Murli du jour du lundi 11 novembre 2024

11-11-2024 praatahmurli om shanti "baapdaada"' madhuban

“meethe bachche - apne oopar poori nazar rakho, koi bhi bekaayde chalan nahin chalna, shreemat ka ullanghan karne se gir jaayenge''

prashn:- padmaapadmapti banne ke liye kaun-si khabardaari chaahiye?

uttar:- sadaiv dhyaan rahe - jaisa karma ham karenge humein dekh aur bhi karne lagenge। kisi bhi baat ka mithya ahankaar na aaye। murli kabhi bhi miss na ho। mansa-vaacha-karmana apni sambhaal rakho। yeh aankhen dhokha na den to padmon ki kamaai jama kar sakenge। iske liye antarmukhi hokar baap ko yaad karo aur vikarmon se bache raho।

om shanti। roohaani bachchon ko baap ne samjhaaya hai, yahaan tum bachchon ko is khyaal se zaroor baithna hota hai, yeh baba bhi hai, teacher aur satguru bhi hai। aur yeh bhi mahsoos karte ho - baba ko yaad karte-karte pavitra ban, pavitradhaam mein jaakar pahunchenge। baap ne samjhaaya hai ki pavitradhaam se hi tum neeche utarte ho। uska naam hi hai pavitradhaam। satopradhaan se phir sato, rajo, tamo… abhi tum samajhte ho ki ham neeche gire hue hain arthaat veshyaalay mein hain। bhal tum sangamayug par ho, parantu gyaan se tum jaante ho ki hamne kinaara kiya hua hai phir bhi agar ham shivbaaba ki yaad mein rehte hain to shivaalay door nahin। shivbaaba ko yaad nahin karte to shivaalay bahut door hai। sajaayen khaani padti hain to bahut door ho jaata hai। to baap bachchon ko koi jaasti takleeph nahin dete hain। ek to baar-baar kehte hain mansa-vaacha-karmana pavitra banna hai। yeh aankhen bhi bada dhokha deti hain, inse bahut sambhaalkar chalna hota hai। baap ne samjhaaya hai ki dhyaan aur yog bilkul alag hai। yog arthaat yaad। aankhen khuli hote bhi tum yaad kar sakte ho। dhyaan ko koi yog nahin kaha jaata। bhog bhi le jaate hain to direction anusaar hi jaana hai। ismen maaya bhi bahut aati hai। maaya aisi hai jo ekdam naak mein dam kar deti hai। jaise baap balvaan hai, vaise maaya bhi badi balvaan hai। itni balvaan hai jo saari duniya ko veshyaalay mein dhakel diya hai isliye ismen bahut khabardaari rakhni hoti hai। baap ki kaayde anusaar yaad chaahiye। bekaayde koi kaam kiya to ekdam gira deti hai। dhyaan aadi ki kabhi koi ichchha nahin rakhni hai। ichchha maatram avidya..... baap tumhaari sab manokaamnaayen bigar maange poori kar dete hain, agar baap ki aagya par chale to। agar baap ki aagya na maan ulta raasta liya to ho sakta hai svarga ke badle narka mein hi gir jaaen। gaayan bhi hai gaj ko graah ne khaaya। bahuton ko gyaan dene vaale, bhog lagaane vaale aaj hain kahaan, kyonki bekaayde chalan ke kaaran poore maayaavi ban jaate hain। deity bante-bante devil ban jaate hain। baap jaante hain ki bahut achhe purushaarthi jo devta banne vaale the woh asur ban asuron ke saath rehte hain। traitor ho jaate hain। baap ka bankar phir maaya ke ban jaate, unhein traitor kaha jaata hai। apne oopar nazar rakhni hoti hai। shreemat ka ullanghan kiya to yeh gire। pata bhi nahin padega। baap to bachchon ko saavdhaan karte hain ki koi aisi chalan na chalo jo rasaatal mein pahunch jaao।

