Murli du jour du samedi 30 septembre 2023

30-09-2023 praatahmurli om shanti "baapdaada"' madhuban

“meethe bachche - tumhaara magaz (dimaag) khushi se sada bharpoor hona chaahiye kyonki tum abhi baap ke samaan master knowledgeful bane ho''

prashn:- tum bachche 21 janmon ke liye kis aadhaar par maalaamaal bante ho?

uttar:- sangam par tum direct baap ko apna sab kuchh dete ho। sab baap ke havaale kar dete ho iske return mein tum 21 janmon ke liye maalaamaal ban jaate ho। baba kehte is samay tumhaare paas jo kooda kichda hai woh mujhe de do, marne ke pahle apna sab kuchh transfer kar do to bhavishya mein uska return mil jaayega।

geet:- om namo shivaae…

om shanti। saaligraamon prati shiv bhagvaanuvaach। roohaani bachchon prati roohaani baap samjha rahe hain। abhi tum bachche jaante ho yahaan hamko aatma samajh baithna hai, na ki shareer aur saari duniya mein ek bhi aisa manushya nahin hai jo yeh samajhte hon ki aatma kya hai। aatma ko hi nahin jaante to phir paramatma ko bhi kaise samjhenge? baap dvaara hi aatma ki samjhaani milti hai। aatma aur paramatma ko hi nahin jaante isliye hi manushya duhkhi hain। abhi tum bachchon ko yeh maaloom hua hai ki is drama ki athva kalpa vriksha ki aayu 5 hajaar varsha hai। yeh to samajhte ho unhon ka beej agar chaitanya hota to batlaata na ki mujh beej se jhaad aise paida hua। ab woh to hai jad, yeh chaitanya ek hi manushya srishti ka variety jhaad hai। tum bachchon ko abhi saari knowledge hai। tumhaare mein bhi nambarvaar purushaartha anusaar shuru se lekar ant tak saare jhaad ka gyaan mila hua hai। jaise beej mein saare jhaad ka gyaan hota hai। yeh baap hai chaitanya beejroop, gaate bhi hain parampita paramatma sat-chit-aanand swaroop hai। niraakaar ki mahima gaai jaati hai। unki mahima sabse bilkul hi nyaari hai। manushya to kuchh bhi nahin jaante hain। bhal devtaaon ko yeh varsa yahaan se hi milta hai parantu unko bhi vahaan yeh gyaan nahin rehta। wonderful baat hai na। yahaan abhi tumko saara gyaan milta hai। buddhi mein knowledge hai - yeh srishti chakra kaise phirta hai। baap aakarke nai raajdhaani sthaapan karte hain। tum is drama ke actors ho। sirf tumko hi drama ke aadi-madhya-ant, rachta aur rachna ka gyaan hai aur kisko hai nahin। na shoodra varna ko yeh gyaan hai, na devta varna ko yeh gyaan hai। koi sunenge to wonder khaayenge। manushya kehte hain yeh tyohaar aadi jo manaate hain, woh parmapra se chale aaye hain। parantu baap samjhaate hain satayug mein to yeh hote hi nahin। tyohaaron ko koi jaante hi nahin। abhi to kehte hain na yeh dashahra, deevaali aadi tyohaar aane hain। vahaan to yeh kuchh bhi yaad nahin rehta। ekdam nishphurne (nishchint) ho raajya karte rahenge।

