Murli du jour du samedi 20 janvier 2024

20-01-2024 praatahmurli om shanti "baapdaada"' madhuban

“meethe bachche - tum kalyaanakri baap ke bachchon ka kartavya hai sarva ka kalyaan karna, sabko baap ki yaad dilaana aur gyaan daan dena''

prashn:- baba mahaarthi kin bachchon ko kehte hain, unki nishaani kya hogi?

uttar:- jo achhi reeti padhte aur padhaate hain, jin par sada brahaspati ki dasha hai, jo apni aur sarva ki unnati ka sada khyaal rakhte hain, jo yagya seva mein haddiyaan dete hain, jo baba ke kaarya mein madadgaar rehte hain - woh hain mahaarthi। aise mahaarthi bachchon ko baba kehte - yeh hain mere sapoot bachche।

om shanti। aajkal bachche shiv jayanti ke liye taiyaariyaan kar rahe hain। card aadi bhi chhapaate hain। baap ne samjhaaya to bahut baari hai। saari mukhya baat geeta par hai। manushyon ki banaai hui geeta ko padhte-padhte aadhaakalpa neeche utarte aaye hain। yeh bhi tum bachche samajhte ho - aadhaakalpa hai din, aadhaakalpa hai raat। ab baba topic dete hain us par manthan karna pade। tum likh sakte ho bhaai aur bahnon aakar samjho - ek geeta shaastra hai gyaan ka, baaki sab shaastra hain bhakti ke। gyaan ka shaastra ek hi hai jo purushottam sangamayug par behad ka baap parampita paramatma trimoorti shiv sunaate hain ya to likhna hai brahma dvaara suna rahe hain, jisse 21 janma sadgati hogi। gyaan ki geeta se 21 janma ka varsa milta hai phir 63 janma bhakti ki geeta chalti hai jo manushyon ki banaai hui hai। baap to raajayog sikhlaakar sadgati kar dete hain। phir sunne ki darkaar nahin rehti is gyaan ki geeta se din ho jaata hai। yeh gyaan ka saagar baap hi sunaate hai, jisse 21 janma gati sadgati hoti hai arthaat 100 percent pavitrata sukh shanti ka atal akhanda satayugi daivi svaraajya milta hai। 21 janmon ke liye chadhti kala hoti hai। manushyon ki banaai hui geeta se utarti kala hoti hai। bhakti ki geeta aur gyaan ki geeta par achhi tarah vichaar saagar manthan karna hai। yeh mool baat hai jo manushya nahin jaante। tum likhte ho trimoorti shiv jayanti so shreemat bhagvat geeta jayanti so sarva ki sadgati bhavanti। yeh bhi suna sakte ho ki shiv jayanti so vishwa mein shanti bhavanti। mukhya akshar bahut zaroori hai, jis par hi saara madaar hai। tum sabko batla sakte ho ki manushya, manushya ki sadgati kar nahin sakte। bhagwan sadgati karne aate hain - purushottam sangamayug par, jo ab ho rahi hai। yeh 2-3 points mukhya hain। shiv aur krishna ki geeta ka contrast to hai hi। trimoorti shiv bhagwan se sangam par geeta sunne se sadgati hoti hai। aisi-aisi points par jab koi vichaar saagar manthan kare tab auron par bhi asar pade। manushya, manushya ki sadgati kabhi kar nahin sakte। sirf ek hi trimoorti parampita paramatma shiv jo teacher bhi hai, satguru bhi hai woh is purushottam sangamayug par sarva ki sadgati kar rahe hain। card mein thodi likhat hi ho। oopar mein likh dena chaahiye kaliyugi kaudi jaise patit manushya se satayugi heere jaisa paavan devi devta banne ka eeshvareey nimantran। aise likhne se manushya khushi se aayenge - samajhne ke liye। sadgati daata baap ki hi shiv jayanti manaai jaati hai। ekdam clear akshar ho, manushya to bhakti maarga mein kitne dher shaastra padhte hain। maatha maarte hain। yahaan ek second mein behad ke baap se mukti jeevanmukti milti hai। jab baap ka bankar unse knowledge lete hain to jeevanmukti avashya hi milegi। pahle mukti mein jaakar jaisa purushaartha kiya hoga, aise jeevanmukti mein zaroor aayenge। jeevanmukti milti zaroor hai phir shuru mein aaye va pichhaadi mein aaye। pahle jeevanmukti mein aate phir jeevanbandha mein। aisi-aisi mukhya points agar dhaaran karen to bhi bahut service kar sakte hain। agar baap ko jaante ho to doosron ko bhi parichay do। kisko parichay nahin dete to goya gyaan nahin hai। samjhaani to di jaati hai parantu takdeer mein nahin hai, kalyaankaari baap ke bachche to kalyaan karna chaahiye। nahin to baap samjhenge yeh kahne maatra kehte hain ki ham shivbaaba ke bachche hain। kalyaan to karte nahin। saahookaar athva gareeb kalyaan to sabka karna hai। parantu pahle gareeb uthaayenge kyonki unhon ko phursat hai। drama mein noondh hi aisi hai। ek saahookaar agar abhi aa jaae to unke pichhaadi dher aa jaayen। ab agar mahima nikle to dheron ke dher aa jaayen।

