Murli du jour du vendredi 12 juillet 2024

12-07-2024 praatahmurli om shanti "baapdaada"' madhuban

“meethe bachche - tumhein saahebjaade so shahjaade banna hai, isliye yaad ki yaatra se apne vikarmon ko bhasma karo''

prashn:- kis ek vidhi se tumhaare sab duhkh door ho jaate hain?

uttar:- jab tum apni nazar baap ki nazar se milaate ho to nazar milne se tumhaare sab duhkh door ho jaate hain kyonki apne ko aatma samajhkar baap ko yaad karne se sab paap kat jaate hain। yahi hai tumhaari yaad ki yaatra। tum deh ke sab dharma chhod baap ko yaad karte ho, jisse aatma satopradhaan ban jaati hai, tum sukhdhaam ke maalik ban jaate ho।

om shanti। shiv bhagvaanuvaach, apne ko aatma samajhkar baitho। baap farmaate hain shiv bhagvaanuvaach maana hi shivbaaba samjhaate hain bachche apne ko aatma samajhkar baitho kyonki tum sab brothers ho। ek hi baap ke bachche ho। ek hi baap se varsa lena hai, hoobhu jaise 5 hazaar varsha pahle baap se varsa liya tha। aadi sanaatan devi-devtaaon ki raajdhaani mein the। baap baith samjhaate hain tum sooryavanshi arthaat vishwa ke maalik kaise ban sakte ho। mujh apne baap ko yaad karo। tum sab aatmaayen bhaai-bhaai ho। oonch te oonch bhagwan ek hi hai। us sachche saaheb ke bachche saahebjaade hain। yeh baap baith samjhaate hain, unki shreemat par buddhi ka yog lagaayenge to tumhaare paap sab kat jaayenge। sab duhkh door ho jaayenge। baap se jab hamaari aankhen milti hain to sab duhkh door ho jaate hain। aankhe milaane ka bhi arth samjhaate hain। apne ko aatma samajh baap ko yaad karo, yeh hai yaad ki yaatra। isko yog agni bhi kaha jaata hai। is yog agni se tumhaare jo janma-janmaantar ke paap hain, woh bhasma ho jaayenge। yeh hai hi duhkhadhaam। sabhi narkavaasi hain। tumne bahut paap kiye hain, isko kaha jaata hai raavan raajya। satayug ko kaha jaata hai raam-raajya। tum aise samjha sakte ho। bhal kitni bhi badi sabha baithi ho, bhaashan karne mein harja thode hi hai। tum to bhagvaanuvaach kehte rehte ho। shiv bhagvaanuvaach - ham sab aatmaayen unki santaan hain, brothers hain। baaki shreekrishna ki koi santaan the, aise nahin kahenge। na itni raaniyaan hi thi। shreekrishna ka to jab svayanvar hota hai, naam hi badal jaata hai। haan, aise kahenge lakshmi-naaraayan ke bachche the। raadhe-krishna hi svayanvar ke baad lakshmi-naaraayan bante hain tab ek bachcha hota hai। phir unki dynasty chalti hai। tum bachchon ko ab maamekam yaad karna hai। deh ke sab dharma chhodo, baap ko yaad karo to tumhaare sab paap kat jaayenge। satopradhaan ban svarga mein jaayenge। svarga mein koi duhkh hota nahin। narka mein athaah duhkh hai। sukh ka naam-nishaan nahin। aise yukti se batlaana chaahiye। shiv bhagvaanuvaach - he bachchon, is samay tum aatmaaen patit ho, ab paavan kaise bano? mujhe bulaaya hi hai - he patit-paavan aao। paavan hote hi hain satayug mein, patit hote hain kaliyug mein। kaliyug ke baad phir satayug zaroor banna hai। nai duniya ki sthaapna, puraani duniya ka vinaash hota hai। gaayan bhi hai brahma dvaara sthaapna। ham brahmaakumaar-kumaariyaan adopted children hain। ham hain brahman choti। viraat roop bhi hai na। pahle brahman zaroor banna pade। brahma bhi brahman hai। devtaayen hain hi satayug mein। satayug mein sada sukh hai। duhkh ka naam nahin। kaliyug mein aparmaapaar duhkh hain, sab duhkhi hain। aisa koi nahin hoga jisko duhkh na ho। yeh hai raavan raajya। yeh raavan bhaarat ka number one dushman hai। har ek mein 5 vikaar hain। satayug mein koi vikaar nahin hote। woh hai pavitra grihastha dharma। abhi to duhkh ke pahaad gire hue hain, aur bhi girne hain। yeh itne bombs aadi banaate rehte hain, rakhne liye thode hi hain। bahut refine kar rahe hain phir rehearsal hogi, phir final hoga। abhi samay bahut thoda hai, drama to apne samay par poora hoga na।

