Murli du jour du lundi 11 décembre 2023

11-12-2023 praatahmurli om shanti "baapdaada"' madhuban

“meethe bachche - tum sabko jeevanmukti ka mantra dene vaale satguru ke bachche guru ho, tum eeshvar ke baare mein kabhi bhi jhooth nahin bol sakte''

prashn:- second mein jeevanmukti praapta karne ki vidhi aur uska gaayan kya hai?

uttar:- second mein jeevanmukti praapta karne ke liye pravritti mein rehte kamal phool samaan pavitra bano। sirf is antim janma mein pavitrata ki pratigya karo to jeevanmukti mil jaayegi। is par hi raaja janak ka misaal gaaya hua hai ki grihastha vyavhaar mein rehte ek second mein pratigya ke aadhaar par jeevanmukti praapta ki।

geet:- yeh vakta ja raha hai…

om shanti। baap aate hain sabko second mein jeevanmukti dene। gaayan bhi hai sabka sadgati daata, jeevanmukti daata ek hai। ek second mein jeevanmukti kyon kehte hain? jaise raaja janak ka misaal hai। unka naam janak tha parantu bhavishya mein vahi anujnak banta hai। janak ke liye kehte hain ki unhein ek second mein jeevanmukti mili, lekin jeevanmukti to satayug-treta mein kahenge। guru log kaan mein mantra dete hain, use vasheekran mantra bhi kehte hain। ve to sab mantra dete hain lekin tumhein milta hai mahaamantra, jeevanmukti ka mantra। yeh mantra kaun dete hain? brahmaakumaar-brahmaakumaariyaan। unhein yeh mantra kahaan se mila? us satguru se। sarvottam to ek hi baap hai। phir tum bachche sarvottam bante ho। unmein sarvottam guru hote hain। tum bhi satguru ke bachche guru ho। geeta sunaane vaale ko bhi guru kaha jaata hai। nambarvaar to hote hi hain। tum bhi sat bolne vaale guru ho। tum kabhi eeshvar ke baare mein jhooth nahin bolte ho। pahle-pahle to tum pavitrata ke oopar hi samjhaate ho ki baap se pratigya karo ham kabhi bhi vikaar mein nahin jaayenge। jhooth aadi na bolna yeh to common baat hai। jhooth to bahuton se nikalti rehti hai। par yahaan woh baat nahin hai। yahaan hai pavitrata ki baat। grihastha vyavhaar mein rehte is antim janma mein ham baap se pratigya karte hain ki ham kamal pushpa samaan pavitra rahenge। to yahaan pavitra rahne ki baat hai। kahenge yeh to bahut oonch manzil hai। yeh to ho nahin sakta। tum kahenge vaah, kyon nahin ho sakta। yeh to gaaya hua hai kamal phool samaan… yeh drishtaanta shaastron mein likha hua hai। zaroor baap ne hi aisi shiksha di hai। hai bhi bhagvaanuvaach ya braahmanon vaach। bhagwan sabko nahin sunaate hain। brahman bachche hi sunte hain। yeh baat tumhein sabko samjhaani hai। mool baat hai pavitrata ki। kamal phool samaan pavitra banna hai, janak misal। vahi janak phir anujnak bana। jaise raadhe anuraadhe banti hai। koi ka naam naaraayan hai to bhavishya mein anu naaraayan banta hai। yeh accurate baat hai। to jo bhi aate hain unko samjhaana pade। suna to hai second mein jeevanmukti। grihastha vyavhaar mein rehte oonch pad paaya ja sakta hai। ham anubhav se kehte hain, gapoda nahin maarte hain। bhagvaanuvaach - mukhya baat samjhaani hai - bhagwan sabka baap hai। zaroor jeevanmukti daata bhi vahi hai। yeh hai pravritti maarga। sannyaasiyon ka to hai hi nivriti maarga। woh kabhi raajayog sikhla nahin sakte। woh to gharbaar chhod bhaagne vaale hain। vo yeh gyaan de nahin sakte, yeh hai raajayog। grihastha vyavhaar mein rehte kamal phool samaan pavitra rehna hai। satayug mein bhaarat pavitra pravritti maarga tha, viceless duniya thi। raajaai mein stri-purush donon chaahiye। to samjhaana padta hai - ham anubhvi hain। grihastha vyavhaar mein rehte kamal phool samaan pavitra rah sakte hain। ham jaante hain ki pavitra ban baap dvaara pavitra duniya ke maalik bante hain। pavitra pravritti maarga tha, ab to apvitra pravritti maarga hai। yeh duniya hi bhrashtaachaari hai। woh shreshthaachaari duniya thi। raavan bhrashtaachaari banaate hain, raam shreshthaachaari banaate hain। aadhaakalpa raavan raajya chalta hai। bhrashtaachaari duniya mein bhakti maarga hai। daan-punya aadi karte rehte hain kyonki bhrashtaachaar hai। samajhte hain manushya jitna bhakti, daan-punya karenge to phir bhagwan milega। bhagwan ki bhakti karte hain। kehte hain ki aakar hamko shreshtha banaao। bhaarat shreshthaachaari tha। abhi nahin hai।

