Murli du jour du dimanche 2 juillet 2023

02-07-23 praatahmurli om shanti ''avyakt-baapdaada'' revise 26-01-95 madhuban

brahma baap ke aur do kadam - farmaanbardaar-vaphaadaar

aaj baapdaada chaaron or ke snehi aur sahayogi bachchon ko aur shaktishaali samaan bachchon ko dekh rahe hain। snehi sabhi bachche hain lekin shaktishaali yathaashakti hain। snehi bachchon ko sneh ka return padma guna sneh aur sahayog praapta hota hai। shaktishaali samaan bachchon ko sada sahaj vijayi bhav ka return milta hai। milta sabhi ko hai। snehi bachche yatha shaktishaali hone ke kaaran sada sahaj vijay ka anubhav nahin kar paate। kabhi sahaj, kabhi mehnat। baapdaada snehi bachchon ko bhi mehnat ko sahaj karne ka sahayog dete hain kyonki snehi aatmaayen sahayogi bhi rehti hi hain। to sahayog ke return mein baapdaada sahayog zaroor dete hain lekin yog yathaartha na hone kaaran sahayog milte bhi praapti ka anubhav nahin kar paate। yog dvaara hi sahayog ka anubhav hota hai aur shaktishaali samaan bachche sada yogayukta hain isliye sahayog ka anubhav karte sahaj vijayi ban jaate hain। lekin baap ko donon hi bachche pyaare hain। pyaar aur sada vijayi rahne ki shubh chaahna sabhi bachchon mein rehti hai lekin shakti kam hone ke kaaran samay par aur sarva shaktiyaan kaarya mein nahin laga sakte। baap varse ke adhikaar mein sarva shaktiyon ka adhikaar sabhi bachchon ko dete hain। adhikaar dene mein baapdaada antar nahin rakhte, sabhi ko sampoorn adhikaari banaate hain lekin lene mein nambarvaar ban jaate hain। baapdaada kisko special, kisko alag tuition dete hain kya? nahin dete। padhaai sabki ek hai, paalna sabki ek hai। paandavon ko alag paalna ho, shaktiyon ko alag ho - aise hai kya? sabko ek jaisi paalna aur padhaai hai। lekin lene mein, result mein kitna antar ho jaata hai! kahaan ashta ratna aur kahaan 16108 ratna - kitna antar hai! yeh antar kyon hua? padhaai aur paalna ko, vardaanon ko dhaaran karna aur kaarya mein lagaana - ismen antar ho jaata hai। kai bachche dhaaran bhi kar lete hain lekin samay pramaan kaarya mein lagaana nahin aata hai। buddhi tak bahut bharpoor honge lekin karma mein aane mein pharka pad jaata hai।

brahma baap number one kyon bana? do kadam pahle sunaaye na! teesra - sada baap, shikshak aur sadguru ke farmaanbardaar banen। har farmaan ko ji haazir kiya। baap ka farmaan hai sada sarva khajaanon ke varse mein sampanna banna aur banaana। to pratyaksha dekha ki sarva khajaane - gyaan, shaktiyaan, gun, shreshtha samay, shreshtha sankalpon ka khajaana pahle din se lekar last din tak kaarya mein lagaaya। last din bhi samay, sankalp bachchon prati lagaaya। gyaan ka khajaana, yaad ki shakti aur sahansheelta ke gun ka swaroop - yeh sab khajaane last samay tak, shareer ko bhi bhool seva mein practical mein lagaakar dikhaaya। to isko kaha jaata hai farmaanbardaar number one bachcha kyonki baap ka vishesh farmaan yahi hai ki yaad aur seva mein sada baap samaan raho। to aadi se lekar ant ghadi tak donon hi farmaan practical mein dekha na? sneh ki nishaani hai follow karna। to check karo - aadi se ab tak sarva khajaanon ko sva ke saath-saath seva mein lagaaya hai? baap ka farmaan ek shvaas va sankalp, second vyartha nahin ganvaana hai। to saare din mein ye farmaan practical mein laaya? va kabhi laaya, kabhi nahin laaya? agar kabhi-kabhi farmaanbardaar bane aur kabhi nahin bane to kis list mein jaayenge? agar baapdaada farmaanbardaar ki list nikaale to aap kis list mein honge? apne ko to jaante ho na? kyonki aap sabhi sarva khajaanon ke trustee, maalik ho। to ek sankalp bhi bina baap ke farmaan ke use nahin kar sakte ho। ya sochte ho ki ham baalak so maalik hain, isliye vyartha ganvaayen ya kya bhi karen, ismen baap ka kya jaata hai! baap ne de diya, abhi hisaab kyon lete hain? nahin। aap roz baap ke aage kehte ho ki sab tera hai, mera nahin hai। kehte ho na! ki time par mera aur time par tera! jab hamaara matlab ho to mera, vaise tera… aisi chaturaai to nahin karte ho? brahma baap ko dekha - apna aaraam ka samay bhi vichaar saagar manthan kar bachchon ke prati lagaaya। raatri mein bhi jaagkar bachchon ko yog ki shakti dete rahe। ye charitra to sune hain na? brahma ki kahaani suni hai na? follow father kiya ki sirf sun liya? sunna arthaat karna।

