Murli du jour du vendredi 18 août 2023

18-08-2023 praatahmurli om shanti "baapdaada"' madhuban

“meethe bachche - khushboodaar phool bano, shreekrishna hai number one khushboodaar phool isliye sabhi ko bahut pyaara lagta hai, sabhi naynon par rakhte hain''

prashn:- laukik mein sweet sambandh kaun-sa hai aur sweetest kise kahenge?

uttar:- laukik mein bhi sweet father ko hi kaha jaata hai। tum bachche bhi kehte ho hamaara ati most lovely sweet father hai, ham uske lovely bachche hain। sweetest phir teacher ko kahenge kyonki teacher padhaai padhaate hain। knowledge source oph income hai। tumko bhi pahle knowledge milti hai। grihastha vyavhaar mein rehte hue is knowledge ko dhaaran karna aur doosron ko karaana hai।

geet:- marna teri gali mein…

om shanti। bachchon ne geet suna। jab koi marte hain to doosre maa-baap ke paas janma lete hain। baap ko badhaai di jaati hai। ab tum bachche jaante ho ham aatmaayen avinaashi hain। woh shareer ki baat hai। ek shareer chhod doosra lete hain arthaat ek baap ko chhod doosre baap ke paas jaate hain। tumne 84 saakaari baap liye hain। vaastav mein ho niraakaar baap ke bachche। tum aatmaayen rahne vaali bhi nirvaandhaam-shantidham ki ho। jahaan baap ke saath sabhi nivaas karte hain। use aatmaon ki duniya kahenge। tum aatmaayen bhi vahaan rehti ho to baap bhi vahaan rehte hain। yahaan laukik baap ke bachche bante ho to unko bhool jaate ho। satayug mein to baap ka koi simran nahin karte hain। buddhi neeche aa jaati hai। unko yaad karenge to kahenge - O baba। inko bhi baba kehte hain। woh bhi father hai। laukik baap ko yahaan dekhte hain। paarlaukik baap ko bulaate hain to nazar oopar jaati hai। abhi tum us baba ke bane ho। tum jaante ho pahle ham pavitra the, raajya-bhaagya kiya, ab 84 janma poore hue hain। duhkhi hue hain isliye baap ko yaad karte hain। yeh vastra (shareer) pahante-pahante ab tamopradhaan ban gaya hai। pahle aatma aur shareer - donon satopradhaan the। phir aatma sato, rajo, tamo mein aati hai। pahle golden thi phir silver, copper, iron mein aaye hain। isko jevar bhi kaha jaata hai। sone mein khaad daalte hain na। baap samjhaate hain ab tum aatmaayen patit ho gai ho। sona kaala ho gaya hai। tum kaale impure ban gaye ho। pahle tum aatma pure thi, shareer bhi pure tha, ab phir pure shareer kaise lenge? kya snaan karne se? snaan karne se to kuchh hota nahin hai। aatma pukaarti hai - he patit-paavan baba। ‘baba' akshar kitna meetha hai! bada achha hai। bhaarat mein hi ‘baba' akshar hai। bachche ‘baba-baba' karte rehte hain। abhi tum bachche jaante ho ham aatma-abhimaani ban baap ke bane hain। baap kehte hain hamne pahle-pahle tumko svarga mein bheja tha। part bajaate-bajaate abhi ant mein aakar pahunche ho। andar mein sadaiv baba-baba kehte raho। tum bachche jaante ho baba aaya hua hai। unko hi sabhi yaad karte hain ki he patit-paavan baba aao, ham patiton ko aakar paavan banaao। sabhi apni-apni bhaasha mein pukaarte hain। jab duniya puraani hoti hai tab pukaarte hain। to zaroor sangam par hi aayenge। yeh bhi tum jaante ho। shaastron mein to agdam bagdam bahut likh diya hai। tum bachchon ko pakka nishchay hai ki hamaara most beloved baba hai, most lovely baba hai। baba bhi kehte hain sweet children। sweet, sweeter, sweetest। ab sweet kaun hai? laukik sambandh mein bhi father hi sweet hota hai। phir sweetest kahenge teacher ko। teacher achha hota hai। phir bhi padhaate hain। kaha bhi jaata hai - knowledge is source oph income। to yeh knowledge bhi source oph income hai।

