Murli du jour du lundi 1 janvier 2024

01-01-2024 praatahmurli om shanti "baapdaada"' madhuban

“meethe bachche - tum raajarishi ho, tumhein raajaai praapta karne ke liye purushaartha karna hai, saath-saath daivi gun bhi zaroor dhaaran karne hain।''

prashn:- uttam purush banne ka purushaartha kya hai? kis baat par bahut attention chaahiye?

uttar:- uttam purush banna hai to padhaai se kabhi roothna nahin। padhaai se ladne jhagadne ka tailuk nahin। padhenge likhenge honge navaab…isliye sada apni unnati ka khyaal rahe। chalan par bahut attention chaahiye। devtaaon jaisa banna hai to chalan badi royal chaahiye। bahut-bahut meetha banna hai। mukh se aise bol niklen jo sabko meethe lage। kisi ko duhkh na ho।

om shanti। meethe-meethe roohaani bachchon prati baap baith samjhaate hain aur poochhte hain ki aapki buddhi ka thikaana kahaan hai? manushyon ki buddhi to bhatakti hai, kabhi kahaan, kabhi kahaan। baap samjhaate hain tumhaari buddhi ka bhatakna banda। buddhi ko ek thikaane lagaao। behad ke baap ko hi yaad karo। yeh to roohaani bachche jaante hain ab saari duniya tamopradhaan hai। aatmaayen hi satopradhaan theen nambarvaar purushaartha anusaar। ab tamopradhaan bani hain phir baap kehte hain satopradhaan banna hai isliye apni buddhi ko baap ke saath lagaao। ab vaapis jaana hai aur koi ko bhi pata nahin ki hamko vaapis ghar jaana hai। aur koi bhi nahin hoga jisko direction milte hon ki bachche mujh baap ko yaad karo। kitni sahaj baat samjhaate hain। sirf baap ko yaad karo to tumhaare vikarma vinaash ho jaayenge aur koi aise samjha na sake, baap hi samjhaate hain। jismen pravesh kiya woh bhi sunte hain। patit se paavan banne ki aur us par chalne ki sabse achhi mat baap dete hain। baba kehte hain bachche tum hi satopradhaan the ab phir banna hai। tum hi aadi sanaatan devi devta dharma ke the phir 84 janma bhog kaudi misal ban pade ho। tum heere misal the ab phir banna hai। baba bahut simple baat sunaate hain ki apne ko aatma samjho। aatmaon ko hi vaapis jaana hai, shareer to nahin jaayega। baap ke paas khushi se jaana hai। baap jo shreemat dete hain, usse hi tum shreshtha banenge। pavitra aatmaayen mool vatan mein jaakar phir aayengi to naya shareer lengi। yeh to nishchay hai na, to phir vahi taat lagi rahe। daivi gun bhi dhaaran karne hain to bahut phaayda hoga। student jo achhi padhaai padhte hain vahi oonch pad paate hain। yeh bhi padhaai hai। tum kalpa-kalpa aise hi padhte ho। baap bhi kalpa-kalpa aise hi padhaate hain। jo time paas hua woh drama। drama anusaar hi baap ki aur bachchon ki act chali। baba raay to theek dete hain na। bachche kehte hain baba ham aapko ghadi-ghadi bhool jaate hain। yahi to maaya ke toofaan hain। maaya deeva bujha deti hai। baap ko shama bhi kehte hain, sarvashaktimaan authority bhi kehte hain। jo bhi ved shaastra hain sabka saar batlaate hain। woh knowledgeful hai srishti ke aadi madhya ant ka raaz samjhaate hain। yeh brahma baba bhi kahenge ham bachchon ko samjhaate hain। baap kahenge tum bachchon ko samjhaata hoon। usmein yeh brahma bhi aa jaata hai। ismen moonjhane ki baat nahin। yeh hai bahut sahaj raajayog। tum raajarishi ho, rishi pavitra aatma ko kaha jaata hai। tumhaare jaisa rishi to koi ho na sake। aatma ko hi rishi kaha jaata hai। shareer ko nahin kahenge। aatma hai rishi। raaj-rishi। raajya kahaan se lete hain? baap se। to tum bachchon ko kitni khushi rahni chaahiye। ham shivbaaba se raajya bhaagya le rahe hain। baap ne smriti dilaai hai tum vishwa ke maalik the, phir punarjanma lete-lete neeche utarte aaye ho। devtaaon ke chitra bhi hain। manushya samajhte hain yeh jyoti jyot sama gaye। ab baap ne samjhaaya hai ek bhi manushya jyoti jyot nahin samaata। koi bhi mukti jeevanmukti pa nahin sakte। to saara din andar mein bachchon ke vichaar chalne chaahiye। jitna yaad mein rahenge utna khushi hogi। padhaai padhaane vaala dekho kaun hai। shreekrishna ko laardakrishna bhi kehte hain। bhagwan ko kabhi lord nahin kahenge। unko god father hi kehte hain। woh hai heavenly god father। tumko ab dil se lagta hai ki vahi heavenly god father heaven arthaat daivi raajdhaani sthaapan kar rahe hain। satayug mein