bhrashtaachaari hi shreshthaachaari bante hain। bhaarat ki nai rachna ki kahaani koi jaante hi nahin। chitron ke dvaara achhi tarah samjhaaya ja sakta hai। aise-aise chitra banaane padenge। harek centre par pradarshani ke chitra hone chaahiye। baba direction dete hain bhal likh den ki chitra hamaare paas nahin hain, to baba direction denge yeh banaao phir sabko bhejo to sabke paas pradarshani ho jaayegi। yeh chitra bahut arth sahit hain। pahle-pahle yeh buddhi mein aana chaahiye ki ham baap ke bachche hain। bhagwan hai svarga rachne vaala। narka ka rachayita hai raavan। gole ke oopar 10 sir vaale raavan ka chitra bana do। svarga ke gole par chaturbhuj। likh bhi sakte hain - yeh raamraajya, yeh raavan raajya। is samay raavan sarvavyaapi hai। vahaan ham raam sarvavyaapi to nahin kah sakenge। gaaya bhi jaata hai - aatma-paramatma alag rahe bahukaal phir sundar mela kar diya jab satguru mila dalaal। to zaroor woh aayega na। yeh hisaab koi bhi jaante nahin hain। pahle-pahle alag hui hain devi-devtaaon ki aatmaayen। yeh knowledge hai, koi ko bhi samjhaana hai। aatmaon ka baap to hai na। ab he aatma, apne parampita paramatma ka occupation bataao? kya nahin jaanti ho? aisa bachcha to hota nahin jo baap ke occupation ko nahin jaanta ho। baap baith samjhaate hain tum apne janmon ko nahin jaante ho, main samjhaata hoon। pahle-pahle jo devi-devta hain woh itne janma lete hain। to hisaab karo - doosre dharma vaale kitne janma lete honge? siddha kar bataana pade - maximum itne hain। jhaad vriddhi ko paata rehta hai। pahle-pahle devi-devta the। unhon ke hi 84 janma kahe jaate hain। bhaarat ki knowledge hai na। praacheen bhaarat ki knowledge kisne di? yeh bhagwan ne hi di hai। knowledgeful god father hai na। brahma ko bhi knowledgeful nahin kahenge, shreekrishna ko bhi nahin kahenge। shreekrishna ki mahima hi alag hai। yeh samajhne ki badi hi clear knowledge hai। bhagwan to sabka ek hi niraakaar parampita paramatma hai। woh hai rachayita। shreekrishna to hai rachna। oonch te oonch bhagwan to ek hai na। sarvavyaapi unko kah nahin sakte। bhaarat mein oonch te oonch president phir nambarvaar aur hain। sabka occupation bataayenge। aise to nahin, sab ek hi hain। harek aatma ko avinaashi part mila hua hai - yeh siddha karna hai। aapas mein raay kar service ke plan banaane hain। parantu jiski line clear nahin hogi, koi vikaar hoga va naam-roop mein phansa hoga to yeh kaam ho nahin sakega। ismen line badi clear chaahiye। result to ant mein hi niklegi। abhi sabhi nambarvaar hain। manushya kehte hain yeh vyaas bhagwan ne shaastra banaaye, ab vyaas to bhagwan ho nahin sakta। vaastav mein dharma ke shaastra hain hi 4 । bhaarat ka dharma shaastra to hai hi ek maai baap geeta। varsa unse hi milta hai। maa dvaara baap se varsa milta hai। geeta maata ka baap hai rachta। to geeta dvaara hi baap ne praacheen sahaj raajayog ki knowledge di hai। geeta to bhaaratkhanda ka shaastra hai। phir islaami ka dharma shaastra apna hai, buddha ka apna hai, Christian ka apna hai। geeta to hai sabka maai baap, baaki shaastra hain baal bachche। woh baad mein nikle hain। baaki itne ved-upnishad aadi yeh sab kis dharma ke hain? yeh maaloom to hona chaahiye ki yeh kisne uchchaare? usse kaun-sa dharma nikla? koi dharma to hai nahin। pahle to siddha karna hai ki geeta khandan ki hui hai। baap ke badle bachche ka naam de diya hai। jeevan charitra to sabka alag-alag hai। baap kehte hain sarva dharmaani parityaj… maamekam yaad karo। paramatma aatmaon ko kehte hain - tum ashareeri bano, mere ko yaad karo। ashareeri baap hi yeh kah sakte hain। sannyaasi to kah nahin sakte। yeh geeta ke akshar hain। sab dharma vaalon ko kehte hain - ashareeri bhav। abhi naatak poora hota hai। sabko mantra milta hai ki deh sahit deh ke sab sambandh tyaag maamekam yaad karo to tum mere paas aa jaayenge। mukti ke baad jeevanmukti hai zaroor। pad jeevanmukti ka hai via mukti। jo bhi aate hain sato, rajo, tamo se paas karte hain। samjhaani kitni achhi hai। parantu bachche ek kaan se sun doosre kaan se nikaal dete hain। vaise hai bahut sahaj।

