Murli du jour du mercredi 28 février 2024

28-02-2024 praatahmurli om shanti "baapdaada"' madhuban

“meethe bachche - bhaaratvaasiyon ko siddhakar bataao ki shiv jayanti hi geeta jayanti hai, geeta se phir hoti hai shreekrishna jayanti''

prashn:- kisi bhi dharma ki sthaapna ka mukhya aadhaar kya hai? dharma sthaapak kaun-sa kaarya nahin karte jo baap karte hain?

uttar:- kisi bhi dharma ki sthaapna ke liye pavitrata ka bal chaahiye। sabhi dharma pavitrata ke bal se sthaapan hue। lekin koi bhi dharma sthaapak kisi ko paavan nahin banaate kyonki jab dharma sthaapan hote hain tab maaya ka raajya hai, sabko patit banna hi hai। patiton ko paavan banaana - yeh baap ka hi kaam hai। vahi paavan banne ki shreemat dete hain।

geet:- is paap ki duniya se…

om shanti। ab bachchon ne samajh liya hai ki paap ki duniya kisko aur punya ki duniya athva paavan duniya kisko kaha jaata hai। vaastav mein paap ki duniya yeh bhaarat hi hai aur bhaarat hi phir punya ki duniya svarga banta hai। bhaarat hi bahishta tha, bhaarat hi dozak bana hai kyonki kaam chita par jalte rehte hain। vahaan kaam chita par koi jalta nahin, vahaan kaam chita hai hi nahin। aise bhi nahin kahenge ki satayug mein kaam chita hai, yeh samajhne ki baaten hain na। pahle-pahle prashn uthta hai bhaarat jo patit-duhkhi hai so vahi bhaarat paavan-sukhi tha zaroor। kehte bhi hain aadi sanaatan hindu dharma tha। ab aadi sanaatan kisko kaha jaata hai? aadi maana kya aur sanaatan maana kya? aadi maana satayug। to satayug mein kaun the? yeh to sabko maaloom hai ki lakshmi-naaraayan the। zaroor ve bhi kiski santaan honge jo phir satayug ke maalik banen। satayug sthaapan karne vaala tha parampita paramatma, unki santaan the। parantu is samay apne ko unki santaan nahin samajhte। agar santaan samajhte to baap ko jaante, baap ko to jaante hi nahin। ab hindu dharma to geeta mein hai nahin। geeta mein to bhaarat naam pada hai woh kahlaate hain hindu mahaasbha। ab shreemat bhagvat geeta hai sarvashaastramai shiromni। geeta jayanti bhi manaai jaati hai, shiv jayanti bhi manaai jaati hai। ab shiv jayanti kab hui hai-yeh bhi maaloom hona chaahiye। phir hai shreekrishna jayanti। abhi tum bachche jaan chuke ho ki shiv jayanti ke baad hai geeta jayanti। geeta jayanti ke baad hai shreekrishna jayanti। geeta jayanti se hi devi-devta dharma ki sthaapna hoti hai। phir geeta jayanti ke saath mahaabhaarat ka bhi connection hai। usmein phir aati hai yuddha ki baat। dikhaate hain yuddha ke maidaan mein 3 senaayen thi। yaadav, kaurav aur paandav dikhaate hain। yaadav moosal nikaalte hain। vahaan sharaab piya aur moosal nikaale। tum jaante ho abhi barobar moosal bhi nikal rahe hain। woh bhi apne kul ka vinaash karne ek-doosre ko dhamki de rahe hain। sab Christian log hain। vahi yooropvaasi yaadav thahre। to ek hai unhon ki sabha। unka vinaash hua, aapas mein lad mare। usmein saara Europe aa gaya। usmein islaami, bauddhi, Christian sab aa jaate hain। yahaan phir hai kaurav aur paandav। kaurav bhi vinaash ko praapta hue aur vijay paandavon ki hui। ab prashn uthta hai geeta ka bhagwan kaun, jisne sahaj yog aur sahaj gyaan sikhlaakar raajaaon ka raaja banaaya athva paavan duniya sthaapan ki? kya shreekrishna aaya? kaurav to kaliyug mein the। kaurav-paandavon ke samay shreekrishna kaise aa sakta? shreekrishna jayanti manaate hain, satayug aadi mein 16 kala। shreekrishna ke baad phir treta mein 14 kala raam ki। shreekrishna to prince ka bhi prince hai। vikaari prince log shreekrishna ko poojte hain kyonki jaante hain woh satayug ka 16 kala sampoorn prince tha, ham vikaari hain। zaroor prince log bhi aise kahenge na। ab phir shiv jayanti bhi hai, mandir bhi bade se bada unka hi bana hua hai। woh hai niraakaar shiv ka mandir। unko hi parampita paramatma kahenge। brahma-vishnu-shankar bhi devta hi thahre।

