Murli du jour du jeudi 2 novembre 2023

02-11-2023 praatahmurli om shanti "baapdaada"' madhuban

meethe bachche - yaad roopi davaai se svayan ko ever nirogi banaao, yaad aur svadarshan chakra phiraane ki aadat daalo to vikarmaajeet ban jaayenge

prashn:- jin bachchon ko apni unnati ka sada khyaal rehta hai, unki nishaani kya hogi?

uttar:- unki har act sada shreemat ke aadhaar par hogi। baap ki shreemat hai - bachche, deh-abhimaan mein na aao, yaad ki yaatra ka chart rakho। apne hisaab-kitaab ka potaamel rakho। check karo - kitna samay ham baba ki yaad mein rahe, kitna samay kisko samjhaaya?

geet:- tu pyaar ka saagar hai…

om shanti। yahaan jab baithte ho to baap ki yaad mein baithna hai। maaya bahuton ko yaad karne nahin deti kyonki deh-abhimaani hain। koi ko mitra-sambandhi, koi ko khaan-paan aadi yaad aata rehta hai। yahaan jab aate ho to baap ka aahvaan karna chaahiye। jaise lakshmi ki pooja hoti hai to lakshmi ka aahvaan karte hain, lakshmi koi aati nahin hai। yeh sirf kaha jaata hai to tum bhi baap ko yaad karo athva aahvaan karo, baat ek hi hai। yaad se hi vikarma vinaash honge। dhaarna nahin hoti hai kyonki vikarma bahut kiye hue hain, jis kaaran baap ko bhi yaad nahin kar sakte hain। jitna baap ko yaad karenge utna vikarmaajeet banenge, health milegi। hai bahut sahaj, parantu maaya athva past ke vikarma rookaavat daalte hain। baap kehte hain tumne aadhaakalpa aythaartha yaad kiya hai। abhi to practical mein aahvaan karte ho kyonki jaante ho aane vaala hai, murli sunaane vaala hai। parantu yeh yaad ki aadat pad jaani chaahiye। ever nirogi banaane liye surgeon davaai dete hain ki mujhe yaad karo। phir tum mere se aakar milenge। mujhe yaad karne se hi varsa paayenge। baap aur sweet home ko yaad karna hai। jahaan jaana hai, woh buddhi mein rakhna hai। baap hi yahaan aakar sachcha paigaam dete hain, aur koi bhi eeshvar ka paigaam nahin dete hain। woh to yahaan stage par part bajaane aate hain aur eeshvar ko bhool jaate hain। eeshvar ka pata nahin rehta hai। unko vaastav mein paigambar, messenger kah nahin sakte। yeh to manushyon ne naam lagaaye hain। woh to yahaan aate hain, unko apna part bajaana hai। to yaad phir kaise karenge? part bajaate patit banna hi hai। phir ant mein paavan banna hai। paavan to baap hi aakar banaate hain। baap ki yaad se hi paavan banna hai। baap kehte hain paavan banne ka ek hi upaay hai - deh sahit jo bhi deh ke sambandh hain, unko bhool jaana hai।

tum jaante ho mujh aatma ko yaad karne ka farmaan mila hai। us par chalne se hi farmaanbardaar kaha jaayega। jo jitna purushaartha karte hain utna farmaanbardaar hai। yaad kam karte to kam farmaanbardaar hain। farmaanbardaar pad bhi oonch paate hain। baap ka farmaan hai - ek to mujh baap ko yaad karo, doosra knowledge ko dhaaran karo। yaad nahin karte to sajaayen bahut khaani padti। svadarshan chakra phiraate rahenge to bahut dhan milega। bhagvaanuvaach - mujhe yaad karo aur svadarshan chakra phiraao arthaat drama ke aadi-madhya-ant ko jaano। mere dvaara mujhe bhi jaano aur srishti ke aadi-madhya-ant ka chakra bhi jaano। do baaten mukhya hain। is par attention dena hai। shreemat par poora attention denge to oonch pad paayenge। merciful banna hai, sabko raasta bataana hai, kalyaan karna hai। mitra-sambandhiyon aadi ko sachchi yaatra par le jaane ki yukti rachni hai। woh hain jismaani yaatraayen, yeh hai roohaani yaatra। yeh spiritual knowledge koi ke paas nahin hai। woh hai sab shaastron ki philosophy। yeh hai spiritual roohaani knowledge। supreme rooh yeh knowledge dete hi hain roohon ko samjhaakar vaapas le jaane ke liye।

