Murli du jour du dimanche 18 août 2024

18-08-24 praatahmurli om shanti ''avyakt-baapdaada'' revise 20-02-2001 madhuban

“shiv jayanti, vrat lene aur sarva samarpan hone ka yaadgaar hai''

aaj trimoorti rachta shiv baap apne poojya saaligraamon se milne aaye hain। milna bhi hai to aaj manaana bhi hai। aap sabhi vishwa ke chaaron or se baapdaada ki jayanti bade umang-utsaah se manaane ke liye pahunche ho। bachche kehte hain baap ki jayanti manaane aaye hain aur baap kehte hain bachchon ki jayanti manaane aaye hain। aap sab bhi apni jayanti alaukik birth de manaane ke liye aaye hain। saare kalpa mein aisa nyaara aur pyaara birth de kabhi hota nahin hai। saare kalpa mein dekha hai, aisa birth de manaaya hai, jo baap ka bhi ho aur saath mein bachchon ka bhi ho? kyonki vishwa parivartan ke kaarya mein shiv baap brahma daada ke saath-saath brahman bhi zaroor chaahiye। braahmanon ke bina yagya saphal nahin hota ha isliye baap aur bachchon ka ikattha janma din hai arthaat jayanti hai। to bachche dil hi dil mein baap ko mubaarak de rahe hain aur baap har brahman bachche ko alaukik janma ki arab-kharab se bhi jyaada dil ki duaaon ke saath mubaarak de rahe hain। to mubaarak ho, mubaarak ho, mubaarak ho! (sabhi ne haath hilaaya) bahut achha - ek haath ki taali achhi lagti hai, do haath ki nahin। bahut khushi hai na, to haath rookte nahin hain, chal padte hain।

duniya mein bhakta log bhi shiv jayanti bade dhoomdhaam se manaate hain। lekin woh manaate hain ek din ka jaagran va ek din ka vrat। aap bachchon ne agyaan neend se jaagran ka sankalp ek din ke liye nahin kiya hai, jaagran woh bhi karte lekin aapne ek sangam yug ka heere tulya janma jaagran kiya hai aur kar rahe hain। jaag gaye hain na, abhi phir soyenge to nahin na! ya thoda-thoda sa so jaayenge! achha soye nahin to thoda jhutka kha lenge! yeh jaagran aisa jaagran hai jo svayan to jaag jaate hain lekin auron ko bhi jagaate hain। gyaan ki jeevan mein jaagran maana andhakaar se roshni mein aana। yeh alaukik jaagran sabhi ko achha lagta hai na! jab se janma liya, jayanti manaai tab se kya-kya vrat liya? yaad hai na! bachche kehte hain yaad to kya, hamaari to natural jeevan hi vrat ki ho gai। pavitra aahaar, pavitra vyavhaar aur pavitra vichaar yeh jeevan ban gai। ek maas ke liye, do maas ke liye nahin, jeevan hi vrat dhaaran karne vaali ban gai। natural ban gai aur nature ban gai। pavitrata ki nature ban gai hai na! nature ban gai hai ya banaani padti hai? ban gai hai na? sirf kaandh hilaao bas। ban gai? apvitrata nature se samaapta ho gai aur pavitrata jeevan mein sama gai। aisi heere tulya shiv jayanti va saaligraam jayanti mana li। chaaron or ke desh-videsh ke bachche bhi saath-saath mana rahe hain। baapdaada dekh rahe hain ki chaaron or baap saath aur aapke saath woh bhi kitne khush ho rahe hain।

aaj ke din vishesh bhakta log aapka yaadgaar bali bhi chadhaate hain। aap sab man-vachan-karma se baap ke aage samarpan hote ho, usi ka yaadgaar bhakta log apne ko bali nahin chadhaate, bakre ko bali chadha dete hain। aur koi nahin mila, bakra hi kyon mila? iska bhi rahasya aap jaante ho, kyonki sabse bade te bada deh-abhimaan ka kaaran hai “main pan''। yeh “main pan'' jab arpan kar lete ho tab hi brahman bante ho। to bakra bhi kya karta hai? mein, mein… to yeh deh-abhimaan ke main-pan ki nishaani hai aur deh-abhimaan ka main-pan bahut sookshm bhi hai aur bhinna-bhinna prakaar ka bhi hai। sabse pahla main pan hai - main shareer hoon, phalaana hoon। phir aage chalo to sambandh mein phansane ka bhi bhinna-bhinna main-pan hai। aur aage chalo to bhinna-bhinna position ka bhi main-pan hai। usse bhi sookshm apni visheshta ka main-pan oopar se neeche le aata। visheshta har ek mein hai, aisi koi bhi manushya aatma nahin hai jismen chaahe sthool, chaahe sookshm koi bhi visheshta na ho, yeh nahin। gyaani jeevan mein bhi har brahman ke andar kam se kam ek visheshta avashya hai, lekin gyaani jeevan mein visheshta parmaatma den hai, paramatma ki saugaat hai। jab paramatma ki den ko deh-abhimaan vash main-pan mein laate hain, main aisa hoon, yeh royal abhimaan bade te bada main-pan hai। to samarpan to hue hi hain lekin aage kya dekhna hai?