tum jagah-jagah par pradarshani karo, akhbaaron mein bhi pad jaae। kharcha kar sakte ho। bhal sab sunen। akhbaar mein to zaroor daalna hai। bachchon ko bada nasha rehna chaahiye। baaki time bahut thoda bacha hai। ateendriy sukh ki bhaasna gop-gopiyon se poochho। gaaya hua hai - yeh gopi vallabh ke gop-gopiyaan hain। gop-gopiyaan na satayug mein, na kaliyug mein hote hain। vahaan lakshmi devi, raadhe devi hain। gop-gopiyaan abhi hain, gopi vallabh ke bachche potre-potriyaan hain। zaroor daada bhi hoga। daada, baba aur mama - yeh nai rachna hui hai sangam par। baap kehte hain main kalpa-kalpa, kalpa ke sangamayuge aata hoon nai duniya banaane। aasuri santaan se tum eeshvareey santaan bane ho phir banenge daivi santaan। phir kshatriy, vaishya, shoodra santaan banenge - 84 janmon mein। phir saath-saath vriddhi bhi hoti rehti hai। jhaad bhi poora complete chaahiye। pralay bhi nahin hoti hai। bhaarat to avinaashi khanda hai। bhaarat ki bahut mahima karni hai। bhaarat sab khandon mein shreshtha hai। vinaash kabhi nahin hota। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

raatri-class 16-4-68

tum brahman bachchon bigar kisko bhi yeh pata nahin hai ki sangam yug kab hota hai। is kalpa ke sangam yug ki mahima bahut hai। baap aakar raajayog sikhlaate hain। satayug ke liye to zaroor sangamayug hi aayega। hain bhi manushya। unmein koi kanishta, koi uttam hain। unke aage mahima gaate hain aap purushottam ho, ham kanishta hain। aapehi bataate hain - main aise hoon, aise hoon।

