Murli du jour du jeudi 8 août 2024

08-08-2024 praatahmurli om shanti "baapdaada"' madhuban

“meethe bachche - baap, teacher aur satguru yeh teen akshar yaad karo to anek shiphten (visheshtaayen) aa jaayengi''

prashn:- kin bachchon ke har kadam mein padmon ki kamaai jama hoti rehti hai?

uttar:- jo apna har kadam service mein badhaate rehte hain, vahi padmon ki kamaai jama karte hain। agar baba ki service mein kadam nahin uthaayenge to padma kaise paayenge। service hi kadam mein padma deti hai, isi se padmaapadmapti bante ho।

prashn:- kis raaz ko jaanne ke kaaran tum bachche sabhi ke kalyaankaari bante ho?

uttar:- baba ne ham bachchon ko yeh raaz samjhaaya hai ki sabhi ki yeh ek hi hatti hai, yahaan sabko aana hi hai। yeh bahut guhya raaz hai। is raaz ko jaanne vaale bachche hi sabke kalyaankaari bante hain।

om shanti। roohaani baap ke roohaani bachche yeh to har ek jaante honge ki baba hamaara baap bhi hai, teacher bhi hai aur satguru bhi hai। bachche jaante hain, jaante hue bhi ghadi-ghadi bhool jaate hain। yahaan jo baithe hain, woh jaante to honge na parantu bhool jaate hain। duniya vaale to bilkul nahin jaante। baap kehte hain sirf yeh teen akshar bhi yaad rahe to bahut service kar sakte hain। pradarshani athva museum mein tumhaare paas bahut aate hain, ghar mein bhi mitra-sambandhi aadi bahut aate hain। koi bhi aaye to samjhaana chaahiye ki jisko bhagwan kaha jaata hai woh baba bhi hai, teacher bhi hai aur satguru bhi hai। yeh yaad ho to bhi theek, aur koi ki yaad na aaye। aur koi ko to aise kah na saken। tum bachche jaante ho hamaara baba baap bhi hai, teacher bhi hai, satguru bhi hai। kitna sahaj hai। parantu koi-koi ki to aisi pattharbuddhi hai jo yeh 3 akshar bhi buddhi mein dhaaran nahin kar sakte, bhool jaate hain। baba hamko manushya se devta banaate hain kyonki behad ka baap hai na। behad ka baap hai to zaroor behad ka varsa hi denge। behad ka varsa hai devtaaon ke paas। itna sirf yaad karen to ghar mein bhi bahut service kar sakte hain। parantu yeh bhi bhool jaane ke kaaran kisko bata nahin sakte। ghadi-ghadi bhool jaate hain kyonki saare kalpa ke bhoole hue hain। ab baap baith samjhaate hain। vaastav mein yeh gyaan bahut simple hai, baaki yaad ki yaatra se sampoorn banna, ismen mehnat hai। baba hamaara baap bhi hai, shiksha bhi dete hain, varsa bhi dete hain, pavitra bhi banaate hain kyonki patit-paavan baap hai, sirf kehte hain ki sabko yahi kaho ki mujhe yaad karo। baba ki service mein zara bhi kadam nahin utha to woh phir padma kaise paayenge! padmapti to service se hi ban sakte hain। service hi kadam mein padma le aati hai। service ke liye bachche kahaan-kahaan se bhaagte rehte hain। kitne kadam uthaaye jaate hain। padma to unhon ko milega na। yeh bhi buddhi kehti hai pahle shoodra ko brahman banaana pade। brahman hi nahin banaayenge to kya banenge! service to chaahiye na। bachchon ko service ka samaachaar bhi isliye sunaaya jaata hai ki temptation ho। service se hi padma mile hain। sirf ek baat hi sunaao jo duniya mein aur koi nahin jaante। behad ka baap, baap hai। parantu baap ka koi ko pata nahin hai। sirf aise hi god father kehte rehte hain। woh teacher hai - yeh to koi ki buddhi mein nahin hoga। student ki buddhi mein hamesha teacher yaad rehta hai, jo poori reeti nahin padhte hain unko anapdha kaha jaata hai। baba kehte hain harja nahin hai। tum kuchh bhi na padhe hue yeh to samajh sakte ho na ki ham bhaai-bhaai hain। hamaara baap behad ka hai। baap aate hi hain ek dharma ki sthaapna karne, brahma dvaara karte hain। parantu log kuchh bhi samajhte nahin hain। eeshvar agar kabhi na aaya hua hota to unko