Murli du jour du mardi 23 avril 2024

23-04-2024 praatahmurli om shanti "baapdaada"' madhuban

“meethe bachche - baap jo shikshaayen dete hain, unhein amal mein laao, tumhein pratigya kar apne vachan se phirna nahin hai, aagya ka ullanghan nahin karna hai''

prashn:- tumhaari padhaai ka saar kya hai? tumhein kaun-sa abhyaas avashya karna hai?

uttar:- tumhaari padhaai hai vaanaprastha mein jaane ki। is padhaai ka saar hai vaani se pare jaana। baap hi sabko vaapas le jaate hain। tum bachchon ko ghar jaane ke pahle satopradhaan banna hai। iske liye ekaanta mein jaakar dehi-abhimaani rahne ka abhyaas karo। ashareeri banne ka abhyaas hi aatma ko satopradhaan banaayega।

om shanti। apne ko aatma samajh baba ko yaad karne se tum tamopradhaan se satopradhaan ban jaayenge aur phir aise vishwa ke maalik ban jaayenge। kalpa-kalpa tum aise hi tamopradhaan se satopradhaan bante ho phir 84 janmon mein tamopradhaan bante ho। phir baap shiksha dete hain, apne ko aatma samajh baap ko yaad karo। bhakti maarga mein bhi tum yaad karte the, parantu us samay moti buddhi ka gyaan tha। ab maheen buddhi ka gyaan hai। practical mein baap ko yaad karna hai। yeh bhi samjhaana hai - aatma bhi star misal hai, baap bhi star misal hai। sirf woh punarjanma nahin lete hain, tum lete ho isliye tumko tamopradhaan banna padta hai। phir satopradhaan banne ke liye mehnat karni pade। maaya ghadi-ghadi bhula deti hai। ab abhul banna hai, bhool nahin karni hai। agar bhoolen karte rahenge to tum aur bhi tamopradhaan ban jaayenge। direction milta hai apne ko aatma samajh baap ko yaad karo, battery ko charge karo to tum satopradhaan vishwa ke maalik ban jaayenge। teacher to sabko padhaate hain। student mein nambarvaar paas hote hain। nambarvaar phir kamaai karte hain। tum bhi nambarvaar paas hote ho phir nambarvaar martaba paate ho। kahaan vishwa ke maalik, kahaan praja daas-daasiyaan। jo student achhe, sapoot, aagyaakaari, vaphaadaar, farmaanbardaar hote hain woh zaroor teacher ki mat par chalenge। jitna register achha hoga utni marks jaasti milengi isliye baap bhi bachchon ko baar-baar samjhaate hain, gaphlat na karo। aise mat samjho kalpa pahle bhi fail hue the। bahuton ko yeh dil mein aata hoga ki ham service nahin karte hain to zaroor fail honge। baap to saavdhaani dete rehte hain, tum satayugi satopradhaan se kaliyugi tamopradhaan bane ho phir world ki history-geography repeat hogi। satopradhaan banne liye baap bahut sahaj raasta bataate hain - mujhe yaad karo to vikarma vinaash honge। tum chadhte-chadhte satopradhaan ban jaayenge। chadhenge dheere-dheere isliye bhoolo mat। parantu maaya bhula deti hai। naapharmaanbardaar bana deti hai। baap jo direction dete hain, woh maante hain, pratigya karte hain phir us par chalte nahin hain। to baap kahenge aagya ka ullanghan kar apne vachan se phirne vaale hain। baap se pratigya kar phir amal kiya jaata hai। behad ka baap jaisi shikshaaen dete hain aisi shikshaaen aur koi denge nahin। change bhi zaroor hona hai। chitra kitna achha hai। brahmaavanshi ho phir vishnuvanshi banenge। yeh hai nai eeshvareey bhaasha, inko bhi samajhna padta hai। yeh roohaani knowledge koi dete nahin। koi sanstha nikli hai jinhonne roohaani sanstha naam rakha hai। parantu roohaani sanstha tumhaare bigar koi ho na sake। imitation bahut ho jaati hai। yeh hai nai baat, tum bilkul thode ho aur koi yeh baaten samajh na sake। saara jhaad ab khada hai। baaki thur nahin hai, phir thur khada ho jaata hai। baaki taal-taaliyaan nahin rahenge, woh sab khatma ho jaayenge। behad ka baap hi behad ki samjhaani dete hain। ab saari duniya par raavan raajya hai। yeh lanka hai। woh lanka to samudra ke paar hai। behad ki duniya bhi samudra par hai। chaaron taraph paani hai। woh had ki baaten, baap behad ki baaten samjhaate hain। ek hi baap samjhaane vaala hai। yeh padhaai hai। jab naukri mile, padhaai ki result nikle tab tak padhaai mein lage rehte hain। usmein hi buddhi chalti hai। student ka kaam hai padhaai mein attention dena। uthte, baithte, chalte, phirte yaad karna hai। student ki buddhi mein yeh padhaai rehti hai। imtahaan ke dinon mein bahut mehnat karte hain ki kahaan naapaas na ho jaayen। khaas savere bageeche mein jaakar padhte hain kyonki ghar ke shor ke vibrations gande hote hain।

