Murli du jour du mercredi 25 décembre 2024

25-12-2024 praatahmurli om shanti "baapdaada"' madhuban

“meethe bachche - kadam-kadam shreemat par chalna yahi highest chart hai, jin bachchon ko shreemat ka regard hai woh murli zaroor padhenge''

prashn:- tum eeshvar ke bachchon se kaun-sa prashn koi bhi poochh nahin sakta hai?

uttar:- tum bachchon se yeh koi bhi nahin poochh sakta ki tum raazi khushi ho? kyonki tum kehte ho ham sadaiv raazi hain। parvaah thi paar brahm mein rahne vaale baap ki, woh mil gaya baaki kis baat ki parvaah karni, tum bhal beemaar ho to bhi kahenge ham raazi khushi hain। eeshvar ke bachchon ko kisi baat ki parvaah nahin। baap jab dekhte hain in par maaya ka vaar hua hai to poochhte hain - bachche, raazi khushi ho?

om shanti। baap samjhaate hain bachchon ki buddhi mein yeh zaroor hoga ki baba baap bhi hai, teacher aur supreme guru bhi hai। is yaad mein zaroor honge। yeh yaad kabhi koi sikhla na sake। kalpa-kalpa baap hi aakar sikhlaate hain। woh gyaan saagar patit-paavan hai। yeh abhi samjhaaya jaata hai jabki gyaan ka teesra netra divya buddhi mili hai। bachche bhal samajhte to honge parantu baap ko hi bhool jaate hain to teacher-guru phir kaise yaad aayega। maaya bahut hi prabal hai jo baap ke teenon roopon ko hi bhula deti hai। kehte hain ham haar kha gaye। yoon to kadam-kadam mein padam hain parantu haar khaane se padam kaise honge? devtaaon ko hi padam ki nishaani dete hain। yeh eeshvar ki padhaai hai। aise manushya ki padhaai kabhi ho na sake। bhal devtaaon ki mahima ki jaati hai phir bhi oonch te oonch hai ek baap। baaki unki badaai kya hai। aaj gadhaai, kal raajaai। abhi tum purooshaartha kar yeh ban rahe ho। jaante ho is purooshaartha mein fail bahut hote hain। gyaan to bahut sahaj hai phir bhi itne thode paas hote hain। kyon? maaya ghadi-ghadi bhula deti hai। baap kehte hain apna chart rakho parantu likh nahin paate hain। kahaan tak baith likhen। agar likhte bhi hain to kabhi up, kabhi down। highest chart unhon ka hota hai jo kadam-kadam shreemat par chalte hain। baap to samjhenge in bichaaron ko lajja aati hogi। nahin to shreemat amal mein laani chaahiye। 1-2 percent mushkil likhte hain। shreemat ka itna regard nahin hai। murli milti hai tab bhi nahin padhte hain। unhon ko dil mein lagta to zaroor hoga - baba kehte to sach hain, ham murli nahin padhte hain to auron ko kya sikhlaayenge।

