Murli du jour du vendredi 22 décembre 2023

22-12-2023 praatahmurli om shanti "baapdaada"' madhuban

“meethe bachche - tumhaara avyabhichaari pyaar ek baap ke saath tab jut sakta hai jab buddhiyog deh sahit deh ke sab sambandhon se toota hua ho''

prashn:- tum bachchon ki race kaun-si hai? us race mein aage jaane ka aadhaar kya hai?

uttar:- tumhaari race hai “paas with honour banne ki'' is race ka aadhaar hai buddhiyog। buddhiyog jitna baap ke saath hoga utna paap katenge aur atal, akhanda, sukh-shaantimay 21 janma ka raajya praapta hoga। iske liye baap raay dete hain - bachche, neend ko jeetne vaale bano। ek ghadi, aadhi ghadi bhi yaad mein rehte-rehte abhyaas badhaate jaao। yaad ka hi record rakho।

geet:- na woh hamse juda honge, na ulphat dil se niklegi…

om shanti। bachchon ne geet suna। ulphat kaha jaata hai pyaar ko, ab tum bachchon ka pyaar baandha hua hai behad ke baap shiv ke saath। tum bi.ke. unko daada kahenge। aise koi manushya nahin hoga jo apne baapdaada ke occupation ko na jaanta ho। aisi koi sanstha nahin jahaan itne dher ke dher kahen ki ham brahmaakumaar-kumaari hain। maataayen to kumaari nahin hain phir brahmaakumaari kyon kahlaati hain? yeh to hain brahma mukh vanshaavli। itne brahmaakumaar-kumaariyaan hain prajaapita brahma ki mukh vanshaavli। ek baap ki bachchiyaan hain। brahma ke occupation ko bhi jaanna hai। brahma kiska bachcha hai? shiv ka। shiv ke teen bachche brahma, vishnu, shankar sookshm vatan vaasi hain। ab prajaapita brahma to sthoolavtan vaasi hona chaahiye। itne sab kehte hain prajaapita brahma ke mukh vanshaavli hain। kukh vanshaavli to ho na saken। yeh koi garbha ki paidaais nahin hai। aur phir tumse poochhte bhi nahin ki itne sab brahmaakumaar-kumaariyaan kaise kahlaate ho? maataaen bhi brahmaakumaariyaan hain to zaroor brahma ke bachche hue brahma ke mukh vanshaavli। yeh sab hain eeshvar ki santaan। eeshvar kaun hai? woh hai parampita paramatma, rachta। kis cheez ki rachna karte hain? svarga ki। to zaroor apne potre-potriyon ko svarga ka varsa dete honge। unko shareer chaahiye jo raajayog sikhaaye। aise thode hi paag rakh denge। shivbaaba baith brahma mukh vanshaavli ko phir se raajayog sikhlaate hain kyonki phir se svarga ki sthaapna karte hain। nahin to phir itne brahmaakumaar-kumaariyaan kahaan se aayen? wonder hai, koi himmat rakh poochhte bhi nahin! kitne centres hain! poochhna chaahiye aap hain kaun, apna parichay do? yeh to saaph hai prajaapita brahma ke kumaar-kumaariyaan aur shiv ke potre-potriyaan hain। ham unke bachche bane hain। unse hamaara pyaar hai। shivbaaba bhi kehte hain sabse pyaar athva buddhiyog hataae mujh ek ke saath rakho। main tumko brahma dvaara raajayog sikhla raha hoon na aur tum brahmaakumaar-kumaari sun rahe ho na। kitni sahaj seedhi si baat hai। poochho