teachers sabhi apne ko kya kehti hain? samarpan hain na! teachers sabhi samarpan hain? achha-pravritti mein rahne vaale samarpan hain? haan ya na? paandav samarpan hain? bahut achha mubaarak ho। aage kya karna hai? samarpan to ho gaye, bahut achha। abhi aage yeh check karna hai, bataayen kya? aap kahenge samarpan to hain na phir kya karna hai? to ek hai samarpan aur aage hai sarva samarpan। sarva mein vishesh underline hai apne man-buddhi-sanskaar sahit samarpan kyonki jitna aage badhte ho, purushaartha mein teevragti se kadam uthaate ho aur utha bhi rahe ho lekin vartamaan vaayumandal pramaan brahman jeevan mein bhi man aur buddhi ke oopar vyartha ka prabhaav, bura nahin, bura khatma hua lekin vyartha aur negative ka prabhaav jyaada hai, isliye yathaartha aur satya nirnay karne ki mahsoosta shakti kam ho jaati hai। samajh se mahsoosta hoti hai - haan yeh wrong hai, yeh theek nahin hai lekin ek hai vivek se mahsoosta, doosra hai dil se mahsoosta। agar dil se koi bhi baat ko mahsoos kar liya to duniya badal jaae lekin svayan nahin badlega। aur sanskaar, puraane 63 janmon ke hone ke kaaran natural ho gaye hain, jisko doosre shabdon mein kehte ho yeh galti nahin hai lekin meri nature hai। to puraane sanskaar kuchh mitte hain, kuchh dab jaate hain phir nikal aate hain। lekin sarva samarpan ka arth hai - man ka bhaav aur bhaavna har aatma ke prati parivartan ho jaae, jisko baapdaada kehte hain kaisi bhi aatma ho, bhinna-bhinna to hogi hi, kalpa vriksha hai, variety nahin ho to shobha nahin lekin har aatma ke prati shubh bhaavna aur shubh kaamna। ashubh bhaavna ko bhi parivartan kar shubh bhaavna rakhna va shubh bhaavna dena। har aatma ke prati shubh kaamna, yeh avashya badlenge। aisa nahin ki yeh to badalna hi nahin hai, uske prati judge banke judgement nahin do, yeh badalna hi nahin hai। jab challenge ki hai ki prakriti ko bhi parivartan kar satoguni banaana hi hai, banaana hi hai। banegi, nahin banengi - question nahin, banaana hi hai। hi shabd ko underline kiya hai। to kya prakriti badal sakti hai, aatma nahin badal sakti? aatma to prakriti ka purush hai। to prakriti badle purush nahin badle kyon? to vartamaan samay yeh man-buddhi-sanskaar sva ke parivartan aur sarva ke parivartan - yahi seva hai।

sabhi poochhte hain - is varsha mein kya karna hai? to double seva karni hai। ek to sva ko sarva samarpan aur itna sva ko samarpan karo jo aapka vaayumandal, aapka vibration, aapka sang, aapka dil ka sahayog, aapke dil ki duaayen auron ko bhi sahaj parivartan karne mein sahayog den। itna sva parivartan karna hai। sarva samarpit karna hai। ek yeh seva aur doosri hai lok seva, result mein dekha hai ki chaaron or desh mein, videsh mein, gaanv mein sabhi brahman bachchon ne ab tak jo seva ki hai, baap ke muhabbat se ki hai, uski to baapdaada bahut-bahut-bahut mubaarak dete hain। aage kya karna hai?