tumhaara hai eeshvareey martaba। tum apna bhi aur auron ka bhi kalyaan karte ho। jo apna hi kalyaan nahin karte to auron ka bhi kar nahin sakte। baap to hai kalyaankaari, sarva ka sadgati daata। tum bhi madadgaar ho na। tum jaante ho woh hai bhaktimaarga ki dasha। sadgati maarga ki dasha ek hi hai jo achhi reeti padhte aur padhaate hain un par hai brahaspati ki dasha। unko mahaarthi kahenge। apni dil se poochho ham mahaarthi hain। phalaane-phalaane misal service karte hain। pyaade kabhi kisko gyaan suna na saken। agar kiska kalyaan nahin karte to apne ko kalyaankaari baap ka bachcha kyon kahlaana chaahiye। baap to purushaartha karaayega। is yagya seva mein haddiyaan bhi deni chaahiye। baaki sirf khaana peena sona woh service hui kya। aise to jaakar praja mein daas daasi banenge। baap to kehte hain purushaartha kar nar se naaraayan bano। sapoot bachchon ko dekh baap bhi khush honge। laukik baap bhi dekhte hain yeh to bahut achha martaba paane vaala hai to dekhkar khush honge। paarlaukik baap bhi aise kehte hain। behad ka baap bhi kehte hain ham tumko vishwa ka maalik banaane aaye hain। ab tum auron ko bhi banaao। baaki sirf pet ki pooja karne se kya phaayda hoga। sabko sirf yahi bataao ki shivbaaba ko yaad karo। bhojan par bhi ek do ko baap ki yaad dilaao to sab kahenge inki shivbaaba se bahut preet hai। yeh to sahaj hai na। ismen kya nuksaan hai। tev (aadat) pad jaayegi to khaate rahenge aur baba ko bhi yaad karte rahenge। daivi gun bhi zaroor dhaaran karne hain। abhi to sab pukaarte hain he patit-paavan aao to zaroor patit hain। shankaraachaarya bhi shiv ko yaad karte hain kyonki vahi patit-paavan hai। aadhaakalpa bhakti karte hain phir bhagwan aate hain, koi ko hisaab ka thode hi pata hai। baap samjhaate hain - yagya, tap, daan se main nahin milta hoon, ismen geeta bhi aa jaati hai। yeh shaastra aadi padhne se koi ki sadgati nahin hoti hai। geeta, ved, upnishad sab hain bhakti maarga ke। baap to bachchon ko sahaj raajayog aur gyaan sikhlaate hain, jisse raajaai praapta karaate hain। inka naam hi hai raajayog। ismen pustak ki koi baat nahin। teacher study karaate hain - pad praapta karaane ke liye, to follow karna chaahiye। sabko bolo shivbaaba ko yaad karo। woh ham sab aatmaon ka baap hai। shiv-baba ko yaad karne se vikarma vinaash honge। ek do ko saavdhaan kar unnati ko paana hai। jitna yaad karenge utna apna hi kalyaan hai। yaad ki yaatra se saare vishwa ko pavitra banaayenge। yaad mein rahkar bhojan banaao to usmein bhi taakat aa jaayegi isliye tumhaare brahma bhojan ki bahut mahima hai। woh bhakta log bhog lagaate hain to bhi raam-raam kehte rehte hain। raam naam ka daan dete hain। tumko to buddhi mein ghadi-ghadi baap ki yaad rahni chaahiye। buddhi mein saara din gyaan rehna chaahiye। baap ke paas saari rachna ke aadi-madhya-ant ka gyaan hai na। oonche te ooncha bhagwan hai tum unko yaad karenge to oonch pad praapta karenge। phir doosre kisko yaad hi kyon karen। baap kehte hain sirf mujhe yaad karo to doosre sab chhodne padte hain। yeh hai avyabhichaari yaad। agar yaad nahin padti to gaanth baandh lo। apni unnati ke liye, oonch pad paane ke liye purushaartha zaroor karna hai। hamko bhi teacher banaane vaala shivbaaba hamaara teacher hai। tum sab pande ho na। pandon ka kaam hai raasta bataana। itna saara gyaan pahle thode hi tumhaare mein tha। sab kehte hain pahle to jaise paai paise ki padhaai thi। so to zaroor hoga। drama anusaar kalpa pahle misal padhte rehte hain। phir kalpa ke baad bhi aise hi padhenge। pichhaadi mein tumko sab saakshaatkaar honge। saakshaatkaar hone mein deri nahin lagti hai। baba ko jaldi-jaldi saakshaatkaar hote gaye। phalaana-phalaana raaja banenge, yeh dress hogi। shuru mein bachchon ko bahut saakshaatkaar hote the phir ant mein bahut honge, phir yaad karenge। achha-