to sahi। to yeh ho gai gaooshaala। shaastron mein brahma ki gaooshaala bhi gaai hui hai। vaastav mein shivbaaba ki gaooshaala hai, shivbaaba is nandeegan mein aata hai to gaooshaala akshar ke kaaran shaastron mein phir gau aadi dikha di hai। shiv jayanti hai to zaroor shiv aaya hoga। zaroor kisi tan mein aaya hoga। tum jaante ho yeh god father ka school hai। shiv bhagvaanuvaach। gyaan saagar patit-paavan woh hai। shreekrishna to svayan paavan hai, unko kya padi hai jo patit tan mein aaye। gaaya bhi jaata hai door desh ka rahne vaala aaya desh paraaye.....। shareer bhi paraaya hai। to zaroor shivbaaba ne inko racha hoga tab to manushya srishti rachi jaae। to siddha hua ki yeh baapdaada hai। prajaapita brahma hai aadi dev, mahaaveer kyonki maaya par jeet paate hain। jagdamba bhi gaai hui hai। shri lakshmi bhi gaai hui hai। duniya ko pata nahin ki jagdamba koi brahma ki beti sarasvati hai। woh bhi brahmaakumaari hai। yeh bhi brahmaakumaari hai। shivbaaba ne brahma mukh se inko apna banaaya hai। ab in sabhi ke buddhi ka yog (ulphat) unke saath hai। kaha bhi jaata hai ulphat paramatma ke saath rakho। aur sab saath tod ek saath jodo। woh ek hai bhagwan। parantu jaante nahin। jaane bhi kaise? jab baap aakar apna parichay de, tab nishchay ho। aajkal to sikhla diya hai - aatma so paramatma..... jisse sambandh hi toot gaya hai। ab tum bachche vaastav mein sachchi-sachchi satya naaraayan ki katha sunte ho। woh hai sukhdev aur tum ho vyaas। geeta mein bhi vyaas ka naam hai na। woh to manushya thahra। parantu sachche vyaas tum ho। tum jo geeta banaate ho woh bhi vinaash ho jaayegi। jhoothi aur sachchi geeta abhi hai। sachkhanda mein jhooth ka naam nahin rehta। tum varsa le rahe ho daade se। is baba ki property nahin hai। svarga ka rachta hai shivbaaba, na ki brahma। brahma manushya srishti ka rachayita hai। brahma mukh kamal se brahman varna racha gaya। tum ho shiv ke potre arthaat eeshvareey sampradaay। unko apna banaaya hai। guru potre kahlaate hain na। ab tum ho satguru potre aur potriyaan। woh to sirf potre hain arthaat males hain। potriyaan hain nahin। satguru to ek shivbaaba hai। gaaya jaata hai satguru bin ghor andhiyaara। tumhaara brahmaakumaar-kumaari naam bada wonder-full hai। baap kitna samjhaate hain parantu kai bachche samajhte nahin। baap kehte hain mujh behad ke baap ko jaanne se tum sab kuchh jaan jaayenge। satayug-treta mein sooryavanshi chandravanshi raajya tha। phir raavan raajya mein brahma ki raat shuru hoti hai। practical mein brahmaakumaar-kumaariyaan tum ho। satayug ko hi svarga kaha jaata hai jahaan ghi doodh ki nadi bahti hai। yahaan to ghi milta nahin। baap kehte hain bachche yeh puraani duniya ab vinaash honi hai। ek din is bhambhor ko aag lagegi, sab khatma ho jaayenge phir mere se varsa to pa nahin sakenge।

