Murli du jour du mercredi 4 septembre 2024

04-09-2024 praatahmurli om shanti "baapdaada"' madhuban

“meethe bachche - tum behad ke baap paas aaye ho vikaari se nirvikaari banne, isliye tumhaare mein koi bhi bhoot nahin hona chaahiye''

prashn:- baap abhi tumhein aisi kaun-si padhaai padhaate hain jo saare kalpa mein nahin padhaai jaati?

uttar:- nai raajdhaani sthaapan karne ki padhaai, manushya ko raajaai pad dene ki padhaai is samay supreme baap hi padhaate hain। yeh nai padhaai saare kalpa mein nahin padhaai jaati। isi padhaai se satayugi raajdhaani sthaapan ho rahi hai।

om shanti। yeh to bachche jaante hain ham aatma hain, na ki shareer। inko kaha jaata hai dehi-abhimaani। manushya sab hain deh-abhimaani। yeh hai hi paap aatmaon ki duniya athva vikaari duniya। raavan raajya hai। satayug past ho gaya hai। vahaan sab nirvikaari rehte the। bachche jaante hain - ham hi pavitra devi-devta the, jo 84 janmon ke baad phir patit bane hain। sab to 84 janma nahin lete hain। bhaarat-vaasi hi devi-devta the, jinhon ne 82, 83, 84 janma liye hain। vahi patit bane hain। bhaarat hi avinaashi khanda gaaya hua hai। jab bhaarat mein lakshmi-naaraayan ka raajya tha tab ise nai duniya, naya bhaarat kaha jaata tha। abhi hai puraani duniya, puraana bhaarat। woh to sampoorn nirvikaari the, koi vikaar nahin the। woh devtaayen hi 84 janma le abhi patit bane hain। kaam ka bhoot, krodh ka bhoot, lobh ka bhoot - yeh sab kade bhoot hain। inmen mukhya hai deh-abhimaan ka bhoot। raavan ka raajya hai na। yeh raavan hai bhaarat ka aadhaakalpa ka dushman, jab manushya mein 5 vikaar pravesh karte hain। in devtaaon mein yeh bhoot nahin the। phir punarjanma lete-lete inki aatma bhi vikaaron mein aa gai। tum jaante ho ham jab devi-devta the to koi bhi vikaar ka bhoot nahin tha। satayug-treta ko kaha hi jaata hai raam raajya, dvaapar-kaliyug ko kaha jaata hai raavan raajya। yahaan har ek nar-naari mein 5 vikaar hain। dvaapar se kaliyug tak 5 vikaar chalte hain। ab tum purooshottam sangamayug par baithe ho। behad ke baap ke paas aaye ho vikaari se nirvikaari banne ke liye। nirvikaari ban agar koi vikaar mein girte hain to baba likhte hain tumne kaala munh kiya, ab gora munh hona mushkil hai। 5 manzil se girne jaisa hai। haddiyaan toot jaati hain। geeta mein bhi hai bhagvaanuvaach - kaam mahaashatru hai। bhaarat ka vaastavik dharmashaastra hai hi geeta। har ek dharma ka ek hi shaastra hai। bhaaratvaasiyon ke to dher shaastra hain। usko kaha jaata hai bhakti। nai duniya satopradhaan golden ej hai, vahaan koi ladaai-jhagda nahin tha। badi aayu thi, ever healthy-wealthy the। tumko smriti aai ham devtaayen bahut sukhi the। vahaan akaale mrityu hoti nahin। kaal ka dar rehta nahin। vahaan health, wealth, happiness sab rehti hai। narka mein happiness hoti nahin। kuchh na kuchh shareer ka rog laga rehta hai। yeh hai apaar duhkhon ki duniya। woh hai apaar sukhon ki duniya। behad ka baap duhkhon ki duniya thode hi rachenge। baap ne to sukh ki duniya rachi। phir raavan raajya aaya to unse duhkh-ashaanti mili। satayug hai sukhdhaam, kaliyug hai duhkhadhaam। vikaar mein jaana goya ek-do par kaam kataari chalaana। manushya kehte hain yeh to bhagwan ki rachna hai na। parantu nahin, bhagwan ki rachna nahin, yeh raavan ki rachna hai। bhagwan ne to svarga