bulaate hi kyon ki he liberator aao, he patit-paavan aao। jabki patit-paavan ko yaad karte hain phir shaastra kyon padhte? teerthon par kyon jaate? vahaan baitha hai kya? koi jaante hi nahin jabki patit-paavan eeshvar hai to ganga snaan aadi se koi paavan ho kaise sakte। svarga mein koi ja kaise sakte, janma to yahaan hi lena hai। nai duniya aur puraani duniya mein pharka to hai na। isko satayug thode hi kahenge। ab to kaliyug hai na। manushyon ki to bilkul pattharbuddhi hai। jahaan thoda sukh dekhte hain to svarga samajh lete hain। yeh baap hi samjhaate hain, baap koi gaali nahin dete hain। baap shiksha bhi dete hain, sabko sadgati bhi dete hain। bhagwan baap hai to baap se zaroor kuchh milna chaahiye। baba akshar bhi aisa hai jo unse varse ki khushbu zaroor aati hai। aur bhal kitna bhi kaaka, maama aadi hain parantu unse varse ki khushbu nahin aati। antarmukh ho vichaar karna hai ki baap theek kehte hain। guru ke paas koi jaaydaad hoti nahin। woh to khud hi gharbaar chhodte hain। tumne sannyaas kiya hai vikaaron ka। woh to kah dete hain hamne gharbaar chhoda, tum kehte ho ham saari duniya ke vikaaron ka sannyaas karte hain। nai duniya mein jaana kitna sahaj hai। ham sannyaas karte hain saari puraani srishti, tamopradhaan duniya ka। satayug hai nai duniya। yeh bhi jaante ho nai duniya thi zaroor। sab gaate hain। svarga kaha hi jaata hai nai duniya ko। parantu vo log sirf kahne maatra kah dete hain, samajh kuchh nahin। to baap bachchon ko kehte hain sirf yeh vichaar karo - baba, hamaara baap bhi hai, shikshak aur satguru bhi hai। sabko le jaayenge। akshar hi do hain - manamnaabhav, ismen sab aa jaata hai, parantu yeh bhi bhool jaate hain। pata nahin buddhi mein kya-kya yaad rehta hai। nahin to roz likhkar do ki itna samay ham kis avastha mein baithe the? tum baithe ho baap, teacher, satguru ke saamne to vahi yaad aana chaahiye na। student ko teacher hi yaad aayega na parantu yahaan maaya hai na। ekdam maatha hi mood deti hai। saara raajya-bhaagya hi le leti hai। tumko pata nahin padta hai। aaye to the varsa lene parantu milta kuchh bhi nahin। aise hi kahenge na। bhal svarga mein to chalenge, parantu woh koi badi baat thode hi hai। yahaan aaye bhal parantu padhe nahin, phir svarga mein to jaayenge na। yahaan to baithe hai na। samajhte hain svarga mein jaana hai, phir kya bhi banen। woh to padhaai nahin hui na। thoda bhi suna to uska phal mil jaata hai। padhaai se to badi scholarship milti hai। baap se oonch te oonch pad paana hai to purooshaartha karna pade। padhaai yaad hogi to 84 ka chakra bhi yaad aa jaayega। yahaan baithne se sab yaad aana chaahiye। parantu yeh bhi yaad aata nahin hai। agar yaad aaye to kisko sunaayen bhi। chitra to sabke paas hain। shiv ke chitra par tum koi ko sunaayenge to kabhi gussa nahin karenge। bolo, aao to ham aapko bataayen ki yeh shiv behad ka baap hai na। inke saath aapka kya sambandh hai? aise phaaltu chitra to nahin hoga। shiv ke liye zaroor kahenge yeh bhagwan hai, bhagwan to niraakaar hi hota hai। unko baap kaha jaata hai। woh shiksha bhi dete hain। tumhaari aatma shiksha leti hai। aatma hi sab kuchh karti hai। teacher bhi aatma banti hai। baap bhi is rath par aakar padhaate hain। satayug ki sthaapna karte hain। vahaan kaliyug ka naam nishaan hi nahin। manushya kahaan se aayenge। serviceable bachchon ko saara din khyaal chalte rehte hain। service nahin karte to samjha jaata hai buddhi hi nahin chalti। jaise buddhu baithe hain। baap ko samajh nahin sakte। patit-paavan baap ko yaad karne se hi varsa milega। yaad karte-karte marenge to baap ki sab milkiyat milegi। behad ke baap ki milkiyat hai svarga।