kal bhi baba ne samjhaaya - bahut gop hain aapas mein committee aadi banaate hain, jo kuchh karte hain, shreemat ke aadhaar bigar karte hain to dis service karte hain। bigar shreemat karenge to girte hi jaayenge। baba ne shuru mein committee banaai thi to maataaon ki banaai thi kyonki kalash to maataaon ko hi milta hai। vande maatram gaaya hua hai na। agar gop log committee banaate hain to vande gop to gaayan nahin hai। shreemat par nahin to maaya ke jaal mein phans padte hain। baba ne maataaon ki committee banaai, unhon ke havaale sab kuchh kar diya। purush aksar karke devaala maarte hain, striyaan nahin। to baap bhi kalash maataaon par rakhte hain। is gyaan maarga mein maataayen bhi devaala maar sakti hain। padmaapadma bhaagyashaali jo banne vaale hain, woh maaya se haar khaakar devaala maar sakte hain। ismen stri-purush donon devaala maar sakte hain aur maarte bhi hain। kitne haar khaakar chale gaye goya devaala maar diya na। baap samjhaate hain bhaaratvaasiyon ne to poora devaala maara hai। maaya kitni jabardasta hai। jo samajh nahin sakte hain ham kya the, kahaan se ekdam neeche aakar gire hain। yahaan bhi oonch chadhte-chadhte phir shreemat ko bhool apni mat par chalte hain to devaala maar dete hain। vo log to devaala maarte phir 5-7 varsha baad khade ho jaate hain। yahaan to 84 janmon ka devaala maarte hain। oonch pad pa na saken। devaala maarte hi rehte hain। baba ke paas photo hota to batlaate। tum kahenge baba to bilkul theek kehte hain। yeh kitna bada mahaarthi tha, bahuton ko uthaate the। aaj hain nahin। devaale mein hain। baba ghadi-ghadi bachchon ko saavdhaan karte rehte hain। apni mat par committee aadi banaana ismen kuchh rakha nahin hai। aapas mein milkar jharmui jhagmui karna, yeh aisa karta tha, phalaana aisa karta tha........., saara din yahi karte rehte hain। baap se buddhiyog lagaane se hi satopradhaan banenge। baap ka bane aur baap se yog nahin to ghadi-ghadi girte rahenge। connection hi toot padta hai। link toot jaae to ghabraana nahin chaahiye। maaya humein itna tang kyon karti hai। koshish kar baap ke saath link jodni chaahiye। nahin to battery charge kaise hogi। vikarma hone se battery discharge ho jaati hai। shuru mein kitne dher ke dher baba ke aakar bane। bhatthi mein aaye phir aaj kahaan hain। gir pade kyonki puraani duniya yaad aai। abhi baap kehte hain main tumko behad ka vairaagya dilaata hoon, is puraani duniya se dil nahin lagaao। dil svarga se lagaani hai। agar aisa lakshmi-naaraayan banna hai to mehnat karni pade। buddhiyog ek baap ke saath hona chaahiye। puraani duniya se vairaagya। sukhdhaam aur shantidham ko yaad karo। jitna ho sake uthte, baithte, chalte, phirte baap ko yaad karo। yeh to bilkul hi sahaj hai। tum yahaan aaye hi ho nar se naaraayan banne ke liye। sabko kehna hai ki ab tamopradhaan se satopradhaan banna hai kyonki return journey hoti hai। world ki history-geography repeat maana narka se svarga, phir svarga se narka। yeh chakra phirta hi rehta hai।

