Murli du jour du mardi 20 février 2024

20-02-2024 praatahmurli om shanti "baapdaada"' madhuban

“meethe bachche - tumhein tan-man-dhan se sachchi roohaani seva karni hai, roohaani seva se hi bhaarat golden ej ban jaayega''

prashn:- bephikra rahne ke liye sada kaun-si baat yaad rakho? tum bephikra kab rah sakenge?

uttar:- bephikra rahne ke liye sada yaad rahe ki yeh drama bilkul accurate bana hua hai। jo bhi drama anusaar chal raha hai yeh bilkul accurate hai। parantu abhi tum bachche bephikra rah nahin sakte, jab tumhaari karmaateet avastha ho, tab tum bephikra banenge, iske liye yog bahut achha chaahiye। yogi aur gyaani bachche chhip nahin sakte।

om shanti। patit-paavan shiv bhagvaanuvaach। baap ne samjha diya hai ki dehdhaari manushya ko kabhi bhi bhagwan nahin kaha ja sakta। manushya yeh bhi jaante hain, patit-paavan bhagwan hi hai। shreekrishna ko patit-paavan nahin kahenge। bichaare bahut moonjhe hue hain। bhaarat mein jab soot moonjh jaata hai tab shivbaaba ko aana padta hai। baap ke bina use koi suljha na sake। vo hi patit-paavan shivbaaba hai, jisko sirf tum bachche hi jaante ho। so bhi nambarvaar purushaartha anusaar। bhal yahaan baithe hain, roz sunte hain to bhi dhyaan mein yeh nahin aata hai ki ham shivbaaba ke paas baithe hain, woh inmen viraajmaan hain, hamko padha rahe hain, paavan bana rahe hain, yukti batla rahe hain।

tum svadarshan chakradhaari ban rachta aur rachna ki knowledge paakar kaam ko jeet jagatjeet bante ho। to woh baap patit-paavan bhi thahra। nai rachna ka rachta bhi thahra। abhi behad ka raajya paane ke liye tum purushaartha karo। harek samajhte hain ham shivbaaba se raajya-bhaagya le rahe hain। yeh bhi yathaartha reeti samajh nahin sakte। koi thoda jaante, koi to bilkul hi nahin jaante। shivbaaba to kehte hain patit-paavan main hoon। mere se agar koi aakar poochhe to main apna parichay de sakta hoon। tumko bhi to baap ne apna parichay diya hai na। shivbaaba kehte hain main saadhaaran tan mein pravesh karta hoon। yeh saadhaaran tan hai। jhaad ke ant mein khada hai। patit duniya mein khada hai aur phir neeche tapasya kar rahe hain। inko bhi tapasya shivbaaba sikhla rahe hain। raajayog shivbaaba sikhaate hain। neeche aadi dev, oopar mein aadi naath। tum bachche samjha sakte ho ham brahman shivbaaba ki santaan hain। tum bhi shivbaaba ke bachche ho parantu jaante nahin ho। bhagwan ek hai, baaki sab brothers hain। baap kehte hain main apne bachchon ko hi padhaata hoon। jo mujhe pahchaante hain unhon ko hi padhaakar devta banaata hoon। bhaarat hi svarga tha, ab narka hai। jo kaam ko jeetega vahi jagatjeet banega। main golden world ki sthaapna kar raha hoon। anek baar yeh bhaarat golden ej mein tha, phir iron ej mein aaya - yeh koi bhi jaante nahin। rachayita aur rachna ke aadi, madhya, ant ko koi jaante nahin। main knowledgeful hoon। yeh hai em object। main inke saadhaaran tan mein pravesh hokar knowledge deta hoon। ab tum bhi pavitra bano। in vikaaron ko jeetne se tum jagatjeet banenge। yeh sab bachche purushaartha kar rahe hain। tan-man-dhan se roohaani seva karte hain, jismaani nahin। inko spiritual knowledge kaha jaata hai। yeh bhakti nahin hai। bhakti ka yug hai dvaapar-kaliyug, jisko brahma ki raat kaha jaata hai aur satayug-treta ko brahma ka din kaha jaata hai। koi geetaapaathi aaye to unko bhi samjhaayenge geeta mein bhool hai। geeta kisne sunaai, raajayog kisne sikhaaya, kisne kaha hai kaam par jeet paane se tum jagat-jeet ban jaayenge? yeh lakshmi-naaraayan bhi jagatjeet bane hain na। inke 84 janmon ka raaz baith samjhaaye। koi bhi ho, knowledge lene ke liye to yahaan aana padega na। main to bachchon ko padhaata hoon। parantu tumhaare mein bhi koi itna nahin samajhte hain, isliye gaayan hai koton mein koi…। main jo hoon, jaisa hoon koi to yeh 5 percent bhi nahin jaante। tumhein baap ko jaankar poori reeti yaad karna hai। maamekam yaad kyon nahin karte ho? kehte hain baba yaad bhool jaati hai। are, tum baba ko yaad nahin kar sakte ho। yoon to baap samajhte hain yeh mehnat ka kaam hai, phir bhi purushaartha karaane ke liye pump karte rehte hain। are, jo baap tumko ksheersaagar mein le jaate hain, vishwa ka maalik banaate hain, unko bhool jaate ho! maaya bhulaayegi bhi zaroor। time lagega। aise bhi nahin ki maaya ko bhulaana hi hai, isliye thande hokar baith jaao। nahin, purushaartha zaroor karna hai। kaam par jeet paani hai। maamekam yaad karo to vikarma vinaash honge। jaise tum bachchon ko bolta hoon vaise koi bhi bade se bada judge aayega, unko bhi baap bolenge na - “bachche'' kyonki main to oonche se ooncha bhagwan hoon। oonche se oonchi padhaai main hi padhaata hoon, prince-princess pad paane ke liye। baap kehte hain main inko padha raha hoon। yahi phir shreekrishna bante hain। brahma-sarasvati, vo hi phir lakshmi-naaraayan banenge। yeh pravritti maarga chala aata hai। nivriti maarga vaale raajayog sikhla na saken। raaja-raani donon chaahiye। vilaayat mein jaakar kehte hain ham raajayog sikhlaate hain। parantu woh to sukh ko kaag vishta samaan kehte hain phir raajayog kaise sikhaayenge। to bachchon ko uchhal aani chaahiye। parantu bachche ajun chhote hain, baalig nahin bane hain। baaligapne ki himmat chaahiye।