to teesra kadam sada ji haazir, sada hazoor haazir aur naazir। kabhi brahma baap se shiv baap alag nahin hue, haazir-naazir rahe na! bachche ne kaha baba aur baap ne kaha meethe bachche। to man ki sthiti mein sada haazir aur naazir anubhav kiya। seva mein sada ji haazir kiya। chaahe raat ho, chaahe din ho, seva ka direction mila aur practical kiya aur karma mein sada haan ji kiya। haan ji ka paath padhaaya na? to aap kya follow karte ho? kabhi haan ji, kabhi na ji to nahin karte? to pyaar ka saboot dikhaao। aise nahin socho ki jitna baba se mera pyaar hai utna aur kiska nahin। mere dil mein dekh lo, kya dikhaaoon, kya sunaaoon... bachche aise geet gaate hain। lekin saboot dikhaao। saboot hai follow father। to check karo - sthiti mein, seva mein, karma arthaat sambandh-samparka mein, (sambandh aur samparka mein aana hi karma hai) teenon mein sada follow father hain? har farmaan sirf buddhi tak rehta hai ya karma mein bhi aata hai? result mein dekha jaata hai ki agar buddhi aur vaani mein 100 baaten rehti hai to karma mein 50 hain। to unhon ko follow father kahen? adhoori result vaalon ko follow father ki list mein rakhen? aap kya samajhte hain? ve farmaanbardaar hain? ki aap aadhe mein raazi hain? thoda-thoda antar pasanda hai! shuru-shuru mein maala bhi banaate the, golden-silver bhi list nikaalte the। to abhi phir se list nikaalen? ki silver mein naam dekhkar copper ban jaayenge?

samay ki soochna baap to de hi rahe hain lekin prakriti bhi de rahi hai। prakriti bhi challenge kar rahi hai to samay ke pramaan aap log auron ko bhi soochna dete rehte ho। bhaashnon mein sabko kehte ho ki samay aa gaya hai, samay aa gaya hai। to apne ko bhi kehte ho ya sirf doosron ko kehte ho? doosron ko kehna to sahaj hota hai na? to svayan bhi ye challenge smriti mein laao। samay ke pramaan apne purushaartha ki gati kya hai? baapdaada ek baat par andar hi andar muskaraate rehte hain। kis baat par muskaraate hain, jaante ho? ek taraph majority bachche kabhi-kabhi ek second ye sochte hain ki samay pramaan purushaartha mein teevrata honi chaahiye aur doosre taraph jab maaya apna prabhaav daal deti hai to doosre second ye sochte hain ki yeh to sab chalta hi hai, ye to mahaarthiyon se bhi parampara chala aata hai। to baapdaada kya karenge? gussa to nahin karenge na! muskaraayenge। aur iska vishesh kaaran hai ki samay prati samay purushaartha ko bahut sahaj kar diya hai, easy kar liya hai। svabhaav ko easy nahin karte, svabhaav mein tight hote hain aur purushaartha mein easy ho jaate hain। phir sochte hain sahaj yog hai na! lekin jeevan mein, purushaartha mein easy rehna - isko sahaj yog nahin kaha jaata kyonki easy rahne se shaktiyaan merge ho jaati hain, emerge nahin hoti। aap sabhi apne brahman jeevan ke aadi ka samay yaad karo। us samay kaisa purushaartha raha? easy purushaartha raha ya attention vaala purushaartha raha? attention vaala raha, umang-utsaah vaala raha aur abhi albelepan ke Dunlop ke takiye aur bistare mil gaye hain। saadhnon ne aaraam pasanda jyaada bana diya hai। to apne aadi ke purushaartha, aadi ki seva aur aadi ke umang-utsaah ko check karo - kya tha? aaraam pasanda the? (nahin) aur abhi thoda-thoda hain? saadhan seva ke prati hain, saadhan svayan ko aaraam pasanda banaane ke liye nahin hain। to abhi Dunlop ka takiya aur bistara nikaalo। patraaniyaan bano, patraane bano। bhale palang par soo lekin sthiti patraani-patraane ki ho। dekho, aadi seva ke samay mein saadhan nahin the, lekin saadhna kitni shreshtha rahi। jis aadi ki saadhna ne ye saari vriddhi ki hai। to saadhna ke beej ko vistaar mein chhipa nahin do। jab vistaar hota hai to beej chhip jaata hai। to saadhna hai beej, saadhan hai vistaar। to saadhna ka beej chhipne nahin do, abhi phir se beej ko pratyaksha karo।

