Murli du jour du mercredi 8 mai 2024

08-05-2024 praatahmurli om shanti "baapdaada"' madhuban

“meethe bachche - vishwa ki sabhi aatmaayen anjaan aur duhkhi hain, aap un par upkaar karo, baap ka parichay dekar khushi mein laao, unki aankhe kholo''

prashn:- kisi bhi centre ki vriddhi ka aadhaar kya hai?

uttar:- nihsvaartha sachche dil ki seva। tumhein service ka sada shauk rahe to hundi bharti rahegi। jahaan par service ho sakti hai vahaan prabandha karna chaahiye। maangana kisi se bhi nahin hai। maangane se marna bhala। aapehi sab kuchh aayega। tum baahar vaalon ki tarah chanda ikattha nahin kar sakte। maangane se centre zor nahin bharega isliye bigar maange centre ko jamaao।

om shanti। roohaani bachche yahaan baithe hain, buddhi mein yeh gyaan hai, kaise shuru mein ham oopar se aate hain। jaise vishnu avatran ka ek khel dikhlaate hain। vimaan par baithkar phir neeche aate hain। abhi tum bachche samajhte ho avtaar aadi jo kuchh dikhlaate hain woh sab wrong hain। abhi tum samajhte ho - ham aatmaayen asul mein kahaan ke rahne vaale hain, kaise oopar se phir yahaan aate hain, kaise 84 janmon ka part bajaate patit bante hain? abhi phir baap pavitra banaate hain। yeh to zaroor tum students ki buddhi mein hona chaahiye, 84 ka chakra ham kaise lagaate hain? yeh smriti mein rehna chaahiye। baap hi samjhaate hain - tum kaise 84 janma lete ho। kalpa ki aayu ko lamba-chauda time dene kaaran itni sahaj baat bhi manushya samajhte nahin, isliye blind faith kaha jaata hai। jo bhi aur dharma hain woh kaise sthaapan hote hain, yeh bhi tumhaari buddhi mein hai। tum jaante ho punarjanma lete-lete, part bajaate-bajaate abhi ant mein aakar pahunche hain। ab phir vaapis jaate hain। yeh knowledge tum bachchon ko hi hai। duniya mein aur koi bhi yeh knowledge nahin jaante hain। kehte bhi hain 5 hazaar varsha pahle paradise tha। parantu woh kya tha, yeh nahin jaante hain। zaroor aadi sanaatan devi-devtaaon ka raajya tha। parantu yeh bilkul nahin jaante। tum samajhte ho ham bhi pahle kuchh nahin jaante the। aur dharma vaale aise thode hi hain ki apne dharma sthaapak ko nahin jaante। tum abhi jaankaar, knowledgeful bane ho। baaki saari duniya anjaan hai। ham kitne samajhdaar bane the, phir ab besmajh anjaan ho gaye hain। manushya hokar athva actors hokar ham nahin jaante the। knowledge ka prabhaav dekho kaisa hai! yeh tum hi jaante ho। to bachchon ko andar mein kitna gadgad hona chaahiye। jab dhaarna ho tab hi andar mein woh khushi aaye। tum jaante ho ham shuru-shuru mein kaise aaye phir kaise shoodra kul se brahman kul mein transfer hue। yeh srishti ka chakra kaise phirta hai, so tumhaare sivaae duniya mein koi bhi jaanta nahin hai। andar mein yeh gyaan dance hona chaahiye। baba hamko kitni wonderful knowledge dete hain, jis knowledge se ham apna varsa paate hain। likha hua bhi hai is raajayog se main tumko raajaaon ka raaja banaata hoon। parantu kuchh samajh mein nahin aata tha। abhi buddhi mein saara raaz aa gaya hai। ham shoodra se ab so brahman bante hain। yeh mantra bhi buddhi mein hai। ham so brahman phir devta banenge phir ham utarte-utarte neeche aate hain। kitna punarjanma lete chakra lagaate hain। yeh knowledge buddhi mein rahne kaaran khushi bhi rahni chaahiye। auron ko bhi yeh knowledge kaise mile? kitne khyaalaat chalte rehte hain। kaise sabko baap ka parichay den? tum brahman kitna upkaar karte ho। baap bhi upkaar karte hain na। jo bilkul hi anjaan hain, unhon ko sada sukhi banaayen। aankhe kholen। khushi hoti hai na। jinko service ka shauk rehta hai unhon ko andar mein aana chaahiye, bahut khushi honi chaahiye। ham aatmaayen kahaan ki rahne vaali hain, phir kaise aati hain part bajaane? kitne oonch bante hain phir kaise neeche aate hain phir raavan raajya kab shuru hota hai? yeh abhi buddhi mein aaya hai।

