Murli du jour du jeudi 23 mai 2024

23-05-2024 praatahmurli om shanti "baapdaada"' madhuban

“meethe bachche - tumhein kabhi bhi vighna roop nahin banna hai, andar mein koi kami ho to use nikaal do, yahi samay hai sachcha heera banne ka''

prashn:- kis baat ki defect aate hi aatma ki value kam hone lagti hai?

uttar:- pahla defect aata hai apvitrata ka। jab aatma pavitra hai to uski grade bahut oonchi hai। woh amoolya ratna hai, namaste laayak hai। impurity ka thoda bhi defect value ko khatma kar deta hai। ab tumhein baap samaan ever pure heera banna hai। baba aaya hai tumhein aap samaan pavitra banaane। pavitra bachchon ko hi ek baap ki yaad sataayegi। baap se atoot pyaar hoga। kabhi kisi ko duhkh nahin denge। bahut meethe honge।

om shanti। double om shanti bhi kah sakte hain। bachche bhi jaante hain aur baapdaada bhi jaante hain। om shanti ka arth hai main aatma shant swaroop hoon। aur barobar shanti ke saagar, sukh ke saagar, pavitrata ke saagar baap ki santaan hoon। pahle-pahle hai pavitrata ka saagar। pavitra banne mein hi manushyon ko takleeph hoti hai। aur pavitra banne mein bahut grades hain। har ek bachcha samajh sakta hai, yeh bhi grades badhti jaati hain। abhi ham sampoorn bane nahin hain। kahaan na kahaan koi mein kis prakaar ki, koi mein kis prakaar ki defect zaroor hain - pavitrata mein aur yog mein। deh-abhimaan mein aane se hi defected hote hain। koi mein jaasti, koi mein kam defect hote hain। kisma-kisma ke heere hote hain। unko phir magnify glass se dekha jaata hai। to jaise baap ki aatma ko samjha jaata hai, vaise aatmaon (bachchon) ko bhi samajhna hota hai। yeh ratna hain na। ratna bhi sab namaste laayak hain। moti, maanik, pukhraaj aadi sab namaste laayak hain isliye sab variety daale jaate hain। nambarvaar purooshaartha anusaar to hain na। samajhte hain behad ka baap hai avinaashi gyaan ratnon ka jauhri, woh ek hi hai। jauhri bhi unko zaroor kahenge। gyaan ratna dete hain na aur phir rath bhi jauhri, woh bhi ratnon ki value ko jaante hain। javaahraat ko bahut achhi reeti magnify glass se dekhna hota hai - ismen kahaan tak defect hai! yeh kaun-sa ratna hai? kahaan tak serviceable hai? dil hoti hai ratnon ko dekhne ki। achha ratna hoga to usko bahut pyaar se dekhenge। yeh bada achha hai। isko to sone ki dibbi mein rakhna chaahiye। pukhraaj aadi ko sone ki dibbi mein nahin rakha jaata hai। yahaan bhi jaise behad ke ratna bante hain। har ek apne dil ko jaante hain - main kis prakaar ka ratna hoon? hamaare mein koi defect to nahin hai? jaise javaahraat ko achhi reeti dekha jaata hai, vaise har ek ko dekhna padta hai। tum to ho hi chaitanya ratna। to har ek ko apne ko dekhna hai - ham kahaan tak sabja pari, neelam pari bane hain। jaise phoolon mein bhi koi sada gulaab, koi gulaab, koi kaise hote hain। tumhaare mein bhi nambarvaar hain। har ek apne ko achhi reeti jaan sakte hain। apne ko dekho saara din kya kiya? baba ko kitna yaad kiya? yeh bhi baba ne kah diya hai ki grihastha vyavhaar mein rehte hue baap ko yaad karna hai। baba ne naarad ko bhi kaha - apni shakla ko dekho। yeh bhi ek drishtaanta hai। tum jo bachche ho, ek-ek ko apne ko achhi reeti dekhna hai। jaanch karni hai ki jis baap dvaara ham heere bante hain unke saath hamaara lav kahaan tak hai? aur koi taraph vritti to nahin jaati hai? kahaan tak mera daivi svabhaav hai? svabhaav bhi manushya ko bahut sataata hai। har ek ko teesra netra mila hai। unse apni jaanch karni hai। kahaan tak main baap ki yaad mein rehta hoon? kahaan tak meri yaad baap ko pahunchti hai? unki yaad mein rah romaanch ekdam khade ho jaane chaahiye। parantu baap khud kehte hain maaya ke vighna aise hain jo khushi mein aane nahin dete hain। bachche jaante hain abhi ham sab purooshaarthi hain। result to pichhaadi mein nikalni hai। apni jaanch karni hai। flaw aadi abhi tum nikaal sakte ho। ekdam pure diamond banna hai। agar thoda bhi defect hoga to samajh jaayenge, hamaari value bhi kam hogi। ratna hain na। baap to samjhaate hain - bachche ever pure valuable heera banna chaahiye। purooshaartha karaane liye bhinna-bhinna prakaar se baap samjhaate hain।