doosra koi dharma tha nahin। chitra bhi in devtaaon ke hain, unko hi aadi sanaatan devi devta kaha jaata hai। yeh vishwa ke maalik the। unhon ko kahenge satayugi, tum ho sangamayugi। tum jaante ho baba hamko righteous banaate hain। tum righteous bante jaate ho। vikaari ko unrighteous kaha jaata hai। yeh devtaayen pavitra hain। light bhi pavitrata ki dikhaai hai। unrighteous maana ek bhi kadam right nahin। shivaalay se utar veshyaalay mein aa jaate hain। yeh baaten naya koi samajh na sake। jab tak tum unko baap ka parichay achhi tarah na do ki woh hai heavenly god father। heaven aur hell donon akshar hain। sukh aur duhkh, svarga aur narka। tum jaante ho bhaarat mein sukh tha, abhi duhkh hai, phir baap aakar sukh dete hain। ab duhkh ka samay khatma hona hai। baba bachchon ke liye sukh ki saugaat le aate hain। sabko sukh dete hain tab to sab unki bandagi karte hain। sannyaasi, udaasi bhi tapasya karte hain, unko bhi koi na koi aash zaroor rehti hai। satayug mein aisi koi baat nahin। vahaan aur koi dharma vaale hote hi nahin। tum to ab purushaartha kar rahe ho nai duniya mein jaane ke liye। jaante ho woh hai sukhdhaam, woh hai shantidham, yeh hai duhkhadhaam। tum abhi sangam par ho, uttam purush banne ke liye purushaartha kar rahe ho। purushaartha bahut achhi reeti karna hai। padhaai se kabhi roothna nahin hai। koi se anabni hoti hai to padhaai nahin chhodni chaahiye। padhaai se ladne jhagadne ka tailuk nahin hai। padhenge likhenge honge navaab.....ladenge jhagdenge to navaab kaise banenge, phir tamopradhaan chalan ho jaati hai। har ek ko apni unnati ka khyaal karna chaahiye। baap kehte hain he aatmaayen baap ko yaad karo to vikarma vinaash honge aur daiveegun bhi dhaaran honge। agar lakshmi-naaraayan jaisa banna hai to baap ne hi unhon ko bhi aisa banaaya। baap kehte hain tum hi yeh raajya karte the। ab phir tumko hi banna hai। raajayog baap sangam par hi sikhaate hain। tum kalpa-kalpa yeh bante ho। aise nahin sadaiv kaliyug hi chalta rahega। kaliyug ke baad satayug...yeh chakra phirta hai zaroor। satayug mein manushya kam the, ab phir zaroor kam hone chaahiye। yeh to sahaj samajhne ki baaten hain। beeti hui kahaani sunaate hain। chhoti si kahaani hai। vaastav mein hai badi parantu samajhne mein chhoti hai। 84 janmon ka raaz hai। tumko bhi aage maaloom nahin tha, ab tum samajhte ho ham padh rahe hain। yeh hai sangamayug ki padhaai। ab drama ka chakra phirkar aaya hai, phir satayug se lekar shuru hoga। is puraani srishti ko badalna hai। kaliyugi jangal ka vinaash hoga phir satayugi phoolon ka bageecha hoga। phool daivi gun vaale ko kaha jaata hai। kaanta aasuri gun vaale ko kaha jaata hai। apne ko dekhna hai mere mein koi avgun to nahin hai। abhi ham devta banne laayak ban rahe hain to daivi gun zaroor dhaaran karna pade। baap teacher satguru bankar aate hain to character zaroor sudhaarna pade। manushya kehte hain sabke character kharaab hain। lekin achha character kisko kaha jaata - yeh bhi nahin jaante। tum samjha sakte ho in devtaaon ke character achhe the na। yeh kabhi kisko duhkh nahin dete the। koi ki chalan achhi hoti hai to kehte hain yeh to jaise devi hai, inke bol kitne meethe hain। baap kehte hain tumko devta banaata hoon to tumko bahut meetha banna pade। daivi gun dhaaran karne hain। jo jaisa hai vaisa hi banaayenge। tum sabko teacher banna hai। teacher ke bachche teacher। tum paandav sena ho na। pandon ka kaam hai sabko raasta bataana। daivi gun dhaaran karne hain। grihastha vyavhaar mein bhi rehna hai। ghar mein bhi service kar sakte ho। jo aayenge teach karte rahenge (padhaate rahenge), aise bahut hain jo apne paas geeta paathshaala khol bahuton ki service karte rehte hain। aise nahin ki yahaan aakar baithna hai। kanyaaon ke liye to bahut sahaj hai। maas do chakra lagaaya phir gaye ghar। ghar ka sannyaas to nahin karna hai। tumko ghar se bulaava aata hai to jaate ho, tumko mana nahin hai। ismen koi ghaate ki (kami ki) baat nahin hai aur bhi umang aayega। ham bhi abhi hoshiyaar hue hain। ghar vaalon ko bhi aap samaan banaakar saath le jaayenge। aise bahut hain jo ghar mein rahkar bhi service karte hain to hoshiyaar ho jaate hain।