abhi is purushottam sangam yug ko tum brahman bigar koi bhi nahin jaante। inki advertise kaise karen jo manushyon ko pata pade। sangamayug par bhagwan hi aakar raajayog sikhlaate hain। tum jaante ho ham raajayog seekh rahe hain। abhi aisi kya yukti rachen jo manushyon ko maaloom pade। parantu hoga dheere। abhi samay pada hai। bahut gai thodi rahi…। ham kehte hain to manushya jaldi purushaartha karen। nahin to gyaan second mein milta hai, jisse tum usi samay second mein jeevanmukti pa lenge। parantu tumhaare sir par aadha kalpa ke paap hain, woh thode hi second mein katenge। ismen to time lagta hai। manushya samajhte hain abhi to samay pada hai, abhi ham brahmaakumaariyon paas kyon jaayen। literature se ulta bhi utha lete hain। takdeer mein nahin hai to ulta utha lete hain। tum samajhte ho yeh purushottam banne ka yug hai। heere jaisa gaayan hai na। phir kam ho jaata hai। golden ej, silver ej। yeh sangam yug hai diamond ej। satayug hai golden ej। yeh tum jaante ho svarga se bhi yeh sangam achha hai, heere jaisa janma hai। amarlok ka gaayan hai na। phir kam hota jaata hai। to yeh bhi likh sakte ho purushottam sangam yug hai diamond, satayug hai gold, treta hai silver…। yeh bhi tum samjha sakte ho - sangam par hi ham manushya se devta bante hain। aath ratna banaate hain na। to diamond ko beech mein rakha jaata hai। sangam ka show hota hai। sangam yug hai hi heere jaisa। heere ka maan sangam yug par hai। yog aadi sikhlaate hain, jisko spiritual yog kehte hain। parantu spiritual to father hi hai। roohaani father aur roohaani knowledge sangam par hi milti hai। manushya jinmen deh-ahankaar hai, woh itna jaldi kaise maanenge। gareeb aadi ko samjhaaya jaata hai। to yeh bhi likhna hai sangamayug is diamond। unki aayu itni। satayug golden ej to unki aayu itni। shaastron mein bhi svaastika nikaalte hain। to tum bachchon ko bhi yeh yaad rahe to kitni khushi rahe! students ko khushi hoti hai na। student life is di best life। yeh to source aaph income hai। yeh hai manushya se devta banne ki paathshaala। devtaayen to vishwa ke maalik the। yeh bhi tumko maaloom hai। to athaah khushi honi chaahiye, isliye gaayan hai ateendriy sukh gopi vallabh ke gop gopiyon se poochho। teacher ant tak padhaate hain to unko ant tak yaad karna chaahiye। bhagwan padhaate hain aur phir bhagwan saath bhi le jaayenge। pukaarte bhi hain liberator guide। duhkh se chhudaao। satayug mein duhkh hota hi nahin। kehte hain vishwa mein shanti ho। bolo aage kab thi? woh kaun sa yug tha? kisko pata nahin hai। raam raajya satayug, raavan raajya kaliyug। yeh to jaante ho na। bachchon ko anubhav sunaana chaahiye। bas kya sunaaoon dil ki baat। behad ka baap behad ki baadshaahi dene vaala mila aur kya anubhav sunaaoon। aur koi baat hi nahin। is jaisi khushi aur koi hoti hi nahin। koi ko bhi kisi se roothkar vaastav mein ghar mein nahin baithna chahie। yeh jaise apni takdeer se roothna hai। padhaai se rootha to kya seekhenge। baap ko padhaana hi hai - brahma dvaara। to ek do se kabhi roothna nahin chaahiye। yeh hai maaya। yagya mein asuron ke vighna to padte hain na। achha!

meethe-meethe roohaani bachchon prati roohaani baap va daada ka yaad pyaar goodnight। roohaani bachchon ko roohaani baap ki namaste।

dhaarna ke liye mukhya saar:-

1) baap jo sunaate hain woh ek kaan se sun doosre se nikaalna nahin hai। gyaan ke nashe mein rah ateendriy sukh ka anubhav karna hai।

2) sabhi ko second mein mukti-jeevanmukti ka adhikaar dene ke liye yahi mahaamantra sunaana hai ki “deh sahit deh ke sab sambandhon ko tyaag baap ko yaad karo।''

vardaan:- clear buddhi dvaara har baat ko parakhkar yathaartha nirnay karne vaale saphalta moorta bhav

jitni buddhi clear hai utni parakhne ki shakti praapta hoti hai। jyaada baaten sochne ke bajaae ek baap ki yaad mein raho, baap se clear raho to har baat ko sahaj hi parakhkar yathaartha nirnay kar sakenge। jis samay jaisi paristhiti, jaisa samparka-sambandh vaale ka mood, usi samay par us pramaan chalna, usko parakhkar nirnay lena yeh bhi bahut badi shakti hai jo saphaltaamoorta bana deti hai।

slogan:- gyaan soorya baap ke saath lucky sitaare woh hain jo jag se andhakaar ko mitaane vaale hain, andhakaar mein aane vaale nahin।