baapdaada ne is season mein kaam diya tha lekin kiya nahin। yaad hai kya diya tha? ki kaapiyon mein hai! kaam diya tha ki behad ke vairaagya vritti par svayan se bhi charcha karo aur aapas mein bhi charcha karo aur practical mein is saadhna ke beej ko pratyaksha karo। to kiya? ki ek din sirf debate kar li, workshop to ho gai lekin work mein nahin aai। to vartamaan samay ke pramaan abhi apni seva va seva-sthaanon ki dincharya behad ke vairaagya vritti ki banaao। abhi aaraam ki dincharya mix ho gai hai। ye albelaapan shareer ki chhoti-chhoti beemaariyon ke bhi bahaane banaata hai। pahle bhi to beemaari hoti thi na, lekin seva ka umang beemaari ko merge kar deta hai। jab koi aapke dil pasanda seva hoti hai to beemaari yaad aati hai? agar aapko incharge behen kahe - nahin, aapki tabiyat theek nahin hai, doosre ko karne do, to karne denge? us samay bukhaar va sir darda kahaan chala jaata hai? aur jab seva koi pasanda nahin hogi to kya hoga? sir darda bhi aa jaayega to pet darda bhi aa jaayega। sunaaya hai na ki agar bahaanebaaji mein bukhaar kahengi to teacher kahegi ki tharma meter lagaao lekin pet darda aur sir darda ka tharma meter to hai hi nahin। mood theek nahin hoga aur kahenge ki pet darda hai! to ye albelepan ke bahaane hain। behad ki vairaagya vritti merge ho gai hai aur bahaanebaaji emerge ho gai hai।

baapdaada dekh rahe the ki sabhi bachche bahut sneh se madhuban mein pahunch gaye hain। to sneh to dikhaaya, uski mubaarak ho। baapdaada ko bhi bachchon ki khushi dekhkar khushi hoti hai lekin aage kya karna hai? sirf madhuban tak pahunchna hai ya sneh ka saboot dikhaane ke liye pharishte roop mein vatan mein pahunchna hai? kya karna hai? madhuban mein pahunche uski mubaarak hai lekin farishta ban vatan mein kab pahunchenge? chalte-phirte aap sabhi ko farishta hi dekhen। bol-chaal, rahan-sahan sab farishton ka ban jaaye। aur farishte ka arth hi hai double light। to dincharya mein light nahin banna hai lekin sambandh-samparka mein, sthiti mein light। to light banna aata hai ki bojh kheenchata hai? baapdaada sneh ka saboot dekhna chaahte hain aur jab sneh ka saboot denge to aapko taaliyaan bajaane ki jaroorat nahin padegi lekin maaya bhi taali bajaayegi - vaah vijayi vaah, prakriti bhi taali bajaayegi। to abhi kuchh parivartan karo।