baapdaada ne dekha jo brahman bane hain, braahmanon ki bhi vriddhi hai aur bhi teevragti ki vriddhi honi hai। lekin saath mein jo lok priy seva ki hai, bhinna-bhinna project dvaara seva ho rahi hai, woh bahut achhi hai। abhi bhinna-bhinna sthaanon par sahayogi aatmaayen achhi nimitta bani hain। sahayogi to bahut achhe hain, ek kadam sahayog ka hai, ek paanv to badhaaya hai lekin doosra paanv hai - sahajyogi, karmayogi। karmayogi ya sahajyogi bhi kuchh kuchh ban gaye hain, yeh bhi stage doosri hai। abhi aisi aatmaayen practical swaroop se stage par part bajaayen। mike stage par hota hai na! to mike ban seva ki stage par pratyaksha swaroop mein bhi aayenge zaroor। aap might ho, woh mike। jaise brahma baap avyakt roop mein might hai, aur aap bachchon ko mike banaaya, aise aap might bano aur aise mike taiyaar karo। hain, bahut achhe-achhe, ummeendavaar fast jaane vaale hain, sirf ab aur aisi aatmaon ke connection ko badhaane ki aavashyakta hai। woh chaahte hain kya karen, kaise karen, unhon ko might ban vidhi aisi sunaao jo laukik occupation aur alaukik seva donon ka balance rakhte hue last so fast, fast so first ke line mein aa jaaen। aise hain, pratyaksha hone hain। sirf connection aur current do, roohaaniyat ki current, vibration, vaayumandal ki current aur vidhi, jo nimitta banen ki balance rakhne vaali jeevan bahut achhi aur sahaj hai। theek hai na! kya karna hai, woh sun liya na!

chhota-chhota guldasta to taiyaar karo। chalo bada guldasta nahin, 5 phoolon ka, 10 phoolon ka guldasta to laao। aur har ek taraph baapdaada ki nazron mein hain। suna! paandav suna? bahut achha।

double foreigners jump nahin lekin ud rahe hain, to pahla guldasta videsh laayega ya bhaarat laayega? kaun laayega? ki donon saath mein laayenge? ek taraph se foreign ka, ek taraph bhaarat ka, donon guldaste stage par aayenge। jaise yeh ceremony manaate hain to woh bhi ceremony manaayenge, donon guldaston ki, bhaarat ki bhi videsh ki bhi। theek hai? videsh vaale kya samajhte hain? theek hai। to doosri season mein laayenge? laana hai? bhaarat vaale laayenge? laukik aur alaukik occupation ke balance vaale। aap jaise sirf brahman jeevan vaale nahin, laukik bhi alaukik bhi, unhon ka prabhaav jyaada hoga। aap logon se to drishti lene aayenge। achha - kya soch rahi hai, jayanti?

naam soch rahi hai kya? yeh nirmala, mohni naam soch rahe hain na! yahaan paandav dekho, bhaarat ke paandav koi kam hain, subhaanaalla hain। yeh dekho, kuchh-kuchh to baithe bhi hain। yeh braayan saamne baitha hai na! (Australia ke braayan bhaai se) guldasta taiyaar karna hai na! bahut achhe-achhe kya naam dete ho, N. si. O., achha। foreign ke N. si. O. vaale haath uthaao। N. si. O. banna sahaj nahin hai, kamaal karna padega। kar sakte hain koi badi baat nahin hai kyonki dharni taiyaar hai। beej bhi pada hua hai sirf paalna ka paani dena hai। abhi beej ko paalna ka paani chaahiye। achha।

teachers bhi bahut aai hain। teachers ko bhi mubaarak hain। aapne hi to seva ki hai na! to seva ki mubaarak। achha। gujraat ka kya haal hai? (gujraat mein bahut bada bhookampa aaya hai) halchal gujraat se shuru hui hai। jyaada halchal gujraat aur videsh mein bhi thoda-thoda shuru hai। darte to nahin ho na! dharni to hilti hai lekin dil to nahin hilti hai na! jahaan dharni hili hai, nuksaan hua hai vahaan se jo aaye hain woh utho। ahamdaabaad vaale bhi utho। achha। dil hili ki dharni hili? kya hua? dil mein thoda aisa-aisa hua? nahin hua! bahaadur hain। baapdaada ne dekha ki bachchon ne apne himmat aur baap ki chhatrachhaaya se achha apna record rakha। koi fail nahin hua, sab paas ho gaye, koi thoda, koi jyaada। nambarvaar to sab hota hi hai har jagah। lekin paas hain। mubaarak hain। sabse jyaada naazuk sthaan se kaun aaye hain? (ek bhuj ki aur ek bhachaau ki behen aai hai) achha, bhuj mein aap to hajaar bhujaaon vaalon ke saath the। achha, paper mein paas। bahut achha kiya। aage bhi hilna nahin। abhi to hota rahega। ghabraana nahin। (roz hota hai) hone do। dekho parivartan to hona hai na! to prakriti bhi apna kaam to karegi na! jab manushya aatmaon ne prakriti ko tamoguni bana diya, to woh apna kaam to karegi na। lekin har khel, drama ke khel mein yeh bhi khel hai। khel ko dekhte hue apni avastha neeche oopar nahin karna। master sarvashaktivaan aatmaon ki sva-sthiti par par-sthiti prabhaav nahin daale। aur hi aatmaon ko maansik pareshaaniyon se chhudaane ke nimitta bano kyonki man ki pareshaani aap meditation se hi mita sakte ho। doctors apna kaam karenge, science vaale apna kaam karenge, government apna kaam karegi, aapka kaam hai man ke pareshaani, tension ko mitaana। tension free jeevan ka daan dena। sahayog dena। jaise vartamaan samay desh videsh vaale sahayogi ban sahayog de rahe hain na! yeh bahut achha kar rahe hain। isse siddha hota hai ki chaahe videsh ho, chaahe koi bhi ho lekin bhaarat desh se pyaar hai। har ek apna-apna kaarya to kar rahe hain, aap apna kar rahe hain। jaise aag lagti hai to aag bujhaane vaale darte nahin hain, bujhaate hain। to aap sab bhi man ke pareshaani ki aag bujhaane vaale ho। achha।

