Murli du jour du dimanche 24 mars 2024

24-03-24 praatahmurli om shanti ''avyakt-baapdaada'' revise 13-03-98 madhuban

holi shabd ke arth swaroop mein sthit hona arthaat baap samaan banna

aaj baapdaada apne holiest, highest aur richest in di world bachchon ko chaaron taraph dekh rahe hain। chaahe saakaar mein sammukh hain, chaahe door baithe dil se sameep hain - chaaron or ke bachchon ko dekh harshit hote rehte hain। har ek bachcha aisa holiest banta hai jo saare kalpa mein aur koi bhi aisa mahaan pavitra aatma na bana hai, na ban sakte hain। samay prati samay dharma aatmaayen, mahaan aatmaayen, pavitra rahe hain lekin unhon ki pavitrata aur aapki pavitrata mein antar hai। is samay aap pavitra bante ho, isi pavitrata ki praapti va praalabdha bhavishya anek janma tak tan-man-dhan, sambandh, samparka aur saath mein aatma bhi pavitra hai। shareer bhi pavitra ho aur aatma bhi pavitra ho - aisi pavitrata aap aatmaayen praapta karti ho। man-vachan-karma teenon hi pavitra banne se aisi praalabdha praapta hoti hai। to aise holiest aatmaayen ho। apne ko aise shreshtha holiest aatmaayen samajhte ho? abhi bane hain va ban rahe hain? banna sahaj hai ya thoda-thoda mushkil hai? lekin kalpa pahle bhi bane hain aur ab bhi banna hi hai। pakka ya thoda-thoda chalta hai? nahin। svapna maatra bhi apvitrata samaapta honi hi hai, itna nishchay hai na ki aaj ban rahe hain aur kal ban hi jaayenge। to holiest bhi hain aur highest bhi hain।

oonche te oonche baap ke bachche oonche te oonche hain। highest bante ho tab pooje jaate ho। chaahe aajkal ki highest aatmaayen, sakaami raaje the, ab to nahin hain। chaahe president ho, chaahe prime minister ho lekin woh poojya nahin bante hain। aap poojya banne vaali aatmaon ke aage pujaari ban naman aur poojan karte hain। abhi bhi sva-raajya adhikaari bante ho aur bhavishya mein bhi raajaaon ke raaje bante ho। to aisa highest pad praapta karte ho। saath mein richest in di world ho। aapka title hi hai padmaapadmapti। aur aisa khajaana hai jo arbapti, kharbapti, arab-kharab se bhi aisa khajaana praapta nahin kar sakte। aap shreshtha aatmaayen baap dvaara aisa bhaagya bana rahe ho jo anubhav karte ho aur varnan bhi karte ho ki hamaare kadam mein padam hain। kadam mein padam hain ya sau hain, hajaar hain? aisa koi bade se bada millionaire bhi itni kamaai nahin kar sakta। kadam mein kitna time lagega? kadam uthaao, kitna samay lagta hai? second। chalo do second kah do। agar do second bhi kaho to do second mein padam, to saare din mein kitne padam hue? hisaab karo। aisa koi millionaire hai jo ek din mein itni kamaai kare? aisa koi hoga? to richest