bachchon ke paas badge bhi hai, ghar mein mitra-sambandhi aadi to bahut aate hain। koi marta hai to bhi bahut aate hain। unhon ki bhi tum bahut achhi service kar sakte ho। shivbaaba ka chitra to bahut achha hai। bhal bada hi rakh do, ismen koi kuchh kahenge nahin। aise nahin kahenge ki yeh brahma hai। yeh hai gupta। tum gupta bhi samjha sakte ho। sirf shiv ka chitra rakho aur sab chitra utha do। yeh shivbaaba baap, teacher, satguru hai। yeh aate hain nai duniya ki sthaapna karne aur sangam par hi aate hain। yeh gyaan to buddhi mein hai na। bolo, shivbaaba ko yaad karo aur kisi ko yaad nahin karo। shivbaaba patit-paavan hai, woh kehte hain mujhe yaad karo to tum mere saath aakar milenge। tum gupta service kar sakte ho। yeh lakshmi-naaraayan is knowledge se hi bane hain। kahenge shivbaaba niraakaar hai, woh kaise aate hain? are, tumhaari aatma bhi to niraakaar hai, woh kaise aati hai? woh bhi oopar se aati hai na, part bajaane। yeh bhi baap aakar samjhaate hain। bail par to aa na sake। bolega kaise? saadhaaran boodhe tan mein aate hain। samjhaane ki bhi badi yukti chaahiye। koi kehte tum bhakti nahin karte ho? bolo, ham to sab kuchh karte hain। yukti se chalna hota hai। kisko uthaane liye sochna chaahiye - kya yukti rachen? koi ko naaraaz bhi nahin karna hai। grihastha vyavhaar mein rehte sirf pavitra rehna hai। tum kehte ho - baba, service nahin milti hai। are, service to bahut kar sakte ho। ganga ji par jaakar baith jaao। bolo, yeh paani mein snaan karne se kya hoga? kya paavan ban jaayenge? tum to bhagwan ko kehte ho he patit-paavan aao, aakar paavan banaao। phir woh patit-paavan hai ya yeh? aisi nadiyaan to dher hain। baap patit-paavan to ek hi hai। yeh paani ki nadiyaan to sadaiv hain hi। baap ko to paavan banaane ke liye aana padta hai। aate bhi hain purooshottam sangamayug par, aakar paavan banaate hain। vahaan koi patit hota nahin। naam hi hai svarga, nai duniya। abhi to hai puraani duniya। is sangamayug ka tumko hi pata hai aur koi samajh na sake। baap to anek prakaar ki service ki yuktiyaan samjhaate hain। buddhu bhi na bano। kehte hain amarnaath par bhi kabootar hote hain। pigeon paigaam pahunchaate hain। aise nahin, paramatma ka paigaam oopar se kabootar laayenge। yeh bhi sikhlaate hain। unke paanv mein likhkar baandhenge to le jaayega। unko sahaj reeti daana milta hai to aur kahaan bhatakne ki darkaar nahin। tumko bhi yahaan daana milta hai, tumhaari buddhi mein hai vishwa ki baadshaahi, jo yahaan se milti hai। woh phir samajhte hain daana yahaan milta hai to phir hir jaate hain। tum to chaitanya ho, tumko avinaashi gyaan ratnon ka daana milta hai। shaastron mein bhi hai chidiyaaon ne saagar ko