Murli du jour du lundi 23 septembre 2024

23-09-2024 praatahmurli om shanti "baapdaada"' madhuban

“meethe bachche - andar mein din raat baba-baba chalta rahe to apaar khushi rahegi, buddhi mein rahega baba humein kuber ka khajaana dene aaye hain''

prashn:- baba kin bachchon ko honest (eemaandaar) phool kehte hain? unki nishaani sunaao?

uttar:- honest phool woh hai jo kabhi bhi maaya ke vash nahin hote hain। maaya ki khitpit mein nahin aate hain। aise honest phool last mein aate bhi fast jaane ka purushaartha karte hain। woh puraanon se bhi aage jaane ka lakshya rakhte hain। apne avgunon ko nikaalne ke purushaartha mein rehte hain। doosron ke avgunon ko nahin dekhte।

om shanti। shiv bhagvaanuvaach। woh hua roohaani baap kyonki shiv to supreme rooh hai na, aatma hai na। baap to roz-roz nai-nai baaten samjhaate rehte hain। geeta sunaane vaale sannyaasi aadi bahut hain। woh baap ko yaad kar na saken। ‘baba' akshar kabhi unke mukh se nikal na sake। yeh akshar hai hi grihastha maarga vaalon ke liye। woh to hain nivritti maarga vaale। woh brahm ko hi yaad karte hain। mukh se kabhi shivbaaba nahin kahenge। bhal tum jaanch karo। samjho bade-bade vidvaan sannyaasi chinmiyaanand aadi geeta sunaate hain, aise nahin ki woh geeta ka bhagwan shreekrishna ko samajh unse yog laga sakte hain। nahin। woh to phir bhi brahm ke saath yog lagaane vaale brahm gyaani va tatva gyaani hain। shreekrishna ko kabhi koi baba kahe, yeh ho nahin sakta। to shreekrishna geeta sunaane vaala baba to nahin thahra na। shiv ko sab baba kehte hain kyonki woh sab aatmaon ka baap hai। sab aatmaayen unko pukaarti hain - parampita paramatma। woh hai supreme, param hai kyonki paramdham mein rahne vaala hai। tum bhi sab paramdham mein rehte ho parantu unko param aatma kehte hain। woh kabhi punarjanma mein nahin aate hain। khud kehte hain mera janma divya aur alaukik hai। aise koi rath mein pravesh kar tumko vishwa ka maalik banne ki yukti bataaye, yeh aur koi ho nahin sakta। tab baap kehte hain - main jo hoon, jaisa hoon, mujhe koi bhi nahin jaante। main jab apna parichay doon tab jaan sakte hain। yeh brahm ko athva tatvon ko maanne vaale, shreekrishna ko phir apna baap kaise maanenge। aatmaayen to sab bachche thahre na। shreekrishna ko sab pita kaise kahenge। aise thode hi kahenge ki shreekrishna sabka baap hai। ham sab brothers hain। aise bhi nahin shreekrishna sarvavyaapi hai। sab shreekrishna thode hi ho sakte hain। agar sab shreekrishna hon to unka baap bhi chaahiye। manushya bahut bhoole hue hain। nahin jaante hain tab to kehte hain mujhe koton mein koi jaante hain। shreekrishna ko to koi bhi jaan lenge। sab vilaayat vaale bhi unko jaante hain। lord krishna kehte hain na। chitra bhi hain, asli chitra to hain nahin। bhaaratvaasiyon se sunte hain, inki pooja bahut hoti hai to phir geeta mein yeh likh diya hai - shreekrishna bhagwan। ab bhagwan ko bhala lord kaha jaata hai kya। lord krishna kehte hain na। lord ka title vaastav mein bade aadmi ko milta hai। woh to sabko dete rehte hain, isko kaha jaata hai andher nagri…। koi bhi patit manushya ko lord kah dete hain। kahaan yeh aaj ke patit manushya, kahaan shiv va shreekrishna! baap kehte hain jo tumko gyaan deta hoon woh phir gum ho jaata hai। main hi aakar nai duniya sthaapan karta hoon। gyaan bhi main abhi hi deta hoon। main jab gyaan doon tab hi bachche sunen। mere bigar koi suna na sake। jaante hi nahin।