in di world ho na! aur aapka aisa khajaana hai jo aag bhi nahin jala sakti, paani dubo nahin sakta, chor loot nahin sakta, raaja bhi kha nahin sakte। aisa khajaana is purushottam sangamayug mein hi praapta karte ho। to apna aisa svamaan smriti mein rehta hai? haan ya na? peechhe vaale haath hila rahe hain। peechhe vaale aaraam se baithe ho na? richest in di world ho to aaraam hi aaraam hai। bade se badi university mein bhi aise couch par padhaai padhne ke liye nahin baithte hain, lekin aap beggar tu prince ho। beggar bhi ho aur prince bhi ho। sarva tyaag maana beggar। sarva praaptiyaan arthaat prince। bina tyaag ke itna bada bhaagya nahin milta hai। tyaag ka hi bhaagya mila hai। tan-man-dhan, sambandh sabhi tyaag kiya arthaat parivartan kiya। tan mera ke bajaae tera kiya। man, dhan, sambandh ek shabd parivartan hone se mere ke bajaae tera kiya, hai ek shabd ka parivartan lekin isi tyaag se bhaagya ke adhikaari ban gaye। to bhaagya ke aage yeh tyaag kya hai? chhoti baat hai ya thodi badi bhi hai? kabhi-kabhi badi ho jaati hai। tera kehna maana badi baat ko chhota karna aur mera kehna maana chhoti baat ko badi karna। kya bhi ho jaae, 100 himaalay se bhi badi samasya aa jaae lekin tera kehna aur pahaad ko rooi banaana, raai bhi nahin, rui। jo rooi second mein ud jaae। sirf tera kehna nahin maanna, sirf maanna bhi nahin chalna। ek shabd ka parivartan sahaj hi hai na! aur faayda hi hai, nuksaan to hai nahin। tera kahne se saara bojh baap ko de diya। tera tum hi jaanon। aap sirf nimitta-maatra ho। ismen faayda hai na? nyaare aur paramatma ke pyaare ban gaye। jo paramatma ke pyaare bante hain woh vishwa ke pyaare bante hain। sirf bhavishya praapti nahin hai, vartamaan bhi hai। ek second mein anubhav kiya bhi hai aur karke dekho। koi bhi baat aa jaae tera kah do, maan jaao aur tera samajhkar karo to dekho bojh halka hota hai ya nahin hota hai। anubhav hai na? sabhi anubhvi baithe ho na! sirf kya hota hai, mera mera kahne ki bahut aadat hai na, 63 janmon ki aadat hai to tera tera kahkar phir mera kah dete ho aur mera maana gaye, phir woh baat to ek ghante mein, do ghante mein, ek din mein khatma ho jaati hai lekin jo tere se mera kiya uska phal lamba chalta hai। baat aadhe ghante ki hogi lekin chaahe pashchaataap ke roop mein, chaahe parivartan karne ke lakshya se, woh baat baar-baar smriti mein aati rehti hai isliye baap sabhi bachchon ko kehte hain agar “mera shabd'' se pyaar hai, aadat hai, sanskaar hai, kehna hi hai to mera baba kaho। aadat se majboor hote hain na। to jab bhi mera-mera aave to mera baba kahkar khatma kar do। anek mere ko ek mera baba mein sama do।

