Murli du jour du mercredi 26 juillet 2023

26-07-2023 praatahmurli om shanti "baapdaada"' madhuban

“meethe bachche - baap se jeevanmukti ka varsa praapta karne ke liye maaya ke sarva bandhanon se mukta bano, yahaan ke jeevanmukta hi vahaan jeevan-mukti pad paate hain''

prashn:- is gyaan ka beej avinaashi hai - kaise?

uttar:- is gyaan se sooryavanshi aur chandravanshi raajdhaani sthaapan hoti hai, woh raajdhaani bahut badi hai, jo aatmaayen ek baar bhi gyaan le leti hain, bhal beech mein chhodkar chali jaayen, phir woh ant mein aa jaayengi, kyonki unhein bhi raajdhaani mein aana hi hai। jismen thoda bhi gyaan ka beej pada hai, woh aa jaayega। ja nahin sakta। yeh baat hi gyaan ko avinaashi siddha karti hai।

geet:- bholenaath se niraala…

om shanti। bachche ab apne bholaanaath praaneshvar ke sammukh baithe hain aur achhi reeti jaante hain ki is behad ke maalik bholaanaath se hamko phir se svarga ka varsa mil raha hai। buddhi vahaan chali jaati hai, barobar baap dvaara hi ham baap ke ghar jaate hain। baap bulaane aaye hain, jaise saajan sajni ko bulaane aate hain। ek saajan aakar sab sajniyon ko gul-gul banaate hain। unka naam hi hai - patit-paavan। parantu bachche baap ko bhool jaate hain। yeh bhoolna bhi drama ke andar hai। baap aakar sabhi raaz samjhaate hain। tum lucky sitaaron ka martaba baap se bhi oonch hai। jaise baap brahmaanda ka maalik hai, vaise tum bhi brahmaanda ke maalik ho। tum bhi mujh baap ke saath rahne vaale the। phir tum bachchon ko to part bajaana hi hota hai। tum jaante ho ham vaikunthanaath banne ke liye trilokeenaath ke paas aaye hain। baap kehte hain - bachche, tum bhi is samay trilokeenaath ho, to main bhi trilokeenaath hoon। phir satayug aata hai to uske naath tum bante ho, main nahin banta hoon। main aata hi hoon tumhaari aatma ko raavan ke duhkhon se chhudaane। raavan se tumhein bahut duhkh mila hai। drama ko to bachche samajh gaye hain। inke chaar yug nahin, balki paanch yug hain। chaar hain bade, ek sangamayug leap yug hai। yeh knowledge bhi bachchon ke dhyaan mein honi chaahiye kyonki gyaan saagar ke tum bachche bane ho। bhakti maarga mein uski mahima ki jaati hai। tum gyaan ke saagar, shanti ke saagar ho। yeh mahima phir vaikunthanaath ki nahin hoti। unko phir kaha jaata hai - sarvagun sampanna, 16 kala.....। is kaliyug mein to hote nahin, to zaroor koi banaane vaala aaya hoga। to svarga ke maalik sirf tum hi bante ho। brahma, vishnu, shankar jo sookshmavtanvaasi devtaayen hain unko bhi yugal dikhaate hain - pravritti maarga dikhaane liye। to svarga bhi yahaan hi hota hai। brahman varna se tum devta varna mein aayenge phir kshatriy varna mein aayenge।

sayaane bachche jo hote hain woh achhi reeti padhaai par dhyaan dete hain। agyaan kaal mein bhi bachcha hota hai to samajhte hain vaaris aaya hai। tum bhi mama-baba kehte ho to vaaris thahre na। jaise gaandhi ko baapu ji kehte the, yoon to bhaarat mein maat-pita bahuton ko kehte hain। bujurga ko pita ji kehte hain। sirf kahne maatra kah dete। yeh to sabhi ka baapu ji hai hi। praaneshvar arthaat sabhi aatmaon ka eeshvar baap hai। baap kahne se varse ki khushi dil mein aati hai। woh bhaasna aati hai। tum bachchon ko bhi nambarvaar purushaartha anusaar bhaasna aati hai। barobar behad ka baap aakar raajayog sikhlaate hain। brahma, vishnu, shankar to raajayog sikhla na saken। bhagvaanuvaach hai। devi-devtaayen hain daiveegun vaale manushya। parmeshvar maana god father। bhaarat mein bhi kehte hain - parampita paramatma, supreme god father, to buddhi oopar mein chali jaati hai kyonki jaante hain - father oopar mein rehte hain। abhi tum bachche samajhte ho - ham bhi vahaan ke rahne vaale hain। abhi ham us praaneshvar ke sammukh baithe hain। baap sammukh yaad dilaate hain to nishchay karte ho - barobar yeh koi saadhu-mahaatma nahin, ham maat-pita ke sammukh baithe hain। kyon unke bane ho? maat-pita se bhavishya 21 janmon ka varsa lene। agar nishchay nahin to kyon baithe ho? kaaran chaahiye। bina pahchaan koi kisi ke sammukh baith na sake। duniya mein to ek-do ki pahchaan hoti hai - yeh sannyaasi hai, yeh governor hai.......। yahaan yeh baap to hai gupta। jabki samajhte hain parampita paramatma paramdham ka rahne vaala hai। phir usmein sarvavyaapi ki baat uthti hi nahin। aatma yaad karti hai - O god father। khud hi paramatma hote to phir pukaarte kiske liye? bahut thodi samajhne ki baat hai। parantu maaya aisa bana deti hai jo samajhte hi nahin। jo baat mukh se kehte us par phir vishvaas nahin karte। maaya sanshaybuddhi bana deti hai। pukaarte bhi hain - O god father, phir kah dete ham hi father hain tab pukaarte kyon hain? father akshar to bachcha hi kahega। yaad ek ko hi karna hai। abhi tum sammukh baithe ho। jaante ho ham parampita paramatma ke bane hain। usse varsa lete hain। ab to nahin bhoolenge na।