pahle-pahle shiv baba ka gyaan hona chaahiye। kuchh bhi bhaashan aadi shuru karte ho to hamesha pahle-pahle kehna hai - shivaae namah… kyonki shivbaaba ki jo mahima hai woh aur koi ki nahin ho sakti। shiv jayanti hi heere tulya hai। shreekrishna ke charitra aadi kuchh hain nahin। satayug mein to chhote bachche bhi satopradhaan hi hote hain। bachchon mein koi chanchalta aadi nahin hoti। shreekrishna ke liye dikhaate hain - makkhan khaate the, yeh karte the, yeh to mahima ke badle aur hi glaani karte hain। kitna khushi mein aakar kehte eeshvar sarvavyaapi hai। tere mein bhi hai, mere mein bhi hai। yeh badi bhaari glaani hai parantu tamopradhaan manushya in baaton ko samajh nahin sakte। to pahle-pahle baap ka parichay dena chaahiye - woh niraakaar baap hai, jinka naam hi hai kalyaankaari shiv, sarva ka sadgati daata। woh niraakaar baap sukh ka saagar, shanti ka saagar hai। ab itna duhkh kyon hua hai? kyonki raavan raajya hai। raavan hai sabka dushman, usko maarte bhi hain, parantu marta nahin। yahaan koi ek duhkh nahin hai, aparmaapaar duhkh hain। satayug mein hai aparmaapaar sukh। 5 hazaar varsha pahle behad ke baap ke bachche bane the aur yeh varsa baap se liya tha। shivbaaba aate hain zaroor, kuchh to aakar karte hain na। accurate karte hain tab to mahima gaai jaati hai। shiv raatri bhi kehte hain phir hai shreekrishna ki raatri। ab shivraatri aur shreekrishna ki raatri ko bhi samajhna chaahiye। shiv to aate hi hain behad ki raat mein। shreekrishna ka janma amritvele hota hai, na ki raatri ko। shiv ki raatri manaate hain parantu unki koi tithi taareekh nahin। shreekrishna ka janma hota hai amritvele। amritvela sabse shubh muhoortta maana jaata hai। vo log shreekrishna ka janma 12 baje manaate hain parantu woh prabhaat to hui nahin। prabhaat savere 2-3 baje ko kaha jaata hai jabki simran bhi kar sake। aise thode hi 12 baje vikaar se uthkar koi bhagwan ka naam bhi lete honge, bilkul nahin। amritvela 12 baje ko nahin kaha jaata। us samay to manushya patit gande hote hain। vaayumandal hi saara kharaab hota hai। adhaai baje thode hi koi uthta hai। 3-4 baje ka samay amritvela hai। us samay uthkar manushya bhakti karte hain, yeh time to manushyon ne banaaye hain, parantu woh koi samay hai nahin। to tum shreekrishna ki vela nikaal sakte ho। shiv ki vela kuchh bhi nahin nikaal sakte। yeh to khud hi aakar samjhaate hain। to pahle-pahle mahima bataani hai shivbaaba ki। geet pichhaadi mein nahin, pahle bajaana chaahiye। shivbaaba sabse meetha baba hai, unse behad ka varsa milta hai। aaj se 5 hazaar varsha pahle yeh shreekrishna satayug ka pahla prince tha। vahaan aparmaapaar sukh the। abhi bhi svarga ka gaayan karte rehte hain। koi marta hai to kahenge phalaana svarga gaya। are, abhi to narka hai। svarga ho to svarga mein punarjanma le saken।