abhi yahaan tumhaari buddhi ka taala khula hua hai। tum actors ho। is drama ke creator, director, mukhya actors, duration aadi ko jaante ho। yeh knowledge jiski buddhi mein rahegi, unko apaar khushi rahegi। god father ko hi knowledgeful gyaan saagar kaha jaata hai। kaunsi knowledge hai? sivaae tumhaare yeh koi bhi samajh na sake। god ko hi knowledgeful, world almighty authority kaha jaata hai। to knowledge kiski hai? sabhi vedon, shaastron, granthon, srishti ke aadi-madhya-ant ki। shaastron mein yeh gyaan nahin hai। woh hai hi bhakti maarga ke shaastra, sirf pooja karte raho। baaki rachayita aur rachna ki knowledge kuchh bhi nahin hai। tab to rishi-muni aadi bhi kehte the ki ham rachta aur rachna ko nahin jaante। samjhaane vaala ek hi baap hai। to jaanenge phir kahaan se। abhi tum baap dvaara sunte ho phir yeh knowledge praayahlop ho jaati hai। yeh knowledge sivaae tum bachchon ke aur koi nahin jaante। tumko kitni badi knowledge milti hai। to tum bachchon ko kitni khushi honi chaahiye! woh log doktari aadi padhne ke liye, seekhne ke liye vilaayat mein jaate hain। tumko to yahaan aisa banaate hain jo vahaan yeh doctor aadi hote hi nahin। behad ka baap jo knowledgeful hai, un dvaara ham sab kuchh jaan jaate hain। unki ham santaan hain। to gyaan se magaz (dimaag) kitna bharpoor rehna chaahiye। kitni khushi honi chaahiye। aisi koi cheej nahin jisko ham na jaante ho। woh log jo kuchh padhte hain woh to kuchh nahin hai। bhakti maarga ke shaastra aadi kitne padhte hain। parantu yeh to koi nahin jaante ki yeh srishti chakra kaise phirta hai? tum bachche abhi master knowledgeful bante ho। nutshell mein to sab jaan chuke ho। baaki sirf aatma jo tamopradhaan hai unko satopradhaan banaana hai। koi hain jo tamopradhaan se tamo bane honge, koi tamo se rajo bane honge, koi rajo se sato bane honge। satopradhaan nahin kahenge। satopradhaan jab ban jaayenge to nambarvaar purushaartha anusaar karmaateet avastha aa jaayegi phir to nai duniya chaahiye raajaai ke liye isliye puraani duniya ka vinaash hota hai। jab yeh yagya poora hoga to saari puraani duniya ki aahuti padegi। yeh padhaai poori ho jaayegi phir nambarvaar purushaartha anusaar karmaateet avastha ko chakra lenge। jaise woh bhi imtahaan paas kar phir transfer ho jaate hain, tum bhi mrityulok se transfer ho amarlok mein chale jaayenge। ham amarlok mein the phir 84 janma lete-lete mrityulok mein aa gaye hain।

tum kehte ho abhi ham padh rahe hain phir amarlok mein jaakar devi-devta banenge। baap hi manushya se devta banaate hain। patiton ko paavan devi-devta kaun banaayega? devta to yahaan koi hai nahin, jo devi-devta banaave। lakshmi-naaraayan chaahiye na। woh to yahaan hote nahin। tum bachche jaante ho is samay baap hi aakar padhaate hain। svarga ka raajya bhaagya dete hain। svarga tha, lakshmi-naaraayan ka raajya tha na। inhon ki yeh raajaai kisne sthaapan ki? heavenly god father ne hi paradise satayug sthaapan kiya, jahaan devi-devta raajya karte the। vahaan doosra koi khanda tha nahin। ek hi bhaarat tha। tumhaari buddhi mein hai - ham jab raajya karenge to doosra koi nahin hoga। tumhaari buddhi mein yeh saara jhaad hai, iska beej oopar mein hai। woh sat hai, chaitanya hai। aatma bhi imperishable hai। baba bhi imperishable hai। jo baba mein gyaan hai woh tumko sunaate hain। saara jhaad khada hai, baba oopar mein hai। is samay manushya tamopradhaan kaante hain। jhaad puraana hone se jaise sookh jaata hai isliye inko kaha jaata hai kaanton ka jangal। vahaan hota hai phoolon ka bageecha। baagvaan bhi hai, kisko khivaiya, kisko baagvaan, kisko maali kehte hain। baap hai khivaiya। tum bhi boat chalaana seekh rahe ho। harek ki naeeya bahut puraani ho gai hai। naeeya aatma aur shareer donon ki bani hui hai। gaate bhi hain - naeeya meri paar lagaao। ab naeeya bhi puraani to shareer bhi puraana। ab paar kaise ho aur kahaan jaayen? tum jaante ho paar kisko kaha jaata hai, muktidhaam, jeevanmuktidhaam kya cheez hai! barobar baap abhi paar le jaate hain, duhkhadhaam se sukhdhaam athva vishay saagar se ksheersaagar mein le jaate hain। woh sirf gaate hain naeeya meri paar lagaao, baagvaan aao, kaanton ko phool banaao। tum bhi pahle nahin jaante the। abhi mool vatan, sookshm vatan, satayug se lekar kaliyug tak sab raaz ko jaan gaye ho। jo jaante hain vahi sunaate hain। andar gyaan tapakta rahe to sadaiv khushi mein rahenge। koi chinta ki baat hi nahin rehti, phikra se faarig ho jaate ho।

