Murli du jour du lundi 1 juillet 2024

01-07-2024 praatahmurli om shanti "baapdaada"' madhuban

“meethe bachche - shantidham paavan aatmaon ka ghar hai, us ghar mein chalna hai to sampoorn paavan bano''

prashn:- baap sabhi bachchon se kaun-si guarantee karte hain?

uttar:- meethe bachche, tum mujhe yaad karo to main guarantee karta hoon ki bigar saza khaaye tum mere ghar mein chalenge। tum ek baap se dil lagaao, is puraani duniya ko dekhte bhi nahin dekho, is duniya mein rehte pavitra bankar dikhaao, to baba tumhein vishwa ki baadshaahi avashya denge।

om shanti। roohaani bachchon se roohaani baap poochh rahe hain, yeh to bachche jaante hain baap aaya hai ham bachchon ko apne ghar le jaane liye, ab ghar jaane ki dil hoti hai? woh hai sab aatmaon ka ghar। yahaan sab jeev aatmaon ka ghar ek nahin hai। yeh to samajhte ho baap aaya hua hai। nimantran par bulaaya hai baap ko। hamko ghar arthaat shantidham le chalo। ab baap kehte hain apne dil se poochho - he aatmaayen, tum patit kaise chal sakengi? paavan to zaroor banna hai। ab ghar chalna hai aur to koi baat nahin kehte। bhakti maarga mein tumne itna samay purooshaartha kiya hai, kiske liye? mukti ke liye। to ab baap poochhte hain ghar chalne ka vichaar hai? bachche kehte - baba iske liye hi to itni bhakti ki hai। yeh bhi jaante ho jo bhi jeev aatmaayen hain, sabko le jaana hai। parantu pavitra bankar ghar jaana hai phir pavitra aatmaayen hi pahle-pahle aati hain। apvitra aatmaayen to ghar mein rah nahin sakti। abhi jo bhi karodon aatmaayen hain, sabko ghar zaroor jaana hai। us ghar ko shantidham va vaanaprastha kaha jaata hai। ham aatmaon ko paavan bankar paavan shantidham jaana hai। bas। kitni sahaj baat hai। woh hai paavan shantidham aatmaon ka। woh hai paavan sukhdhaam jeev aatmaon ka। yeh hai patit duhkhadhaam jeev aatmaon ka। ismen moonjhane ki to baat hi nahin। shantidham jahaan sab pavitra aatmaayen nivaas karti hain। woh hai aatmaon ki pavitra duniya - viceless, incorporeal world। yeh puraani duniya hai sab jeev aatmaon ki। sab patit hain। ab baap aaye hain aatmaon ko paavan banaakar, paavan duniya shantidham mein le jaane। phir jo raajayog seekhte hain vahi paavan sukhdhaam mein aayenge। yeh to bahut sahaj hai, ismen koi bhi baat ka vichaar nahin karna hai। buddhi se samajhna hai। ham aatmaon ka baap aaya hua hai, hamko paavan shantidham mein le jaane। vahaan jaane ka raasta jo ham bhool gaye the, so ab baap ne bataaya hai। kalpa-kalpa main aise hi aakar kehta hoon - he bachche, mujh shivbaaba ko yaad karo। sarva ka sadgati daata ek satguru hai। vahi aakar bachchon ko paigaam athva shreemat dete hain ki bachchon abhi tumko kya karna hai? aadhaakalpa tumne bahut bhakti ki hai, duhkh uthaaya hai। kharcha karte-karte kangaal ban gaye ho। aatma bhi satopradhaan se tamopradhaan ban gai hai। bas, yeh thodi baat hi samajhne ki hai। ab ghar chalna hai va nahin? haan baba, zaroor chalna hai। woh hamaara sweet silence hom hai। yeh bhi samajhte ho barobar abhi ham patit hain isliye ja nahin sakte hain। ab baap kehte hain mujhe yaad karo to tumhaare paap kat jaayenge। kalpa-kalpa yahi paigaam deta hoon। apne ko aatma samjho, yeh deh to khalaas ho jaani hai। baaki aatmaon ko vaapis jaana hai। unko kehte hain niraakaari duniya। sab niraakaari aatmaayen vahaan rehti hain। woh ghar hai aatmaon ka। niraakaar baap bhi vahaan rehte hain। baap aate hain sabse pichhaadi mein kyonki phir sabko vaapis le jaana hai। ek bhi patit aatma rehti nahin hai, ismen koi moonjhane va takleeph ki baat nahin hai। gaate bhi hain he patit-paavan aakar hamko paavan banaae saath le chalo। sabka baap hai na। phir jab ham nai duniya mein part bajaane aate hain to bahut thode rehte hain। baaki itni karod aatmaayen kahaan jaakar rehti hain? yeh bhi jaante ho satayug mein thodi jeev aatmaayen thi, chhota jhaad tha phir vriddhi ko paaya hai। jhaad mein anek dharmon ki variety hai। usko hi kalpa vriksha kaha jaata hai। kuchh bhi agar nahin samajhte ho to poochh sakte ho। kai kehte hain - baba, ham kalpa ki aayu 5 hazaar varsha kaise maanen? are, baap to satya hi sunaate hain। chakra ka hisaab bhi bataaya hai।