kai bachche yahaan aakar baithte hain to koi laachaari baithte hain। apni sva-unnati ka kuchh bhi khyaal nahin hai। deh-abhimaan bahut hai। dehi-abhimaani ho to merciful banen, shreemat par chalen। farmaanbardaar nahin hain। baap kehte hain apna chart likho - kitna samay yaad karte hain? kis-kis samay yaad karte hain? aage chart rakhte the। achha baba ko na bhejo, apne paas to chart rakho। apni shakla dekhni hai - ham lakshmi ko varne laayak banen hain? vyaapaari log apne paas potaamel rakhte hain, koi-koi manushya apni saare din ki dincharya likhte hain। ek hobby rehti hai likhne ki। yeh hisaab-kitaab rakhna to bahut achhi baat hai ki kitna samay ham baba ki yaad mein rahe? kitna samay kisko samjhaaya? aisa chart rakhen to bahut unnati ho jaae। baap raay dete hain aise-aise karo। bachchon ko apni unnati karni hai। maala ka daana jo bante hain unko purushaartha bahut karna hai। baba ne kaha tha - braahmanon ki maala abhi nahin ban sakti hai, ant mein banegi, jab roodra ki maala banegi। braahmanon ki maala ke daane badalte rehte hain। aaj jo 3-4 number mein hain, kal woh last mein chale jaate hain। kitna farka ho jaata। koi girte hain to durgati ko pa lete। maala se to gaye, praja mein bhi bilkul chandaal jaakar bante hain। agar maala mein pirona hai to uske liye badi mehnat karni pade। baba bahut achhi raay dete hain - apni unnati kaise karo? sabke liye kehte hain। bhal koi goonga hote bhi ishaare se koi ko baap ki yaad dila sakte hain। bolne vaale se ooncha ja sakte hain। andhe loole kaise bhi hon tandaroosta se bhi jaasti pad pa sakte hain। second mein ishaara diya jaata hai। second mein jeevanmukti gaai hui hai na। baap ka bana aur varsa to mil hi jaayega। phir usmein nambarvaar pad zaroor hain। bachcha paida hua aur varse ka hakdaar ban jaata hai। yahaan tum aatma to ho hi males। to father se varse ka hak lena hai। saara madaar purushaartha ke oopar hai। phir kahenge kalpa pahle bhi aise purushaartha kiya tha। maaya ke saath boxing hai। paandavon ki thi hi maaya raavan se ladaai। koi to purushaartha kar vishwa ke maalik double sirtaaj bante hain, koi phir praja mein bhi naukar chaakar bante hain। sabhi yahaan padh rahe hain। raajdhaani sthaapan ho rahi hai, attention zaroor aage vaale daanon taraph jaayega। 