baap to kehte hain mujhe yaad karo to svarga ke maalik bano, ismen baap bhi aa gaya, padhaane vaala bhi aa gaya। sadgati daata bhi aa gaya। thode-thode akshar mein saara gyaan aa jaata hai। yahaan tum aate hi ho isko revise karne। bhal baap bhi yahi samjhaate hain kyonki tum khud kehte ho ham bhool jaate hain isliye yahaan aate hain revise karne। bhal koi karte bhi hain to bhi revise nahin hota। takdeer mein nahin hai to tadbeer bhi kya karen। tadbeer karaane vaala to ek hi baap hai, ismen koi ki paas-khaatiri bhi nahin ho sakti। us padhaai mein to extra padhaane liye teacher ko bulaate hain। yeh to takdeer banaane ke liye sabko ekras padhaate hain। ek-ek ko alag-alag kahaan tak padhaayenge - kitne dher bachche hain! us padhaai mein koi bade aadmi ke bachche hote hain, offer karte hain to unko extra bhi padhaate hain। teacher jaante hain ki yeh dull hai, isliye padhaakar unko scholarship laayak banaate hain। yeh teacher aisa nahin karte hain। yeh to sabhi ko ek jaisa padhaate hain। extra purooshaartha maana teacher kuchh kripa karte hain। bhal aise to paise bhi lete hain, khaas time de padhaate hain, jisse woh jaasti padhkar hoshiyaar hote hain। yeh baap to sabko ek hi mahaamantra dete hain manamnaabhav। bas। baap hi ek patit-paavan hai, unki hi yaad se ham paavan banenge। woh tum bachchon ke haath mein hai, jitna yaad karenge utna paavan banenge। saara madaar har ek ke purooshaartha par hai। woh to teerthon par yaatraayen karne jaate hain। ek-do ko dekhkar bhi jaate hain। tum bachchon ne bhi bahut yaatraayen ki hain phir kya hua। neeche hi girte aaye ho। yaatra kislie hai, isse kya milega! kuchh bhi pata nahin tha। abhi tumhaari hai yaad ki yaatra। akshar hi ek hai - manamnaabhav। yeh yaatra tumhaari anaadi hai। woh bhi kehte hain ham yeh yaatra anaadi kaal se karte aaye hain। abhi tum gyaan sahit kehte ho ki ham kalpa-kalpa yeh yaatra karte hain। yeh yaatra khud baap aakar sikhlaate hain। un yaatraaon mein kitne dhakke khaate hain। kitna shor hota hai। yeh yaatra hai dead silence ki। ek baap ko hi yaad karna hai, isse hi paavan banna hai। tumhein baap ne yeh sachchi-sachchi roohaani yaatra sikhlaai hai। woh yaatraayen to tum janma-janmaantar karte hi rahe, phir bhi gaate hain - chaaron taraph lagaaye phere… bhagwan se to door hi rahe। yaatra se aakar phir vikaaron mein girte hain to kya phaayda। abhi tum bachche jaante ho yeh hai purooshottam sangamayug, jabki baap aaye hain। ek din sabhi jaan jaayenge ki baap aaya hua hai। bhagwan aakhreen milega kaise? yeh to koi bhi nahin jaante। koi to samajhte hain kutte billi mein milega। kya in sabmen bhagwan milega? kitna jhooth hai। jhooth hi khaana, jhooth hi peena, jhooth hi raat bitaana isliye yeh hai hi jhooth khanda। sach khanda svarga ko kaha jaata hai। bhaarat hi svarga tha। svarga mein sab bhaaratvaasi the, aaj vahi bhaaratvaasi narka mein hain। yeh to tum meethe-meethe bachche jaante ho ham baap se shreemat lekar bhaarat ko phir se svarga bana rahe hain। us samay bhaarat mein aur koi hota hi nahin। saara vishwa pavitra ban jaata hai। abhi to kitne dher ke dher dharma hain। baap saare jhaad ki knowledge sunaate hain। tumhein phir se smriti dilaate hain। tum so devta the phir vaishya, shoodra bane। abhi tum brahman bane ho। yeh akshar kabhi koi sannyaasi udaasi, vidvaan dvaara sune hain? yeh ham so ka arth baap kitna sahaj karke sunaate hain। ham so maana main aatma, ham aatma aise-aise chakra lagaate hain। woh to kah dete ham aatma so paramatma, paramatma so ham aatma। ek bhi nahin jisko ham so ke arth ka pata ho। baap kehte hain yeh jo ham so ka mantra hai, sada buddhi mein yaad rehna chaahiye। nahin to chakravarti raaja kaise banenge। woh to 84 ka arth bhi nahin samajhte hain। bhaarat ka hi utthaan aur patan gaaya hua hai। satopradhaan, sato, rajo, tamo। sooryavanshi, chandravanshi.......।