kya sannyaasi shivbaaba ko yaad kar sakte hain? woh kah bhi nahin sakte ki niraakaar god ko yaad karo। kab suna hai? bahut padhe-likhe manushya bhi samajhte nahin hain। ab baap samjhaate hain shreekrishna bhagwan nahin। manushya to unko hi bhagwan kehte rehte hain। kitna farka ho gaya hai। baap to bachchon ko baith padhaate hain। woh baap, teacher, guru bhi hai। shivbaaba sabko baith samjhaate hain। na samajhne kaaran trimoorti mein shiv rakhte hi nahin। brahma ko rakhte hain, jisko prajaapita brahma kehte hain। praja ko rachne vaala। parantu unko bhagwan nahin kahenge। bhagwan praja nahin rachte hain। bhagwan ke to sab aatmaayen bachche hain। phir koi dvaara praja rachte hain। tumko kisne adopt kiya? brahma dvaara baap ne adopt kiya। brahman jab banenge tab hi to devta banenge। yeh baat to tumne kabhi suni nahin hai। prajaapita ka bhi zaroor part hai। act chaahiye na। itni praja kahaan se aayegi। kukh vanshaavli bhi to ho na sake। woh kukh vanshaavli brahman kahenge - hamaara surname hai brahman। naam to sabka alag-alag hai। prajaapita brahma to kehte hi tab hain jab shivbaaba inmen pravesh karen। yeh nai baaten hain। baap khud kehte hain - mujhe koi jaante nahin, srishti chakra ko bhi nahin jaante। tab to rishi-muni sab neti-neti kah gaye hain। na paramatma ko, na paramatma ki rachna ko jaante hain। baap kehte hain jab main aakar apna parichay doon tab hi jaanen। in devtaaon ko vahaan yeh pata thode hi padta hai - hamne yeh raajya kaise paaya? inmen gyaan hota hi nahin। pad pa liya phir gyaan ki darkaar nahin। gyaan chaahiye hi sadgati ke liye। yeh to sadgati ko paaye hue hain। yeh badi samajhne ki guhya baaten hain। samajhdaar hi samjhen। baaki jo boodhi-boodhi maataayen hain, unmein itni buddhi to hai nahin, woh bhi drama plan anusaar har ek ka apna part hai। aise to nahin kahenge - he eeshvar buddhi do। sabko ek jaisi buddhi ham den to sab naaraayan ban jaayenge। sab ek-do ke oopar gaddi par baithenge kya! haan, em object hai yeh banne ki। sab purushaartha kar rahe hain nar se naaraayan banne ka। banenge to purushaartha anusaar na। agar sab haath uthaayen - ham naaraayan banenge to baap ko andar mein hansi aayegi na। sab ek jaise ban kaise sakte! nambarvaar to hote hain na। naaraayan di first, second, third। jaise Edward di first, second, third..... hote hain na। bhal em object yeh hai, parantu khud samajh sakte hain na - chalan aisi hai to kya pad