Murli du jour du mardi 2 janvier 2024

02-01-2024 praatahmurli om shanti "baapdaada"' madhuban

“meethe bachche - dehi-abhimaani bano to vikalpa samaapta ho jaayenge, kisi bhi baat se dar nahin lagega, tum phikar se faarig ho jaayenge।''

prashn:- naye jhaad ki vriddhi kis tarah se hoti hai aur kyon?

uttar:- naye jhaad ki vriddhi bahut dheere-dheere aur joon misal hoti hai। jaise drama joon misal chal raha hai, aise drama anusaar yeh jhaad bhi dheere-dheere vriddhi ko paata hai kyonki ismen maaya ka mukaabla bhi bahut karna padta hai। bachchon ko dehi-abhimaani banne mein mehnat lagti hai। dehi-abhimaani banen to bahut khushi rahe। service mein bhi vriddhi ho। baap aur varse ki yaad rahe to beda paar ho jaae।

om shanti। roohaani baap baith roohaani bachchon ko samjhaate hain। roohaani baap bhi akaalmoorta hai। roohaani baap kaha jaata hai parampita paramatma ko। tum bachche bhi akaalmoorta ho। tum sikkha logon ko bhi achhi tarah se samjha sakte ho। yoon to koi bhi dharma vaalon ko samjha sakte ho। yeh bhi baap ne bataaya hai ki yeh jhaad dheere-dheere badhta hai। jaise drama joon misal chalta hai vaise jhaad bhi joon misal badhta hai। poora kalpa lagta hai badhne mein। abhi tumhaara yeh naya jhaad hai, tum bachchon ki bhi kalpa ki aayu ho jaati hai। 5 hazaar varsha se tum chakra lagaate ho, joon misal yeh chakra chalta hai। pahle-pahle to aatma ko samajhna hai। yahi difficult baat hai। baap jaante hain drama anusaar aahiste-aahiste jhaad badhta hai kyonki maaya ka mukaabla hota hai, is samay uska raajya hai phir to raavan hi nahin rehta। tum bachchon ko pahle dehi-abhimaani banna hai। dehi-abhimaani bachche service bahut achhi karenge aur bahut khushi mein bhi rahenge। buddhi mein phaaltu vikalpa nahin aayenge। goya tum maaya par jeet paate ho to phir tumko koi hila na sake। angad ka bhi drishtaanta hai na, isliye tumhaara mahaaveer naam rakha hai। abhi to ek bhi mahaaveer nahin। mahaaveer pichhaadi mein banenge, so bhi nambarvaar। jo achhi service karte hain unko mahaaveer ki line mein rakhenge। abhi veer hain, mahaaveer pichhaadi mein honge। jara bhi koi sanshay nahin aana chaahiye। koi to bahut ahankaar mein aa jaate hain। koi ki bhi parvaah nahin karte। ismen to badi nirmaanta se koi ko samjhaana hota hai। amritsar mein sikkhon ki tum service kar sakte ho। sandesh to sabko ek hi dena hai। baap ko yaad karne se tumhaari aatma ki kat utar jaayegi। vo log kehte hain jap saaheb ko… saaheb ki mahima bhi hai। ekoankaar sat naam, akaal moorta। ab akaalmoorta kaun? kehte hain satguru akaal। akaalmoorta to aatma hai na। unko kabhi kaal kha na sake। aatma ko to part mila hua hai, so to part bajaana hi hai। unko kaal khaayega kaise। shareer ko kha sakta hai। aatma to akaal moorta hai। tum sikkhon ke paas jaakar bhaashan kar sakte ho। jaise geeta vaale bhi bhaashan karte hain। tum bachche jaante ho bhakti maarga ki to athaah saamagri hai। gyaan jara bhi nahin। gyaan ka saagar hai hi ek baap। manushya ko gyaanvaan nahin kaha jaayega। devtaayen bhi to manushya hain na। parantu daiveegun hain isliye devta kaha jaata hai। unhon ko bhi baap se hi varsa mila tha। tum bhi is raajayog se vishwa ke maalik ban rahe ho। satguru akaal kehte hain na। satya to woh ek hi baap hai। vahi patit-paavan hai। do baap ka bhi parichay dena hai। tumko bhaashan ke liye do minute milen to bhi bahut hai। ek minute ek second mile to bhi bahut hai। jinko kalpa pahle teer laga hoga unko hi lagega, koi badi baat nahin। sirf paigaam dena hai। baba ne samjhaaya hai - samjho guroonaanak aata hai to woh koi message nahin dete ki tumko vaapis ghar chalna hai, uske liye pavitra bano। woh to pavitra aatmaayen oopar se aati hain। unke dharma ki vriddhi hoti hai, aate rehte hain। vaastav mein sadgati daata koi manushya ho nahin sakta। sadgati daata ek baap hai। manushya to manushya hi hain phir samjhaaya jaata hai phalaane dharma ka hai। baap ne samjhaaya hai tum apne ko aatma samjho, pavitra bano, guroonaanak ne kaha hai moot paleeti kapad dhoe.. yeh bhi peechhe shaastra banaane vaalon ne likha hai। pahle to bahut thode hote hain। unko kya baith sunaayenge। yeh gyaan bhi baap tumko abhi dete hain phir shaastra to pichhaadi mein bante hain। satayug mein to shaastra hote nahin। pahle to samjhaana hai baap ko yaad karo to vikarma vinaash honge। vinaash to hona hi hai। poochhna chaahiye sarvavyaapi kisko kehte ho jiski yeh mahima gaate ho ekoankaar..woh to baap thahra na। unke bachche ham aatmaayen bhi akaalmoorta hain। hamaara takhta yeh hai। ham ek takhta chhod doosre par baithe hain। 84 takhta par baithte hain। abhi yeh hai puraani duniya, kitne hangaame hain। nai duniya mein yeh baaten ho na sake। vahaan to ek hi dharma hota hai। baap tumko vishwa ki baadshaahi de dete hain। tumhaare par koi chadhaai nahin kar sakte। dvaapar se dharma sthaapak aate hain apne-apne dharma ki sthaapna karne। unka dharma jab vriddhi ko paaye, taakat mein aaye tab ladaai ki baat ho। islaami pahle kitne thode honge। tumhaara dharma to yahaan sthaapan hota hai। woh aate hi dvaapar mein hain। us samay hi dharma sthaapan hota hai। phir ek do ke pichhaadi aate jaayenge। yeh badi samajhne ki baaten hain। koi to drama anusaar kuchh bhi dhaaran nahin kar sakte hain। baap samjhaate hain zaroor unka pad kam hoga। yeh koi shraap nahin hai। maala to mahaaveeron ki banti hai। drama anusaar sabhi ek jaisa purushaartha to kar nahin sakte। aage bhi nahin kiya hoga। kahenge phir hamaara kya dosh hai। baap bhi kehte hain tumhaara koi dosh nahin। takdeer mein nahin hai to baap kya kar sakte। samajh sakte hain kaun-kaun kis pad ke laayak hain। sikkhon ko bhi samjhaana hai ki saaheb ko japo to sukh-shanti mile। unko sukh tab milta hai jab unke dharma ki sthaapna hoti hai। ab to sab neeche aa chuke hain। tum maante ho satguru akaal.. phir guru kisko kehte ho? sadgati dene vaala guru ek hai। bhakti sikhlaane vaale to dher guru chaahiye। gyaan sikhlaane vaala ek baap hai। to tum maataayen unko samjhaao ki yeh kangan tum jo pahante ho ye bhi pavitrata ki nishaani hai। tumhaara woh maan lenge kyonki tum maataayen hi svarga ka dvaar kholne vaali ho। tum maataaon ko abhi gyaan ka kalash mila hai jisse sabki sadgati ho jaati hai।

