Murli du jour du mardi 27 août 2024

27-08-2024 praatahmurli om shanti "baapdaada"' madhuban

“meethe bachche - chaitanya avastha mein rah baap ko yaad karna hai, sunna avastha mein chale jaana ya neend karna - yeh koi yog nahin hai''

prashn:- tumhein aankhe banda karke baithne ki mana kyon ki jaati hai?

uttar:- agar tum aankh banda karke baithenge to dukaan ka saara saamaan hi chor chori karke le jaayenge। maaya chor buddhi mein kuchh bhi dhaarna hone nahin degi। aankh banda karke yog mein baithenge to neend aa jaayegi। pata hi nahin chalega isliye aankhe kholkar baithna hai। kaamkaaj karte buddhi se baap ko yaad karna hai। ismen hathayog ki baat nahin hai।

om shanti। roohaani baap kehte hain bachchon ko, yeh bhi bachcha hai na। dehdhaari sab bachche hain। to roohaani baap aatmaon ko kehte hain, aatma hi mukhya hai। yeh to achhi reeti samjho। yahaan jab saamne baithte ho to aise nahin shareer se nyaara ho gum ho jaana hai। shareer se nyaara ho gum ho jaana, yeh koi yaad ke yaatra ki avastha nahin hai। yahaan to sujaag ho baithna hai। chalte phirte, uthte baithte apne ko aatma samajh baap ko yaad karna hai। baap aise nahin kehte yahaan baithe behosh ho jaao। aise bahut baithe-baithe gum ho jaate hain। tumhein to sujaag hokar baithna hai aur phir pavitra bhi banna hai। pavitrata bigar dhaarna nahin hogi, kiska kalyaan nahin kar sakenge, kisko kah nahin sakenge। khud pavitra rehte nahin aur doosre ko kehte hain, woh to pandit ho gaya। miya mitthu bhi nahin banna hai, phir woh dil andar khaata rahega। aise mat samjho ham sunna mein chale jaate hain। aankhe banda ho jaati hain, yeh koi yaad ki avastha nahin hai, ismen chaitanya avastha mein rah baap ko yaad karna hai। neend karna koi yaad karna nahin hai। bachchon ko kai points samjhaai jaati hain। shaastron mein dikhaaya gaya hai - saatveen bhoomika mein chale jaate hain, unko duniya ka pata nahin padta hai। tumko to duniya ka pata hai na। yeh chhi-chhi duniya hai। baap ko koi jaante nahin hain। agar baap ko jaante to srishti chakra ko bhi jaan jaaen। baap batlaate hain yeh chakra kaise phirta hai। manushya punarjanma kaise lete hain। satayug mein bhal badi aayu ho jaati to bhi badsoorat nahin honge। baaki sanyaasiyon ka to hai hathayog। aankhe banda karna, guphaaon mein baithe-baithe badsoorat ban jaana…। tumko to baap kehte hain grihastha vyavhaar mein rehte sujaag rehna hai। sunna mein chale jaana, yeh koi avastha nahin hai। dhandha aadi bhi karna hai, grihastha vyavhaar bhi sambhaalna hai। sunna mein nahin jaana hai। kaam-kaaj karte buddhi se baap ko yaad karna hai। zaroor kaam karenge, aankhe khol-kar karenge na। dhandha aadi sab kuchh karte raho। buddhi yog baap ke saath ho। ismen gaphlat nahin karni hai। dukaan par baithe aankhe banda ho jaayegi to koi saamaan hi le jaayenge aur pata bhi nahin padega। yeh koi avastha nahin। ham deh se nyaare ho jaate hain, yeh sab hathayogiyon ki baaten hain। riddhi siddhi vaale karte hain। baap to achhi reeti baith samjhaate hain, ismen aankhe nahin banda karni hai।