racha। vahaan kaam kataari hoti nahin। aise nahin duhkh-sukh bhagwan deta hai। are, bhagwan behad ka baap bachchon ko duhkh kaise dega। woh to kehte hain main sukh ka varsa deta hoon phir aadhaakalpa ke baad raavan shraapit karte hain। satayug mein to athaah sukh the, maalaamaal the। ek hi somnaath ke mandir mein kitne heere-javaahraat the। bhaarat kitna solvent tha। abhi to insolvent hai। satayug mein 100 pratishat solvent, kaliyug mein 100 pratishat insolvent - yeh khel bana hua hai। abhi hai iron ej, khaad padte-padte bilkul tamopradhaan ban gaye hain। kitna duhkh hai। yeh aeroplane aadi bhi 100 varsha mein bane hain। inko kaha jaata hai maaya ka pomp। to manushya samajhte science ne to svarga bana diya hai। parantu yeh hai raavan ka svarga। kaliyug mein maaya ka pomp dekh tumhaare paas mushkil aate hain। samajhte hain hamaare paas to mahal motor aadi hain। baap kehte hain svarga to satayug ko kaha jaata hai, jab in lakshmi-naaraayan ka raajya tha। ab in lakshmi-naaraayan ka raajya thode hi hai। ab kaliyug ke baad phir inka raajya aayega। pahle bhaarat bahut chhota tha। nai duniya mein hote hi hain 9 laakh devtaayen। bas। peechhe vriddhi ko paate rehte hain। saari srishti vriddhi ko paati hai na। pahle-pahle sirf devi-devta the। to behad ka baap world ki history-geography baith samjhaate hain। baap bigar aur koi batla na sake। unko kaha jaata hai knowledgeful god father। sab aatmaon ka father। aatmaayen sab bhaai-bhaai hain phir bhaai aur behen banti hain। tum sab ho ek prajaapita brahma ke adopted children। sabhi aatmaayen unki santaan to hain hi। unko kaha jaata hai parampita, unka naam hai shiv। bas। baap samjhaate hain - mera naam ek hi shiv hai। phir bhakti maarga mein manushyon ne bahut mandir banaaye hain to bahut naam rakh diye hain। bhakti ki saamagri kitni dher hain। usko padhaai nahin kahenge। usmein em object kuchh bhi nahin। hai hi neeche utarne ki। neeche utarte-utarte tamopradhaan ban jaate hain phir satopradhaan banna hai sabko। tum satopradhaan bankar svarga mein aayenge, baaki sab satopradhaan ban shantidham mein rahenge। yeh achhi reeti yaad karo। baba kehte hain tumne hamko bulaaya hai - baba, ham patiton ko aakar paavan banaao to ab main saari duniya ko paavan banaane aaya hoon। manushya samajhte hain ganga snaan karne se paavan ban jaayenge। ganga ko patit-paavni samajhte hain। kuen se paani nikla, usko bhi ganga ka paani samajh snaan karte hain। gupta ganga samajhte hain। teertha yaatra par va koi pahaadi par jaayenge, usko bhi gupta ganga kahenge। isko kaha jaata hai jhooth। god is truth kaha jaata hai। baaki raavan raajya mein sab hain jhooth bolne vaale। god father hi sachkhanda sthaapan karte hain। vahaan jhooth ki baat nahin hoti। devtaaon ko bhog bhi shuddh lagaate hain। abhi to hai aasuri raajya, satayug-treta mein hai eeshvareey raajya, jo ab sthaapan ho raha hai। eeshvar hi aakar sabko paavan banaate hain। devtaaon mein koi vikaar hota nahin। yatha raaja raani tatha praja sab pavitra hote hain। yahaan sab hain paapi, kaami, krodhi। nai duniya ko svarga aur isko narka kaha jaata hai। narka ko svarga baap ke sivaae koi bana na sake। yahaan sab hain narkavaasi patit। sat-yug mein hain paavan। vahaan aise nahin kahenge ki ham patit se paavan hone ke liye snaan karne jaate hain।

