Murli du jour du vendredi 15 décembre 2023

15-12-2023 praatahmurli om shanti "baapdaada"' madhuban

“meethe bachche - yeh bana-banaaya anaadi drama hai, is drama mein har ek actor ki act fix hai, moksha kisko bhi nahin mil sakta''

prashn:- shivbaaba ashareeri hai, woh shareer mein kislie aate hain? kaunsa kaam karte hain aur kaunsa nahin?

uttar:- baba kehte - bachche, main is shareer mein tumhein sirf murli sunaane aata hoon। main murli sunaane ka hi kaam karta hoon। main khaane peene ke liye nahin aata hoon। main aaya hoon tumhein nai raajdhaani dene। baaki svaad to inki aatma leti hai।

geet:- chhod bhi de aakaash sinhaasan…

om shanti। geet bajaaye hi woh jaate hain jismen apna tailuk hai। aakaash mein koi takhta nahin hai। aakaash is polaar ko kaha jaata hai। baaki aakaash tatva mein to takhta nahin hai। na parampita paramatma is aakaash mein takhta par rehta hai। baap bachchon ko samjhaate hain - ham parampita paramatma aur tum bachche jo aatmaayen ho, donon is soorya, chaand, sitaaron se us paar rehte hain, usko mool-vatan kaha jaata hai। jaise yahaan aakaash mein soorya, chaand, sitaare hain vaise hoobhu jhaad ke muaaphik mahtatva mein bhi aatmaayen rehti hain। jaise sitaare aakaash par khade hain, koi cheez par aadhaar nahin hai। aham aatmaayen aur paramatma baap, ham sab rahne vaale mahtatva mein hain। star muaaphik hi hain। gyaan soorya, gyaan chandrama, gyaan sitaare। ab yeh to samjhaaya hai jab-jab bheed padti hai (duhkh hota hai) tab aata hoon। puraane ko naya banaana hai zaroor। puraane mein hi bheed hoti hai, kaliyug mein hai duhkh ki bheed। svarga mein to sukh hi sukh hai। phir se mujhe aakar sahaj gyaan aur sahaj raajayog sikhlaana hota hai। sab bulaate hain ki aao। krishna ke liye nahin kehte ki sinhaasan chhodkar aa jaao। krishna ke liye sinhaasan akshar shobhta nahin। woh to prince tha na। sinhaasan tab kahen jabki raajgaddi mile। haan, chhote bachche ko baap god mein va baaju mein bitha sakte hain। to baap samjhaate hain aatmaayen mool vatan mein star muaaphik hain। phir vahaan se nambarvaar aati rehti hain। dikhaate hain na star kaise girte hain। vahaan se bhi aatmaayen aakar seedha garbha mein jaati hain। yeh achhi reeti note karo - har ek aatma ko sato, rajo, tamo se paas karna hai। jaise pahle lakshmi-naaraayan aayenge to unko sato-rajo avastha se paas hote, punarjanma lete-lete phir tamopradhaan avastha ko paana hi hai। har ek ka aise hai। vaapis ja nahin sakte। ibraaham, buddha aate hain, unko bhi sato, rajo, tamo se paas karna hai, punarjanma lena padta hai। dvaapar mein dharma sthaapak aate hain। vahaan se punarjanma shuru hota hai phir tamopradhaan banna hai। ab unki sadgati kaun kare? sadgati daata to ek hi shiv hai। kehte hain sabki sadgati karne mujhe aana padta hai। mere jaisa kaam aur koi kar nahin sakta। main devi-devta dharma bhi sthaapan karta hoon। tumko raajayog sikha raha hoon। gati aur sadgati daata to main hoon। jab tum pure ban jaate ho to phir main tumko vaapis le jaata hoon। tumhaari bhi sadgati karta hoon। tumhaare saath jo anek dharma vaale hain un dharma sthaapkon sahit sabka uddhaar karta hoon। tumko gyaan se shrringaar kar svarga ke maalik lakshmi athva naaraayan ko varne laayak banaata hoon। phir tumko vaapis le jaata hoon। sabko pahle muktidhaam bhej deta hoon, sabka sadgati daata bhi hoon। doosre dharma sthaapak jo aate hain woh sadgati nahin karte। woh sirf apna dharma sthaapan kar unki vriddhi karne lag padenge। apne dharma mein punarjanma lete sato, rajo, tamo se paas karenge। abhi sab tamopradhaan hain। ab inko paavan satopradhaan kaun banaaye? baap khud baith bachchon ko samjhaate hain। bhagwan aakar sabki sadgati bhi karte hain, bhaarat ko svarga bhi banaate hain। jeevanmukti ke liye raajayog sikhaate hain isliye baap ki itni mahima hai। geeta hai sarvashaastramai shiromni। parantu krishna ka naam likh dene se bhagwan ko bhool gaye hain। bhagwan to sabka sadgati daata hai isliye geeta sab dharma vaalon ke liye dharma-shaastra hai, sabko ise maanna pade। sadgati ka shaastra aur koi hai nahin। sadgati dene vaala hai hi ek। unki hi geeta hai। tum bachchon ko sadgati ka gyaan de rahe hain। geeta mein shiv ka naam hota to sab dharma vaalon ka yeh shaastra hota। baap sabko kehte hain - apne ko aatma samajh mere saath yog lagaao to vikarma vinaash honge aur tum mere dhaam aa jaayenge। sab dharma vaalon ki sadgati karne vaala bhi main hoon। baaki to aate hi hain apna dharma sthaapan karne। manushya kehte hain kya moksha nahin milega? baap kehte hain nahin। jo bhi sab aatmaayen hain, sabka part drama mein fix hai। kiski act badal nahin sakti। har ek ki poori act ka anaadi drama bana hua hai। drama anaadi hai, uska aadi, madhya, ant nahin hai। srishti ki aadi satayug ko kaha jaata aur ant kaliyug ko kaha jaata hai। baaki drama ka aadi ant nahin hai। drama kab bana, yeh nahin kah sakte। yeh prashn uth nahin sakta।