sukhaaya। bahut kathaayen likh di hain। manushya kahenge sat। phir kehte hain saagar se devta nikle। ratnon ki thaaliyaan bharkar le aaye। kahege sat। ab samudra se devta kaise niklenge? samudra mein manushya va devta rehte hain kya! kuchh bhi samajhte nahin। janma janmaantar jhooth hi padhte-sunte rehte hain isliye kehte hain jhoothi maaya…। sachche aur jhoothe sansaar mein kitna raat-din ka pharka hai! jhooth bolte-bolte insolvent ban pade hain। tum kitna yukti se samjhaate ho, phir bhi koton mein koi ko hi buddhi mein baithta hai। yeh hai bahut sahaj gyaan aur sahaj yog। baap, teacher, satguru ko yaad karne se unki shiphten bhi buddhi mein aa jaayengi। apni jaanch karni chaahiye। ham sab baba ko yaad karte hain va aur taraph buddhi jaati hai? tumhaari buddhi ko abhi samajh milti hai। kitni meethi-meethi baaten baap samjhaate hain। yuktiyaan bataate hain। tum koi ko baithkar samjhaayenge phir tumhaare dushman bhi nahin banenge। shivbaaba hi tumhaara baap, teacher, satguru hai, unko yaad karo। samjhaane ki yukti rachni chaahiye। brahma ke chitra par bahut peechhe padte hain। shiv ka chitra dekh kabhi udaayenge nahin। are, yeh to aatmaon ka baap hai na। to baap ko yaad karo, inse bahuton ko phaayda ho sakta hai। inko yaad karne se tum patit se paavan ban jaayenge। woh sabka baap hai। ek baap ke sivaae koi ki yaad nahin aani chaahiye aur sang tod ek sang jodna hai। yeh hai kiske kalyaan karne ki yuktiyaan। baap ko yaad hi nahin kar sakenge to paavan kaise banenge। ghar mein bhi tum bahut service kar sakte ho। bahut mitra-sambandhi aadi tumko milenge। bhinna-bhinna yuktiyaan racho। bahuton ka kalyaan kar sakte ho। hatti to ek hi hai। aur koi hatti hai nahin, to jaayenge kahaan? achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) grihastha vyavhaar mein bahut yukti se chalna hai, koi ko naaraaz bhi nahin karna hai, pavitra bhi zaroor banna hai।

2) ek baap se avinaashi gyaan ratnon ka daana le apni buddhi roopi jholi bharpoor rakhni hai, buddhi ko bhatkaana nahin hai, paigambar ban sabko baap ka paigaam dena hai।

vardaan:- behad ki vairaagya vritti dvaara sarva lagaavon se mukta rahne vaale sachche raajarishi bhav

raajarishi arthaat ek taraph raajya doosre taraph rishi arthaat behad ke vairaagi। agar kahaan bhi chaahe apne mein, chaahe vyakti mein, chaahe vastu mein kahaan bhi lagaav hai to raajarishi nahin। jiska sankalp maatra bhi thoda lagaav hai uske do naanv mein paanv hue, phir na yahaan ke rahenge na vahaan ke। isliye raajarishi bano, behad ke vairaagi bano arthaat ek baap doosra na koi - yeh paath pakka karo।

slogan:- krodh agni roop hai jo khud ko bhi jalaata aur doosron ko bhi jala deta hai।