Murli du jour du mercredi 13 mars 2024

13-03-2024 praatahmurli om shanti "baapdaada"' madhuban

“meethe bachche - saari duniya mein tuhaare jaisa padmaapadma bhaagyashaali student koi nahin, tumhein svayan gyaan saagar baap teacher bankar padhaate hain''

prashn:- kaun-sa shauk sada bana rahe to moh ki ragen toot jaayengi?

uttar:- service karne ka shauk bana rahe to moh ki ragen toot jaayengi। sada buddhi mein yaad rahe ki in aankhon se jo kuchh dekhte hain yeh sab vinaashi hai। ise dekhte hue bhi nahin dekhna hai। baap ki shreemat hai - hear no evil, si no evil…।

om shanti। shiv bhagvaanuvaach meethe saaligraamon ya roohaani bachchon prati। yeh to bachche samajhte hain ham satayugi aadi sanaatan pavitra devi-devta dharma ke the, to yeh yaad rakhna hai। aadi sanaatan devi-devta dharma ko to bahut maante hain parantu devta dharma ke badle hindu naam rakh diya hai। tum jaante ho ham aadi sanaatan kaun the? phir punarjanma lete-lete yeh bane hain। yeh bhagwan baith samjhaate hain। bhagwan koi dehdhaari manushya nahin hai। aur sabko apni apni deh hai, shivbaaba ko kaha jaata hai videhi। unko apni deh nahin hai aur sabko apni deh hai, to apne ko bhi aisa videhi samajhna kitna meetha lagta hai। ham kya the, ab kya ban rahe hain। yeh drama kaisa bana hua hai - yeh bhi tum abhi samajhte ho। yeh devi-devta dharma hi pavitra grihastha aashram tha। abhi aashram nahin hai। tum jaante ho abhi ham aadi sanaatan devi-devta dharma ki sthaapna kar rahe hain। hindu naam to abhi rakha hai। aadi sanaatan hindu dharma to hai nahin। baba ne bahut baar kaha hai - aadi sanaatan dharma vaalon ko samjhaao। bolo, ismen likho aadi sanaatan devi-devta pavitra dharma ke ho ya hindu dharma ke ho? to unko 84 janmon ka maaloom pade। yeh knowledge to bahut sahaj hai। sirf laakhon varsha kahne se manushya moonjh padte hain। yeh bhi drama mein noondh hai। satopradhaan se tamopradhaan banne ka bhi drama mein part hai। devta dharma vaale hi 84 janma lete-lete kitne chhi-chhi ban pade hain। pahle bhaarat kitna oonch tha। bhaarat ki hi mahima karni chaahiye। ab phir tamopradhaan se satopradhaan, puraani duniya se nai duniya zaroor banni hai। aage chal-kar tumhaari baat ko samjhenge zaroor। bolo, ghor neend se jaago। baap aur varse ko yaad karo। tum bachchon ko saara din khushi rahni chaahiye। saari duniya mein, saare bhaarat mein tumhaare jaise padmaapadma bhaagyashaali student koi nahin। samajhte ho jo ham the vahi phir banenge। chhaant karke phir vahi niklenge, ismen tum moonjho mat। pradarshani mein thoda bhi sunkar jaate hain to woh bhi praja banti jaati hai kyonki avinaashi gyaan dhan ka to vinaash nahin hota hai। din-pratidin tumhaari sanstha jor bharti jaayegi, phir dheron ke dher tumhaare paas aayenge। dheere-dheere dharma ki sthaapna hoti hai। jab koi bada aadmi baahar se aata hai to unka munh dekhne ke liye kitne dher manushya jaate hain। yahaan to woh baat nahin। tum jaante ho is duniya mein jo bhi cheejen hain, sab vinaashi hain। unhein nahin dekhna hai। si no evil...yeh kichda to bhasma hone vaala hai। jo bhi kuchh dekhte hain manushya aadi, samajhte hain yeh to sab kaliyugi hain। tum ho sangamayugi brahman। sangamayug ko koi jaante nahin। itna sirf yaad karo - yeh sangamayug hai, ab ghar jaana hai। pavitra bhi zaroor banna hai। ab baap kehte hain yeh kaam vikaar aadi-madhya-ant duhkh dene vaala hai, isko jeeto। vish ke liye dekho kitna tang karte hain। baap kehte hain kaam mahaashatru hai, usko jeetna hai। ab is samay kitne dher manushya hain duniya mein। tum ek-ek ko kahaan tak samjhaayenge। ek ko samjhaate ho to doosra kehta hai jaadu hai, phir padhaai chhod dete hain isliye baap kehte hain aadi sanaatan dharma vaalon ko samjhaao। aadi sanaatan hai hi devta dharma। tum samjhaate ho in lakshmi-naaraayan ne yeh pad kaise paaya? manushya se devta kaise bane? zaroor antim janma hoga। 84 janma poore kar phir yeh bane। jinko service ka shauk hai woh to ismen lage rehte hain। aur sab taraph se moh aadi toot jaata hai। ham in aankhon se jo kuchh dekhte hain inko bhoolna hai। jaise ki dekhte hi nahin hain। si no evil..... । manushya to bandaron ka chitra bana dete hain। samajhte kuchh bhi nahin। bachchiyaan kitni mehnat karti hain। baba unhein aaphreen dete hain, jo samjhaakar laayak banaati hain। prize bhi unhon ko hi milti hai, jo kaam karke dikhaate hain। tum jaante ho baba hamko kitni prize denge। pahla number hai sooryavanshi raajdhaani ki prize। second number hai chandravanshi ki prize। nambarvaar to hote hi hain। bhakti maarga ke shaastra bhi kitne baith banaate hain। ab baap samjhaate hain in shaastra padhne, yagya-tap karne se mere se koi milta nahin hai। din-pratidin kitne paap aatma bante jaate hain। punya aatma koi ban na sake। baap hi aakar punya aatma banaate hain। ek hai had ka daan-punya, doosra hai behad ka। bhakti maarga mein indirect eeshvar arth daan-punya karte hain parantu eeshvar kisko kaha jaata hai yeh jaante hi nahin। abhi tum jaante ho। tum kehte ho ki shivbaaba hi hamko kya se kya banaate hain! bhagwan to ek hi hai। unko phir sarvavyaapi kah diya hai। to unko samjhaana chaahiye ki yeh tum logon ne kya kiya hai। tumhaare paas aate bhi hain, thoda sunkar baahar gaye, khalaas। yahaan ki yahaan rahi। sab bhool jaata hai। tumko kehte hain gyaan bahut achha hai, ham phir aayenge। parantu moh ki ragen tootti nahin hain। moh jeet raaja ki katha kitni achhi hai। mohjeet raaja first class yeh lakshmi-naaraayan hain। parantu manushya samajhte hi nahin। wonder hai। raavan raajya mein seedhi utarte ekdam neeche gir jaate hain। bachchon ka khel hota hai na। oopar jaakar phir neeche girte hain। tumhaara bhi khel bahut sahaj hai। baap kehte hain achhi reeti dhaarna karo। koi chhi-chhi kaam nahin karo।