baba ne samjhaaya hai ki aur jo bhi shaastra hain, unse har ek ne aakar apna dharma sthaapan kiya hai। sadgati nahin ki hai। unhonne to dharma sthaapan kiya, unke peechhe vriddhi hoti gai। kitni-kitni guhya points hain। essay (nibandha) likhne jaisi hain। yahaan gapode ki baat nahin। haar-jeet ka yeh drama hai। satayug mein paramatma ko yaad karne ki darkaar nahin। paramatma ko yaad karen to phir yeh baaten bhi samjhen ki ham braahmanon ko usne racha hai। tumko to sammukh batlaate hain ki main rachta hoon। yeh braahmanon ki nai duniya hai sangam ki। choti ko to koi nahin jaante। viraat roop banaate hain। usmein devta, kshatriy, vaishya, shoodra dikhaate hain। braahmanon ko bhool gaye hain। satayug mein devtaayen, kaliyug mein shoodra। sangamayugi braahmanon ko jaante nahin। yeh raaz baap aakar samjhaate hain। baba kehte hain - pavitrata bigar kabhi dhaarna nahin ho sakti hai। baba samjhaate hain - kitne dher ved-shaastra hain। parikrama dilaate hain। mandiron se chitra nikaal parikrama dilaae phir vaapis mandir mein le aate hain। baba anubhvi hain। shaastron se gaadi bharkar parikrama dete hain, aise hi phir devtaaon ke chitra bhi gaadi mein rakh parikrama dilaate hain। yeh sab hai bhakti maarga।