bhakti aur gyaan mein raat-din ka farka hai। shuru se bhakti kisne ki hai? tum kahenge pahle-pahle ham aaye to bahut sukh dekha phir ham bhakti karne lage। poojya aur pujaari mein kitna raat-din ka farka hai। tumhaare paas abhi kitna gyaan hai। khushi honi chaahiye na। kaise hamne 84 ka chakra lagaaya hai। kahaan 84 janma, kahaan 84 laakh! itni chhoti-si baat bhi kiske dhyaan mein nahin aati hai। laakhon varsha ki bhent mein to yeh ek-do roz ke baraabar ho jaata hai। achhe-achhe bachchon ki buddhi mein yeh chakra phirta rehta hai, tab hi kaha jaata hai svadarshan chakradhaari। satayug mein yeh knowledge hoti nahin। svarga ka kitna gaayan hai। vahaan sirf bhaarat hi tha। jo tha woh phir banna hi hai। baahar se to dekhne mein kuchh nahin aata hai। saakshaatkaar hota hai। tum jaante ho yeh puraani duniya ab khatma honi hai phir nambarvaar ham nai duniya mein aayenge। aatmaayen kaise aati hain part bajaane, woh bhi tum samajh gaye ho। aatmaayen aise koi oopar se utarti nahin hain, jaise naatak mein dikhaate hain। aatma ko to in aankhon se koi dekh bhi na sake। aatma kaise aati hai, chhote shareer mein kaise pravesh karti hai, bada hi wonderful khel hai। yeh padhaai eeshvareey hai। ismen din-raat khyaalaat chalne chaahiye। ham ek baar samajh lete hain, jaise ki dekh lete hain phir varnan karte hain। aage jaadu vaale log bahut cheezen nikaal dikhaate the। baap ko bhi jaadoogar, saudaagar, ratnaagar kehte hain na। aatma mein hi saara gyaan thaharta hai। aatma hi gyaan saagar hai। bhal kehte hain paramatma gyaan ka saagar hai, parantu woh kaun hai, kaise woh jaadoogar hai, yeh kisko bhi pata nahin hai। aage tum bhi nahin samajhte the। abhi baap aakar devta banaate hain। andar mein kitni khushi honi chaahiye। ek baap hi knowledgeful hai, hamko padhaate bhi hain। yeh sirf tum bachche hi jaante ho। yeh din-raat andar mein simran chalna chaahiye। yeh behad ke naatak ka knowledge sirf ek baap hi suna sakte hain, aur koi suna na sake। baba ne dekha thode hi hai, parantu unmein saari knowledge hai। baap kehte hain main satayug-treta mein to nahin aata hoon parantu knowledge saari sunaata hoon। wonder lagta hai na। jisne kabhi part hi nahin liya, woh kaise batlaate hain! baap kehte hain main kuchh bhi dekhta nahin hoon। na main satayug-treta mein aata hoon parantu mere mein knowledge kitni achhi hai jo main ek hi baar aakar tumko sunaata hoon। tumne part bajaaya, tum jaante nahin ho aur jisne part hi nahin bajaaya hai woh sab sunaate hain - wonder hai na। ham jo paartadhaari hain, ham kuchh nahin jaante aur baap mein kitni saari knowledge hai। baap kehte hain main thode hi satayug-treta mein aata hoon jo tumko anubhav sunaaoon। drama anusaar bigar dekhe, anubhav kiye saari knowledge dete hain। kitna wonder hain - main part bajaane aata hi nahin aur tumko saara part samjhaata hoon, isliye hi mujhe knowledgeful kehte hain।

to baap kehte hain ab meethe-meethe bachchon apni unnati karni hai to apne ko aatma samjho। yeh hai khel। tum phir bhi aise hi khel karenge। devi-devta banenge। phir ant mein chakra lagaae manushya banenge। wonder khaana chaahiye na। baba mein yeh knowledge kahaan se aai? unka to koi guru bhi nahin। draamaanusaar pahle se hi unmein part bajaane ki noondh hai। isko kudrat kahenge na। har ek baat wonderful hai। to baap baith nai-nai baaten samjhaate hain। aise baap ko kitna yaad karna chaahiye। 84 ke chakra ko bhi yaad karna hai। yeh raaz bhi baba ne hi samjhaaya hai। viraat roop ka chitra kitna achha hai। jo lakshmi-naaraayan athva vishnu ka chitra banaate hain, vahi dikhaate hain - ham kaise 84 janmon mein aate hain। ham so devta phir kshatriy, vaishya phir shoodra। yeh simran karne mein kya koi takleeph hai? baap hai knowledgeful। koi se padha thode hi hai, na shaastra aadi hi padha hai। bigar kuchh bhi padhe, bigar guru kiye itni saari knowledge baith sunaaye - aisa to kabhi dekha nahin। baap kitna meetha hai। bhakti maarga mein koi kisko, koi kisko meetha samjhenge। jisko jo aata hai unki pooja karne lag padte hain। baba baith sab raaz samjhaate hain। aatma hi aananda swaroop hai, phir aatma hi duhkh roop chhi-chhi ban jaati hai। bhakti maarga mein to kuchh bhi tum nahin jaante the। meri kitni mahima karte hain parantu jaante kuchh bhi nahin। yeh bhi kitna wonderful khel hai। yeh saara khel baba ne samjhaaya hai। itne chitra seedhi aadi ke kabhi dekhe bhi nahin the। ab dekhte hain, sunte hain to kehte bhi hain yeh gyaan to yathaartha reeti hai। parantu kaam mahaashatru hai, is par jeet paani hai, to yeh sunkar dheele pad jaate hain। tum kitna samjhaate ho, samajhte hi nahin। kitni mehnat lagti hai। yeh bhi jaante hain kalpa pahle jinhonne samjha tha vahi samjhenge। daivi parivaar vaale jitne banne vaale honge unhon ko hi dhaarna hogi। tum jaante ho ham shreemat par raajdhaani sthaapan karte hain। baap ka direction hai auron ko bhi aapasmaan banaao। baap sab gyaan suna rahe hain। tum bhi suna rahe ho। to zaroor yeh shivbaaba ka rath bhi suna sakta hoga। parantu apne ko gupta kar dete hain। tum shivbaaba ko hi yaad karte raho। inki to upma (mahima) bhi nahin karni hai। sarva ka sadgati daata, maaya ki janjeeron se chhudaane vaala ek hi hai।