Russia vaale ek doll laate hain na, to doll mein doll… ek doll ho jaati hai। aise aap bhi ek mera baba mein anek mera sama do, khatma। yeh kar sakte ho? karte ho lekin kabhi-kabhi mere ke vistaar mein chale jaate ho। abhi kabhi-kabhi hai, sada mera, tera ho jaae usmein nambarvaar hain। number one bhi hain, A one bhi hain lekin phir bhi peechhe ke number bhi hain। to holi manaane aaye ho na? to yahi mantra yaad karo main baap ki ho li, ban gaye। parmaatma parivaar ki ho li arthaat ho gai। to aisi holi manaai? abhi kya karna hai? abhi jalaana hai ya jala diya? ismen haan nahin kehte, soch rahe hain?

dekho, bhakti maarga mein jo bhi utsav manaate hain, yaadgaar hain lekin kuchh-kuchh arth se bane hue hain। pahle jalaana hai phir manaana hai। pahle manaana phir jalaana nahin। pahle bhasma karo, ashuddhi ko, kamjori ko, buraai ko jalaao phir manaao। to aapne to bahut pahle jala diya na ya abhi bhi thoda sa dupatte ka kona rah gaya hai? paandavon ke bushirt ya jo chola pahante hain uska kuchh kona rah gaya ho? saadi ka kona to nahin rah gaya? vaastav mein dekho aatmik manaana aur us manaane se shakti, ateendriy sukh ka anubhav karna, woh tabhi kar sakte hain jab pahle jalaaya hai। manoranjan ke roop se manaana woh alag cheez hai। woh to sangamayug hai maujon ka yug, isliye manoranjan ki reeti se bhi manaate ho aur manaao, khoob manaao। lekin parmaatma rang mein rang jaana arthaat baap samaan ban jaana। yeh hai rang mein rang jaana। jaise baap ashareeri hai, avyakt hai vaise ashareeri pan ka anubhav karna va avyakt pharishte pan ka anubhav karna - yeh hai rang mein rang jaana। karma karo lekin avyakt pharishta banke kaam karo। ashreereepan ki sthiti ka jab chaaho tab anubhav karo। aise man aur buddhi aapke control mein ho। order karo - ashareeri ban jaao। order kiya aur hua। pharishte ban jaayen। jaise man ko jahaan jis sthiti mein sthit karne chaaho vahaan second mein sthit ho jaao। aise nahin jyaada time nahin laga, 5 second lag gaye, 2 second lag gaye। order mein to nahin hua, control mein to nahin raha। kaisi bhi paristhiti ho, halchal ho lekin halchal mein achal ho jaao। aise controlling power hai? ya sochte-sochte ashareeri ho jaaoon, ashareeri ho jaaoon, usmein hi time chala jaayega? kai bachche bahut bhinna-bhinna pose badalte rehte, baap dekhte rehte। sochte hain ashareeri banen phir sochte hain ashareeri maana aatma roop mein sthit hona, haan main hoon to aatma, shareer to hoon hi nahin, aatma hi hoon। main aai hi aatma thi, banna bhi aatma hai… abhi is soch mein ashareeri hue ya ashareeri banne ki yuddha ki? aapne man ko order kiya second mein ashareeri ho jaao, yeh to nahin kaha socho - ashareeri kya hai? kab banenge, kaise banenge? order to nahin maana na! controlling power to nahin hui na! abhi samay pramaan isi practice ki aavashyakta hai। agar controlling power nahin hai to kai paristhitiyaan halchal mein le aa sakti hain isliye ek holi shabd hi yaad karo to bhi theek hai। holi - beeti so beeti aur ho li baap ki ban gai। aur kya ban gai? holi arthaat pavitra aatma ban gai। ek shabd holi yaad karo to ek holi shabd ke teen arth use karo, varnan nahin karo, haan holi maana beeti so beeti। haan beeti so beeti hai - aise nahin sochte raho, varnan karte raho, nahin। arth swaroop mein sthit ho jaao। socha aur hua। aise nahin socha to soch mein hi pade raho। nahin। jo socha woh ho gaya, ban gaye, sthit ho gaye।

(baapdaada ne drill karaai)

