Murli du jour du lundi 24 juillet 2023

24-07-2023 praatahmurli om shanti "baapdaada"' madhuban

“meethe bachche - gyaan ratnon ki len-den kar tumhein gyaan se ek-do ki paalna karni hai, aapas mein bahut-bahut pyaar se rehna hai''

prashn:- beemaari athva karmabhog hote bhi apaar khushi kis aadhaar par rah sakti hai?

uttar:- vichaar saagar manthan karne ki aadat daalo। koi bhi karmabhog athva beemaari aati hai to apne aapse baaten karo - ab hamne 84 janmon ka part poora kiya, yeh puraani jutti hai। is puraane hisaab-kitaab ko chuktu karna hai। phir ham 21 janmon ke liye sab beemaariyon se chhoot jaayenge। koi beemaari chhootti jaati hai to khushi hoti hai na।

geet:- maata O maata…

om shanti। yeh hai maataaon ki mahima, vande maatram। he maata, tum shivbaaba ke bhandaare se sabki paalna karti ho। tumko shivbaaba ke bhandaare se gyaan ratnon ka khajaana milta hai athva gyaan amrit ke kalash se tumhaari paalna hoti hai। vaastav mein mahima shivbaaba ki hai, woh karnakraavanhaar hai। maata hai jagdamba। zaroor aur bhi maataayen hongi, jo yeh maataaon ki mahima hai। maata bahut-bahut achhi paalna karti hai। shivbaaba ke yagya mein jo rahne vaale hain unhon ki sthool mein bhi paalna hoti hai aur avinaashi gyaan ratnon se to sabhi ki paalna hoti hai। paalna karne vaali majority maataayen hain। bahut hain jo bhaai bhi bahnon ki paalna karte hain। aise nahin, sirf behen bhaai ki paalna karti hai। donon gyaan ratnon ki len-den se ek-do ki paalna karte hain - bhaai behen ki, behen bhaai ki। bachchon ko bahut pyaar se rehna hai। is duniya mein to ek-do ko vikaar hi dete hain isliye jaise ek-do ke dushman hue। yahaan avinaashi gyaan ratnon ka khajaana dete hain। vo to jaise patthar maarte hain kyonki hai hi pattharbuddhi। aise nahin ki patthar maarte hain, yeh to samjhaani hai। tum ho behen-bhaai brahmaakumaar-kumaariyaan। tumhaara naam bhi bada bhaari hai। brahmaakumaari hai to kumaar bhi zaroor hain। prajaapita brahma hai to zaroor brahman-braahmaniyaan bhi honge। board padhne se ghabraana nahin chaahiye। prajaapita brahma ke bachche zaroor brahmaakumaar-kumaariyaan honge। yeh buddhi se kaam liya jaata hai।