tum bachche abhi apne ko mahaaveer kahlaate ho। tum kah sakte ho ham grihastha vyavhaar mein rah svarga ki sthaapna kar rahe hain। raat din ka pharka hai। yeh jataayen bhi pavitrata ki nishaani hain। akaalmoorta patit-paavan baap ki mahima poori karni chaahiye। saadhu sanyaasi paramatma namah kehte hain phir kehte hain sarvavyaapi hai। yeh hai wrong। baap ki tum khoob mahima karo। baap ki mahima se tum tar jaate ho। jaise kahaani hai raam-raam kahne se paar ho jaayenge। baap bhi kehte hain baap ko yaad karne se vishay saagar se paar ho jaayenge। tum sabko mukti mein jaana hi hai। tum amritsar mein jaakar bhaashan karo ki tum pukaarte ho satguru akaalmoorta..parantu woh ab kehte hain deh sahit deh ke sab dharmon ko chhod apne ko aatma samjho। baap ko yaad karo to paap bhasma ho jaayenge। ant mati so gati ho jaayegi। shivbaaba akaalmoorta, niraakaar hai। tum aatma bhi niraakaar ho। baap kehte hain mera shareer to hai nahin। main loan leta hoon। main aata hi patit duniya mein hoon - raavan par jeet paane। yahaan hi direction doonga kyonki patit hote hi puraani duniya mein hain। nai duniya mein ek hi devi devta dharma tha, us samay aur sab shantidham mein rehte hain। phir nambarvaar sato rajo tamo mein aate hain। jinko sukh bahut milta hai, unko duhkh bhi bahut milta hai।

tumhein sabko baap ka paigaam dena hai ki baap ko yaad karo to ghar pahunch jaayenge। sadgati sabki tab hoti hai jab jhaad poora hota hai, sab aa jaate hain। aise tum bhi kisi ko bahut pyaar aur dheeraj se samjhaao। tumko chitra uthaane ki bhi darkaar nahin hai। vaastav mein chitra hain nayon ke liye। tum koi bhi dharma vaalon ko samjha sakte ho। parantu bachchon mein itna yog nahin jo teer lage। kehte hain baba ham haar kha lete hain। maaya ekdam kaala munh kara deti hai, unko yeh pata hi nahin padta hai ki ham devta the। is samay asur ban pade hain।