baap kehte hain main beejroop sat chit aanand swaroop hoon। gyaan ka saagar hoon। ab gyaan ka saagar oopar baitha rahega kya? zaroor kabhi aakar gyaan diya hoga। gyaan kya cheej hai, yeh bhi kisko maaloom nahin hai। ab baap kehte hain main tumko padhaane aata hoon to regular padhna chaahiye। ek din bhi padhaai miss nahin karni chaahiye। koi na koi point zaroor achhi milegi। murli nahin padhenge to zaroor points miss ho jaayengi। athaah points hain। yeh bhi tumko samjhaana hai ki tum bhaaratvaasi aadi sanaatan devi-devta dharma ke the। abhi kitne dher dharma hain। phir history must repeat। yeh chadhne aur utarne ki seedhi hai। jaise jinna ko hukm diya - seedhi utro aur chadho। tum sab jinna ho na। 84 ki seedhi chadhte ho phir utarte ho। kitne dher manushya hain। har ek ko kitna part bajaana hota hai। bachchon ko to bada wonder lagna chaahiye। tumko behad ke naatak ki poori pahchaan mili hai। saare srishti ke aadi-madhya-ant ko abhi tum hi jaante ho। koi bhi manushya nahin jaan sakte hain। satayug mein kiske mukh dvaara koi bhi kuvchan nahin nikalte hain। yahaan to ek-do ko gaali dete rehte hain। yeh hai vishay vaitarni nadi, raurav narka। sabhi manushya raurav narka mein pade hain। yahaan to hai yatha raaja raani tatha praja। tumhaari vijay honi hai ant mein, jab samjhenge aadi sanaatan devi-devta dharma ki sthaapna kisne ki? yahi pahle number ki mukhya baat hai, jo koi nahin jaante।

baap kehte hain main to hoon hi gareeb nivaaz। yeh pichhaadi ko samjhenge, jab tu let ho jaate hain। ab tumko teesra netra mila hai। sweet ghar aur sweet raajaai buddhi mein yaad hai। baap kehte hain ab shantidham-sukhdhaam mein jaana hai। tumne jo part bajaaya ab buddhi mein to aata hai na। aur sab mare pade hain, sivaae tum braahmanon ke। brahman hi khade ho jaayenge। brahman hi so devta bante hain। yeh ek dharma sthaapan ho raha hai। aur dharma kaise sthaapan hote hain, yeh bhi buddhi mein hai। samjhaane vaala ek baap hai। aise baap ko ghadi-ghadi yaad karna chaahiye। dhandha aadi bhal karo sirf pavitra bano। aadi sanaatan devi-devta dharma pavitra tha। ab phir pavitra banna hai। chalte-phirte mujh baap ko yaad karo to tum satopradhaan ban jaayenge। taakat tab aayegi jab satopradhaan banenge। sivaae yaad ki yaatra tum oonch te oonch pad kabhi bhi pa nahin sakte ho। jab satopradhaan tak pahunchenge tab hi paap katenge। yeh hai yog agni - yeh akshar geeta ke hain। yog-yog kah maatha maarte hain। vilaayat se bhi phansaakar le aate hain - yog sikhaane ke liye। ab jab tumhaari baat koi samjhe। paramatma supreme soul to ek hi hai। vahi aakar sabko supreme banaate hain। ek din akhbaar vaale aisi-aisi baaten daalenge। yeh to barobar hai। raajayog sivaae ek parampita paramatma ke aur koi sikhla na sake। aisi baaten bade-bade aksharon mein daalni chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sooryavanshi raajdhaani ki prize lene ke liye baapdaada ki aaphreen leni hai। service karke dikhaana hai। moh ki ragen tod deni hain।