main aaoon to zaroor shareer ka loan lena pade। makaan to chaahiye na। baba kitna achha, ramneek reeti se samjhaate hain। tum ab mere dvaara sab kuchh jaan gaye ho। yeh srishti chakra kaise chalta hai, yeh koi ko bhi pata nahin। 84 janma kaun lete hain? sab to nahin lenge। zaroor pahle aane vaale devi-devta hi 84 janma lenge। ab unko phir se main raajayog sikhaata hoon। bhaarat ko phir se narka se svarga banaane main aata hoon। inko liberate main karta hoon। phir guide ban vaapis bhi le jaata hoon। mujhe jyoti swaroop bhi kehte hain। jyoti swaroop ko bhi aana pade, svayan kehte bachche main tumhaara baap hoon। meri jyoti kabhi bujhti nahin। woh star hai jo bhrakuti ke beech rehte hain। baaki sab aatmaayen ek shareer chhod doosra leti hain। to aatma roopi star mein 84 janmon ka part avinaashi noondha hua hai। 84 janma bhog phir pahle number se shuru karte hain। yatha raaja raani tatha praja। nahin to bhala bataao aatma mein itna part kahaan se bhara hua hai। isko kaha jaata hai bahut guhya wonderful baat hai। saari manushya srishti ki aatmaon ka part noondha hua hai। kehte hain mere mein yeh part hai, woh bhi avinaashi hai। usmein koi tabdeeli (adli-badli) nahin ho sakti। mere part ko brahmaakumaar-kumaariyaan jaante hain। part ko biography kaha jaata hai। prajaapita brahma hai to zaroor jagdamba bhi hogi। woh bhi shoodra se brahman bani hai। to tum bachche jaante ho hamaari ulphat baap ke saath hai aur hamaara ek ke hi saath pyaar hai। avyabhichaari pyaar hone mein deri nahin lagti hai। maaya billi bhi kam nahin hai। kai striyaan hoti hain jinki aapas mein eershya ho jaati hai। ham bhi shivbaaba se pyaar rakhte hain to maaya ko eershya ho jaati hai isliye toofaan laati hai। tum chaahte ho paoombaara daalen (chaupad ka khel) parantu maaya billi teen daane daal deti hai। tum grihastha vyavhaar mein rehte ho sirf tumhaara buddhiyog deh sahit deh ke sab sambandhon se hataae kehte hain mere ko yaad karo। main tumhaara most beloved baap hoon। main tumko svarga ka maalik banaaoonga, yadi meri shreemat par chalenge to। brahma ki raay bhi mashhoor hai। to zaroor brahma ke bachchon ki bhi mashhoor hogi। ve bhi aisi raay dete honge। yeh saare srishti chakra ka samaachaar to baap hi batlaate hain। bhal bachchon aadi ko sambhaalo parantu buddhiyog baap ke saath ho। samjho yeh kabristaan hai, ham paristaan mein jaate hain। kitni sahaj baat hai। baap samjhaate hain ki koi bhi saakaari va aakaari devta se buddhiyog nahin lagaao। baap dalaal bankar kehte hain। gaate hain na aatmaayen paramatma alag rahe bahukaal। ab bahukaal se alag to devi-devta hain। vahi pahle-pahle part bajaane aate hain। sundar mela kar diya jab satguru mila dalaal। dalaal ke roop mein kehte hain maamekam yaad karo aur pratigya karo ki ham kaam chita se utar gyaan chita par baithenge। phir tum raajya bhaagya le lenge। apne paas record rakho ki ham kitna samay aise most beloved baap ko yaad karte hain। kanya din-raat pati ko yaad karti hai na। baap kehte hain - he neend ko jeetne vaale bachche, ab purooshaartha karo। ek ghadi aadhi ghadi..... shuru karo phir dheere-dheere badhaate jaao। mere se yog lagaayenge to paas with honour ho jaayenge। yeh race hai buddhi ki। samay lagta hai, buddhiyog se hi paap katenge। aur phir tum atal, akhanda, sukh-shaantimay 21 janma raajya karenge। kalpa pahle bhi kiya tha, ab phir raajya-bhaagya lo। kalpa-kalpa ham hi svarga banaate, raajya karte hain। phir hamko hi maaya narka-vaasi banaati hai। abhi ham hain raam sampradaay। hamaara unse prem hai। baap ne hamko apni pahchaan di hai। baap hai svarga ka rachayita। ham unke bachche hain to phir ham narka mein kyon pade hain? zaroor svarga mein kabhi the। baap ne to svarga racha hai। brahmaakumaar-kumaariyaan hain sabko praan daan dene vaale। unke praanon ko kabhi kaal aakar bekaayde, akaale nahin le jaayenge। vahaan akaale mrityu hona asambhav hai। vahaan rona bhi hota nahin। tumne saakshaatkaar mein bhi dekha hai ki shreekrishna kaise janma lete hain। ekdam bijli chamak jaati hai। satayug ka first prince hai na। shreekrishna hai number one satopradhaan, phir sato, rajo, tamo mein aate hain। jab tamo jadajdeebhoot shareer hota hai to phir ek shareer chhod doosra le lete hain। yeh practice yahaan ki jaati hai। baba, ab ham aapke paas aate hain phir vahaan se ham svarga mein jaakar naya shareer lenge। ab to vaapis baba ke paas jaana hai na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) akaale mrityu se bachne ke liye sabko praan daan dene ki seva karni hai। raavan sampradaay ko raam sampradaay banaana hai।

2) dil ki ulphat (pyaar) ek baap se rakhna hai। buddhiyog bhatkaana nahin hai, neend ko jeet yaad ko badhaate jaana hai।

vardaan:- shreemat pramaan ji hajoor kar, hajoor ko haazir anubhav karne vaale sarva praapti sampanna bhav

jo har baat mein baap ki shreemat pramaan “ji hajoor-ji hajoor'' karte hain, to bachchon ka ji hajoor karna aur baap ka bachchon ke aage haajir hajoor hona। jab hajoor haajir ho gaya to kisi bhi baat ki kami nahin rahegi, sada sampanna ho jaayenge। daata aur bhaagya-vidhaata - donon ki praaptiyon ke bhaagya ka sitaara mastak par chamakne lagega।

slogan:- parmaatma varse ke adhikaari bankar raho to adheenta aa nahin sakti।