8 daane kaise chal rahe hain, purushaartha se maaloom padta hai। aise nahin, antaryaami hain, sabke andar ko read karte hain। nahin, antaryaami maana jaani jaananhaar। aise nahin ki har ek ke dil ki baat baithkar jaante hain। jaani jaananhaar arthaat knowledgeful hai। srishti ke aadi-madhya-ant ko jaante hain। ek-ek ki dil ko thode hi baith read karenge। mujhe thought reader samjha hai kya? mai jaaneejaananhaar hoon arthaat knowledgeful hoon। past, present, future ko hi srishti ka aadi, madhya, ant kaha jaata hai। yeh chakra kaise repeat hota hai, uski repetition ko jaanta hoon। woh knowledge tum bachchon ko padhaane aata hoon। har ek samajh sakte hain ki kaun kitni service karte hain, kya padhte hain? aise nahin ki baba ek-ek ko baith jaante hain। baba sirf yeh dhandha thode hi baith karenge। woh to jaani jaananhaar manushya srishti ka beejroop, knowledgeful hai। kehte hain manushya srishti ke aadi, madhya, ant aur jo mukhya actors hain unko jaanta hoon। baaki to athaah rachna hai। yeh jaani-jaananhaar akshar to puraana hai। ham to jo knowledge jaanta hoon woh tumko padhaata hoon। baaki tum kya-kya karte ho woh saara din baithkar dekhoonga kya? main to sahaj raajayog aur gyaan sikhlaane aata hoon। baap kahenge bachche to bahut hain, main bachchon ke aage pratyaksha hua hoon। saari kaarobaar bachchon se hai। jo mere bachche bante hain unka main baap hoon। phir woh saga hai va laga hai so main samajh sakta hoon। har ek ki padhaai hai। shreemat par act mein aana hai। kalyaankaari banna hai। tum bachche jaante ho brihspati ko vrikshapti de kaha jaata hai। vrikshapti bhi thahra, shiv bhi thahra। hai to ek hi। guroovaar ke din bachchon ko school mein bithaate hain। jaise somnaath ka din somvaar hai, shivbaaba somras pilaate hain। yoon naam to unka shiv hai parantu padhaate hain isliye somnaath kah diya hai। roodra bhi somnaath ko kaha jaata hai। roodra gyaan yagya racha to gyaan sunaane vaala ho gaya। naam bahut rakh diye hain। to uski samjhaani di jaati hai। shuru se yeh ek hi yagya chalta hai, kisi ko bhi pata nahin hai ki saari puraani srishti ki saamagri is yagya mein svaaha honi hai। jo bhi manushya hain, jo kuchh bhi hai, tatvon sahit sab parivartan hona hai। yeh bhi bachchon ko dekhna hai, dekhne vaale bade mahaaveer chaahiye। kuchh ho jaae, bhoolna nahin hai। manushya to haay-haay, traahi-traahi karte rahenge। pahle-pahle to samjhaana hai thoda khyaal karo, satayug mein ek hi bhaarat tha, manushya bahut thode the, ek dharma tha, abhi kaliyug ant tak kitne dharma hain! yeh kahaan tak chalenge? kaliyug ke baad zaroor satayug hoga। abhi satayug ki sthaapna kaun karega? rachta to baap hi hai। satayug ki sthaapna aur kaliyug ka vinaash hota hai। yeh vinaash saamne khada hai। abhi tumhein baap dvaara past, present, future ka knowledge mila hai। yeh svadarshan chakra phiraana hai। baap aur baap ki rachna ko yaad karna hai। kitni sahaj baat hai।