baap kehte hain mitra sambandhiyon ko jo baith yaad karte ho, woh sab bhool jaao। ek baap ko yaad karna hai। sivaae yaad ki yaatra ke paap kat nahin sakte। bhog le jaate hain, gum ho jaate hain sookshm vatan mein। ismen kya hota hai? jitna samay vahaan hain vikarma vinaash ho na saken। shivbaaba ko yaad kar na saken। na baba ki vaani sun sakenge। to ghaata pad jaata hai। parantu yeh drama mein noondh hai isliye jaate hain। phir aakar murli sunte hain isliye baba kehte hain jaao, phauran aao, baitho nahin। khelpaal karna baba ne banda kar diya hai। yeh bhi ghoomna phirna rulna hua na। bhakti maarga mein rulna pitna bahut hota hai kyonki andhiyaara maarga hai na। meera dhyaan mein vaikuntha mein chali jaati thi। woh yog va padhaai thode hi thi। kya usne sadgati ko paaya? svarga jaane laayak bani? janma-janmaantar ke paap kate? bilkul nahin। janma-janmaantar ke paap to baap ki yaad se hi katte hain। baaki saakshaatkaar aadi se koi phaayda nahin hota। yeh to sirf bhakti hai। na yaad hai, na gyaan hai। bhakti maarga mein yeh sikhlaane vaala koi hota hi nahin to sadgati ko bhi paate nahin। bhal kitna bhi saakshaatkaar ho, shuru mein to bachchiyaan aapehi chali jaati thi। mama-baba thode hi jaate the। yeh to shuru mein baba ko sirf sthaapna aur vinaash ka saakshaatkaar hua। peechhe to kuchh nahin hua। ham kisko bhi bhejte nahin hain। haan, bithaakar kah dete baba inki rassi kheencho। woh bhi drama mein hoga to rassi kheenchenge, nahin to nahin। saakshaatkaar to dher hote hain। jaise shuru mein bahut saakshaatkaar karte the, pichhaadi mein bhi bahut saakshaatkaar karenge, mirooa maut malooka shikaar..... itne dher manushya hain, woh sab shareer chhod denge। shareer sahit koi satayug mein va shantidham mein nahin jaayenge। kitne dher manushya hain, sab vinaash ko praapta karenge। baaki ek aadi sanaatan devi-devta dharma ki sthaapna ho rahi hai brahma dvaara। tum bachchiyaan gaanv-gaanv mein jaakar kitni service karti ho। yahi kehti ho ki apne ko aatma samajh baap ko yaad karo। sanyaasi to raajayog sikhlaana jaante nahin। baap bigar raajayog sikhlaave kaun? tum bachchon ko baap abhi raajayog sikhla rahe hain। phir raajaai mil jaati hai। tum apaar sukhon mein rehte ho। vahaan to phir yaad karne ki darkaar hi nahin। rinchak bhi duhkh nahin hota hai। aayu bhi badi, kaaya bhi nirogi hoti hai। yahaan kitne duhkh hain। aise to nahin baap ne duhkh ke liye khel racha hai। yeh to khel sukh-duhkh, haar-jeet ka aadi anaadi hai। in sab baaton ko sanyaasi jaante hi nahin to samjha kaise sakte। woh to bhakti maarga ke shaastra aadi padhne vaale hain। tumko kaha jaata hai - apne ko aatma samajh baap ko yaad karo। woh sanyaasi phir aatma samajh brahm ko yaad karte hain। brahm ko paramatma samajhte hain, brahm gyaani hain। vaastav mein brahm hai rahne ka sthaan। jahaan tum aatmaayen rehti ho woh phir kehte ham unmein leen honge। unka gyaan hi saara ulta hai। yahaan to behad ka baap tum bachchon ko padhaate hain। woh kehte bhagwan 40 hazaar varsha baad aayega, isko kaha jaata hai agyaan andhiyaara। baap kehte hain nai duniya ki sthaapna aur puraani duniya ka vinaash karne vaala to main hoon। main sthaapna kar raha hoon, vinaash bhi saamne khada hai। ab jaldi karo। paavan bano tab hi paavan duniya mein jaayenge। yeh to puraani tamopradhaan duniya hai। lakshmi-naaraayan ka raajya thode hi hai। inka raajya nai duniya mein tha, ab nahin hai। yeh punarjanma lete aaye hain। shaastron mein to kya-kya likh diya hai। krishna ko dikhaaya hai arjun ke ghode gaadi mein baitha hai। aise nahin ki arjun ke andar krishna baitha hai। krishna to dehdhaari tha na, na koi ladaai aadi ki baat hai। unhonne to paandavon aur kaurvon ka lashkar alag-alag kar diya hai। yahaan to woh baat nahin। yeh bhakti maarga ke athaah shaastra hain। satayug mein yeh hote nahin। vahaan to gyaan ki praalabdha raajdhaani hai। vahaan sukh hi sukh hai। baap nai duniya sthaapan karte hain to zaroor nai duniya mein sukh hoga na। baap kabhi puraana makaan banaate hain kya! baap to naya makaan banaate hain, us duniya ko hi satopradhaan duniya kaha jaata hai। abhi to sab tamopradhaan apvitra hain, paraaye raavan raajya mein baithe hain।