baap batlaate hain - yeh hai raavan sampradaay। tum pukaarte ho patit-paavan aao। to yeh patit duniya hai ya paavan duniya hai? tum samajhte ho na ki ham narkavaasi hain। kya yeh daivi sampradaay hai? raamraajya hai? tum raavan raajya ke nahin ho? ab raavan raajya mein sabki aasuri buddhi hai। ab aasuri buddhi ko daivi buddhi banaane vaala kaun? aise 4-5 prashn poochho to manushya soch mein pad jaayen। tum bachchon ka kaam hai baap ka parichay dena। jhaad to dheere-dheere badhta hai। phir bahut vriddhi ko paayenge। maaya bhi chakri lagaakar ekdam gira deti hai। boxing mein bhi bahut marte hain, ismen bhi bahut mar jaate hain। vikaar mein gaya aur mara। phir nayesir purushaartha karna pade। vikaar ekdam maar daalta hai। jo kuchh junk nikaal patit se paavan bana, woh ki kamaai chat ho jaati hai। phir nayesir mehnat karni pade। aise nahin, unko allow nahin karna hai। nahin, unko samjhaana hai jo kuchh yaad ki yaatra ki, padha woh sab khalaas ho gaya। ekdam neeche gir padte hain। phir bhi ghadi-ghadi agar girte rahenge to kahenge get out। ek-do baari ajmaaya jaayega। do baari maaphi mili, phir case hopeless ho jaata hai। phir aayega bhi lekin ekdam dirty class mein। bhent mein to aise kahenge na। jo bilkul kam pad paate hain unko kahenge dirty class। daas-daasiyaan, chandaal, praja ke bhi naukar-chaakar sab bante hain na। baap to jaante hain main inhon ko padha raha hoon। har 5 hajaar varsha ke baad padhaata hoon। woh log laakhon varsha kah dete hain। aage chalkar yeh bhi kahne lag padege ki barobar 5 hajaar varsha ki baat hai। vo hi mahaabhaari ladaai hai। parantu yaad ki yaatra mein rah na saken। din pratidin toolate hote jaayenge। gaaya bhi jaata hai bahut gai thodi rahi…। yeh sab is samay ki baaten hain। baaki thoda samay hai paavan banne mein। ladaai saamne khadi hai। apne dil se poochhna hai - ham yaad ki yaatra par hain? jab koi naya aata hai to bachchon ko form zaroor bharaana hai। jab form bhare tab unko samjhaaya jaaye। agar kisko samajhna hi nahin hai to form hi kya bharega? aise to dher aate hain। bolo, baap ko pukaarte ho - patit-paavan aao to zaroor yeh patit duniya hai, tab to kehte hain ki aakar paavan banaao। phir koi bante hain, koi nahin bante hain। baba ke paas patra to dher aate hain। sab likhte hain shivbaaba care-aaph brahma। shivbaaba bhi kehte hain - main saadhaaran tan mein pravesh karta hain। inko 84 janmon ki kahaani sunaata hoon। aur koi bhi manushya rachta aur rachna ke aadi-madhya-ant ko nahin jaante hain। ab baap ne hi tumko bataaya hai। yeh chitra aadi bhi baba ne divya drishti dekar sab banvaaye hain।