is kalpa ke sangam par hi baap aakar daivi raajdhaani sthaapan karte hain, jo abhi nahin hai। satayug mein phir ek daivi raajdhaani hogi। is samay tumko rachta aur rachna ka gyaan sunaate hain। baap kehte hain main kalpa-kalpa, kalpa ke sangamayuge aata hoon। nai duniya ki sthaapna karta hoon। puraani duniya khatma ho jaani hai। drama plan anusaar, nai se puraani, puraani se nai banti hai। iske 4 bhaag bhi poore hain jisko svaastika bhi kehte hain parantu samajhte kuchh bhi nahin hain। bhaktimaarga mein to jaise gudiyon ka khel khelte rehte hain। athaah chitra hain, deepmaala par khaas dukaan nikaalte hain, anekaanek chitra hain। abhi tum samajh gaye ho ek hai shivbaaba aur ham bachche। phir yahaan aao to lakshmi-naaraayan ka raajya, phir raam-seeta ka raajya, phir baad mein aur-aur dharma aate hain, jisse tum bachchon ka connection hi nahin hai। woh apne-apne samay par aate hain phir sabko vaapis jaana hai। tum bachchon ko bhi ab ghar jaana hai। yeh saari duniya vinaash honi hai। ab ismen kya rehna hai। is duniya se dil hi nahin lagti। dil lagaani hai ek maashuk se, woh kehte hain mujh ek ke saath dil lagaao to tum paavan banenge। ab bahut gai thodi rahi, time jaata rehta hai। yog mein nahin rahe honge to phir ant mein woh bahut pashchaataap karenge, saja khaayenge, pad bhi bhrashta ho jaayega। yeh bhi tumko abhi maaloom pada hai ki apna ghar chhode hamko kitna samay hua hai। ghar jaane liye hi to maatha maarte hain na। baap bhi ghar mein hi milega। satayug mein to nahin milega। muktidhaam mein jaane ke liye manushya kitni mehnat karte hain। usko kaha jaata hai bhakti maarga। abhi bhakti maarga khalaas hona hai drama anusaar। abhi main tumko ghar le jaane ke liye aaya hoon। zaroor le jaaoonga। jitna jo paavan banenge utna oonch pad paayenge। ismen moonjhane ki baat hi nahin। baap kehte hain - bachche tum mujhe yaad karo, main guarantee karta hoon tum bigar saja khaaye ghar chale jaayenge। yaad se tumhaare vikarma vinaash honge। agar yaad nahin karenge to sajaayen khaani padegi, pad bhi bhrashta ho jaayega। har 5 hazaar varsha baad main yahi aakar samjhaata hoon। main anekaanek baar aaya hoon tumko vaapis le jaane। tum bachche hi haar-jeet ka part bajaate ho, phir main aata hoon le jaane। yeh hai patit duniya, isliye gaate bhi hain patit-paavan aao, ham vikaari patit hain, aakar nirvikaari paavan banaao। yeh hai vikaari duniya। abhi tum bachchon ko sampoorn nirvikaari banna hai। jo peechhe aate hain woh saja khaakar jaate hain isliye phir aate bhi aisi duniya mein hain jahaan do kala kam ho jaati hain। unko sampoorn pavitra nahin kahenge isliye ab purooshaartha bhi poora karna chaahiye। aisa na ho ki kam pad ho jaae। bhal raavan raajya nahin hai parantu pad to nambarvaar hai na। aatma mein khaad padti hai to phir usko shareer bhi aisa milega। aatma golden aged se silver aged ban jaati hai। chaandi ki khaad aatma mein padti hai phir din-pratidin jaasti chhi-chhi khaad padti hai mulamme ki। baap bahut achhi reeti samjhaate hain। koi nahin samajhte hain to haath uthaao। jisne 84 janmon ka chakra lagaaya hai, unko hi samjhaayenge। baap kehte hain inke 84 janmon ke ant mein main aakar pravesh karta hoon। inko hi phir pahle number mein aana hai। jo pahle tha, woh last mein hai। unko hi pahle number mein jaana hai, jo bahut janmon ke ant mein patit ban gaya hai, main patit-paavan unke hi shareer mein aata hoon, unko paavan banaata hoon। kitna clear kar samjhaata hoon।