raam to kaha jaata hai shivbaaba ko, raam-raam kah raam naam ka daan dete hain। ab kahaan raam, kahaan shivbaaba। ab shivbaaba tum bachchon ko kehte hain maamekam yaad karo। jahaan se aaye ho vahaan hi phir jaana hai, jab tak baap ko yaad kar pavitra nahin banenge to vaapis bhi ja nahin sakenge। tumhaare mein bhi koi virle hain jo achhi reeti baap ko yaad karte hain। mukh se to kahne ki baat nahin। bhakti mein raam-raam mukh se kehte hain। koi nahin kahenge to samjhenge yeh naastik hain। kitna aavaaz karke gaate hain। jitna jhaad bada hota hai, utni bhakti ki saamagri badi hoti jaati hai। beej kitna chhota hota hai। tumko koi cheez nahin, koi aavaaz nahin। sirf kehte hain - apne ko aatma samajh mujhe yaad karo। mukh se kehna bhi nahin hai। laukik baap ko bhi bachche buddhi se yaad karte hain। baba-baba baithkar kehte thode hi hain। tum abhi jaante ho aatmaon ka baap kaun hai। aatmaayen to sab bhaai-bhaai hain। aatma ko aur koi naam nahin। baaki shareer ka naam badalta hai। aatma to aatma hi hai। woh bhi param aatma। unka naam hai shiv। unko apna shareer hai nahin। baap kehte hain mujhe bhi agar shareer hota to punarjanma mein aana padta। tumko phir sadgati kaun dete? bhakti maarga mein mujhe yaad karte hain। anek chitra hain। abhi tum narkavaasi se svargavaasi bante ho na। janma to narka mein liya hai। marenge svarga ke liye। yahaan tum aaye hi ho svarga mein jaane ke liye। jaise koi bridge aadi banaate hain, to pahle foundation ceremony kar lete hain phir bridge banti rehti hai। svarga ki sthaapna ka udghaatan (foundation ceremony) baap ne kar liya hai, ab taiyaari hoti rehti hai। makaan banne mein time lagta hai kya? government karne par aaye to ek maas mein makaan khada kar le। vilaayat mein to makaan taiyaar milte hain। svarga mein to bahut vishaal buddhi satopradhaan hote hain। science ki buddhi teekhi hoti hai। jhat banaate jaayenge, makaanon mein jadit bhi lagti jaayegi। aajkal imitation dekho kitna jaldi banaate rehte hain। woh to phir real se bhi jaasti chamakta hai। aur aajkal ki machinery se jhat bana lete hain। vahaan makaan banne mein deri nahin lagti, saphaai aadi hone mein time lagta hai। aise nahin ki sone ki dvaarika samudra se nikal aayegi। to baap kehte hain khaao pio bhal, sirf baap ko yaad karo to vikarma vinaash hon, aur koi upaay nahin। janma-janmaantar yeh ganga snaan aadi karte aaye ho parantu koi bhi mukti-jeevanmukti ko to paate hi nahin। yahaan to baap paavan banne ki yukti bataate hain। baap kehte hain main hi patit-paavan hoon। tumne bulaaya hai he patit-paavan baba aao, aakarke hamko paavan banaao। drama poora hua to phir sab actors stage par hone chaahiye। creator bhi hona chaahiye। sab khade ho jaate hain na। yeh bhi aise hai। sabhi aatmaayen aa jaayengi phir vaapis jaana hoga। abhi tum taiyaar nahin hue ho। karmaateet avastha hi nahin hui hai to vinaash kaise hoga। baap aate hi hain tumko nai duniya ke liye padhaane, vahaan kaal hota hi nahin। tum kaal par jeet paate ho। kaun jeet pahnaate hain? kaalon ka kaal। woh kitnon ko saath le jaate hain! tum khushi se jaate ho। ab baap aaye hain sabka duhkh door karne isliye unki mahima gaate hai, god father liberate karo, duhkh se। shantidham-sukhdhaam mein le chalo। parantu yeh to manushyon ko pata nahin ki abhi baap svarga ki rachna rach rahe hain। tum svarga mein jaayenge vahaan jhaad bahut chhota hoga phir vriddhi ko paayega। abhi aur sab dharma hain, woh ek dharma hai nahin। naam, roop, raajaai aadi badal jaati hai। pahle double taaj, phir single taaj vaale hote hain। somnaath ka mandir banaaya hai, kitna dhan tha। sabse bada mandir ek hai jisko lootkar le gaye। baap kehte hain tum padmaapadma bhaagyashaali bante ho। kadam-kadam par baap ko yaad karte raho to padma ikatthe honge। itni kamaai baap ko yaad karne se hoti hai। phir aise baap ko yaad karna tum bhoolte kyon ho? jitna baap ko yaad karenge, service karenge utna oonch pad paayenge। achhe-achhe bachche chalte-chalte gir padte hain। kaala munh kiya to ki kamaai chat ho jaati hai। jabardasta lottery ganva dete hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) grihastha vyavhaar sambhaalte hue buddhiyog baap ke saath rakhna hai। gaphlat nahin karni hai। pavitrata ki dhaarna se apna aur sarva ka kalyaan karna hai।

2) yaad ki yaatra aur padhaai mein hi kamaai hai, dhyaan deedaar to ghoomna hai isliye usse koi phaayda nahin। jitna ho sake sujaag ho, baap ko yaad kar apne vikarma vinaash karne hai।

vardaan:- shreshtha smriti dvaara shreshtha sthiti aur shreshtha vaayumandal banaane vaale sarva ke sahayogi bhav

yog ka arth hai shreshtha smriti mein rehna। main shreshtha aatma shreshtha baap ki santaan hoon, jab aisi smriti rehti hai to sthiti shreshtha ho jaati hai। shreshtha sthiti se shreshtha vaayumandal svatah banta hai jo anek aatmaon ko apni or aakarshit karta hai। jahaan bhi aap aatmaayen yog mein rahkar karma karti ho vahaan ka vaataavran, vaayumandal auron ko bhi sahayog deta hai। aisi sahayogi aatmaayen baap ko aur vishwa ko priy ho jaati hain।

slogan:- achal sthiti ke aasan par baithne se hi raajya ka sinhaasan milega।