(aaj yog ke samay beech mein baapdaada sandali se uthkar sabha ke beech mein chakra lagaae ek-ek bachche se nain mulaakaat kar rahe the) baba aaj kyon uthe? dekhne liye ki kaun-kaun serviceable bachcha hai? kyonki kahaan koi, kahaan koi baithe rehte hain। to baba ne uthkar ek-ek ko dekha - inmen kya gun hain? inka kitna lav hai? sab bachche sammukh baithe hue hain, to sabhi bahut pyaare lagte hain। parantu yeh to zaroor hai nambarvaar purooshaartha anusaar hi pyaare lagenge। baap ko to maaloom hai - kya-kya kismen defect hai? kyonki jis tan mein baap ne pravesh kiya hai, woh bhi apni jaanch karte hain। yeh donon baapdaada ikatthe hain na। to jitna-jitna jo auron ko sukh dete hain, koi ko duhkh nahin dete hain, woh chhipe nahin rah sakte hain। gulaab, motiya kab chhipe nahin rah sakenge। baap sab kuchh bachchon ko samjhaae phir bachchon ko kehte hain maamekam yaad karo to tumhaari khaad nikal jaaye। yaad karne samay saare din mein jo kuchh kiya hai, woh bhi dekhna hai। mere mein kya avgun hain, jo baba ki dil par itna nahin chadh sakte? dil par so takhta par। to baap uthkar bachchon ko dekhte hain, hamaare takhta ke vaasi kaun-kaun banne vaale hain? jab samay nazdeek aata hai, to bachchon ko jhat maaloom pad jaata hai - ham kahaan tak paas honge? naapaas hone vaale ko pahle se hi maaloom pad jaata hai ki hamaare marks kam honge। tum bhi samajhte ho hamko marks to milne hain। ham student hain, kiske? bhagwan ke। jaante hain woh is daada dvaara padhaate hain। to kitni khushi honi chaahiye। baba hamko kitna pyaar karte hain, kitna meetha hai, takleeph to koi dete nahin। sirf kehte hain is chakra ko yaad karo। padhaai koi jaasti nahin hai। em object saamne khada hai। aisa humein banna chaahiye। daiveegunon ki em object hai। tum daiveegun dhaaran kar in jaisa pavitra bante ho tab hi maala mein piroye jaate ho। behad ka baba hamko padhaate hain। khushi hoti hai na। baba zaroor aapasmaan pure knowledgeful banaayenge। ismen pavitrata, sukh, shanti sab aa jaati hai। abhi koi bhi paripoorna nahin bana hai। ant mein banna hai। uske liye purooshaartha karna hai। baap ko to sabhi pyaar karte hain। ‘baba' kahkar to dil hi khil jaata hai। baap se varsa kitna bhaari milta hai। sivaae baap ke aur kahaan bhi dil nahin jaayegi। baap ki yaad hi bahut sataani chaahiye। baba, baba, baba, bahut pyaar se baap ko yaad karna hota hai। raaja ka bachcha hoga to unko raajaai ka nasha hoga na। abhi to raajaaon ka maan nahin raha hai। jab British government thi to unhon ka bahut maan tha। sab unko salaam bharte the sivaae viceroy ke। baaki sab naman karte the raajaaon ko। abhi unhon ki gati kya ho gai hai। yeh bhi tum jaante ho ki yeh koi aakar raajaai pad nahin lenge।