geet mein mahima hai maata ki। jagat amba sarasvati kahen to bhi zaroor bachche aur bachchiyaan honge। zaroor family hogi। yeh bhi samajhne ki baat hai na। samajhte bhi hain - prajaapita likha hua hai na। brahma ko kaha jaata hai prajaapita brahma। yeh hai saakaari srishti ka pita। gaaya hua hai prajaapita brahma dvaara brahman kul ki rachna hui। aadi sanaatan pahle-pahle brahman ho jaate hain। vaastav mein aadi sanaatan devi-devta dharma kehna wrong hai। woh to hai satayug ka dharma। yeh aadi sanaatan braahmanon ka dharma jo hai woh praayahlop ho gaya hai। parampita paramatma prajaapita brahma dvaara brahman dharma rachte hain। to yeh sangamayug ho gaya devi-devta dharma se bhi oonch। pahle yeh brahman dharma hai, jisko choti kehte hain। isko kaha jaayega sangamayugi aadi sanaatan brahman dharma। kitna achha raaz hai samajhne ka। baba ne samjhaaya hai ki pahle jab koi aate hain to unko baap ka parichay do। yeh hai mukhya। braahmanon ko to raajdhaani hai nahin। likha jaata hai satayugi deity world sovereignty tumhaara eeshvareey janma siddha adhikaar hai। devi-devta dharma to barobar hai। parantu unko yeh raajdhaani kab aur kaise milti hai - yeh bhi samjhaana padta hai isliye trimoorti ka chitra saamne zaroor rakhna hai। ismen likha hua hai - svarga ki baadshaahi tumhaara janma siddha adhikaar hai। kis dvaara? yeh bhi likhna pade। yeh board banaakar har ek apne ghar mein lagaave। jaise government ke officers ke board hote hain na। koi ke paas badge rehte hain। sabki apni-apni nishaani rehti hai। tumhaari bhi nishaani rahni chaahiye। baba direction dete hain, amal mein laana to bachchon ka kaam hai na। vihang maarga ki service karni hai। yeh bahut mukhya cheez hai। doctor, barrister aadi sabke ghar mein board laga hua hota hai na। tumhaara bhi board laga hua ho - aakar samjho ki shivbaaba se brahma dvaara svarga ki baadshaahi kaise milti hai? baba direction dete hain, jo manushya dekhkar wonder khaayenge। andar aayenge samajhne ke liye। flat ke baahar bhi board laga sakte ho। jiska jo dhandha hai woh board lagaana chaahiye। ek-do se seekhna chaahiye। parantu bachchon par maaya ka vaar bahut hota hai, nishchay nahin ki ham baba ke paas jaate hain। 84 janmon ka part poora hua phir nai duniya, svarga mein aakar varsa lenge। yeh yaad nahin rehta hai। baba kehte hain ki bhal karma karo phir jitna samay mile to baba ko yaad karo। tum yeh dhindhora peette raho ki yeh sabka antim janma hai। punarjanma mrityulok mein phir nahin lena hai। tum bhi jaante ho ki mrityulok abhi khatma hona hai। pahle nirvaandhaam jaana hai। aise-aise apne saath baaten karni chaahiye, isko vichaar saagar manthan kaha jaata hai। baap kehte hain tum karmayogi ho। kya tumko kachhue jaanvar jaisa bhi akla nahin hai! vo bhi shareer nirvaah arth ghaas aadi khaakar phir karmendriyon ko samet shant mein baith jaate hain। tum bachchon ko to baap ki yaad mein rehna hai, svadarshan chakra phiraana hai, apne ko master beejroop samajhna hai। beej mein jhaad ka saara gyaan hai - inki utpatti evan paalna kaise hoti hai, drama mein 84 ka chakra kaise phirta hai? 84 ke chakra ke liye yeh chitra (chakra ka) banaaya jaata hai। manushya samajhte hain ki aatma 84 laakh yoniyon mein jaati hai। lekin tumhein baap ne samjhaaya hai ki tum sirf 84 janma lete ho। jo aadi sanaatan devi-devta dharma vaale hain arthaat jo brahman se devta bante hai unke hi 84 janma hote hain। tum 84 janmon ko jaante ho। brahma ki raat aur brahma ka din kehte hai, ismen 84 janma aa jaate hain। trimoorti ka board banaakar likhna chaahiye - yeh eeshvareey janma siddha adhikaar hai, lena hai to lo। now aar never (ab nahin to kabhi nahin)। is hovanhaar mahaabhaarat ladaai ke pahle purushaartha karna hai।

raam (shiv) kya dete hain aur raavan kya dete hain? - yeh tum jaante ho। aadhaakalpa hai raamraajya, aadhaakalpa hai raavanraajya। aise nahin, paramatma hi duhkh dete hain। duhkh dene vaala to raavan 5 vikaar hain jo hi vicious banaate hain। bachchon ko bhinna-bhinna prakaar ki samjhaani roz milti rehti hai to khushi mein rehna chaahiye na। tum jaante ho shivbaaba roz padhaate hain। aise nahin ki saakaar ko yaad karna hai। shivbaaba hamko brahma baba dvaara sahaj raajayog sikhlaate hain। shivbaaba aate hi prajaapita brahma mein hain। prajaapita brahma aur kisko kah nahin sakte। brahman bhi zaroor chaahiye। gaaya jaata hai second mein mukti-jeevanmukti ka varsa athva raajya-bhaagya lo। bachche kehte hain ki ham shivbaaba ke bachche hain। vo hai hi svarga ka rachayita to zaroor hamko bhi svarga ki raajaai denge। baba kaisa wonderful hai! ek second mein jeevanmukti janak ko mili - yeh bhi gaaya hua hai। tum jaante ho ki ab ham shivbaaba ke bane hain। shivbaaba ko zaroor yaad karna pade। jaise bachche dharma ki god lete hain to jaante hain ki pahle ham phalaane ka bachcha tha, ab phalaane ka hoon, unse dil hatti jaayegi aur unse jutti jaayegi। ham yahaan bhi aise kahenge ki ham shivbaaba ke adopted bachche hain phir us laukik baap ko yaad karne se faayda hi kya? most beloved baap itni badi sampatti dene vaala hai। baap bhi mehnat karke bachchon ko laayak banaate hain na! aise baap ko tum ghadi-ghadi bhool jaate ho। aur to sabhi tumko duhkh dene vaale hain phir bhi unko yaad karte rehte ho aur mujh baap ko tum bhool jaate ho। raho bhal apne ghar mein parantu yaad baba ko karo। ismen mehnat chaahiye। sirf mera hokar raho। nirantar mujhe yaad karo aur nai duniya ko yaad karo। yeh to saara kabristaan banna hai। tum mere bane goya vishwa ke maalik bane। tum jaante ho ki ham baba ke bane hain phir svarga ke maalik ham bhavishya mein banenge। khushi ka paara chadhna chaahiye।