abhi svayan ko sneh ke saath shaktishaali banaao। svayan ke parivartan mein shaktiroop bano। sahaj yogi, sahaj yogi karke albelaapan nahin laao। baapdaada dekhte hain ki sva prati, chaahe seva prati, chaahe auron ke sambandh-samparka prati albelaapan jyaada aa gaya hai। aise nahin socho ki sab chalta hai। ek-do ko copy nahin karo, baap ko copy karo। doosron ko dekhne ki aadat thodi jyaada ho gai hai। apne ko dekhne mein albelaapan aa gaya hai। baapdaada ne sunaaya tha na ki najdeek ki nazar kamjor ho gai hai aur door ki nazar tej ho gai hai। to abhi kya karenge? season ka phal kya denge? ki sirf baap aaya, mila, manaaya, murli suni - ye phal hai? har season ka phal hota hai na? to is season ka phal baapdaada ko kya bhog lagaayenge? bhog lagaate ho to phal bhi rakhte ho na? vo to baajaar mein mil jaata hai, koi badi baat nahin। ab is season ka phal kya bhent karenge ya bhog lagaayenge? lagaana hai ya mushkil hai? to dekhenge ki number one bhog kahaan se aata hai। vaayda to bahut achha karke jaate ho, kabhi bhi na nahin karte ho, haan hi karte ho! khush kar dete ho। lekin abhi kya karenge? teachers number one bhog lagaayengi na? sabhi centres ka bhog dekhenge। pravritti vaale bhi bhog to lagaate ho na ki khud hi kha jaate ho? to ye nahin sochna ki sirf centres vaalon ka kaam hai। sabhi ka kaam hai। to farmaanbardaar ka kadam practical mein laana hai।

chautha kadam hai - vaphaadaar। kabhi bhi man se, buddhi se, sankalp se baap ke bevpha nahin banna। vaphaadaar ka arth hi hai sada ek baap, doosra na koi। sankalp mein bhi deh, deh ke sambandh, deh ke padaartha va dehdhaari vyakti aakarshit nahin karen। jaise jab pati-patni ek-do ke vaphaadaar bante hain to svapna mein bhi agar par (doosre) ki yaad aa gai to vaphaadaar nahin kaha jaata। to brahma baap ko dekha, sankalp bhi doosre ke taraph nahin। ek baap sab kuchh hai, isko kaha jaata hai vaphaadaar। agar padaartha ki bhi aakarshan hai, saadhnon ki bhi aakarshan hai to saadhna khandit ho jaati hai, vaphaadaari khandit ho jaati hai। aur khandit kabhi bhi sampanna, poojya nahin gaaya jaata hai। to check karo ki sankalp mein bhi koi aakarshan bevpha to nahin bana deti? agar zara bhi kisi ke prati vishesh jhukaav hai, thoda bhi personal jhukaav hai, chaahe gun ke oopar, chaahe seva ke oopar, chaahe achhe sanskaaron ke oopar bhi agar extra prabhaavit hain to vaphaadaar nahin kaha jaayega। sabki visheshta, behad ki visheshta par aakarshit hai, vo doosri baat hai lekin kisi vishesh vyakti ya vaibhav ke oopar aakarshit hai to vaphaadaar ki list mein khandit gaaya jaayega। to check karo ki khandit moorti to nahin hai? poojya hai? kahaan extra lagaav va jhukaav to nahin hai? sankalp maatra bhi jhukaav nahin। vaacha-karmana ki to baat hi chhodo। lekin sankalp maatra bhi hai to khandit ke list mein aa jaayenge। to check karna aata hai na? achha।

chaaron or ke sneh ka saboot dene vaale, har farmaan ko sankalp, bol aur karma mein laane vaale, sada svayan ko baap samaan simple aur sample banaane vaale, brahma baap ke har kadam par kadam rakhne vaale aise shaktishaali baap samaan banne ke dridh sankalpadhaari sarva bachchon ko baapdaada ka yaad-pyaar aur namaste।

vardaan:- saaksheepan ki sthiti dvaara hero part bajaane vaale sahaj purushaarthi bhav

saaksheepan ki sthiti drama ke andar hero part bajaane mein sahayogi banti hai। agar saaksheepan nahin to hero part baja nahin sakte। saaksheepan arthaat deh se nyaare, aatma maalikpan ki stage par sthit rahe। deh se bhi saakshi, maalik। is deh se karma karaane vaali, aisi saakshi sthiti hi sahaj purushaartha ka anubhav karaati hai kyonki is sthiti mein kisi bhi prakaar ka vighna ya mushkilaat nahin aa sakti, yeh hai mool abhyaas। isi abhyaas se last mein vijayi banenge।

slogan:- pharishta banna hai to apne sarva rishte ek prabhu ke saath jod lo।