tum jaante ho baba hamko le jaate hain, ab ham baba jaise ban rahe hain। bachcha baap samaan banta hai na। baba knowledgeful hai, tumko bhi knowledgeful banaaya hai। aatmaon ka connection hai hi paramatma baap se। aatma kehti hai jo baba mein knowledge hai, woh ham aatmaon ko de rahe hain। tum ho roohaani baap ke roohaani bachche। yeh bhi nai baat hai na। baba bigar koi suna na sake। woh niraakaar baap bhi saakaar ke aadhaar se sunaate hain। nahin to tum sun na sako। bachchon ko baap aap samaan banaate hain। duhkh harta, sukh karta woh baap hai। unki jo mahima hai woh tumhaari bhi hai, koi farka nahin। baaki kya farka rehta hai? ham janma-maran mein nahin aate hain, tum janma-maran mein aate ho। mujhe gyaan saagar kehte hain to main tum bachchon ko gyaan deta hoon। main sukh ka saagar, pavitrata ka saagar, shanti ka saagar hoon, to tumko bhi yeh varsa deta hoon।

tum jaante ho yeh saara chakra phir 5 hajaar varsha baad phirega। yeh knowledge hai source aaph income। jitna padhte hain utna knowledge se income hoti hai। yeh knowledge bhi hai to dhandha bhi hai। sharraaph log satta karte hain, tum kya dete ho? kooda-kichda। marne ke baad karneeghor ko kooda-kichda hi dete hain। tumko to jeete ji dena hai। eeshvar arth dete hain। ab kya eeshvar ko puraana khatiya aadi denge? baap kehte hain tum marne se pahle hi sab de do। yeh puraani cheez tumhaare kaam mein hi nahin aayegi। bhal koi kitna bhi saahookaar ho parantu kitne din ke liye hoga? ek janma ke liye, phir karmon anusaar pata nahin kahaan jaakar janma lenge। tum to baap se 21 janmon ke liye lete ho purushaartha anusaar।

yeh hai roohaani service। saari duniya jaanti hai jismaani service ko। roohaani ko koi jaante hi nahin। supreme rooh hi aakar knowledge dete hain। us supreme ka janma bhi manaate hain। unko hi sukh ka saagar, shanti ka saagar, duhkh harta, sukh karta kehte hain। shiv naam hai na। jayanti bhi manaate hain। parantu buddhi mein kuchh nahin hai। baap hi yeh sab raaz sunaate hain। phir 5 hajaar varsha baad sunaayenge। yeh gyaan satayug mein nahin hota kyonki aatmaayen satopradhaan hain। gyaan se hi woh aisi banti hain। yeh nai baaten hain na। mandir banaane vaale bhi yeh nahin jaante ki lakshmi-naaraayan ka mandir ham kyon banaate hain? unhon ko yeh raajya kisne diya? kaise yeh pad paaya? kehte hain na karmon ka phal hai। abhi baap baith karma-akarma-vikarma ki gati ka raaz samjhaate hain। unhon ne bhi yeh knowledge suni hogi। hai hi bhagvaanuvaach - geeta se hi aadi sanaatan devi-devta dharma ki sthaapna hui। vahaan bahut thode manushya hote hain। baaki saari puraani srishti kahaan gai? zaroor vinaash hua hoga। mahaabhaarat ladaai bhi gaai hui hai। girdhar kaviraaj kehte hain। ab girdhar to kehte hain shreekrishna ko। kavi kaun hai? shivbaaba ko kavi kaha jaata hai। kavi arthaat sunaane vaala।