abhi samay ke pramaan aap har nimitta bani hui, sada yaad aur seva mein rahne vaali aatmaon ko sva parivartan dvaara vishwa parivartan ka vibration powerful aur teevragti ka badhaana hai। chaaron or man ka duhkh aur ashaanti, man ki pareshaaniyaan bahut teevragti se badh rahi hain। baapdaada ko vishwa ki aatmaon ke oopar raham aata hai। to jitna teevragti se duhkh hi lahar badh rahi hai utna hi aap sukh daata ke bachche apne mansa shakti se, mansa seva va sakaash ki seva se, vritti se chaaron or sukh ki anchali ka anubhav karaao। baap ko to pukaarte hi hain lekin aap poojya dev aatmaon ko bhi kisi na kisi roop se pukaarte rehte hain। to he dev aatmaayen, poojya aatmaayen apne bhakta aatmaon ko sakaash do। science vaale bhi sochte hain aisi invention nikaalen jo duhkh samaapta ho jaae, saadhan sukh ke saath duhkh bhi deta hai lekin duhkh na ho, sirf sukh ki praapti ho uska sochte zaroor hain। lekin svayan ki aatma mein avinaashi sukh ka anubhav nahin hai to doosron ko kaise de sakte hain। lekin aap sabke paas sukh ka, shanti ka, nihsvaartha sachche pyaar ka stock jama hai। jama hai ya jitna ikattha karte ho utna kharcha ho jaata hai? yeh bhi check karo jama to hota hai lekin jama ke saath-saath kharcha bhi to nahin ho jaata? gyaan ke khajaane to kharcha karne se badhte hain, kam nahin hote। agar baar-baar apne hi svabhaav-sanskaar va maaya ki taraph se aai hui samasyaaon mein apni shaktiyaan use karte ho to jama ka khaata kam hota hai। to check karo - jama kiya lekin kharcha bhi kiya baaki account kitna raha? kamaaya aur khaaya, aisa to nahin hai? do din kamaaya aur ek din itna hi ganvaaya jo jama kiya hua bhi kharcha karna pada। aisa account to nahin hai? aise hi kamaaya aur khaaya va apne prati hi lagaakar khatma kiya to 21 janma ke liye jama kya kiya? jama ki to khushi hoti hai lekin kharcha ka hisaab nahin nikaala to samay par dhokha mil jaayega। jama ka khaata bhi dekho lekin saath-saath apne prati kharcha kitna kiya। doosre ko koi gun diya, shakti di, gyaan ka khajaana diya woh kharcha nahin hai, woh jama ke khaate mein jama hota hai lekin apne prati samay prati samay kharcha kiya to khaata khaali ho jaata hai, iseelie achhe vishaal buddhi se checking karo। jama ka khaata bahut lamba chauda chaahiye। hai sahaj agar har kadam mein padam jama karte jaao to jama ka account bahut bada ho jaayega। to check karo ki har karma va kadam brahma baap samaan raha? anubhvi ho, jab koi achha karma karte ho to karma ka phal usi samay pratyaksha roop mein khushi, shakti aur saphalta ke kaaran double light rehte ho kyonki yaad rehta hai baap ke saath se karma kiya। aur agar abhi koi vikarma hota hai to uska pashchaataap bahut lamba hai। vaise abhi vikarma to koi hona nahin chaahiye, woh to time abhi beet gaya, lekin abhi koi vyartha sankalp va vyartha karma, vyartha bol, vyartha sambandh-samparka bhi na ho kyonki vyartha sambandh-samparka bhi bahut dhokha deta hai। jaisa sang vaisa rang lag jaata hai। kai bachche bade chatur hain kehte hain ham to sang nahin karte, lekin woh mere ko nahin chhodte, main nahin karti, woh nahin chhodte। to kya kinaara karna nahin aata? agar koi buri cheez de to aap lete kyon ho! lene vaala nahin lega to dene vaala kya karega? iseelie vyartha sambandh aur samparka bhi account khaali kar deta hai। aur usi samay andar dil mein aata bhi hai, dil khaata hai - yeh karna nahin chaahiye। karna nahin chaahiye phir bhi kar lete hain। sunna nahin chaahiye lekin suna diya to kya karoon! lekin agar purushaarthi ho to vyartha karma bhi na ho। albele ho to baat hi chhodo, phir to aaraam se so jaao, treta mein aa jaana। lekin agar purushaartha hai to usi samay dil mein aata hai, dil khaata hai ki yeh nahin karna chaahiye phir bhi karte hain to baapdaada to kahenge ki aise bachchon ki bhi kamaal hai। na chaahte bhi karte rehte hain, dil khaata rehta hai aur sunte bhi rehte, karte bhi rehte, to bahut powerful aatmaayen hain! isliye vyartha ke oopar bhi checking attention se karo। achha।

chaaron or ki holiest aatmaayen, sada highest sthiti mein sthit rahne vaali highest aatmaayen, sada sarva khajaanon se sampanna richest aatmaayen, sada har kadam mein padam jama karne vaali, baap samaan banne vaali shreshtha aatmaayen, sada merciful, kshama ke saagar bachche master kshama karne vaali aatmaayen, vishwa ke duhkhi aatmaon ko sakaash dvaara sukh-shanti ki anchali dene vaali aatmaayen, har samay apne jama ke khaate mein bharpoor rahne vaale ati teevra purushaarthi aatmaon ko baapdaada ka yaadapyaar aur namaste।

vardaan:- holi shabd ke arth ko jeevan mein laakar purushaartha ki speed ko tej karne vaale teevra purushaarthi bhav

ho li arthaat jo baat ho gai, beet gai usko bilkul khatma kar dena। beeti ko beeti kar aage badhna yahi hai holi manaana। beeti hui baat aise mahsoos ho jaise bahut puraani koi janma ki baat hai, jab aisi sthiti ho jaati hai tab purushaartha ki speed tej hoti hai। to apni ya doosron ki beeti hui baaton ko kabhi chintan mein nahin laana, chitta par nahin rakhna aur varnan to kabhi nahin karna, tab hi teevra purushaarthi ban sakenge।

slogan:- mere pan ke anek rishton ko samaapta karna hi pharishta banna hai।