geet:- tu pyaar ka saagar hai…

chitron mein ocean oph knowledge, ocean oph bliss likhte hain, usmein ocean oph lav akshar zaroor aana chaahiye। baap ki mahima bilkul alag hai। sarvavyaapi kahne se mahima ko hi khatma kar dete hain। to ocean oph lav akshar zaroor likhna hai, yeh behad ke maa-baap ka pyaar hai, jiske liye hi gaate hain tumhari kripa se sukh ghanere, parantu jaante nahin hain। ab baap kehte hain tum mere ko jaanne se sab kuchh jaan jaayege। main hi srishti ke aadi, madhya, ant ka gyaan samjhaaoonga। ek janma ki baat nahin, saare srishti ke past, present, future ko jaante hain, to kitna buddhi mein aana chaahiye। jo dehi-abhimaani nahin bante hain unhein dhaarna bhi nahin hoti hai। saara kalpa deh-abhimaan chala hai। satayug mein bhi paramatma ka gyaan nahin rehta। yahaan part bajaane aaye aur paramatma ka gyaan bhool gaye। yeh to samajhte hain aatma ek shareer chhod doosra leti hai। parantu vahaan duhkh ki baat nahin hai। yeh baap ki mahima hai, gyaan ka saagar, prem ka saagar hai। ek boond hai manmanaabhav, madhyaaji bhav… yeh milne se ham vishay saagar se ksheersaagar mein chale jaate hain। kehte hain na - svarga mein doodh-ghi ki nadiyaan bahti hain। yeh sab mahima hai। baaki nadi koi doodh-ghi ki thode hi ho sakti hai। barsaat mein to paani niklega। ghi kahaan se niklega! yeh badaai di hui hai। yeh bhi tum jaante ho svarga kisko kaha jaata hai। bhal ajmer mein model hai parantu samajhte kuchh bhi nahin। tum koi ko bhi samjhaao to jhat samajh jaayenge। jaise baap ko aadi, madhya, ant ka gyaan hai vaise tum bachchon ki buddhi mein bhi phirna chaahiye। baap ka parichay dena hai, accurate mahima sunaani hai, unki mahima aprampaar hai। sab ek samaan nahin ho sakte। har ek ko apna-apna part mila hua hai। aage chal dekhenge, divya drishti mein jo baba ne dikhaaya hai woh phir practical hona hai। sthaapna aur vinaash ka saakshaatkaar karaate rehte hain। arjun ko bhi divya drishti se saakshaatkaar karaaya tha phir practical mein dekha। tum bhi in okhon se vinaash dekhenge। vaikuntha ka saakshaatkaar kiya hai, woh bhi jab practical mein jaayenge to phir saakshaatkaar banda ho jaayega। kitni achhi-achhi baaten samjhaate hain, jo phir bachchon ko auron ko samjhaani hai - bahnon-bhaaiyon aakar aise baba se varsa lo, is gyaan aur yog ke dvaara।

baba nimantran patra ko correct kar rahe hain। neeche sahi karte hain tan-man-dhan se eeshvareey seva par upasthit hain, is kaarya ke liye। aage chal mahima to nikalni hai। kalpa pahle jinhonne varsa liya hai, unko aana hi hai। mehnat karni hai। phir khushi ka paara chadhte-chadhte sthaai ban jaayega। phir ghadi-ghadi murjhaayenge nahin। toophaan to bahut aayenge, unko paar karna hai। shreemat par chalte raho। vyavhaar bhi karna hai। jab tak service ka saboot nahin dete tab tak baba is service mein laga nahin sakte। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shreemat par poora attention dekar apna aur doosron ka kalyaan karna hai। sabko sachchi yaatra karaani hai, merciful banna hai।

2) baap ke har farmaan ko paalan karna hai। yaad va seva ka chart zaroor rakhna hai। svadarshan chakra phiraana hai।

vardaan:- sachchi dil se saaheb ko raazi karne vaale raazayukta, yuktiyukta, yogayukta bhav

baapdaada ka title dilvaala, dilaaraam hai। jo sachchi dil vaale bachche hain un par saaheb raazi ho jaata hai। dil se baap ko yaad karne vaale sahaj hi bindu roop ban sakte hain। woh baap ki vishesh duaaon ke paatra ban jaate hain। sachchaai ki shakti se samay pramaan unka dimaag yuktiyukta, yathaartha kaarya svatah hi karta hai। bhagwan ko raazi kiya hua hai isliye har sankalp, bol aur karma yathaartha hota hai। woh raazayukta, yuktiyukta, yogayukta ban jaate hain।

slogan:- baap ke lav mein sada leen raho to anek prakaar ke duhkh aur dhokhe se bach jaayenge।