baap mukhya baat samjhaate hain ki apne ko aatma samjho aur mujh baap ko yaad karo। apni unnati karni hai। ghar mein rahne vaalon ki yahaan rahne vaalon se bhi achhi unnati ho sakti hai। tum ko kabhi mana nahin ki jaati hai ki ghar mein nahin jaao। unhon ka bhi kalyaan karna hai। jinko kalyaan karne ki aadat pad jaati hai woh rah nahin sakte। gyaan aur yog poora hai to koi bhi bei-jjati nahin kar sakte। yog nahin hai to maaya bhi thappad lagaati hai। to ghar grihastha mein rah kamal phool samaan pavitra zaroor banna hai। baba to freedom dete hain bhal ghar mein bhi raho। sab yahaan aakar kaise rahenge। jitne aate hain unhon ke liye utne makaan aadi banaane padte hain। kalpa pahle jo kuchh hua hai woh repeat hota rahega। bachche bhi vriddhi ko paate rahenge। drama bigar kuchh hone ka nahin hai। yeh jo ladaaeeyaan aadi lagti hain - itne manushya aadi marte hain, yeh sab drama mein noondh hai। jo past hua woh phir repeat hoga। jo kalpa-kalpa samjhaaya hai vahi ab bhi samjhaaoonga। manushya bhal kya bhi vichaar karen, main to vahi part bajaaoonga, jo mera noondha hua hai। drama mein kam jaasti ho nahin sakta। jo kalpa pahle padhe the, vahi padhenge। harek ki chalan se saakshaatkaar bhi hota rehta hai। yeh kya padhte hain, kya pad paayenge। achhi service karte hain, samjho achaanak accident ho jaata hai to jaakar achhe kul mein janma lenge। bahut sukhi rahenge। jitna sukh bahuton ko diya hai utna unko bhi milega। yeh kamaai kabhi jaati nahin hai। satayug mein to jahaan jeet vahaan janma hoga। bahuton ko sukh diya hoga to golden spoon in di mouth milega। usse kam to silver, usse kam to peetal ka milega। samajh mein to aata hai na। kitna hamaara yog hai, raaja, raani praja sab banne vaale hain। achhi reeti nahin padhenge, daiveegun dhaaran nahin karenge to pad kam ho jaayega। achhe va bure karma zaroor saamne aate hain। aatma ko maaloom hai ham kahaan tak service kar rahe hain। agar ab shareer chhoot jaae to kya pad paayenge! abhi tum padhkar sudhar rahe ho। koi to bigadte bhi hain to kahenge inki takdeer mein nahin hai। baba to kitna oonch banaate hain। saani ke ghar se koi khaali na jaae। abhi saani tumhaare sammukh hai। koi ko tum do akshar bhi sunaao, woh bhi praja mein aayenge zaroor। devi devta dharma vaale ab tak aate rehte hain। parantu ab patit hone kaaran apne ko hindu kahlaate hain। tumhaari buddhi mein yeh gyaan aise hai jaise baba ke paas hai। baap gyaan ka saagar hai। batlaate hain yeh history-geography kaise repeat hoti hai। teacher bhi student ki padhaai se jaan jaate hain ki yeh kitne marks mein paas honge। har ek khud bhi jaante hain। koi daivi gunon mein kachche hain, koi yog mein kachche hain, koi gyaan mein kachche hain। kachche hone se naapaas ho jaayenge। aise bhi nahin aaj kachche hain, kal pakke nahin ho sakte। gallop karte rahenge। khud bhi feel karte hain ham jahaan tahaan se fail ho aate hain। phalaane hamse hoshiyaar hain। seekhkar hoshiyaar bhi ho sakte hain। agar deh-abhimaan hoga to phir kya seekh sakenge। main aatma hoon yeh to ekdam pakka kar do। baap ne smriti dilaai hai। baap kehte hain mujhe yaad karo to vikarma vinaash honge, phir daiveegun dhaaran honge। apni nabz dekhni hai ki main kahaan tak laayak bana hoon?