baap ne kaha hai yahaan svadarshan chakradhaari hokar baitho। isi yaad mein raho ki hamne kitne baar chakra lagaaya hai। abhi phir se ham devta ban rahe hain। duniya mein koi bhi is raaz ko nahin samajhte hain। yeh gyaan devtaaon ko hai nahin। woh to hain hi pavitra। unmein gyaan hi nahin jo shankh bajaaven। woh pavitra hain, unko yeh nishaani dene ki darkaar nahin। nishaani tab hoti hai jab donon ikatthe hote hain। tumko bhi nishaani nahin kyonki tum aaj devta bante-bante kal asur ban jaate ho। baap devta banaate, maaya asur bana deti hai। baap jab samjhaate hain tab pata padta hai ki sachmuch hamaari avastha giri hui hai। kitne bichaare shivbaaba ke khajaane mein jama karaate phir maangakar asur ban jaate। ismen yog ki hi saari kami hai। yog se hi pavitra banna hai। bulaate bhi ho baba aao, humein patit se paavan banaao, jo ham svarga mein ja sake। yaad ki yaatra hai hi paavan ban oonch pad paane ke liye। jo mar jaate hain phir bhi jo kuchh suna hai to shivaalay mein aayenge zaroor। pad bhal kaisa bhi paayen। ek baar yaad kiya to svarga mein aayenge zaroor। baaki oonch pad pa na saken। svarga ka naam sunkar khush hona chaahiye। fail ho paai-paise ka pad pa liya, ismen khush nahin ho jaana hai। feeling to aati hai na - main naukar hoon। pichhaadi mein tumhein sab saakshaatkaar honge ki ham kya banenge, hamse kya vikarma hua hai, jo aisi haalat hui hai। main mahaaraani kyon nahin banoon। kadam-kadam par khabardaari se chalne se tum padmaapadmapti ban sakte ho। mandiron mein devtaaon ko padma ki nishaani dikhaate hain। darje mein pharka ho jaata hai। aaj ki raajaai ka kitna dabadba rehta hai! hai to alpa-kaal ka। sadaakaal ke raaja to ban na saken। to abhi baap kehte hain - tumhein lakshmi-naaraayan banna hai to purushaartha bhi aisa chaahiye। kitna ham auron ka kalyaan karte hain? antarmukh ho kitna samay baba ki yaad mein rehte hain? abhi ham ja rahe hain apne sweet hom mein। phir aayenge sukhdhaam mein। yeh sab gyaan ka manthan andar mein chalta rahe। baap mein gyaan aur yog donon hain। tumhaare mein bhi hona chaahiye। jaante ho humein shivbaaba padhaate hain to gyaan bhi hua aur yaad bhi hui। gyaan aur yog donon saath-saath chalta hai। aise nahin, yog mein baitho, baba ko yaad karte raho aur knowledge bhool jaae। baap yog sikhlaate hain to knowledge bhool jaate hain kya? saari knowledge unmein rehti hai। tum bachchon mein bhi knowledge honi chaahiye। padhna chaahiye। jaise karma main karunga mujhe dekh aur bhi karenge। main murli nahin padhoonga to aur bhi nahin padhenge। mithya ahankaar aa jaata hai to maaya jhat vaar kar deti hai। kadam-kadam baap se shreemat lete rehna hai। nahin to kuchh na kuchh vikarma ban jaate hain। bahut bachche bhoole karte baap ko nahin bataate to apni satyaanaash kar lete hain। gaphlat hone se maaya thappad laga deti hai। worth not A penny bana deti hai। ahankaar mein aane se maaya bahut vikarma karaati hai। baba ne aise thode hi kaha hai, aisi-aisi purushon ki committee banaao। committee mein ek-do samjhu sayaani bachchiyaan zaroor honi chaahiye। jinki hi raay par kaam ho। kalash to lakshmi par rakha jaata hai na। gaayan bhi hai, amrit pilaate the phir kahaan yagya mein vighna daalte the। anek prakaar ke vighna daalne vaale hain। saara din yahi jharmui jhagmui ki baaten karte rehte hain। yeh bahut kharaab hai। koi bhi baat ho to baap ko report karni chaahiye। sudhaarne vaala to ek hi baap hai। tum apne haath mein law nahin uthaao। tum baap ki yaad mein raho। sabhi ko baap ka parichay dete raho tab aisa ban sakenge। maaya bahut kadi hai। kisko nahin chhodti। sadaiv baap ko samaachaar likhna chaahiye। direction lete rehna chaahiye। yoon to direction sadaiv milte rehte hain। aise to bachche samajhte hain baba ne to aapehi is baat par samjha diya, baba to antaryaami hai। baba kehte nahin, main to knowledge padhaata hoon। ismen antaryaami ki baat hi nahin। haan, yeh jaanta hoon ki yeh sab mere bachche hain। har ek shareer ke andar mere bachche hain। baaki aise nahin ki baap sabhi ke andar viraajmaan hai। manushya to ulta hi samajh lete hain। baap kehte hain main jaanta hoon ki sabhi takhta par aatma viraajmaan hai। yeh to kitni sahaj baat hai। sabhi chaitanya aatmaayen apne-apne takhta par baithi hain phir bhi paramatma ko sarvavyaapi kah dete hain, yeh hai ekaj bhool। is kaaran hi bhaarat itna gira hua hai। baap kehte hain tumne meri bahut glaani ki hai। vishwa ke maalik banaane vaale ko tumne gaali di hai isliye baap kehte hain yada yadaahi......। baahar vaale yeh sarvavyaapi ka gyaan bhaaratvaasiyon se seekhte hain। jaise bhaaratvaasi unse hunar seekhte hain woh phir ulta seekhte hain। tumhein to ek baap ko yaad karna hai aur baap ka parichay bhi sabko dena hai। tum ho andhon ki laathi। laathi se raah batlaate hain na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ki aagya anusaar har kaarya karna hai। kabhi bhi shreemat ka ullanghan na ho tab hi sarva manokaamnaayen bina maange poori hongi। dhyaan deedaar ki ichchha nahin rakhni hai, ichchha maatram avidya banna hai।

2) aapas mein milkar jharmui jhagmui (ek doosre ka parchintan) nahin karna hai। antarmukh ho apni jaanch karni hai ki ham baba ki yaad mein kitna samay rehte hain, gyaan ka manthan andar chalta hai?

vardaan:- har aatma ke sambandh samparka mein aate sabko daan dene vaale mahaadaani, vardaani bhav

saare din mein jo bhi sambandh-samparka mein aaye use koi na koi shakti ka, gyaan ka, gun ka daan do। aapke paas gyaan ka bhi khajaana hai, to shaktiyon aur gunon ka bhi khajaana hai। to koi bhi din bina daan diye khaali na jaae tab kahenge mahaadaani। 2- daan shabd ka roohaani arth hai sahayog dena। to apni shreshtha sthiti ke vaayumandal dvaara aur apni vritti ke vibrations dvaara har aatma ko sahayog do tab kahenge vardaani।

slogan:- jo baapdaada aur parivaar ke sameep hain unke chehre par santushtata, roohaaniyat aur prasannata ki muskaraahat rehti hai।