shiv jayanti bhaarat mein hi manaai jaati hai। ab dekho shiv jayanti aane vaali hai। siddhakar samjhaana hai shiv ko hi kaha jaata hai gyaan ka saagar arthaat srishti ko paavan karne vaala parampita paramatma। gaandhi bhi gaate the, shreekrishna ka naam nahin lete the। ab prashn uthta hai shiv jayanti so geeta jayanti ya shreekrishna jayanti so geeta jayanti? ab shreekrishna jayanti to satayug mein kahenge। shiv ki jayanti kab hui thi-kisko pata nahin। shiv to hai niraakaar parampita paramatma, usne srishti rachi sangam par। satayug mein tha shreekrishna ka raajya। to zaroor pahle shiv jayanti hogi। bachche jo brahman kul bhooshan service mein tatpar rehte hain unhon ko yeh baaten buddhi mein laani hain ki bhaaratvaasiyon ko kaise siddhakar bataayen ki shivjayanti so geeta jayanti। phir geeta se hoti hai shreekrishna jayanti athva raajaaon ke raaja ki jayanti। shreekrishna hai paavan duniya ka raaja। vahaan to hai raajaai। vahaan shreekrishna ne janma lekar geeta to gaai nahin aur satayug mein mahaabhaarat ladaai aadi to ho nahin sakti। woh zaroor sangam par hui hogi। tum bachchon ko achhi tarah in baaton par samjhaana hai।