yog ko yaad, gyaan ko knowledge kaha jaata hai। tum bachche jaante ho - tumko svarga ka maalik banaaya tha, tab to shivjayanti manaate hain। parantu shivbaaba kaise aaya - yeh kisko bhi pata nahin hai। chitron mein trimoorti hai, shiv hai oopar mein। brahma dvaara sthaapna, sthaapna kaun karaate hain? karnakraavanhaar shivbaaba hai। brahma, vishnu, shankar ke oopar hai shiv। woh hui rachna। unka rachta hai shiv। woh niraakaar hai। yeh hai saakaar srishti। srishti chakra hai, jo repeat hota hai। sookshm vatan ko srishti ka chakra nahin kahenge। yeh manushya srishti hi chakra lagaati hai। baaki na sookshm vatan mein, na mool vatan mein chakra ki baat hai। abhi hai kaliyug narka। satayug hai svarga। ab narkavaasiyon ko svargavaasi kaun banaave? vaam maarga mein jaane se hi patit ho jaate hain। din-pratidin sukh se duhkh mein aate jaate hain। duniya tamopradhaan ban jaati hai, tab kehte hain yeh bilkul hi tamoguni buddhi hai। yeh bahut satopradhaan buddhi hain, jaise devta samaan hain। vaastav mein pooja devtaaon ki honi chaahiye। parantu devta to is samay koi hain nahin kyonki daiveegun unmein hain nahin। Christian log Christ ko jaante hain। unko poojte hain। bhaaratvaasi apne ko devi-devta kah nahin sakte। naam to bahuton ke hain - phalaani devi, phalaana devta। parantu woh gun to hain nahin। gaate bhi hain - main nirgun haare mein koi gun naaheen… aatma kiske saamne kehti hai? baap ke saamne kehna chaahiye na। baap ko bhool bhaaiyon ke peechhe jaakar pade hain। brahma, vishnu, shankar bhi brothers hain na। unse kuchh bhi milne ka nahin hai। brothers ki pooja karte rehte, neeche girte jaate hain। ab tumko to father se varsa milta hai। father ko koi jaante nahin। father ko sarvavyaapi kah dete hain। are, father ka naam? kah dete hain woh to naam-roop se nyaara hai। are, tum ek or akhanda jyoti swaroop kehte ho phir nyaara kaise kehte? yeh bhi samajhte hain - law mujeeb sabko tamopradhaan banna hi hai। phir jab baap aaye tab sabko satopradhaan banaaye। aatma ko pure zaroor hona hai। sab aatmaayen baap ke saath rahne vaali hain। nai duniya so puraani duniya honi hai।

tum jaante ho abhi ham baba ke bane hain। baba aaya hua hai। brahma dvaara sthaapna karaate hain। baap kehte hain main brahma tan ka aadhaar leta hoon। bhaagyashaali rath mein savaar hota hoon। rath mein zaroor aatma to hogi na। kehte hain bhaageerath ne ganga laai। ab ganga jataaon se kaise aayegi? yeh to pahaadon se meetha paani aata hai। saagar se baadal bharkar phir baraste hain। aajkal science ki taakat se paani ko meetha bana dete hain। natural baadal kitne baraste hain। kitna paani aa jaata hai। baadh ho jaati hai। kahaan se itna paani aata hai? baadal hi kheenchate hain। baaki indra aadi kuchh hai nahin। yeh to baadal bharkar phir baraste hain। vaastav mein yeh hai gyaan ki varsha। yeh knowledge hai na। inse kya hota hai? patit se paavan bante hain। ganga-jamuna nadi satayug mein bhi to hogi hi। kehte hain shreekrishna vahaan khelpaal aadi karte the। vaastav mein aisi koi baat hai nahin। vahaan to shreekrishna ki bahut sambhaal se paalna karte hain। bahut achha phool hai na। phool kitna pyaara lagta hai। phool se hi sugandha lete hain। kaante se kab sugandha lete hain kya? yeh hai hi kaanton ka jangal। niraakaar baap kehte hain main aakar garden oph flower banaata hoon, isliye babulnaath naam bhi rakhte hain। babul kaanton ko flower banaate hain isliye mahima gaai jaati hai - kaanton ko phool banaane vaala naath। to baba se kitna lav hona chaahiye। laukik baap hote bhi aatma paarlaukik baap ko yaad karti hai, kyonki duhkhi hai। yeh bhi khel hai। tum aadha kalpa se yaad karte aaye ho। woh aate hain tab to shiv jayanti manaate ho। tum jaante ho abhi ham behad ke baap ke bachche bane hain। hamaara sambandh unse bhi hai। laukik se bhi hai। behad ka baap kehte hain mujhe yaad karne se tum paavan ban jaayenge। aatma jaanti hai yeh laukik baap hai, woh paarlaukik baap hai। aatma paarlaukik baap ko hi pukaarti hai। aatma kehti hai - he bhagwan, O god father। jab father ghar mein baitha hai to phir O father kah kyon pukaarte hain? aatma us avinaashi baap ko yaad karti hai। woh kab aakar nai duniya rachte hain - yeh bhi tum abhi samajhte ho। zaroor kahenge ki kaliyug ant aur satayug aadi ke sangam par aayega। kaliyug ki aayu phir laakhon varsha kah dete hain। manushya bhagwan ko paane ke liye kitna bhatakte hain। sabse jaasti bhakti kaun karte hain? unko to pahle milna chaahiye na। baap ne samjhaaya hai pahle-pahle bhakti tum hi shuru karte ho। tumko hi pahle gyaan milna chaahiye। tum pahle aasuri gunon vaale the। ab tum daivi gunvaan devta bante ho। itne oonche svarga ke tum maalik bante ho। vahaan ki har cheej first class hoti hai। tum bahut bade aadmi bante ho। tumhaare liye vahaan heere-javaahron ke mahal banenge।