yeh variety manushya srishti roopi jhaad hai। beejroop hai bhagwan। vahi rachna rachte hain। pahle-pahle rachte hain devi-devtaaon ko। phir vriddhi ko paate-paate itne dharma ho jaate hain। pahle ek dharma, ek raajya tha। sukh hi sukh tha। manushya chaahte bhi hain vishwa mein shanti ho। woh abhi tum sthaapan kar rahe ho। baaki sab khatma ho jaayenge। baaki thode rahenge। yeh chakra phirta rehta hai। abhi hai kaliyug ant aur satayug aadi ka purooshottam sangamayug। isko kaha jaata hai kalyaankaari purooshottam sangamayug। kaliyug ke baad satayug sthaapan ho raha hai। tum sangam par padhte ho iska phal satayug mein milega। yahaan jitna pavitra banenge aur padhenge utna oonch pad paayenge। aisi padhaai kahaan hoti nahin। tumko is padhaai ka sukh nai duniya mein milega। agar koi bhi bhoot hoga to ek to saja khaani padegi, doosra phir vahaan kam pad paayenge। jo sampoorn ban auron ko bhi padhaayenge to oonch pad bhi paayenge। kitne centres hain, laakhon centres ho jaayenge। saare vishwa mein centres khul jaayenge। paap aatma se punya aatma banna hi hai। tumhaari em object bhi hai। padhaane vaala ek shivbaaba hai। woh hai gyaan ka saagar, sukh ka saagar। baap hi aakar padhaate hain। yeh nahin padhaate, inke dvaara woh padhaate hain। inko gaaya jaata hai bhagwan ka rath, bhaagyashaali rath। tumko kitna padmaapadma bhaagyashaali banaate hain। tum bahut saahookaar bante ho। kabhi bhi beemaar nahin padte। health, wealth, happiness sab mil jaata hai। yahaan bhal dhan hai parantu beemaariyaan aadi hain। woh happiness rah na sake। kuchh na kuchh duhkh rehta hai। unka to naam hi hai sukhdhaam, svarga, paradise। in lakshmi-naaraayan ko yeh raajya kisne diya? yeh koi bhi nahin jaante। yeh bhaarat mein rehte the। vishwa ke maalik the। koi partition aadi nahin tha। abhi to kitne partition hain। raavan raajya hai। kitne tukde-tukde ho gaye hain। ladte rehte hain। vahaan to saare bhaarat mein in devi-devtaaon ka raajya tha। vahaan vazeer aadi hote nahin। yahaan to vajeer dekho kitne hain kyonki beakla hain। to vajeer bhi aise hi tamopradhaan patit hain। patit ko patit mile, kar-kar lambe haath…। kangaal bante jaate hain, karja uthaate jaate hain। satayug mein to anaaj phal aadi bahut svaadista hote hain। tum vahaan jaakar sab anubhav karke aate ho। sookshm vatan mein bhi jaate ho to svarga mein bhi jaate ho। baap kehte hain srishti chakra kaise phirta hai। pahle bhaarat mein ek hi devi-devta dharma tha। doosra koi dharma nahin tha। phir dvaapar mein raavan raajya shuru hota hai। abhi hai vikaari duniya phir tum pavitra ban nirvikaari devta bante ho। yeh school hai। bhagvaanuvaach main tum bachchon ko raajayog sikhlaata hoon। tum bhavishya mein yeh banenge। raajaai ki padhaai aur kahin nahin milti। baap hi padhaakar nai duniya ki raajdhaani dete hain। supreme father, teacher, satguru ek hi shivbaaba hai। baba maana zaroor varsa milna chaahiye। bhagwan zaroor svarga ka varsa hi denge। raavan jisko har varsha jalaate hain, yeh hai bhaarat ka number one dushman। raavan ne kaisa asur bana diya hai। inka raajya 2500 varsha chalta hai। tumko baap kehte hain main tumko sukhdhaam ka