaate, baap ke oopar lagaate hain। pahle daada ke oopar kalank nahin lagta tha। baap ke aane par kalank lagaaye hain। chalte-chalte raahi ne aakar pravesh kiya tab se dekho kitne kalank lagaate aaye hain! yeh raas leela aadi sab khel unke hain। vahi bachchon ko bahlaate hain। bachche jaante hain hamko baba mila hai। baba se ham ratnon ki jholi bhar rahe hain। shaastron ke gyaan ko ratna nahin kaha jaata। yeh hain gyaan-ratna। ek-ek ratna laakhon roopaye ka hai। is samay sabhi manushya ek do ko patthar maarte-maarte pattharbuddhi ban gaye hain। baap aakar pattharbuddhi se paaras buddhi bana dete hain। kabristaan se paristaan ban raha hai। yahaan to ghadi-ghadi kaal khaakar kabradaakhil kar deta hai। vahaan to aise nahin hota। jaise sarpa puraani khaal utaar nai le lete hain vaise puraana shareer chhod naya le lete hain। yeh drishtaant baba abhi dete hain। inko phir sannyaasi log apne kaam mein laga dete hain। aise samajhte hain ki budbuda saagar mein sama jaate hain। koi kehte jyoti jyot mein leen ho jaati hai। anek mat hain। ab tumko milti hai ek mat। us par chalna pade। baba kehte hain tum janma-janmaantar mujhe pukaarte ho, main ek hi baar aata hoon। tumne bahut pukaara - main gulaam tera... baap aakar gulaam-pane se chhudaate hain। tum maaya ke gulaam ban pade ho। baap aakar unse liberate karte hain। tum jaante ho hamne bahut bhakti ki hai। ab bhakti ka phal dene baap aaye hain। ab bhakti ka part poora hua। gyaan, bhakti phir hai vairaagya। vairaagya bhi do prakaar ka hai। woh sannyaasiyon ka vairaagya hai gharbaar chhodne ka। yeh tumhaara hai saari puraani duniya se vairaagya। yeh to tum bachche jaante ho - yeh sab bhasma ho jaane hain। kuchh bhi nahin rahega। kinki dabi rahegi dhool mein, phir aise samay chor aadi bhi aakar lootte hain। jaise aeroplane girte hain, aag lagti hai to chor andar ghus jaate hain। aaspaas vaale bhi loot lete hain। time to milta hai, jab tak pulis aaye। yeh vinaash to hona hi hai। kitni badi srishti hai! tum jaante ho America aadi taraph to sukh ka pomp hai। Christian pichhaadi vaale hain na। unhon ke sukh ka part abhi hai। kitni himmat rakhte hain - stars par, chandrama par jaayenge। soorya taraph nahin jaate hain। samajhte hain woh jala dega। koshish karte hain chandrama mein, stars mein jameen le leven। sooryavanshi-chandravanshi naam suna hai to samajhte hain shaayad vahaan koi duniya hai। jaapaani log apne ko sooryavanshi kahlaate hain। koi kya, koi kya kahlaate hain। ab tum jaante ho bhaarat barobar sooryavanshi-chandravanshi tha। in jaisa oonch khanda koi ho nahin sakta। yeh drama bana banaaya hai। ismen badli sadli hone ki baat nahin। yeh to samajhne ki baat hoti hai।

bachche jab shant mein baithte hain to hamesha svadharma mein baithna hai। baap ko yaad karna hai। shanti ke liye koi jangal mein nahin jaana padta hai। koi bhi aaye tum samjha sakte ho ki shanti to gale ka haar hai, tum dhoondhate kahaan ho। aatma kehti hai mera svadharma shant hai। phir yahaan shareer mein aane se talkie banta hoon। silence mein to naatak hota nahin। pahle movie bioscope chalta tha। sookshm vatan mein bhi movie hoti hai। aavaaj nahin nikalta। usi samay jo kalpa pahle samjha tha woh samajhkar aakar sunaate hain। koi nai baat nahin। saara drama hamko 84 janma naach nachaata hai। yeh anaadi drama hai। sab shareer lekar apna-apna part bajaate hain। meethe-meethe bachchon - yeh shivbaaba kah rahe hain। aatmaon se baat karte hain, maamekam yaad karo। yeh (brahma) nahin kahenge ki maamekam yaad karo। kitni guhya baaten hain। yeh kehta hai mujhe bhi unko yaad karna padta hai। main bhi brahmaputra nadi hoon। brahmaputra nadi aur saagar ka mela lagta hai। sarasvati aur saagar ka mela nahin lagta hai। mela ek hi lagta hai। kalkatte mein brahmaputra nadi aur saagar ke sangam par bahut bhaari mela lagta hai। brahmaputra ek hai aur mela bhi ek baar lagta hai। to yeh bhi yahaan mela lagta hai। saagar na ho to mela thode hi kahenge। mama jaati hai to nadiyon ka mela lagta hai। yeh mela laga hai saagar aur brahmaputra nadi ke saath। yeh to tum aapehi samajh sakte ho। agar vichaar saagar manthan kar sakte ho to vichaar karo। yeh saagar chaitanya hai, woh jad hai। sab nadiyaan saagar se nikli hui hain। yeh hai mangal-milan। baap ghadi-ghadi samjhaate hain maamekam yaad karo। bachche bhi kahenge baap ko yaad karo। “maamekam yaad karo bachche'' - yeh tum nahin kah sakte। baba in dvaara kah sakte hain - bachche, maamekam yaad karo। tum sammukh baithe ho na। tum kahenge shivbaaba kehte hain mujhe yaad karo। sabko kehna hai ki baap ko yaad karo to ant mati so gati ho jaayegi। maut to sabka hona hi hai। abhi to kya laga pada hai। America aadi kitna bada hai। yeh bambai aadi kuchh bhi nahin rahegi। bahut thode honge। abhi to raajya karne vaale kitne karodon hain! vahaan to shuru mein bahut thode hote hain। peechhe aate jaate hain। bachchon ko samjhaaya jaata hai maaya badi prabal hai। yaad karne nahin degi, vighna daalti rahegi। baba se bemukh karegi। parantu purushaartha poora karna hai। pakka mahaaveer banna hai। yog aisa rehna chaahiye jo maaya kabhi hila na sake। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apne shant svadharma mein sthit rehna hai। maaya se bachne ke liye mukh mein muhalra daal lena hai।

2) puraani duniya se behad ka vairaagya rakhna hai, vinaash ke pahle apna sab kuchh saphal kar lena hai।

vardaan:- apni himmat ke aadhaar par umang-utsaah ke pankhon se udne vaale shreshtha takdeervaan bhav

kabhi kuchh bhi ho lekin apni himmat nahin chhodna। doosron ki kamjori dekhkar svayan dilshikasta nahin hona। pata nahin hamaara to aisa nahin hoga - aisa sankalp kabhi nahin karna। takdeervaan aatmaayen kabhi kisi bhi prabhaav va aakarshan mein neeche nahin aati, ve sada umang-utsaah mein udne ke kaaran safe rehti hain। jo peechhe ki baaten, kamjori ki baaten sochte hain, peechhe dekhte hain, to peechhe dekhna arthaat raavan ka aana।

slogan:- harek ki raay ko sammaan dena hi sammaan lena hai, sammaan dene vaale apmaan nahin kar sakte।