baba tum aatmaon ko hi padhaate hain। aatmaayen jhat ashareeri ho jaati hain। is shareer se apne ko alag samajhna hai, baba kehte hain - bachche, dehi-abhimaani bhav, ashareeri bhav। main aatmaon ko padhaata hoon। yeh mela hai aatmaon aur paramatma ka, ise sangam ka mela kaha jaata hai। baaki koi paani ki ganga paavan nahin banaati hai। saadhu, santa, rishi, muni aadi sab jaate hain snaan karne। ab ganga patit-paavni ho kaise sakti? bhagvaanuvaach hai na - kaam mahaashatru hai, is par jeet paane se tum jagatjeet ban jaayenge। ganga va saagar to nahin kehte। yeh to gyaan saagar baap samjhaate hain, in par jeet paane ke liye maamekam yaad karo to tum paavan ban jaayenge। daiveegun dhaaran karo, kisko duhkh mat do। pahla number duhkh hai kaam kataari chalaana। yahi aadi, madhya, ant duhkh dene vaala hai। satayug mein yeh hota nahin। woh hai paavan duniya, vahaan koi patit rehta hi nahin। jaise tum yogbal se raajya lete ho, vaise vahaan yogbal se bachcha paida hota hai। raavan raajya hi nahin। tum log raavan ko jalaate ho, pata hi nahin padta ki kab se jalaate aaye ho। raamraajya mein raavan hota nahin। yeh badi samajhne ki baaten hain, jo baap baith samjhaate hain। samjhaate to bahut achha hain parantu kalpa-kalpa jo jitna padhe hain, utna hi padhte hain। purushaartha se saara maaloom pad jaata hai। sthool seva ki bhi subject hai, mansa nahin to vaacha, karmana। vaacha to bahut sahaj hai। pahle hai mansa arthaat manmanaabhav, yaad ki yaatra mein rehna hai। apne ko aatma samajh baap ko yaad karna hai। baba se shiksha leni hai। bahut hain jo baap ko yaad nahin kar sakte। aise nahin kahenge ki gyaan ko yaad nahin kar sakte। maamekam yaad nahin kar sakte। yaad nahin karenge to taakat kaise milegi। baap sarvashaktimaan hai, unko yaad karne se hi shakti aayegi, isko hi jauhar kaha jaata hai। karmana bhi koi achhi kare to pad mile। karmana bhi nahin karte to phir pad kya milega। subject hoti hai na। yeh hai gupta samajhne ki baaten। vo log yog-yog kehte rehte hain parantu samajhte nahin ki yog se tum vishwa ki baadshaahi lete ho। yogbal se hi vahaan bachcha paida hota hai। yeh bhi kisko pata nahin hai। tumko samjhaaya jaata hai phir bhi aadhaakalpa ke baad tum maaya ke mureed (chela) ban jaate ho। phir maaya tumko abhi bhi nahin chhodti hai। ab tumko shiv-baba ke mureed banna hai। koi bhi dehdhaariyon ka mureed nahin banna hai। behen-bhaai bhi ab kaha jaata hai - pavitra banne ke liye। phir to isse bhi oopar jaana hai। bhaai-bhaai samajhna hai। bhaai-behen ki drishti bhi nahin।

drama anusaar jo kuchh chalta hai, bilkul accurate। drama bahut accurate hai। baap to bephikra hai, inko to phikra zaroor rahega। bephikra tab rahenge jab karmaateet avastha hogi, tab tak kuchh na kuchh hota hai। yog achha chaahiye। yog ke liye baba ab jor dete hain। iske liye kehte hain ghadi-ghadi bhool jaate hain। baap ulhana dete hain, jo baap tumko itna khajaana dete hain unko tum bhool jaate ho। baap jaante hain kismen gyaan hai, kismen nahin hai। gyaani kabhi chhipa nahin rahega। woh jhat service ka saboot dega। to yeh sab samajhne ki baaten hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) maaya ki boxing mein haar nahin khaani hai। purushaartha mein thanda ho baith nahin jaana hai। himmat rakh seva karni hai।

2) yeh drama accurate bana hua hai, isliye kisi bhi baat ka phikra nahin karna hai। karmaateet avastha ko paane ke liye ek baap ki yaad mein rehna hai, kisi dehdhaari ka mureed nahin banna hai।

vardaan:- shreemat pramaan seva mein santushtata ki visheshta ka anubhav karne vaale saphaltaamoorta bhav

koi bhi seva karo, koi jigyaasu aave ya nahin aave lekin svayan, svayan se santushta raho। nishchay rakho ki agar main santushta hoon to message kaam zaroor karega। ismen udaas nahin ho। student nahin badhe koi harja nahin, aapke hisaab-kitaab mein to jama ho gaya aur unhon ko sandesh mil gaya। agar svayan santushta ho to kharcha saphal hua। shreemat pramaan kaarya kiya, to shreemat ko maanna yeh bhi saphaltaamoorta banna hai।

slogan:- asmartha aatmaon ko samarthi do to unki duaayen milengi।