baap ne samjhaaya hai dehi-abhimaani hone ka abhyaas daalo phir bhoolenge nahin। ekaanta ke sthaan to bahut hain। shuru-shuru mein class poora kar tum sab pahaadon par chale jaate the। ab din-pratidin knowledge deep hoti jaati hai। student ko em object yaad rehti hai। yeh hai vaanaprastha avastha mein jaane ki padhaai। sivaae ek ke aur koi padha na sake। saadhu santa aadi sab bhakti hi sikhlaate hain। vaani se pare jaane ka raasta ek baap hi batlaate hain। ek baap hi sabko vaapis le jaate hain। ab tumhaari hai behad ki vaanaprastha avastha, jisko koi bhi nahin jaante hain। baap kehte hain - bachche, tum sab vaanaprasthi ho। saari duniya ki vaanaprastha avastha hai। koi padhe va na padhe, vaapis sabko jaana hai। jo bhi aatmaayen mool vatan mein jaayengi, woh apne-apne section mein chali jaayengi। aatmaon ka jhaad bhi wonderful bana hua hai। yeh saara drama ka chakra bilkul accurate hai। jara bhi farka nahin। lever aur cylinder ghadi hoti hai na। lever ghadi bilkul accurate rehti hai। ismen bhi kinka buddhiyog lever rehta hai, kinka cylinder rehta hai। koi ka bilkul lagta hi nahin hai। ghadi jaise ki chalti hi nahin hai। tumko bilkul lever ghadi banna hai to raajaai mein jaayenge। cylinder praja mein jaayenge। purushaartha lever banne ka karna hai। raajaai pad paane vaalon ke liye hi koton mein koi kaha jaata hai। vahi vijay maala mein piro jaate hain। bachche samajhte hain - mehnat barobar hai। kehte hain baba ghadi-ghadi bhool jaate hain। baba samjhaate hain - bachche, jitna pahalvaan banenge to maaya bhi jabardasta ladegi। malla yuddha hoti hai na। usmein badi sambhaal rakhte hain। pahalvaanon ko pahalvaan jaante hain। yahaan bhi aise hai, mahaaveer bachche bhi hain। unmein bhi nambarvaar hain। achhe-achhe mahaarthiyon ko maaya bhi achhi tarah toophaan mein laati hai। baba ne samjhaaya hai - maaya kitna bhi hairaan kare, toophaan laaye, tum khabardaar rehna। koi baat mein haarna nahin। mansa mein toophaan bhal aayen, karmendriyon se nahin karna hai। toophaan aate hain giraane ke liye। maaya ki ladaai na ho to pahalvaan kaise kahenge। maaya ke toophaanon ki parvaah nahin karni chaahiye। parantu chalte-chalte karmendriyon ke vash ho jhat gir padte hain। yeh baap to roz samjhaate hain - karmendriyon se vikarma nahin karna। bekaayde kaam karna chhodenge nahin to paai paise ka pad paayenge। andar khud bhi samajhte hain, ham naapaas ho jaayenge। jaana to sabko hai। baap kehte hain - mere ko yaad karte ho to woh yaad bhi vinaash ko nahin paati hai। thoda bhi yaad karne se svarga mein aa jaayenge। thoda yaad karne se athva bahut yaad karne se kya-kya pad milenge, yeh bhi tum samajh sakte ho। koi bhi chhip nahin sakte। kaun kya-kya banenge। khud bhi samajh sakte hain। agar ham abhi heartfail ho jaayen to kis pad ko paayenge? baba se poochh bhi sakte hain। aage chalkar aapehi samajhte jaayenge। vinaash saamne khada hai, toophaan, barsaat, natural calamities poochh kar nahin aati hain। raavan to baitha hi hai। yeh bahut bada imtahaan hai। jo paas hote hain woh oonch pad paate hain। raajaayen zaroor samajhdaar chaahiye jo raiyat (praja) ko sambhaal saken। aai.si.S. imtahaan mein thode paas hote hain। baap tumko padhaakar svarga ka maalik satopradhaan banaate hain। tum jaante ho satopradhaan se phir tamopradhaan banen, ab baap ki yaad se satopradhaan banna hai। patit-paavan baap ko yaad karna hai। baap kehte hain manmanaabhav। yeh hai vahi geeta ka episode। double sirtaaj banne ki hi geeta hai। banaayenge to baap na। tumhaari buddhi mein saari knowledge hai। jo achhe buddhivaan hain, unke paas dhaarna bhi achhi hoti hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