baap kaise baith tumko samjhaate hain - yeh tum bachchon ke sivaae aur koi ko pata hi nahin hai। manushya yeh bhi nahin jaante ki raavan kya cheez hai। har varsha jalaate hi aate hain। effigy to dushman ka banaaya jaata hai na। tumko abhi pata pada hai ki raavan bhaarat ka dushman hai, jisne bhaarat ko kitna duhkhi, kangaal bana diya hai। sabhi 5 vikaaron roopi raavan ke panje mein phanse hue hain। bachchon ko andar mein yeh aana chaahiye - kaise auron ko bhi raavan se chhudaayen। service ho sakti hain to prabandha karna hai। sachche dil se, nihsvaartha bhaav se seva karni hai। baba kehte hain aise bachchon ki hundi main sakaarta (bharta) hoon। drama mein noondh hai। service ka achha chance hai to ismen poochhne ka bhi nahin rehta। baap ne kah diya hai service karte raho। maango koi se bhi nahin। maangane se marna bhala। aapehi tumhaare paas aa jaayega। maangane se centre itna jor nahin bharega। bigar maange tum centre jamaao, aapehi sab aata rahega। usmein taakat rahegi। jaise baahar vaale chanda ikattha karte hain, aise tumko nahin karna hai।

manushya ko to kabhi bhagwan nahin kaha jaata। gyaan to hai beej। beej roop baap baith tumko gyaan dete hain। beej hi knowledgeful hai na। woh jad beej to varnan kar nahin sakenge। tum varnan karte ho। sab baaton ko samajh sakte ho। is behad ke jhaad ko koi bhi samajhte nahin hain। tum ananya bachche jaante ho nambarvaar purooshaartha anusaar। baap samjhaate hain - maaya bhi prabal hai। kuchh sahan bhi karna padta hai। kitne kade-kade vikaar hain। achhe-achhe service karne vaalon ko chalte-chalte aisi maaya ki chamaat lag jaati hai, kehte hain ham to gir gaye। seedhi oopar chadhte-chadhte neeche gir padte hain। to ki kamaai saari chat ho padti hai। danda to zaroor milna chaahiye। baap se pratigya karte hain, blood se bhi likhkar diya phir bhi gum ho gaye। baba pakka karne liye dekhte bhi hain, itni yuktiyaan karte hue bhi phir duniya ki taraph chale jaate hain। kitna sahaj samjhaate hain, paartadhaari ko apne part ka hi simran karna chaahiye। apna part koi bhool thode hi sakta hai। baap to roz-roz bhinna-bhinna prakaar se samjhaate rehte hain। tum bhi bahuton ko samjhaate ho phir bhi kehte hain ham baba ke sammukh jaayen। baap ka to wonder hai। roz murli chalaate hain। woh hai niraakaar। naam, roop, desh, kaal to hai nahin। phir murli kaise sunaayenge। wonder khaate hain, phir pakke hokar aate hain। dil hota hai aisa baap varsa dene aaye hain, unse milen। is pahchaan se aakar milen to baap se gyaan ratna dhaaran kar saken। shreemat ko paalan kar saken। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan ko jeevan mein dhaaran kar khushi mein gadgad hona hai। wonderful gyaan aur gyaan daata ka simran kar gyaan dance karna hai।

2) apne part ka hi simran karna hai, doosron ke part ko nahin dekhna hai। maaya badi prabal hai isliye khabardaar rehna hai। apni unnati mein lage raho। service ka shauk rakho।

vardaan:- achchhaai par prabhaavit hone ke bajaae use svayan mein dhaaran karne vaale parmaatma snehi bhav

agar parmaatma snehi banna hai to body conscious ki rookaavton ko check karo। kai bachche kehte hain yeh bahut achha ya achhi hai isliye thoda raham aata hai…koi ka kisi ke shareer se lagaav hota to koi ka kisi ke gunon va visheshtaaon se। lekin woh visheshta va gun dene vaala kaun? koi achha hai to achchhaai ko dhaaran bhale karo lekin achchhaai mein prabhaavit nahin ho jaao। nyaare aur baap ke pyaare bano। aise pyaare arthaat parmaatma snehi bachche sada safe rehte hain।

slogan:- silence ki shakti emerge karo to seva ki gati fast ho jaayegi।