yeh bhi jaante hain ki yeh puraana shareer hai। karmabhog bhogna padta hai। mama-baba bhi khushi se karmabhog bhogte hain। phir bhavishya 21 janma ka sukh kitna bhaari hai। yeh to puraani jutti hai। karmabhog bhogte rahenge। phir 21 janma ke liye isse chhoot jaayenge। koi beemaari chhootti jaati hai to khushi hoti hai na। koi aaphat aati hai phir hat jaati hai to khushi hoti hai na। tum bhi jaante ho ki ab janma-janmaantar ke liye aaphten hat jaayengi। abhi ham baba ke paas jaate hain। yeh hai vichaar saagar manthan kar points nikaalna। baba raay to batlaate hain ki aise-aise apne se baaten karo। hamne 84 ka chakra poora kiya, ab baap ke paas jaate hain phir baba ka varsa paayenge। saakshaatkaar bhi karte ho। is samay paroksha aur aproksha hai। jaise mama ko koi bhi saakshaatkaar nahin hua hai, baba ko to hua hai। vinaash aur sthaapna ka saakshaatkaar hua। inko bhavishya ka saakshaatkaar accurate hua। parantu pahle yeh samajh mein nahin aaya ki ham yeh vishnu banenge। peechhe samajhte gaye - ham is vikaari grihastha dharma se ab nirvikaari grihastha dharma mein jaate hain, tattvam। tum bhi baba ki padhaai se aise bante ho। race karni chaahiye। baaki geet mein hai mama ki mahima। tum to jaan gaye ho ki jagat amba kisko kaha jaata hai, vaastav mein maat-pita kaun hai? maat-pita kahne se jagat amba yaad nahin aayegi। woh to hai niraakaar। yeh tumhaari buddhi mein hai। pita to god father theek hai, woh niraakaar hai। maata to niraakaar ho na sake। father niraakaar hai, zaroor varsa denge to yahaan aana pade na, jo apna parichay de। to zaroor unko maata chaahiye। to yeh brahma badi maata ho gai। daada hai niraakaar। kitni wonderful knowledge hai। parantu yeh mel ho gaya kyonki mukh vanshaavli hai na। yeh badi wonderful knowledge hai। baap kehte hain ki kitna guhya raaz samjhaata hoon। koi ki buddhi mein baith nahin sakta ki maat-pita kaun hai। vo samajhte hain shreekrishna ke liye। sirf farka yeh kiya hai। isko kaha jaata hai ekaz bhool। koi to nimitta banna chaahiye na। kya bhool hui jo bhaarat itna duhkhi hota hai? ab tum jaante ho kisne bhulaaya? kaaran kya hua jo bhool gaye? barobar maaya raavan ne bemukh karaaya hai। jaise baba karnakraavanhaar hai vaise maaya bhi karnakraavanhaar duhkh daata hai। woh karnakraavanhaar duhkhadaata aur woh (shivbaaba) karnakraavanhaar sukhdaata। maaya baap se bemukh karaati hai। ab baap khud kehte hain ki he aatmaayen, nirantar mujh baap ko yaad karo। tum hamaare bachche ho, tumko varsa lena hai। sirf mujhe yaad karo to vikarma vinaash honge। behad ke baap ki mat milti hai - brahma dvaara। guru brahma kehte hain na। yeh to hai bhakti maarga ki mahima। guru brahma mashhoor hai। woh phir kah dete eeshvar sarvavyaapi hai। aage ham bhi samajhte the ki theek kehte hai। ab samajhte hain ki maaya ne inhon se aisa kah-laaya hai। maaya bhool karaati hai neeche giraane ke liye aur baba abhul banaate hain oonch chadhaane ke liye। baap bahut achhi takdeer banaate hain। baap ko yaad karna hai - yeh to bahut sahaj hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apne ko master beejroop samajh karmendriyon ko samet shant mein baithne ka abhyaas karna hai।

2) vichaar saagar manthan kar khushi mein rehna hai aur khushi-khushi se puraana karmabhog chuktu karna hai। apne aapse baaten karni hai ki hamne 84 ka chakra poora kiya, ab jaate hain baba ke paas...।

vardaan:- regard maangane ke bajaae sada oonchi sthiti mein rahne vaale sarva ke poojyaneey bhav

kai bachche sochte hain ki ham to aage badh rahe hain lekin doosre hamko aage badhne ka regard nahin dete hain। lekin regard maangane ke bajaae svayan ka regard svayan rakho to doosre svatah regard denge। apna regard rakhna arthaat apne ko sada mahaan shreshtha aatma anubhav karna। jaise moorti jab aasan par hai tab poojyaneey hai। aise aap bhi sada apni oonchi sthiti mein sthit raho to poojyaneey ban jaayenge। sab aapehi regard denge।

slogan:- maaya ka tiraskaar karne vaale hi sarva ke satkaari bante hain।