tum abhi srishti ke aadi madhya ant ka gyaan le rahe ho। yeh raajayog ki knowledge sivaae baap ke koi sikhla na sake। bachche seekhte jaate hain। bachche poochhte hain hamaare kul ke brahman kitne hain? yeh poora pata kaise pade। aate jaate rehte hain। abhi naye-naye bhi nikalte rehte hain। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apna daivi character banaana hai, daivi gun dhaaran kar apna aur sarva ka kalyaan karna hai। sabko sukh dena hai।

2) satopradhaan banne ke liye buddhi ek baap se lagaani hai। buddhi ko bhatkaana nahin hai। baap samaan teacher ban sabko sahi raasta bataana hai।

vardaan:- chalte-phirte apne dvaara ashta shaktiyon ki kirnon ka anubhav karaane vaale pharishta roop bhav

jo bahut keemti moolyavaan bedaag diamond hota hai use light ke aage rakho to bhinna-bhinna rang dikhaai dete hain। aise jab aap pharishta roop banenge to aap dvaara chalte-phirte ashta shaktiyon ke kirnon ki anubhooti hogi। koi ko aapse sahanshakti ki feeling aayegi, koi ko nirnay karne ke shakti ki feeling aayegi, koi se kya, koi se kya shaktiyon ki feeling aayegi।

slogan:- pratyaksha pramaan woh hai jiska har karma sarva ko prerna dene vaala hai।

January 2024 avyakt maas ke liye vishesh purushaartha ki points

is January maas mein vishesh silence ki anubhooti karne tatha bahma baap samaan double light pharishta banne ke liye purooshaartha ki points murli ke neeche likh rahe hain। yahi points January maas ke patra-pushpa mein bhi rahengi। kripaya sabhi brahma vatsa isi anusaar attention rakh roz ekaanta mein baith kam se kam 10 minute avyakt silence ka anubhav avashya karen tatha poora hi din double light pharishta sthiti mein rah apne shreshtha sankalpon dvaara ishaaron se kaarobaar karke apne sevaasthaanon ko sookshm vatan banaayen, beech-beech mein aapas mein milkar in points par gahri roohrihaan karte hue anubhvon ki len-den bhi karen। ham sabki yeh double light sthiti tatha silence ki gahri anubhooti hi parmaatma pratyakshata ke nimitta banengi।

avyakti silence dvaara double light pharishta sthiti ka anubhav karo

sangamayug ki vishesh shakti silence ki shakti hai, silence mein rahne se double light pharishta sthiti sahaj ban jaati hai। is sthiti mein koi bhi kaarya ka bojh nahin rehta, iske liye karma karte beech - beech mein niraakaari aur pharishta swaroop ki drill karte raho। jaise brahma baap ko saakaar roop mein dekha, sada double light rahe। silence ki sthiti dvaara second mein bachchon ko nazar se nihaal kiya। aise follow father karo to sahaj hi baap samaan ban jaayenge।