2) gyaan saagar videhi baap svayan padhaane aate hain isliye roz padhna hai। ek din bhi padhaai miss nahin karni hai। baap samaan videhi banne ka purooshaartha karna hai।

vardaan:- apne practical jeevan ke proof dvaara silence ki shakti ka aavaaj phailaane vaale vishesh sevaadhaari bhav

har ek ko silence ki shakti ka anubhav karaana - yeh vishesh seva hai। jaise science ki power naameegraami hai aise silence power naameegraami ho jaae। sabke mukh se aavaaj nikle ki silence power science se bhi oonchi hai। woh din bhi aana hai। silence ke power ki pratyakshata arthaat baap ki pratyakshata। silence power ka practical proof hai aap sabki jeevan। har ek chalte-phirte pees ke model dikhaai den to science vaalon ki najar bhi silence vaalon par jaayegi। aisi seva karo tab kahenge vishesh sevaadhaari।

slogan:- seva aur sthiti ka balance rakho to sarva ki blessing milti rahengi।

maateshvari ji ke anmol mahaavaakya

geet:- nayanheen ko raah dikhaao prabhu ...

ab yeh jo manushya geet gaate hain nayanheen ko raah bataao, to goya raah dikhaane vaala ek hi paramatma thahra, tabhi to paramatma ko bulaate hain aur jis samay kehte hain prabhu raah bataao to zaroor manushyon ko raah dikhaane ke liye khud paramatma ko niraakaar roop se saakaar roop mein avashya aana padega, tabhi to sthool mein raah bataayega, aane bigar raah to bata nahin sakenge। ab manushya jo moonjhe hue hain, un moonjhe hue ko raah chaahiye isliye paramatma ko kehte hain nayanheen ko raah bataao prabhu... isko hi phir khivaiya bhi kaha jaata hai, jo us paar athva in 5 tatvon ki jo bani hui srishti hai isse paar kar us paar arthaat 5 tatvon se paar jo chhattha tatva akhanda jyoti mahtatva hai usmein le chalega। to paramatma bhi jab us paar se is paar aave tabhi to le chalega। to paramatma ko bhi apne dhaam se aana padta hai, tabhi to paramatma ko khivaiya kehte hain। vahi ham boat ko (aatma roopi naanv ko) paar le chalta hai। ab jo paramatma ke saath yog rakhta hai unko saath le jaayega। baaki jo bach jaayenge ve dharmaraaj ki sajaayen khaakar baad mein mukta hote hain।

jab sabhi manushya ati duhkhi hote hain to paramatma ko yaad karte hain, paramatma is kaanton ki duniya se le chal phoolon ki chhaanv mein, isse siddha hai ki zaroor vo bhi koi duniya hai। ab yeh to sabhi manushya jaante hain ki ab ka jo sansaar hai vo kaanton se bhara hua hai। jis kaaran manushya duhkh aur ashaanti ko praapta kar rahe hain aur yaad phir phoolon ki duniya ko karte hain। to zaroor vo bhi koi duniya hogi jis duniya ke sanskaar aatma mein bhare hue hain। ab yeh to ham jaante hain ki duhkh ashaanti yeh sab karmabandhan ka hisaab kitaab hai। raaja se lekar rank tak har ek manushya maatra is hisaab mein poore jakde hue hain isliye paramatma to khud kehta hai ab ka sansaar kaliyug hai, to vo saara karmabandhan ka bana hua hai aur aage ka sansaar satayug tha jisko phoolon ki duniya kehte hain। ab vo hai karmabandhan se rahit jeevanmukta devi devtaaon ka raajya, jo ab nahin hai। ab yeh jo ham jeevanmukta kehte hain, to iska matlab yeh nahin ki ham koi deh se mukta the, unhon ko koi deh ka bhaan nahin tha, magar vo deh mein hote hue bhi duhkh ko praapta nahin karte the, goya vahaan koi bhi karmabandhan ka maamla nahin hai। vo jeevan lete, jeevan chhodte aadi madhya ant sukh ko praapta karte the। to jeevanmukti ka matlab hai jeevan hote karmaateet, ab yeh saari duniya 5 vikaaron mein poori jakdi hui hai, maano 5 vikaaron ka poora poora vaas hai, parantu manushya mein itni taakat nahin hai jo in 5 bhooton ko jeet sake, tab hi paramatma khud aakar humein 5 bhooton se chhudaate hain aur bhavishya praalabdha devi devta pad praapta karaate hain। achha - om shanti।