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) bhojan par ek do ko baap ki yaad dilaao, yaad mein bhojan khaao। ek shiv baba se hi sachchi preet rakho।

2) yagya seva mein haddiyaan deni hai। baap ka poora madadgaar banna hai।

sabhi gop gopiyon prati maateshvari ji ke haston se likha hua yaad patra (1961)

sabhi gop-gopiyon prati ati yaadapyaar।

baad samaachaar ki aap sab grihastha vyavhaar mein rehte kamal phool samaan apni jeevan mein saphalta ko paate rehte ho na! laadle gop to ab service ko achhi reeti uthaane ke purushaartha mein lag gaye hain, bahut achha hai। aakhir bhi apne param poojya baap ka parichay sabko milna hi hai। yeh to jaante ho ki is oonch praapti ko koton mein koi hi pa sakenge, parantu aise phool zaroor niklenge to na! achha, tej raphtaar se service ko badhaate chalo। khajaana avinaashi gyaan dhan ka to bahut anokha hai, akhut hai, jo baap dvaara sabhi bachchon ko milta hi rehta hai। koi ise praapta kar le to janma-janmaantar ke liye maalaamaal ban jaaye, yeh cheez hi aisi hai। kaho, laadle gop-gopiyaan theek baat hai na!

aap sabhi gop gopiyaan ateendriy sukhmay jeevan ke anubhav se jeevan bitaate chalte chalo। dekho laadle gop, gopiyaan ab is brahman kul ki vriddhi hone mein hi sabka kalyaan hai। phir to brahman so devta avashya banenge। jaise kai apne grihastha vyavhaar mein rehte bhi brahman kul vanshi bankar chal rahe hain arthaat grihastha vyavhaar mein rehte pavitra rehte hain, ham ek baap ke bachche hain, aisi pavitra dhaarna mein rehte hain। baaki sabhi ko us parampita baap ke direction par hi chalna hai, isko hi shreemat par chalna kaha jaata hai। aisi dhaarna mein chalne vaalon ko hi brahman kul vanshi kaha jaata hai। jabki ab vahi baap, teacher, satguru bana hai, dharmaraaj bhi hai, to kyon na unki god ka bachcha ban apna poorn pavitrata ka adhikaar le lena chaahiye। jisse hi bhavishya mein sukh shanti ka poora adhikaar praalabdha roop mein praapta ho jaata hai।

kaho, laadle gop-gopiyaan aise sahaj raaz ko samajh gaye ho na! jeete ji marne athva marjeeva banne mein darte to nahin ho na! aaj yeh patra har ek apne-apne naam se samjhe aur apna patra samajhkar padhe athva sunen aur maa ka pyaar bhi har ek apne naam se paaye। har ek gop-gopi prati naam sahit maa ka atyant pyaar। achha, apna saubhaagya oonch banaane ke purushaartha mein teevra veg se lage rehna hi kalyaankaari banna hai, jabki abhi pata chala hai ki svayan parampita oonch varsa dene aaya hai to lekar hi rehna hai। achha, chhutti lete hain। om shanti।

vardaan:- avinaashi praapti ke aadhaar par sada sampannata ka anubhav karne vaale prasannachit bhav

sangamayug par direct parmaatma praapti hai, vartamaan ke aage bhavishya kuchh bhi nahin hai isliye aapka geet hai jo paana tha vo pa liya…is samay ka gaayan hai apraapta nahin koi vastu braahmanon ke khajaane mein। yeh avinaashi praaptiyaan hain। in praaptiyon se sampanna raho to chalan aur chehre se sada prasannata ki visheshta dikhaai degi। kuchh bhi ho jaae sarva praaptivaan apni prasannata chhod nahin sakte।

slogan:- parmaatma pyaar ke anubhvi bano to koi bhi rukaavat rok nahin sakti।

avyakti silence dvaara double light pharishta sthiti ka anubhav karo

koi bhi aapke sameep samparka mein aaye to mahsoos kare ki yeh roohaani hain, alaukik hain। apne poorvajpan ki smriti se sabhi aatmaon ki paalna shanti ki shakti se karo। aapka pharja hai - ashaanti ke vaayumandal mein aatmaon ko shanti ka daan dekar unmein shanti ki, sahanshakti ki himmat bharna। iske liye apni vritti dvaara, mansa shakti dvaara vishesh seva karo। light-house ban sarva ko shanti ki light do।