tum jaante ho aaphten aadi bahut aani hain। puraani duniya ke vinaash liye kya-kya cheejen bana rahe hain। yeh vahi mahaabhaarat ladaai hai jabki bhagwan ne aakar roodra gyaan yagya racha hai। bhagwan yagya kislie rachte hain? yagya racha hi jaata hai sukh-shanti ke liye। baap sabhi ka duhkh harta, sukh karta hai। to is gyaan yagya mein saari puraani srishti svaaha ho jaayegi। tum jaante ho ham brahman yagya ke servant hain। ham brahman brahma ke sachche mukh vanshaavli hain to baba jo mukh se kahe woh maanna pade। shri shri ki shreshtha mat se hi ham shreshtha ban, roodra ki maala ka daana banenge। sijra banaate hain - vaasvaani sijra, kriplaani sijra…। to oopar mein hai shivbaaba, unka hai niraakaari sijra। niraakaari sijra woh phir saakaari sijra hota hai। pahle number mein hai prajaapita। to woh hua jismaani aur woh roohaani। roohaani baap aakar prajaapita brahma dvaara rachna rachte hain। unko bulaate hi hain he patit-paavan aao। puraani patit duniya ko paavan banaane aao। nai nahin banaate hain। pralay hoti nahin। to yeh world ki history-geography repeat hoti hai। 84 ka chakra phir se shuru hota hai। behad ke baap se behad ki knowledge milti hai, behad ka varsa milta hai। behad ke baap ko sab yaad karte hain - he bhagwan kehte hain na। he eeshvar, he prabhu kahne se koi chitra yaad nahin aata। niraakaar yaad aata hai। kehte bhi hain ki bhagwan ko yaad karo। father hai na। ham sab hain brothers। aatmaon ke liye kehte hain sab brothers hain। sab pukaarte hain - he patit-paavan, duhkh harta, sukh karta, he liberator aao, hamko guide karo। ghar bhool gaya hai। yaad hai parantu ham ja nahin sakte hain। yog lagaane se jaise ghrit padta jaata hai। aatma avinaashi hai na। to aatma ki jyoti saari ujhaai nahin jaati hai। to ab yogbal ka ghrit daalna hai। sadaiv ke liye phir deepmaala, sojhra ho jaayega। deepmaala arthaat ghar-ghar mein sojhra। to deepmaala kahaan hogi? satayug mein। yahaan nahin। yeh sab raaz tum samajhte ho, tumhaare paas blind faith nahin hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) chintaaon se free hone ke liye baap samaan knowledgeful banna hai। buddhi mein sada gyaan ka simran karte rehna hai।

2) roohaani service kar apni praalabdha banaani hai। puraana sab kuchh transfer kar dena hai।

vardaan:- sarva prati shubh kalyaan ki bhaavna rakh parivartan karne vaale behad sevaadhaari bhav

majority bachche baapdaada ke aage apni yeh aash rakhte hain ki hamaara phalaana sambandhi badal jaae। ghar vaale saathi ban jaaen lekin sirf un aatmaon ko apna samajh yeh aash rakhte ho to had ki deevaar ke kaaran aapki shubh kalyaan ki bhaavna un aatmaon tak pahunchti nahin। behad ke sevaadhaari sarva prati aatmik bhaav va behad ki aatmik drishti, bhaai-bhaai ke sambandh ki vritti se shubh bhaavna rakhte hain to uska phal avashya praapta hota hai - yahi mansa seva ki yathaartha vidhi hai।

slogan:- gyaan roopi baanon ko buddhi roopi tarkash mein bharkar maaya ko lalkaarne vaale hi mahaaveer yoddhe hain।