baap kehte hain - bachche, ashareeri bano, pavitra bano। main tumko lene aaya hoon। devtaaon ke aage gaate bhi hain - mujh nirgun haare mein koi gun naahi। devtaaon ki mahima gaate hain, apne ko neech paapi samajhte hain। zaroor pahle sampoorn nirvikaari duniya thi। usko svarga shivaalay kaha jaata tha। shivbaaba ka sthaapan kiya hua svarga। bhaaratvaasi jaante bhi hain - svarga hota hai। parantu bhaarat svarga tha, aadi sanaatan devi-devtaayen raajya karte the - yeh bhoole hue hain। koi marta hai to kehte hain svarga padhaara। svarga to hota hai satayug mein। kaliyug mein thode hi hota hai। jab akhbaar mein likhte hain - svarga padhaara to tum poochho svarga hota kahaan hai? samajhte hain - paramdham mein paramatma ke paas gaya vahi svarga hai। ya to kehte nirvaandhaam gaya ya phir kehte jyoti jyot samaaya। aksharon ka kitna farka hai। usko kaha jaata hai-brahm mahtatva। yeh hai aakaash tatva। inko mahtatva nahin kahenge। mahtatva woh hai - brahm mahtatva, brahmaanda, jahaan ham aatmaayen ande misal rehti hain। baap bhi vahaan rehte hain। usko paramdham kaha jaata hai। baaki brahm mein koi leen nahin ho sakta। bachchon ko bahut points samjhaai jaati hai, jabki sammukh baithe ho। bhakta to bhagwan ko dhoondhate rehte hain।

tum jaante ho - bhakti maarga mein sabse jaasti bhakti kaun karte hain? zaroor jo pahle poojya the, vahi phir pahle pujaari bhakta bante hain। yeh sirf tum bachche hi jaante ho। gaate bhi hain - aapehi poojya, aapehi pujaari। parantu woh samajhte hain ki paramatma baap khud hi poojya-pujaari bante hain। yeh to wrong hai। baap aakar bachchon ko oonch mahima laayak banaate hain। parantu sabhi ko svarga ki jeevanmukti nahin milegi। jeevanmukti to milegi tab, jab maaya ke bandhanon se mukta honge। jeevanmukta arthaat maaya ke bandhan se mukta। aise nahin ki sabhi satayug mein aayenge। satayug mein to vahi aayenge jo raajayog seekhte hain। gyaan maarga mein kitne bandhanon se nikalna padta hai! meera ko koi itne bandhan nahin the। woh sirf kehti thi - shreekrishna se milna hai isliye pavitra banoongi। tumko to shreekrishnapuri mein jaana hai। woh meera thi bhakta shiromni। tum ho vijay maala shiromni, jo vijaymaala pooji jaati hai। bhakton ki maala koi pooji nahin jaati। jo bhaarat ko svarga banaate hain unhon ki maala pooji jaati hai। bhakta tum bachchon ki maala ko poojte hain। pahle hai roodra maala, phir vishnu ki maala banti hai। yeh koi nahin jaante ki maala kiski bani hui hai। sirf maala simarte rehte hain। abhi tum bhakton ki maala to nahin simrenge। bhakta tum bachchon ki maala simarte hain। tum jaante ho - hamaari vijaymaala ban rahi hai। phir ham hi khud pujaari ban maala pherenge। tum raajya bhi karte ho phir jaakar sabse pahle tum hi maala pherenge। tum se hi phir bhakti aur bhi seekhenge। tum vishwa ko svarga banaate ho।