paayenge? purushaartha to zaroor karna hai। baba nambarvaar phool le aate hain, nambarvaar phool de bhi sakte hain parantu aise karte nahin। funk ho jaayenge। baba jaante hain, dekhenge kaun jaasti service kar rahe hain, yeh achha phool hai। peechhe nambarvaar to hote hi hain। bahut puraane bhi baithe hain parantu unmein naye-naye, bade-bade achhe phool hain। kahenge yeh number one honest phool hai, koi khitpit, eershya aadi inmen nahin hain। bahuton mein kuchh na kuchh khaamiyaan zaroor hain। sampoorn to koi ko kah nahin sakte। solah kala sampoorn banne ke liye bahut mehnat chaahiye। abhi koi sampoorn ban na sake। abhi to achhe-achhe bachchon mein bhi eershya bahut hai। khaamiyaan to hain na। baap jaante hain sab kis-kis prakaar ka purushaartha kar rahe hain। duniya vaale kya jaanen। woh to kuchh samajhte nahin। bahut thode samajhte hain। gareeb jhat samajh jaate hain। behad ka baap aaya hua hai padhaane। us baap ko yaad karne se hamaare paap kat jaayenge। ham baap ke paas aaye hain, baba se nai duniya ka varsa zaroor milega। nambarvaar to hote hi hain - 100 se lekar ek number tak parantu baap ko jaan liya, thoda bhi suna to svarga mein zaroor aayenge। 21 janmon ke liye svarga mein aana koi kam hai kya! aise to nahin, koi marta hai to kahenge 21 janma ke liye svarga mein gaya। svarga hai hi kahaan। kitni misunderstanding kar di hai। bade-bade achhe log bhi kehte hain phalaana svarga padhaara। svarga kehte kisko hain? arth kuchh bhi nahin samajhte। yeh sirf tum hi jaante ho। ho tum bhi manushya, parantu tum brahman bane ho। apne ko brahman hi kahlaate ho। tum braahmanon ka ek baapdaada hai। to sannyaasiyon se bhi tum poochh sakte ho ki yeh jo mahaavaakya va bhagvaanuvaach hai ki deh sahit deh ke sab dharma chhod maamekam yaad karo - kya yeh shreekrishna kehte hain maamekam yaad karo? tum shreekrishna ko yaad karte ho kya? kabhi nahin haan kahenge। vahaan hi prasiddha ho jaae। parantu bichaari ablaayen jaati hain, woh kya jaanen। woh apne followers ke aage krodhit ho jaate hain। durvaasha ka naam bhi hai na। unmein ahankaar bahut rehta hai। followers hain dher। bhakti ka raajya hai na। unse poochhne ki koi mein taakat nahin rehti hai। nahin to unko kah sakte hain tum to shivbaaba ki pooja karte ho। ab bhagwan kisko kahenge? kya thikkar bhittar mein bhagwan hai? aage chal in sab baaton ko samjhenge। abhi nasha kitna hai। hain sabhi pujaari। poojya nahin kahenge।