to gujraat majboot hai na! hajaar bhujaaon ki chhatrachhaaya mein ho। kahaan bhi aaye, abhi to gujraat ko dekhkar anubhvi ho gaye ho na। kahaan bhi aaye। dekho prakriti ko koi mana nahin kar sakta hai, gujraat mein aao, aabu mein nahin aao, baambe mein nahin aao, nahin। woh svatantra hai। lekin sabhi ko apne sva-sthiti ko achal-adol aur apne buddhi ko, man ke line ko clear rakhna hai। line clear hogi to touching hogi। baapdaada ne pahle bhi kaha tha unhon ki wireless hai, aapki viceless buddhi hai। kya karna hai, kya hona hai, yeh nirnay spashta aur sheeghra hoga। aise nahin sochte raho baahar niklen, andar baithen, darvaaje par baithen, chhat par baithen। nahin। aapke paanv vahaan hi chalenge jahaan safety hogi। aur agar bahut ghabra jaao, ghabraana to nahin chaahiye, lekin bahut ghabra jaao, bahut dar lage to madhuban asylum ghar aapka hai। darna nahin। abhi to kuchh nahin hai, abhi to sab kuchh hona hai, darna nahin, khel hai। parivartan hona hai na। vinaash nahin, parivartan hona hai। sabmen vairaagya vritti utpanna honi hai। merciful ban sarva shaktiyon dvaara sakaash de raham karo। samjha! achha।

abhi ek second mein man aur buddhi ko ekaagra kar sakte ho? stop, bas stop ho jaae। abhi ek second ke liye man aur buddhi ko ekdam ekaagra bindu, bindu mein sama jaao। achha। (baapdaada ne drill karaai)

chaaron or ke sarva shreshtha brahman aatmaon ko, chaaron or ke sada dridh sankalp ka vrat rakhne vaale achal aatmaon ko, chaaron or ke sarva himmat-hullaas se sva seva aur lok kalyaan ki seva karne vaale mahaan sevaadhaari aatmaon ko, aaj ke shiv jayanti ki, heere tulya jayanti ki, nyaari aur pyaari jayanti ki mubaarak ho, aur duaaon ke saath yaadapyaar aur namaste।

vardaan:- baap ke sneh ko dil mein dhaaran kar sarva aakarshanon se mukta rahne vaale sachche snehi bhav

baap sabhi bachchon ko ek jaisa sneh dete hain lekin bachche apni shakti anusaar sneh ko dhaaran karte hain। jo amritvele ke aadi samay par baap ke sneh ko dhaaran kar lete hain, to dil mein parmaatma sneh samaaya hone ke kaaran aur koi sneh unhein aakarshit nahin karta। agar dil mein poora sneh dhaaran nahin karte to dil mein jagah hone ke kaaran maaya bhinna-bhinna roop se anek sneh mein aakarshit kar leti hai isliye sachche snehi ban parmaatma pyaar se bharpoor raho।

slogan:- deh, deh ki puraani duniya aur sambandhon se oopar udne vaale hi indraprastha nivaasi hain।

soochna:- aaj maas ka teesra ravivaar antarraashtreey yog divas hai, sabhi brahma vatsa sangathit roop mein saayan 6.30 se 7.30 baje tak vishesh merciful baap ke saath apne master merciful swaroop mein sthit ho, sarva aatmaon ko pavitrata ka bal den। pavitra vibration vaayumandal mein phailaane ki seva karen।