samjhaana chaahiye hamaare paas to itne varsho ka anubhav hai, woh sirf 15 minute mein to nahin samjha sakte, ismen to time chaahiye। pahle-pahle to ek second ki baat sunaate hain, behad ka baap jo duhkh harta sukh karta hai, unka parichay dete hain। woh ham sab aatmaon ka baap hai। ham bi.ke. sab shivbaaba ki shreemat par chalte hain। baap kehte hain tum sab bhaai-bhaai ho, main tumhaara baap hoon। main 5 hazaar varsha pahle aaya tha, tab to shiv jayanti manaate ho। svarga mein kuchh manaaya nahin jaata। shivjayanti hoti hai, jiska phir bhakti maarga mein yaadgaar manaaya jaata hai। yeh geeta episode chal raha hai। nai duniya ki sthaapna brahma dvaara, puraani duniya ka vinaash shankar dvaara। ab is puraani duniya ka vaayumandal to tum dekh rahe ho, is patit duniya ka vinaash zaroor hona hai isliye kehte hain paavan duniya mein le chalo। athaah duhkh hain - ladaai, maut, vidhvaapna, jeevghaat karna....। satayug mein to apaar sukhon ka raajya tha। yeh em object ka chitra to zaroor vahaan le jaana chaahiye। yeh lakshmi-naaraayan vishwa ke maalik the। 5 hazaar varsha ki baat sunaate hain - inhonne kaise yeh janma paaya? kaun se karma kiye jo yeh banen? karma-akarma-vikarma ki gati baap hi samjhaate hain। satayug mein karma, akarma ho jaate hain। yahaan to raavan raajya hone kaaran karma, vikarma ban jaate hain isliye isko paap aatmaon ki duniya kaha jaata hai। len-den bhi paap aatmaon se hi hai। pet mein hi bachcha hota hai to sagaai kar dete hain। kitni criminal drishti hai। yahaan hai hi criminal ized। satayug ko kaha jaata hai civilized। yahaan aankhen bahut paap karti hain। vahaan koi paap nahin karte। satayug se lekar kaliyug ant tak history-geography repeat hoti hai। yeh to jaanna chaahiye na। duhkhadhaam sukhdhaam kyon kaha jaata hai? saara madaar hai patit aur paavan hone par isliye baap kehte hain kaam mahaashatru hai, isko jeetne se tum jagatjeet banenge। aadhaakalpa pavitra duniya thi, jismen shreshtha devta the। ab to bhrashtaachaari hain। ek taraph kehte bhi hain yeh bhrashtaachaari duniya hai phir sabko shri shri kehte rehte, jo aata hai woh bol dete hain। yeh sab samajhna hai। ab to maut saamne khada hai। baap kehte hain maamekam yaad karo to paap kat jaayenge। tum satopradhaan ban jaayenge। sukhdhaam ke maalik banenge। abhi to hai hi duhkh। kitna bhi ve log conference karen, sangathan karen parantu inse kuchh hona nahin hai। seedhi neeche utarte hi jaate hain। baap apna kaarya apne bachchon dvaara kar rahe hain। tumne pukaara hai patit-paavan aao, to main apne samay par aaya hua hoon। yada yadaahi dharmasya..... iska arth bhi nahin jaante। bulaate hain to zaroor khud patit hain। baap kehte hain raavan ne tumko patit banaaya hai, ab main paavan banaane aaya hoon। woh paavan duniya thi। ab patit duniya hai। 5 vikaar sabmen hain, aparmaapaar duhkh hain। sab taraph ashaanti hi ashaanti hai। jab tum bilkul tamopradhaan, paap aatma ban jaate ho tab main aata hoon। jo mujhe sarvavyaapi kah mera apkaar karte hain, aise-aise ka bhi main upkaar karne aata hoon। mujhe tum nimantran dete ho ki is patit raavan ki duniya mein aao। patit shareer mein aao। mujhe bhi rath to chaahiye na। paavan rath to chaahiye nahin। raavan raajya mein hain hi patit। paavan koi hai nahin। sab vikaar se hi paida hote hain। yeh vicious world hai, woh hai viceless world। ab tum tamopradhaan se satopradhaan kaise banenge? patit-paavan to main hi hoon। mere saath yog lagaao, bhaarat ka praacheen raajayog yeh hai। aayenge bhi zaroor grihastha maarga mein। kaise wonderful reeti aate hain, yeh pita bhi hai to maa bhi hai kyonki gau mukh chaahiye, jisse amrit nikle। to yeh maat-pita hai, phir maataaon ko sambhaalne ke liye sarasvati ko head rakha hai, unko kaha jaata hai jagat amba। kaali maata kehte hain। aise kaale koi shareer hote hain kya! shreekrishna ko kaala kar diya hai kyonki kaam chita par chadh kaale ban gaye hain। shreekrishna hi saanvara phir gora banta hai। in sab baaton ko samajhne liye bhi time chaahiye। koton mein koi, koi mein bhi koi ki buddhi mein baithta hoga kyonki sabhi mein 5 vikaar pravesh hain। tum yeh baat sabha mein bhi samjha sakte ho kyonki koi ko bhi bolne ka hak hai, aisa mauka lena chaahiye। official sabha mein koi beech mein prashn aadi nahin karte hain। nahin sunna hai to shanti se chale jaao, aavaaz na karo। aise-aise baith samjhaao। abhi to apaar duhkh hain। duhkh ke pahaad girne hain। ham baap ko, rachna ko jaante hain। tum to kiska bhi occupation nahin jaante ho, baap ne bhaarat ko paradise kab aur kaise banaaya tha - yeh tum nahin jaante ho, aao to samjhaayen। 84 janma kaise lete hain? 7 din ka course lo to tumko 21 janma ke liye paap aatma se punya aatma bana denge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) karma-akarma-vikarma ki guhya gati jo baap ne samjhaai hai, woh buddhi mein rakh paap aatmaon se ab len-den nahin karni hai।

2) shreemat par apna buddhiyog ek baap se lagaana hai। satopradhaan banne ka purooshaartha karna hai। duhkhadhaam ko sukh-dhaam banaane ke liye patit se paavan banne ka purooshaartha karna hai। criminal drishti ko badalna hai।

vardaan:- knowledgeful ban sarva vyartha ke prashnon ko yagya mein svaaha karne vaale vaale nirvighna bhav

jab koi vighna aate hain to kya - kyon ke anek prashnon mein chale jaate ho, prashnachit banna arthaat pareshaan hona। knowledgeful ban yagya mein sarva vyartha prashnon ko svaaha kar do to aapka bhi time bachega aur doosron ka bhi time bach jaayega, isse sahaj hi nirvighna ban jaayenge। nishchay aur vijay janma siddha adhikaar hai - is shaan mein raho to kabhi bhi pareshaan nahin honge।

slogan:- sada utsaah mein rehna aur doosron ko utsaah dilaana-yahi aapka occupation hai।