baba ne samjhaaya hai main gareeb nivaaz hoon। gareeb jhat baap ko jaan lete hain। samajhte hain yeh sab kuchh unka hai। unki shreemat par hi ham sab kuchh karenge। unhon ko to apna dhan ka nasha rehta hai isliye woh aise kar na sake isliye baap kehte hain main hoon gareeb nivaaz। baaki haan, badon ko uthaaya jaata hai, kyonki badon ke kaaran phir gareeb bhi jhat aa jaayenge। dekhenge itne bade-bade log bhi yahaan jaate hain, to woh bhi aa jaayenge। parantu gareeb bichaare bahut darte hain। ek din woh bhi tumhaare paas aayenge। woh din bhi aayega। phir unhon ko jab tum samjhaayenge to bade khush honge। ekdam chatak jaayenge। unhon ke liye bhi tum khaas time rakhenge। bachchon ke dil mein aata hai hamko to sabhi ka uddhaar karna hai। woh bhi padhkar bade officers aadi ban jaate hain na। tum ho eeshvareey mission। tumko sabka uddhaar karna hai। gaayan bhi hai na - bheelni ke ber khaaye। vivek bhi kehta hai daan hamesha gareebon ko karna hai, saahookaaron ko nahin। tumko aage chalkar yeh sab kuchh karna hai। ismen yog ka bal chaahiye, jisse woh kashish mein aa jaayen। yogbal kam hai kyonki deh-abhimaan hai। har ek apne dil se poochhe - hamko kahaan tak baap ki yaad hai? kahaan ham phansate to nahin hain? aisi avastha chaahiye, jo kisko bhi dekhne se chalaaymaani na ho। baba ka farmaan hai deh-abhimaani mat bano। sabko apna bhaai samjho। aatma jaanti hai ham bhaai-bhaai hain। deh ke sab dharma chhodne hain। ant mein agar kuchh bhi yaad pada to danda pad jaayega। itni apni avastha majboot banaani hai aur service bhi karni hai। andar mein samajhna hai - aisi avastha jab banaayen tab yeh pad mil sakta hai। baap to achhi reeti samjhaate hain, bahut service rahi hui hai। tumhaare mein bhi bal hoga to unko kashish hogi। anek janmon ki kat lagi hui hai, yeh khyaalaat tum braahmanon ko rakhne hain। sabhi aatmaon ko paavan banaana hai। manushya to nahin jaante, yeh tum jaante ho so bhi nambarvaar purooshaartha anusaar। baap sab baaten samjhaate rehte hain, apni jaanch karni hai। jaise baba behad mein khade hain, bachchon ko behad ka khyaal karna hai। baap ka aatmaon mein kitna lav hai। itna din lav kyon nahin tha? kyonki defected the। patit aatmaon ko kya lav karenge। abhi to baap sabko patit se paavan banaane aaye hain। to lovely zaroor banna padta hai। baba hai hi lovely, bachchon ko bahut kashish karte hain। din-pratidin jitna pavitra bante jaayenge, utna tumko bahut kashish hogi। baba mein bahut kashish hogi। itna kheechenge jo tum thahar nahin sakenge। tumhaari avastha bhi nambarvaar purooshaartha anusaar aisi aa jaayegi। yahaan baap ko dekhte rahenge to bas samjhenge abhi jaakar baba se milen। aise baba se phir kabhi bichhdenge nahin। baap ko phir kashish hoti hai bachchon ki। is bachche ki to kamaal hai। badi achhi service karte hain। haan, kuchh defect bhi hain phir bhi avastha anusaar time par badi achhi service karte hain। koi ko duhkh dene jaisi aasaami nahin dekhne mein aati