baap kehte hain mujhe yaad karo to tumhaare paap bhasma honge। geeta ka gyaan to tumne bahut suna aur sunaaya hai parantu unse bhi tumne sadgati ko nahin paaya। bahut sannyaasiyon ne tumko meethi-meethi aavaaz se shaastra sunaaye, jis aavaaz ko sunkar bade-bade aadmi jaakar ikatthe hote hain। kanras hai na। bhakti maarga hai hi kanras। ismen to aatma ko baap ko yaad karna hai। bhakti maarga ab poora hota hai। baap kehte hain main tum bachchon ko gyaan dene aaya hoon, jo koi nahin jaante। main hi gyaan ka saagar hoon। gyaan kaha jaata hai knowledge ko। tumko sab kuchh padhaate hain। 84 ka chakra bhi samjhaate hain, tumhaare mein saari knowledge hai। sthoolavtan se sookshm vatan cross kar phir mool vatan mein jaate ho। pahle-pahle hai lakshmi-naaraayan ki dynasty। vahaan vikaari bachche nahin hote, raavan raajya hi nahin। yogbal se sab kuchh hota hai, tumko saakshaatkaar hota hai - ab bachcha ban garbha mahal mein jaana hai। khushi se jaate hain। yahaan to manushya kitna rote chillaate hain। yahaan to garbha jel mein jaate hain na। vahaan rone peetne ki baat nahin। shareer to badalna zaroor hai। jaise sarpa ka misaal hai, ismen moonjhane ki baat hi nahin। jaasti poochhne ka rehta nahin hai। ekdam paavan banne ke purushaartha mein lag jaana chaahiye। baap ko yaad karna mushkil hota hai kya! baap ke saamne baithe ho na। main tumhaara baap tumko sukh ka varsa deta hoon। tum yeh ek antim janma yaad mein nahin rah sakte ho! yahaan achhi reeti samajhte bhi hain phir ghar mein jaakar stri aadi ka chehra dekhte hain to maaya kha jaati hai। baap kehte hain koi mein bhi mamatva nahin rakho। woh to sab kuchh khatma hona hi hai। yaad to ek baap ko hi karna hai। chalte phirte baap aur apni raajdhaani ko yaad karo। daiveegun bhi dhaaran karne hain। satayug mein yeh gandi cheejen maas aadi hota hi nahin। baap kehte hain vikaaron ko bhi chhod do। ham tumko vishwa ki baadshaahi deta hoon, kitni aamadni hoti hai। to kyon nahin pavitra rahenge। sirf ek janma pavitra rahne se kitni bhaari aamadni ho jaati hai। bhal ikatthe raho, gyaan talvaar beech mein ho। pavitra rah dikhaaya to sabse oonch pad paayenge kyonki baal brahmachaari thahre। phir knowledge bhi chaahiye। auron ko aap samaan banaana hai। sannyaasiyon ko dikhaana hai ki kaise ham ikatthe rehte pavitra rehte hain। to samjhenge inmen to badi taakat hai। baap kehte hain is ek janma pavitra rahne se 21 janma tum vishwa ke maalik banenge। kitni badi prize milti hai to kyon nahin pavitra rah dikhaayenge। time hi baaki thoda hai। aavaaz bhi hota rahega, akhbaar mein bhi padega। rehearsal to dekhi hai na। ek atom bomb se kya haal ho gaya। abhi tak hospital mein pade hain। abhi to aise bombs aadi banaate hain jo koi takleeph nahin, phat se khatma। aur yeh rehearsal hokar phir final hoga। dekhenge phat se marte hain va nahin? phir aur yukti rachenge। hospital aadi hongi nahin। kaun baith khidmat (seva) karenge। koi brahman aadi khilaane vaala nahin rahega। bomb chhoda aur khalaas। arth quake mein sab dab jaayenge। deri nahin lagegi। yahaan dher manushya hain। satayug mein bahut thode hote hain। to itne sab kaise vinaash honge! aage chal dekhna hai, vahaan to shuru mein 9 laakh hain।

fakeer bhi tum ho, saaheb bhi tumko pyaara hai। abhi sabko chhod apne ko aatma samajh liya hai, aise fakeeron ko baap pyaara lagta hai। satayug mein bahut chhota-sa jhaad hoga। baaten to bahut samjhaate hain। jo bhi actors hain, sab aatmaayen avinaashi hain, apna-apna part bajaane aati hain। kalpa-kalpa tum hi aakar baap se student ban padhte ho। jaante ho baba hamko pavitra banaakar saath le jaayenge। baba bhi drama anusaar bandhaaymaan hain, sabko vaapis zaroor le jaayenge isliye naam hi hai paandav sena। tum paandav kya kar rahe ho? tum baap se raajya bhaagya le rahe ho, hoobhu kalpa pahle misal। nambarvaar purooshaartha anusaar। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ka pyaara banne ke liye poora fakeer banna hai। deh ko bhi bhool svayan ko aatma samajhna hi fakeer banna hai। baap se bade te badi prize lene ke liye sampoorn paavan bankar dikhaana hai।

2) vaapas ghar jaana hai isliye puraani duniya se dil nahin lagaani hai। ek maashook se hi dil lagaani hai। baap aur raajdhaani ko yaad karna hai।

vardaan:- brahman jeevan mein sada cheerful aur careful mood mein rahne vaale combined roopdhaari bhav

yadi kisi bhi paristhiti mein prasannata ki mood parivartan hoti hai to use sadaakaal ki prasannata nahin kahenge। brahman jeevan mein sada cheerful aur careful mood ho। mood badalni nahin chaahiye। jab mood badalti hai to kehte hain mujhe to ekaanta chaahiye। aaj mera mood aisa hai। mood badalti tab hai jab akele hote ho, sada combined roop mein raho to mood nahin badlegi।

slogan:- koi bhi utsav manaana arthaat yaad aur seva ke utsaah mein rehna।