tum ho shiv shaktiyaan। tum saare vishwa ki sadgati karti ho। parantu yeh koi jaante nahin ki delvaada mandir hoobhu inhon ka yaadgaar hai। aisa mandir kahin nahin hai। jagdamba hai, shivbaaba bhi hai। shaktiyon ka chabootra bhi bana hua hai। bhakti maarga mein phir se aise mandir banenge। phir vinaash hoga to yeh sab khatma ho jaayega। satayug mein koi mandir hota nahin। yeh sab bhakti maarga ka vistaar hai। gyaan mein to chup rehna hai। ek shivbaaba ko yaad karna hai। shivbaaba ko bhool auron ko yaad karenge to ant mein fail ho jaayenge। fail nahin hona hai। manushya marte hain to unko kehte hain raam-raam kaho, parantu aise yaad aata nahin hai। phir bhi gaaya jaata hai antakaal jo naaraayan simre… baat abhi ki hai। bhambhor ko aag to lagni hai। antakaal jo naaraayan simre। barobar ab tum samajhte ho ham naaraayan va lakshmi ko varenge। svarga ke liye taiyaar ho rahe ho। baba bigar yeh gyaan koi de nahin sakte। yeh baba bhi kehte hain ki ab hamko shivbaaba ne bataaya hai। inko shakti sena va paandav sena kaha jaata hai। paandav naam hai mahaarthiyon par। shaktiyon ki phir sher par savaari dikhaate hain। to baap kehte hain jaise kalpa pahle sahaj raajayog sikhaaya tha, hoobhu isi prakaar sikha raha hoon। jo bhi act chalti hai kalpa-kalpa vahi chalegi। inmen farka nahin pad sakta। phir kalpa-kalpa yeh part chalega। baba kehte hain tumko guhya-guhya baaten sunaata hoon। peechhe kya hone vaala hai so to phir peechhe sunaayenge na। abhi sab suna doon to kya bas vaapis chala jaaoon? ant tak nai paaintsa sunaate rahenge। ham geeta ki mahima bahut karte hain। parantu us geeta va mahaabhaarat mein to hinsak ladaai aadi dikha di hai। ab ladaai to hai nahin। tumhaari to hai yogbal ki baat। ahinsa ka arth koi bhi nahin jaante। sirf stri ko narka ka dvaar kah diya hai। vaastav mein narka ka dvaar to donon hain। ab unko phir svarga ka dvaar kaun banaaye? woh to bhagwan ki hi taakat hai। yeh geet baba ne banvaaye hain phir banaane vaalon ne koi ne theek banaaya hai, koi ne wrong banaaya hai। mix kar diya hai। raat ke raahi thak mat jaana… aise-aise geet mainne banvaaye hain। to yahaan ki baaten aur hain। gaooshaala bhi hai, vanvaas bhi hai parantu arth nahin samajhte। hamne kisko bhagaaya kya? kisko kabhi kaha tha ki karaachi mein chale aana? poochho in shaktiyon se? yeh drama mein part tha। jin par sitam hue to chale aaye। to right kya hai woh baap baith batlaate hain। shaastron mein to jo likha hai woh hai bhakti maarga। unse to mere se mil nahin sakte, mere paas aa nahin sakte। mujhe to guide ban yahaan aana padta hai। kehte hain aisa tan kyon nahin liya jo grihasthi na ho। are, mujhe to grihasthi ke tan mein hi aakar unko gyaan dena hai। unke hi 84 janma bataata hoon। to kitni guhya baaten hain। yeh naye dharma ke liye nai baaten, gyaan bhi naya hai। baap kehte hain kalpa-kalpa main yeh gyaan sunaata hoon। aur koi aise kabhi nahin kahenge ki main kalpa-kalpa dharma sthaapan karne aata hoon। lakshmi-naaraayan donon nahin kahenge ki ham phir se raajaai karne aaye hain। vahaan yeh gyaan hi praayah lop ho jaata hai। shaastra to baad mein anek bana diye hain। ham braahmanon ke liye ek hi geeta hai। dharma bhi sthaapan karta hoon aur sadgati bhi sabki karta hoon। double kaam hua na। ab ham jo sunaate hain woh right hai ya unhon ka right hai। so to tum jaante ho। main kaun hoon? main truth hoon। main koi ved shaastra nahin sunaata hoon। bhal isne padhe to bahut hain parantu woh sunaate thode hi hain। yeh to shivbaaba nai-nai baaten sunaate hain, woh to ashareeri hai। sirf yeh murli sunaane ka kaam karne aate hain, na ki khaane-peene aate hain। main to aaya hi hoon tum bachchon ko phir se raajdhaani dene। svaad inki aatma leti hai।

har ek ka dharma alag hai, unhein apna dharma shaastra padhna hai। yahaan to dher shaastra padhte rehte hain, saar kuchh bhi nahin hai। jitna padhte rehte, asaar sansaar hota jaata hai। tamopradhaan banna hi hai। pahle-pahle srishti mein tum aaye ho। tum braahmanon ne maat-pita se janma liya hai। us taraph hai aasuri kutumba, yahaan hai eeshvareey kutumba phir jaakar daivi god lenge, svarga ke maalik banenge। maat-pita ki mat par chalenge to svarga ke sukh ghanere milenge। baaki roodra gyaan yagya mein vighna to zaroor padenge। baap kehte hain - bachche, vikaaron par jeet paane se hi tum jagatjeet ban sakte ho। aise thode hi shaadi nahin karenge to kamjor rah jaayenge। sanyaasi pavitra bante hain phir woh kitne mote tandaroosta rehte hain। yahaan to brain ka kaam hai, mehnat hai, dadheechi rishi ka misaal hai na। sanyaasiyon ko to bahut maal milta hai। baba khud bahut maal khilaate the। yahaan to bahut parhej rakhni padti hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan ki achhi dhaarna ke liye pavitrata ke vrat ko apnaana hai। antakaal hai isliye aisa abhyaas karna hai jo ek baap ke sivaae aur koi yaad na aaye।

2) dadheechi rishi misal seva karte vikaaron par vijay praapta kar jagatjeet banna hai।

vardaan:- samay ki raphtaar pramaan sarva praaptiyon se bharpoor rah maayaajeet banne vaale teevra purushaarthi bhav

baapdaada ne jo bhi praaptiyaan karaai hain, un sarva praaptiyon ko svayan mein jama kar bharpoor raho, koi bhi kami na rahe। jahaan bharpoorta mein kami hai vahaan maaya hilaati hai। maayaajeet banne ka sahaj saadhan hai - sada praaptiyon se bharpoor rehna। koi ek bhi praapti se vanchit nahin raho, sarva praapti hon। samay ki raphtaar pramaan koi bhi samay kuchh bhi ho sakta hai isliye teevra purushaarthi ban abhi se bharpoor bano। ab nahin to kabhi nahin।

slogan:- satyata aur nirbhayta ki shakti saath ho to koi bhi kaaran hila nahin sakta।