baap raajayog sikhlaate hain - jiska naam geeta rakha hai। dharmashaastra ka naam to chaahiye na। bhal gyaan praayahlop ho jaata hai parantu shaastra to banenge na। shaastra banaae uska naam shreemat bhagvat geeta rakha hai। bhakti maarga ke liye geeta banaate hain। woh geeta koi gyaan maarga ke liye nahin hai। kitni geetaayen sunaate rehte hain! aise kabhi nahin kehte ki tumko raajayog sikhaate hain। kahenge bhagwan raajayog sikhaakar gaya tha। phir uske shaastra baith padhte hain। ab bhagwan dvaara sammukh vahi geeta sunkar ham svarga ke maalik bante hain। baap kehte hain - main tum bachchon ko ek hi baar raajayog sikhlaae so raajaaon ka raaja banaane aaya hoon। jab tak sadgati dene vaala na aaye tab tak bhakti maarga ki mahima zaroor chalegi। jo kalpa pahle aaye honge vahi aakar yeh sunenge। ajun to bahut banne vaale hain। sooryavanshi-chandravanshi raajdhaani sthaapan ho rahi hai, to kitne aayenge! isliye gyaan ka vinaash nahin hota hai। saahookaar praja, saadhaaran praja, naukar-chaakar aadi bhi chaahiye na। kitni badi raajdhaani sthaapan hoti hai! manushya thode hi jaante hain ki kaise satayugi raajdhaani sthaapan hoti hai, agar yeh jaan jaayen to sunaayen। baap ko hi bhool gaye hain। niraakaar shiv bhagvaanuvaach ke badle shreekrishna bhagvaanuvaach likh diya hai। shiv jayanti ke baad phat se shreekrishna jayanti aati hai। woh shreekrishna hai vaikuntha-naath। yeh baith tumko vaikunthanaath banaate hain। shreekrishna ko phir dvaapar mein le gaye hain। kitna bhaarat ke gyaan ka soot moonjha hua hai!

ab achhi reeti dhaaran kar knowledgeful banna hai। dekhna hai - ham kitne marks se paas hote hain? abhi paas honge to kalpa-kalpaantar honge। grihastha vyavhaar mein rehte padhna hai। aise to kahaan bhi hota nahin jo boodhe-budhiyaan, stri-purush, bahu aadi sab aakar padhe। shaastra bhi aise nahin padhte। maataaon ko to kehte - tumko shaastra padhna nahin hai। purush hi pandit ban padhte hain। yahaan dekho kaun-kaun padhte hain! kaisi-kaisi budhiya aati hain! wonder hai na। grihastha vyavhaar mein rehte kamal phool samaan pavitra rah raajayog seekhna hai। god fatherly student banna hai। iska naam hi hai - eeshvareey brahmaakumaar-kumaariyon ka college। eeshvar brahma dvaara padha rahe hain। brahma koi vishnu ki naabhi se thode hi nikla hai। yeh to parampita paramatma ki naabhi hi kahenge। beejroop to shivbaaba hai na। unse brahma, vishnu, shankar nikle। teenon ka arth hi alag-alag hai। abhi tum bachche samajhte ho - barobar vishnu ko hamesha lakshmi dete hain। nar-naaraayan ka mandir hai to unko bhi chaturbhuj banaate hain। naaraayan hoga to unke saath lakshmi zaroor hogi। nar-naaraayan, naari-lakshmi। nar-naaraayan ko 4 bhuja dete hain। naaraayan ko alag, lakshmi ko alag to do-do bhuja deni chaahiye। aisa kaayde anusaar mandir banaana chaahiye। parantu bichaare nar-naaraayan ke mandir se kuchh bhi samajhte nahin। nar-naaraayan ke saath lakshmi bhi dete hain। deepmaala mein mahaalakshmi ki pooja karte hain। maataaon ki kitni mahima hai! jagat amba ki badi mahima hai। amba badi meethi lagti hai kyonki kumaari hai। yeh adhar hai। to kumaariyon ka bhaarat mein maan bahut hai। parantu mahatva ko jaante nahin hain। jagat amba ka bahut maan hai। baap ka itna nahin। baap ne aakar maataaon ko oonch uthaaya hai। to bahaadur banna chaahiye। sher par savaari chaahiye। atyaachaar honge। parantu baap ke bane to dharat pariye dharma na chhodiye। pavitra bankar oonch pad zaroor paana hai। meera bhi pavitra bani na। baap kumaariyon ko kehte hain - bolo, ham pavitra ban vaikuntha ka maalik banna chaahti hain। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sachcha vaaris banne ke liye sayaana banna hai, padhaai ko achhi reeti dhaaran kar knowledgeful banna hai। baap samaan mahima yogya banna hai।

2) vijay maala mein shiromni banne ke liye maaya ke bandhanon ko kaatte jaana hai। bahut-bahut bahaadur ban pavitra zaroor banna hai।

vardaan:- ichchhaaon roopi mrigtrishna ke peechhe bhaagne ke bajaae sachchi kamaai jama karne vaale ichchha maatram avidya bhav

kai bachche sochte hain ki agar hamaare naam se lottery nikal aaye to ham yagya mein laga den। lekin aisa paisa yagya mein nahin lagta। kai baar ichchha svayan ki hoti hai aur kehte hain ki lottery aayegi to seva karenge! lekin ab ke karodapti banna arthaat sada ke karod ganvaana। ichchhaaon ke peechhe bhaagna to aise hai jaise mrigtrishna isliye sachchi kamaai jama karo, had ki ichchhaaon se ichchha maatram avidya bano।

slogan:- vighna ko vighna ke bajaae khel samajhkar chalo to khel mein hansate gaate paas ho jaayenge।