maalik banaata hoon। raavan tumko duhkhadhaam mein le jaate hain। tumhaari aayu bhi kam ho jaati hai। achaanak akaale mrityu ho jaati hai। anek beemaariyaan hoti rehti hain। vahaan aisi koi baat nahin hoti। naam hi hai svarga। abhi apne ko hindu kahlaate hain kyonki patit hain। to devta kahlaane laayak nahin hain। baap is rath dvaara baith samjhaate hain, inke baaju mein aakar baithte hain tumko padhaane। to yeh bhi padhte hain। ham sab student hain। ek baap hi teacher hai। abhi baap padhaate hain। phir aakar 5000 varsha ke baad padhaayenge। yeh gyaan, yeh padhaai phir gum ho jaayegi। padhkar tum devta banen, 2500 varsha sukh ka varsa liya phir hai duhkh, raavan ka shraap। abhi bhaarat bahut duhkhi hai। yeh hai duhkhadhaam। pukaarte bhi hain na - patit-paavan aao, aakar paavan banaao। abhi tumhaare mein koi bhi vikaar nahin hona chaahiye parantu aadhaakalpa ki beemaari koi jaldi thode hi nikalti hai। us padhaai mein bhi jo achhi reeti nahin padhte hain woh fail hote hain। jo paas with honour hote hain woh to scholarship lete hain। tumhaare mein bhi jo achhi reeti pavitra ban aur phir doosron ko banaate hain, to yeh prize lete hain। maala hoti hai 8 ki। woh hai paas with honour। phir 108 ki maala bhi hoti hai, woh maala bhi simri jaati hai। manushya iska rahasya thode hi samajhte hain। maala mein oopar hai phool phir hota hai double daana meru। stri aur puroosh donon pavitra bante hain। yeh pavitra the na। svargavaasi kahlaate the। yahi aatma phir punarjanma lete-lete ab patit ban gai hai। phir yahaan se pavitra ban paavan duniya mein jaayenge। world ki history-geography repeat hoti hai na। vikaari raajaayen nirvikaari raajaaon ke mandir aadi banaakar unhon ko poojte hain। vahi phir poojya se pujaari ban jaate hain। vikaari banne se phir woh light ka taaj bhi nahin rehta hai। yeh khel bana hua hai। yeh hai behad ka wonderful drama। pahle ek hi dharma hota hai, jisko raam raajya kaha jaata hai phir aur-aur dharma vaale aate hain। yeh srishti ka chakra kaise phirta rehta hai so ek baap hi samjha sakte hain। bhagwan to ek hi hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) svayan bhagwan teacher bankar padhaate hain isliye achhi reeti padhna hai। scholarship lene ke liye pavitra bankar doosron ko pavitra banaane ki seva karni hai।

2) andar mein kaam, krodh aadi ke jo bhi bhoot pravesh hain, unhein nikaalna hai। em object ko saamne rakhkar purooshaartha karna hai।

vardaan:- maaya ki chhaaya se nikal yaad ki chhatrachhaaya mein rahne vaale bephikra baadshaah bhav

jo sada baap ke yaad ki chhatrachhaaya ke neeche rehte hain vo svayan ko sada safe anubhav karte hain। maaya ki chhaaya se bachne ka saadhan hai baap ki chhatrachhaaya। chhatrachhaaya mein rahne vaale sada bephikra baadshaah honge। agar koi phikra hai to khushi gum ho jaati hai। khushi gum hui, kamjor hue to maaya ki chhaaya ka prabhaav pad jaata hai kyonki kamjori hi maaya ka aahvaan karti hai। maaya ki chhaaya svapna mein bhi pad gai to bahut pareshaan kar degi isliye sada chhatrachhaaya ke neeche raho।

slogan:- samajh ke screw driver se albelepan ke loose screw ko tight kar sada alert raho।