jab tak brahman na bane tab tak shivbaaba se varsa mil na sake। shoodra varsa le na saken। yeh yagya hai na। ismen brahman zaroor chaahiye। yagya hamesha braahmanon ka hi hota hai। shiv ko rudra bhi kaha jaata hai। to yeh hai rudra gyaan yagya। rudra shivbaaba ne yeh gyaan yagya racha hua hai। bhakti poori hoti hai to yagya racha jaata hai। manushya yagya rachte hain bhakti maarga mein। satayug mein devtaayen kabhi yagya aadi nahin rachte। parantu yeh hai raajasva ashvamedh avinaashi rudra gyaan yagya। is naam se shaastron mein bhi gaayan hai। bhakti aur gyaan aadha-aadha hai। bhakti hai raat, gyaan hai din। yeh baba samjhaate hain। sadaiv baba-baba karte raho। baba hamko vishwa ka maalik banaane vaala hai। most beloved baba hai। unse jaasti pyaara duniya mein koi ho nahin sakta। aadhaakalpa baap ko yaad kiya hai। ab jaante ho us baap ke ham bane hain। baap kehte hain grihastha vyavhaar mein rehte baap ko yaad karo। sab to yahaan rah na saken। haan, us baba ke paas rah sakte ho। kahaan? kaun sa baba? uska naam? shivbaaba paas kahaan rahenge? paramdham mein। vahaan sabhi aatmaayen rah sakti hain। yahaan to nahin rah sakti। yahaan to thode hi rahenge। yahaan to tum bachchon ko knowledge leni hai। yeh padhaai hai na।

koi bhi milte hain to unko yeh bataana chaahiye ki do baap hain - laukik aur paarlaukik। duhkh mein paarlaukik baap ko hi yaad karte hain। woh baap ab aaya hua hai। most beloved shivbaaba hai। shreekrishna bhi sabka most beloved hai। parantu shiv-baba hai niraakaar aur shreekrishna hai saakaar। shreekrishna ko sabka baap nahin kahenge। woh hai vishwa ka maalik। unko bhi banaane vaala shiv hai। donon hi pyaare hain। parantu donon mein jaasti pyaara kaun hai? kahenge shiv। shiv hi shreekrishna ko aisa banaate hain। baaki shreekrishna kya karte hain? kuchh bhi nahin। tamopradhaan aatmaon ko baap hi aakar satopradhaan banaate hain। to gaayan unka hi hoga na। shreekrishna to bachcha hai, unka dance aadi dikhaate hain। shivbaaba kya dance karenge? baap samjhaate hain tum sab paarvatiyaan ho। shiv amarnaath tumko katha suna rahe hain। doosri koi paarvati hai nahin। arjun bhi ek nahin, tum sab arjun ho। dropdiyaan bhi tum sab ho। woh dushaasan hain jo nangan karte hain। tab pukaarte hain baba hamaari raksha karo। baba kehte hain - bachche, nangan kabhi nahin hona। dikhaate hain na jab dropdi ko nangan kar rahe the to phir shreekrishna ne unko 21 cheer diye। ab 21 saadi pahni jaati hain kya? yeh bhi jaise ek khel dikhaate hain। shreekrishna oopar se saadiyaan dete jaate hain। ab 21 saadiyaan kaise pahan sakenge? vaastav mein arth yeh hai - baap nangan hone se aisa bachaate hain jo tum 21 janma kabhi nangan nahin hote ho। achha!

meethe-meethe sweet children prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) andar mein baba-baba kehte baba samaan sweet banna hai। aatma-abhimaani hokar rehna hai। padhaai par poora dhyaan dena hai।

2) most lovely baap ko yaad kar paavan zaroor banna hai। yaad ki agni se vikaaron ki khaad nikaal sachcha sona banna hai।

vardaan:- pahaad jaisi baat ko bhi ek baba shabd ki smriti dvaara rooi banaane vaale sahajyogi bhav

sahajyogi banne ke liye ek shabd yaad rakho - “mera baba'' bas। koi bhi baat aa jaae, himaalay pahaad se bhi badi ho lekin baba kaha aur pahaad rui ban jaayega। raai bhi thodi majboot, kadak hoti hai, rooi narma aur halki hoti hai। to kitni bhi badi baat rui samaan halki ho jaayegi। duniya vaale dekhenge to kahenge yeh kaise hoga aur aap kahenge yeh aise hoga। baba kaha aur buddhi mein touch hoga ki aise karo to sahaj ho jaayega। yahi sahajyogi jeevan hai।

slogan:- pyaar ke saagar mein lavleen raho to sada sameep, samaan aur sampanna bhav ke vardaani ban jaayenge।