raatri class - 5-1-69

bachche yahaan class mein baithe hain aur jaante hain hamaara teacher kaun hain। abhi yahi yaad ki hamaara teacher kaun hai student ko saara samay rehti hai। yahaan bhool jaate hain। teacher jaante hain bachche mujhe ghadi-ghadi bhool jaate hain। aisa roohaani baap to kab mila nahin। sangamayug par hi milta hai। satayug aur kaliyug mein to jismaani baap milte hain। yeh yaad dilaate hain ki bachchon ko pakka ho jaaye ki yeh sangamayug hai, jismen ham bachche aise purushottam banne vaale hain। to baap ko yaad karne se teenon hi yaad aane chaahiye। teacher ko yaad karo to bhi teenon yaad, guru ko yaad karo to bhi teenon yaad aani chaahiye। yeh zaroor yaad karna padta hai। mukhya baat hai pavitra banne ki। pavitra ko satopradhaan hi kaha jaata hai। woh rehte hi hain satayug mein। abhi chakra lagaakar aaye hain। sangamayug hai। kalpa-kalpa baap bhi aate hain, padhaate hain। baap ke paas tum rehte ho na। yeh bhi jaante ho yeh sachcha sadguru hai। aur barobar mukti-jeevanmukti dhaam ka raasta bataate hain। drama plan anusaar ham purushaartha kar baap ko follow karte hain। yahaan shiksha paakar follow karte hain। jaise yeh seekhte hain vaise tum bachche bhi purushaartha karte ho। devta banna hai to shuddh karma karna hai। gandagi koi bhi na rahe। aur bahut khaas baat hai baap ko yaad karne ki। samajhte hain baap ko bhool jaate hain, shiksha ko bhi bhool jaate hain aur yaad ki yaatra ko bhi bhool jaate hain। baap ko bhoolne se gyaan bhi bhool jaata hai। main student hoon, yeh bhi bhool jaata hai। yaad to teenon padni chaahiye। baap ko yaad kare to teacher, sadguru zaroor yaad padenge। shivbaaba ko yaad karte hain to saath-saath daiveegun bhi zaroor chaahiye। baap ki yaad mein hai karaamat। karaamat jitni baap bachchon ko sikhlaate hain utni aur koi sikhla na sake। tamopradhaan se ham isi janma mein satopradhaan bante hain। tamopradhaan banne mein poora kalpa lagta hai। abhi is ek hi janma mein satopradhaan banna hai, ismen jo jitni mehnat karenge। saari duniya to mehnat nahin karti hai। doosre dharma vaale mehnat nahin karenge। bachchon ne saakshaatkaar kiya hai। dharma sthaapak aate hain। part bajaaya hua hai phalaani-phalaani dress mein। tamopradhaan mein woh aate hain। samajh bhi kehti hai jaise ham satopradhaan bante hain aur sabhi bhi banenge। pavitrata ka daan baap se lenge। sabhi bulaate hain hamko yahaan se liberate kar ghar le chalo। guide bano। yeh to drama plan anusaar sabhi ko ghar jaana hi hai। anek baar ghar jaate hain। koi to poore 5000 varsha ghar mein nahin rehte। koi to poore 5000 varsha rehte hain। ant mein aayenge to kahenge 4999 varsha shantidham mein rahe hain। ham kahenge 4999 varsha is srishti par rahe hain। yeh to bachchon ko nishchay hai 83-84 janma liye hain। jo bahut hoshiyaar honge woh zaroor pahle aaye honge। achha - meethe-meethe roohaani bachchon prati yaadapyaar aur good night।

dhaarna ke liye mukhya saar:-

1) satopradhaan banne ke liye yaad ki yaatra se apni battery charge karni hai। abhul banna hai। apna register achha rakhna hai। koi bhi gaphlat nahin karni hai।

2) koi bhi bekaayde karma nahin karna hai, maaya ke toophaanon ki parvaah na kar, karmendriy jeet banna hai। lever-ghadi samaan accurate purushaartha karna hai।

vardaan:- seva dvaara khushi, shakti aur sarva ki aasheervaad praapta karne vaali punya aatma bhav

seva ka pratyakshaphal - khushi aur shakti milti hai। seva karte aatmaon ko baap ke varse ka adhikaari bana dena - yeh punya ka kaam hai। jo punya karta hai usko aasheervaad zaroor milti hai। sabhi aatmaon ke dil mein jo khushi ke sankalp paida hote, woh shubh sankalp aasheervaad ban jaate hain aur bhavishya bhi jama ho jaata hai isliye sada apne ko sevaadhaari samajh seva ka avinaashi phal khushi aur shakti sada lete raho।

slogan:- mansa-vaacha ki shakti se vighna ka parda hata do to andar kalyaan ka drishya dikhaai de।