hai। beemaari aadi hoti hai to woh hai karmabhog। khud bhi samajhte hain jab tak yahaan hain, kuchh na kuchh hota rahega। bhal yeh rath hai phir bhi karmabhog to pichhaadi tak bhogna hi hai। aise nahin, main in par aasheervaad karoon। inko bhi apna purooshaartha karna hai। haan, rath diya hai, uske liye kuchh izaapha de denge। bahut baandheliyaan kaise-kaise aati hain। kaise yukti se chhootkar aati hain, unhon ka jitna lav rehta hai utna aur koi ka nahin। bahuton ka lav bilkul nahin hai। un baandheliyon ke lav se to kiski bhi bhent nahin kar sakte। baandheliyon ka yog bhi koi kam mat samajhna। bahut yaad mein roti hain। baba, O baba, kab ham aapse milenge? baba, vishwa ke maalik banaane vaale baba, aapse ham kaise milenge? aisi-aisi baandheliyaan hain jo prem ke aansu bahaati rehti hain। woh unke duhkh ke aansu nahin hain, woh aansu pyaar ke moti ban jaate hain। to un baandheliyon ka yog koi kam thode hi hai। yaad mein bahut tadaphti hain। O baba ham aapse kab milenge? sab duhkh mitaane vaale baba! baap kehte hain jitna samay tum yaad mein rahengi, service bhi karengi, bhal koi bandhan mein rehti hain, khud service nahin kar sakti parantu yaad ka bhi unhon ko bahut bal milta hai। yaad mein hi sab kuchh samaaya hua hai, tadaphti rehti hain। baba kab mauka milega jo ham aapse milengi? kitna yaad mein rehti hain। aage chal din-pratidin tumko jor se kheench hoti rahegi। snaan karte, kaarya karte yaad mein hi rahenge। baba, kabhi woh din hoga jo yeh bandhan khalaas honge? bichaari poochhti rehti hain - baba, yeh hamko bahut tang karte hain, kya karen? bachchon ki pitaai kar sakte hain? paap to nahin hoga? baap kehte hain aajkal ke bachche to aise hain jo baat mat poochho! kisko pati se duhkh hota hai to andar mein sochti hain - kab yeh bandhan chhoote to ham baba se milen। baba, bahut kada bandhan hai, kya karen? pati ka bandhan kab chhootega? bas, baba-baba karti rehti hain। unki kashish to aati hai na। ablaayen bahut sahan karti hain। baba bachchon ko dheeraj dete hain - bachche, tum baap ko yaad karte raho to yeh sab bandhan khatma ho jaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apni jaanch karni hai ki hamaare mein koi avgun to nahin hai? kahaan tak hamaari yaad baap tak pahunchti hai? hamaara svabhaav daivi svabhaav hai? vritti aur taraph bhatakti to nahin hai?

2) aisa lovely banna hai jo baap ko kashish hoti rahe। sabko sukh dena hai। pyaar se baap ko yaad karna hai।

vardaan:- saathi ko sada saath rakh sahayog ka anubhav karne vaale combined roopdhaari bhav

sada “aap aur baap'' aise combined raho jo koi bhi alag na kar sake। kabhi apne ko akela nahin samjho। baapdaada avinaashi saath nibhaane vaale aap sabke saathi hain। baba kaha aur baba haazir hai। ham baba ke, baba hamaara। baba aapki har seva me sahayog dene vaale hai sirf apne combined swaroop ke roohaani nashe mein raho।

slogan:- seva aur sva-unnati donon ka balance ho to sada saphalta milti rahegi।