paandav aur kaurav sabha mashhoor hai। paandav pati dikhlaate hain shreekrishna ko। samajhte hain usne sahaj gyaan aur sahaj raajayog sikhlaaya। ab vaastav mein ladaai ki to koi baat hi nahin। vijay paandavon ki hui hai, jinhon ko parampita paramatma ne sahaj raajayog sikhlaaya। vahi 21 janma sooryavanshi-chandravanshi ban gaye। to pahle samjhaana hai, hindu mahaasbha vaalon ko। sabhaayen to aur bhi hain-lok sabha, raajya sabha। yeh hindu sabha hai mukhya। jaise 3 senaayen gaai hui hain yaadav, kaurav aur paandav… aur yeh hue bhi sangam par। abhi satayug ki sthaapna ho rahi hai। shreekrishna ke janma ki taiyaari ho rahi hai। geeta zaroor sangam par hi gaai hai। ab sangam par kisko laayen? shreekrishna to aa na saken। unko kya padi hai jo paavan duniya chhod patit duniya mein aaye aur shreekrishna to hai bhi nahin। tum jaante ho ab woh 84ven janma mein hai kai log phir samajhte hain shreekrishna haaziraahzoor hai, sarvavyaapi hai। shreekrishna ke bhakta kahenge yeh sab krishna hi krishna hain। shreekrishna ne yeh sab roop dhare hain। raadhe panthi honge woh phir kahenge raadhe hi raadhe... ham bhi raadhe, tum bhi raadhe। anek maten nikal padi hain, koi kahe eeshvar sarvavyaapi, koi kahe shreekrishna sarvavyaapi, koi kahe raadhe sarvavyaapi। ab baap tum bachchon ko samjhaate hain। woh baap world almighty authority hai to ab tum bachchon ko bhi authority de rahe hain ki kaise in sabko samjhaayen। hindu mahaasbha vaalon ko samjhaao, woh in baaton ko samajh sakenge। woh apne ko religious minded maante hain। government to koi dharma ko maanti nahin। woh khud hi moonjh gaye hain। shiv paramatma hai niraakaar gyaan saagar aur koi ko gyaan ka saagar kah nahin sakte। woh jab sammukh aakar gyaan de, tab raajaai sthaapan ho। phir to bas raajaai sthaapan ho gai phir sammukh tab aae jab raajaai ganvaao। to tumko siddha karna hai shiv paramatma hai niraakaar gyaan saagar, shiv jayanti so geeta jayanti। is par naatak banaane hain, jo manushyon ki buddhi se shreekrishna ki baat nikal jaaye। niraakaar shiv paramatma ko hi patit-paavan kaha jaata hai। shaastra aadi jo bhi bane hain। woh sab manushya mat par, manushyon ne banaaye hain। baba ka shaastra to koi hai nahin। baap kehte hain main sammukh aakar tum bachchon ko beggar tu prince banaata hoon aur phir main chala jaata hoon। yeh knowledge main hi sammukh suna sakta hoon। woh geeta sunaane vaale bhal geeta sunaate hain parantu vahaan bhagwan sammukh to hai nahin। kehte hain geeta ka bhagwan sammukh tha jo svarga banaakar chala gaya। to kya woh geeta sunne se koi manushya svargavaasi ho sakta hai? marne samay bhi manushyon ko geeta sunaate hain aur koi shaastra nahin sunaate hain। samajhte hain geeta se svarga ki sthaapna hui hai isliye geeta hi sunaate hain। to woh geeta ek honi chaahiye na। doosre dharma sab peechhe aaye hain। aur koi kah nahin sakte tum svargavaasi banenge। phir manushyon ko pilaate bhi ganga jal hai, jamuna jal nahin pilaate। ganga jal ka hi mahatva hai। bahut vaishnav log jaate hain, matke bharkar le aate hain। phir unmein se boond-boond daalkar peete rehte ki sab rog mit jaayen। vaastav mein hai yeh gyaan amrit ki dhaara jisse 21 janma ke duhkh mit jaate hain। tum chaitanya gyaan gangaaon mein snaan karne se manushya svargavaasi ban jaate hain। to zaroor pichhaadi mein gyaan gangaayen nikli hongi। woh paani ki nadiyaan to hain hi hain। aise thode hi koi paani peene se devta ban jaayenge। yahaan koi thoda hi gyaan sunte hain to svarga ke hakdaar ban jaate hain। yeh hai gyaan ke saagar shivbaaba ki gyaan gangaayen। gyaan saagar, geeta gyaan daata ek shiv hai, shreekrishna nahin hai। satayug mein patit koi hota nahin, jisko gyaan den। yeh sab baaten bhagwan baith samjhaate hain। he arjun va he sanjay.... naam mashhoor ho gaya hai। likhne mein bahut teekha hai, nimitta bana hua hai। ab shivjayanti aati hai to us par bade-bade aksharon mein likhna hai। shiv ho gaya niraakaar। unko gyaan saagar, blissful kaha jaata hai। shreekrishna ko knowledgeful, blissful nahin kahenge। shiv paramatma hi knowledge dete hain, raham karte hain। knowledge hi raham hai। master raham kar padhaate hain to barrister, engineer aadi ban jaate hai। satayug mein bliss ki darkaar nahin। to pahle-pahle siddha karna hai ki niraakaar gyaan saagar shivjayanti so geeta jayanti va satayugi saakaar shreekrishna jayanti so geeta jayanti। yeh hai tum bachchon ko siddha karna।