baap kehte hain mere ko virla koi jaante hain। main jo hoon, jaisa hoon - tum bachchon mein bhi virle koi accurate jaante hain। unko andar mein bahut khushi rehti hai। yeh to samajhte hain na - baba hi hamko svarga ki baadshaahi dete hain। kuber ke khajaane milte hain। allaah avaldeen ka bhi khel dikhaate hain na। thaka karne se khajaana nikal aaya। bahut khel dikhaate hain - khuda dosta baadshaah kya karte the, us par bhi kahaani hai। pul par jo aata tha unko ek din ki raajaai de ravaana kar deta tha। yeh sab hain kahaaniyaan। abhi baap samjhaate hain khuda tum bachchon ka dosta hai, inmen pravesh kar tumhaare saath khaate peete hain, khelte bhi hain। shivbaaba ka aur brahma baba ka rath ek hi hai, to zaroor shivbaaba bhi khel to sakte honge na। baap ko yaad kar khelte hain to donon ismen hain। hain to do na - baap aur daada। parantu koi bhi samajhte nahin hain, kehte hain rath par aaye, to woh phir ghode-gaadi ka rath bana diya hai। aise bhi nahin kahenge shreekrishna mein shiv-baba baith gyaan dete hain। woh phir kah dete hain shreekrishna bhagvaanuvaach। aise to nahin kehte brahma bhagvaanuvaach। nahin। yeh hai rath। shiv bhagvaanuvaach। baap baith tum bachchon ko apna aur rachna ke aadi-madhya-ant ka parichay, duration bataate hain। jo baat koi bhi nahin jaante। sensible jo honge woh buddhi se kaam lenge। sannyaasiyon ko to sannyaas karna hai। tum bhi shareer sahit sab kuchh sannyaas karte ho, jaante ho yeh puraani khal hai, hamko to ab nai duniya mein jaana hai। ham aatma yahaan ki rahne vaali nahin hain। yahaan part bajaane aaye hain। ham rahvaasi paramdham ke hain। yeh bhi tum bachche jaante ho vahaan niraakaari jhaad kaisa hai। sabhi aatmaayen vahaan rehti hain, yeh anaadi drama bana hua hai। kitni karodon jeev aatmaayen hain। itne sab kahaan rehte hain? niraakaari duniya mein। baaki yeh sitaare to aatma nahin hain। manushyon ne to in sitaaron ko bhi devta kah diya hai। parantu woh koi devta hai nahin। gyaan soorya to ham shivbaaba ko kahenge। to unko phir devta thode hi kahenge। shaastron mein to kya-kya baaten likh di hain। yeh hai sab bhakti maarga ki saamagri। jisse tum neeche hi girte aaye ho। 84 janma lenge to zaroor neeche utrenge na। abhi yeh hai iron aged duniya। satayug ko kaha jaata hai golden aged duniya। vahaan kaun rehte the? devtaayen। woh kahaan gaye - yeh kisko bhi pata nahin hai। samajhte bhi hain punarjanma lete hain। baap ne samjhaaya hai punarjanma lete-lete devta se badal hindu ban gaye hain। patit bane hain na। aur kiska bhi dharma badli nahin hota। inhon ka dharma kyon badli hota hai - kisko pata nahin। baap kehte hain dharma bhrashta, karma bhrashta ho gaye hain। devi-devta the to pavitra jode the। phir raavan raajya mein tum apvitra ban gaye ho। to devi-devta kahla na sake isliye naam pad gaya hai hindu। devi-devta dharma shreekrishna bhagwan ne nahin sthaapan kiya। zaroor shivbaaba ne hi aakar kiya hoga। shiv jayanti shivraatri bhi manaai jaati hai parantu usne kya aakar kiya, yeh kisko bhi pata nahin hai। ek shiv puraan bhi hai। vaastav mein shiv ki ek geeta hi hai, jo shivbaaba ne sunaai hai, aur koi shaastra hai nahin। tum koi bhi hinsa nahin karte ho। tumhaara koi shaastra to banta nahin। tum nai duniya mein chale jaate ho। satayug mein koi bhi shaastra geeta aadi hota nahin। vahaan kaun padhenge। woh to kah dete yeh ved-shaastra aadi parampara se chale aate hain। unhon ko kuchh bhi pata nahin hai। svarga mein koi shaastra aadi hota nahin। baap ne to devta bana diya, sabki sadgati ho gai phir shaastra padhne ki kya darkaar hai। vahaan shaastra hote nahin। abhi baap ne tumhein gyaan ki chaabi di hai, jisse buddhi ka taala khul gaya hai। pahle taala ekdam banda tha, kuchh bhi samajhte nahin the। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi se bhi eershya aadi nahin karni hai। khaamiyaan nikaal sampoorn banne ka purushaartha karna hai। padhaai se oonch pad paana hai।

2) shareer sahit sab kuchh sannyaas karna hai। kisi bhi prakaar ki hinsa nahin karni hai। ahankaar nahin rakhna hai।

vardaan:- avinaashi aur behad ke adhikaar ki khushi va nashe dvaara sada nishchint bhav

duniya mein bahut mehnat karke adhikaar lete hain, aapko bina mehnat ke adhikaar mil gaya। bachcha banna arthaat adhikaar lena। “vaah main shreshtha adhikaari aatma'', is behad ke adhikaar ke nashe aur khushi mein raho to sada nishchint rahenge। yeh avinaashi adhikaar nishchit hi hai। jahaan nishchit hota hai vahaan nishchint hote hain। apni sarva jimmevaariyaan baap havaale kar do to sab chintaaon se mukta ho jaayenge।

slogan:- jo udaarchit, vishaaldil vaale hain vahi ekta ki neenv hain।