ab baba kehte hain apne ko aatma samajh baap ko yaad karo। baap ka paigaam sabko dete raho। bioscope ke slides par bhi likho ki trimoorti parampita paramatma shiv kehte hain maamekam yaad karo to tumhaare vikarma vinaash honge। tum mukti jeevanmukti pa lenge। paigaam to sabko dena hai na। slides bhi ban jaana chaahiye। ismen yeh jaise ek vasheekran mantra manamnaabhav ka sabko do। is padhaai mein deri nahin lagti। aage chalkar sab samjhenge। koi phikar ki baat nahin। phikar se rahit to hona hi hai। manushya dekho - maut se kitna darte hain। yahaan darne ki to baat hi nahin। tum to kahenge abhi maut na aaye। abhi hamne imtahaan hi poora kahaan kiya hai। abhi yaatra poori nahin ki hai to shareer kyon chhootna chaahiye। aise meethi-meethi baaten baap se karni hai। bahut achhi tev (aadat) pad jaayegi। yahaan chitra ke aage aakar baith jaao। tum jaante ho hamko baba se vishwa ki raajaai milti hai। to aise baap ko bahut yaad karna chaahiye na। yaad nahin karenge to sajaayen bhogni padegi। baba ko to yaad pad gaya hai ki ham yeh banne vaale hain। to bahut khushi hoti hai ki ham yeh banenge। dekhne se hi nasha chadh jaata hai। tumko bhi yeh banna hai। baba ham aapko yaad kar aise banenge zaroor। aur koi kaam nahin hai to yahaan chitron ke saamne aakar baith jaao। baap dvaara hamko yeh varsa milta hai। yeh pakka kar do। yeh yukti kam nahin hai। parantu takdeer mein nahin hai to yaad nahin karte। baba kehte hain yahaan aate ho to bahut practice karo। to jo kuchh grahchaari hogi woh utar jaayegi। seedhi ke chitra par yeh vichaar karo। parantu takdeer mein nahin hai to shreemat par chal nahin sakte। baba raasta bataate hain maaya kaat deti hai। baba yuktiyaan bahut batlaate hain। baap aur varse ko yaad karte raho। kehte hain ateendriy sukh gop gopiyon se poochho, jinko nishchay hai ki ham baap se varsa zaroor lenge। baba svarga ki sthaapna kar humein uska maalik banaate hain। chitra bhi aise bane hue hain। tum siddha kar bataate ho ki brahma, vishnu ka kya sambandh hai। aur kisko bhi pata nahin, brahma ka chitra dekh moonjh jaate hain। sthaapna mein time zaroor lagta hai, karmaateet avastha mein bhi time lagta hai। ghadi-ghadi bhool jaate hain। yeh aadat daalni chaahiye। naudha bhakti vaale bhi chitra ke aage baith jaate hain - hamko deedaar ho। tum to yeh bante ho to tumko yaad karna chaahiye। badge bhi tumhaare paas hai। baba apna bhakti maarga ka misaal bataate hain ki naaraayan ki moorti se mera bahut pyaar tha। woh sab tha bhakti maarga। ab baap kehte maamekam yaad karo aur kuchh bhi nahin karna hai। baba kehte hain ham to obedient servant hain। humein tum maatha kyon tekte ho। achha!

maat-pita baapdaada ka meethe-meethe sikeeldhe bachchon prati yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) nirmaanta ka gun dhaaran karna hai। zara bhi ahankaar mein nahin aana hai। aisa mahaaveer banna hai jo maaya hila na sake।

2) sabhi ko manamnaabhav ka vasheekran mantra sunaana hai। bahut pyaar aur dheeraj se sabko gyaan ki baaten sunaani hai। baap ka paigaam sab dharma vaalon ko dena hai।

vardaan:- karma aur sambandh donon mein svaartha bhaav se mukta rahne vaale baap samaan karmaateet bhav

aap bachchon ki seva hai sabko mukta banaane ki। to auron ko mukta banaate svayan ko bandhan mein baandh nahin dena। jab had ke mere-mere se mukta honge tab avyakt sthiti ka anubhav kar sakenge। jo bachche laukik aur alaukik, karma aur sambandh donon mein svaartha bhaav se mukta hain vahi baap samaan karmaateet sthiti ka anubhav kar sakte hain। to check karo kahaan tak karmo ke bandhan se nyaare bane hain? vyartha svabhaav-sanskaar ke vash hone se mukta bane hain? kabhi koi pichhla sanskaar svabhaav vasheebhoot to nahin banaata hai?

slogan:- samaan aur sampoorn banna hai to sneh ke saagar mein sama jaao।

avyakti silence dvaara double light pharishta sthiti ka anubhav karo

abhi teevra purooshaartha ka yahi lakshya rakho ki main double light pharishta hoon, chalte-phirte pharishta swaroop ki anubhooti ko badhaao। deep silence dvaara ashreereepan ka abhyaas karo। second mein koi bhi sankalpon ko samaapta karne mein, sanskaar-svabhaav mein double light raho।