tum jaante ho jo bhi paigambar aadi aate hain woh paavan nahin banaate। dvaapar se maaya ka raajya hone se sab patit ho jaate hain। phir jab tang hote hain to chaahte hain ham jaayen। jo dharma sthaapan karte hain vahi phir vriddhi ko paate hain। pavitrata ke bal se dharma sthaapan karte hain phir apvitra banna hi hai। mukhya hain 4 dharma, inse hi vriddhi hoti hai। taal-taaliyaan nikalti hain। shiv jayanti, geeta jayanti siddha hone se aur sab shaastra ud jaayenge kyonki woh hain manushyon ke banaaye hue। vaastav mein bhaarat ka shaastra ek hi geeta hai। most beloved baap kitna sahaj kar samjhaate hain। unki shreshtha te shreshtha mat hai। ab tumko yeh siddha karna hai ki niraakaar gyaan saagar jayanti so geeta jayanti ya satayugi saakaar shreekrishna jayanti so geeta jayanti? inke liye badi conference bulaani pade। yeh baat siddha ho jaaye to phir sab pandit tumse aakar yeh lakshya lenge। shiv jayanti par kuchh to karna hai na। hindu mahaasbha vaalon ka samjhaao, unki badi sanstha hai। satayug mein hai aadi sanaatan devi-devta dharma। baaki sabha aadi koi nahin। sabhaayen hain sangam par। pahle-pahle to siddha karna hai ki vaastav mein aadi sanaatan sabha hai yeh braahmanon ki, paandavon ki। paandavon ne hi vijay paai jo phir svargavaasi hue। ab to koi aadi sanaatan devi-devtaaon ki sabha kah na sake। devtaaon ki sabha nahin kahenge, woh hai sovereignty। kalpa ke sangam par yeh sabhaayen thi। unmein ek thi paandav sabha, jisko aadi sanaatan braahmanon ki sabha kahenge। yeh koi nahi jaante। shreekrishna ke naam se brahman hain nahin। braahmanon ki choti brahma ke naam se hai। brahma ke naam se tum brahman sabha kahenge। yeh baaten samjhaane vaala bhi buddhivaan chaahiye। ismen gyaan ki paraakaashtha chaahiye। niraakaar shiv hi geeta gyaan daata divya chakshu vidhaata hai। yeh sab dhaaran kar phir conference bulaate hain, jo samajhte hain ham siddhakar bata sakenge unko aapas mein milna chaahiye। ladaai ke maidaan mein majors, commanders aadi ki sabha hoti hai। yahaan commander mahaarthi ko kaha jaata hai। baba creator, director hain, svarga ki rachna karte hain phir direction dete hain-mahaasbha banaao phir is baat ko uthaao। geeta ka bhagwan siddha hone se phir sab samjhenge ki unse yog lagaana chaahiye। baba kehte hain main guide bankar aaya hoon, tum udne laayak to bano। maaya ne pankh tod daale hain। yog lagaane se tumhaari aatma pavitra ho jaayegi aur udenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan amrit dhaara se sabko nirogi va svargavaasi banaane ki seva karni hai। manushyon ko devta banaana hai। baap samaan master merciful banna hai।

2) gyaan ki paraakaashtha se buddhivaan ban shivjayanti par siddha karna hai ki shiv jayanti hi geeta jayanti hai, geeta gyaan se hi shreekrishna ka janma hota hai।

vardaan:- dincharya ke har karma mein yathaartha aur yuktiyukta chalne vaale poojya, pavitra aatma bhav

poojya, pavitra aatma ki nishaani hai - unka har sankalp, bol, karma aur svapna yathaartha arthaat yuktiyukta hoga। har sankalp mein arth hoga। aise nahin ki aise hi bol diya, nikal gaya, kar liya, ho gaya। pavitra aatma sada dincharya ke har karma mein yathaartha, yuktiyukta rehti hai isliye pooja bhi unke har karma ki hoti hai arthaat poore dincharya ki hoti hai। uthne se lekar sone tak bhinna-bhinna karma ke darshan hote hain।

slogan:- sooryavanshi banna hai to sada vijayi aur ekras sthiti banaao।