abhi tum bachchon ko sab kuchh maaloom pad gaya hai। ek baap beejroop ko hi gyaan ka saagar kaha jaata hai। woh is srishti chakra mein nahin aate hain। aise nahin ki ham aatma so paramatma ban jaate hain। nahin, baap aapasmaan knowledgeful banaate hain। aap samaan god nahin banaate, in baaton ko achhi reeti samajhna chaahiye tab hi buddhi mein chakra chal sakta hai। tum buddhi se samajh sakte ho ki ham kaise 84 ke chakra mein aate hain। ismen samay, varna, vanshaavli sab aa jaate hain। is knowledge se hi oonch te oonch bante hain। knowledge hogi to auron ko bhi denge। un school mein jab imtahaan hota hai to paper aadi bharaate hain। paper vilaayat se aate hain। jo vilaayat mein padhte honge, unmein bhi koi bada education minister hoga to jaanch karte honge। yahaan tumhaare papers ki kaun jaanch karega? tum khud hi karenge। khud jo chaahiye so bano। padhkar jo pad baap se chaaho woh le lo। jitna baap ko yaad karenge, doosron ki service karenge, utna hi phal milega। unhein service karne ki phikra rahegi ki raajdhaani sthaapan ho rahi hai to praja bhi to chaahiye na। vahaan vazeer aadi ki darkaar nahin rehti। yahaan to jab akla kam hota hai tab vazeer ki darkaar hoti hai। yahaan baap ke paas bhi raay lene aate hain - baba paisa hai kya karen? dhandha kaise karen? baap kehte hain yeh duniya ke dhandhe aadi ki baat yahaan nahin laao। haan, koi dilshikasta ho jaae to thoda bahut aathat dene ke liye bata dete hain। lekin yeh mera koi dhandha nahin hai। mera dhandha hai tumhein patit se paavan banaakar vishwa ka maalik banaane ka। tumko baap se shreemat sada lete rehna hai। abhi to sabhi ki hai aasuri mat। vahaan to sukhdhaam hai। vahaan kabhi aise nahin poochhenge ki raazi khushi ho? tabiyat theek hai? yeh akshar yahaan hi poochha jaata hai। vahaan yeh akshar hota hi nahin। duhkhadhaam ke koi akshar hi nahin। parantu baap jaante hain bachchon mein maaya ki praveshta hone ke kaaran baap poochh sakte hain ki theek-thaak raazi khushi ho? manushya yahaan ke akshar ko to samajh na saken। koi manushya poochhe to kah sakte ho ki ham eeshvar ke bachche hain, hamse kya khush khairaaphat poochhte ho? parvaah thi paar brahm mein rahne vaale baap ki, ab woh mil gaya, ab kya parvaah। yeh hamesha yaad rehna chaahiye। ham kiske bachche hain - yeh bhi buddhi mein gyaan hai। jab ham paavan ban jaayenge phir ladaai shuru hogi। tumse poochhenge zaroor। tum kahenge ham to sadaiv raazi hain। beemaar bhi ho to bhi raazi ho। baba ki yaad mein ho to svarga se bhi yahaan jaasti raazi ho। jabki svarga ki baadshaahi dene vaala baap mila hai। hamko kitna laayak banaate hain, phir hamko kya parvaah hai! eeshvar ke bachchon ko kis cheez ki parvaah। vahaan devtaaon ko bhi parvaah nahin। devtaaon ke oopar hai eeshvar। to eeshvar ke bachchon ko kya parvaah ho sakti hai। baba hamko padha rahe hain। baba hamaara teacher, satguru hai। baba hamaare oopar taaj rakhte hain। isko english mein kehte hain crown prince। baap ka taaj bachcha pahnega। tum samajh sakte ho satayug mein sukh hi sukh hai। practical mein woh sukh tab paayenge jab vahaan jaayenge। woh to tum hi jaano। satayug mein kya hoga, yeh shareer chhod ham kahaan jaayenge। abhi tumko practical mein baap padha rahe hain। tum jaante ho sach-sach ham svarga mein jaate hain। woh jo kehte hain phalaana svarga mein gaya parantu unhein pata nahin svarga aur narka kisko kaha jaata hai। kalpa ki aayu hi laakhon varsha likh di hai। janma-janmaantar yeh gyaan sunte-sunte girte aaye। abhi tumhaari buddhi mein hai ki ham kahaan se kahaan aakar gire hain। satayug se girte hi aaye hain। abhi ham is purooshottam sangamayug par pahunche hain। kalpa-kalpa baap aate hain padhaane। baap ke paas tum rehte ho na। yahi hamaara sachcha-sachcha satguru hai, jo mukti-jeevanmukti ka raasta bataate hain। jaise yeh baba bhi seekhte hain, aise inko dekh tum bachche bhi seekhte ho। kadam-kadam par saavdhaani rakhni hoti hai। mansa-vaacha-karmana bahut shuddh rehna hai। andar koi bhi gandagi nahin honi chaahiye। baap ko ghadi-ghadi bachche bhool jaate hain। baap ko bhoolne se baap ki shiksha bhi bhool jaate hain। ham student hain, yeh bhi bhool jaate hain। hai bahut sahaj। baap ki yaad mein hi karaamaat hai। aisi karaamaat aur koi bhi baap sikhla na sake। is karaamaat se hi tamopradhaan se satopradhaan bante hain।

tum bachche jaante ho shivbaaba ne brahma dvaara aadi sanaatan devi-devta dharma ki sthaapna ki hai, jo dharma satayug aur treta, aadha-kalpa chalta hai। phir doosre dharma vaale baad mein vriddhi ko paate hain। jaise Christ aaya, pahle to bahut thode the। jab bahut ho jaaen tab raajaai kar saken। Christian dharma abhi tak hai। vriddhi hoti rehti hai। ve jaante hain ki Christ dvaara ham Christian bane hain। aaj se 2 hajaar varsha pahle Christ aaya tha। ab vriddhi ho rahi hai। Christian kahenge ham Christ ke hain। pahle ek Christ aaya, phir unka dharma sthaapan hota hai, vriddhi hoti jaati hai। ek se do, do se chaar..... phir aise vriddhi hoti jaati hai। abhi dekho Christian ka jhaad kitna ho gaya hai। foundation hai devi-devta gharaana, isliye brahma ko great-great grand father kaha jaata hai। parantu bhaaratvaasiyon ko yeh bhool gaya hai ki ham parampita paramatma shiv ke direct bachche hain।

Christian bhi samajhte hain aadi dev hokar gaye hain, jiske yeh manushya vanshaavli hain। baaki woh maanenge to apne Christ ko hi, Christ ko, buddha ko father samajhte hain। sijra hai na। jaise Christ ka yaadgaar Christian desh mein hai। vaise tum bachchon ne yahaan tapasya ki hai tab tumhaara bhi yaadgaar yahaan (aabu mein) hai। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dead silence ki sachchi-sachchi roohaani yaatra karni hai। ham so ka mantra sada yaad rakhna hai, tab chakravarti raaja banenge।

2) mansa-vaacha-karmana bahut shuddh rehna hai। andar koi bhi gandagi na ho। kadam-kadam par saavdhaani rakhni hai। shreemat ka regard rakhna hai।

vardaan:- nirmaanta ke gun ko dhaaran kar sabko sukh dene vaale sukh deva, sukh swaroop bhav

aap mahaan aatmaon ki nishaani hai nirmaanta। jitna nirmaan banenge utna sarva dvaara maan praapta hoga। jo nirmaan hai woh sabko sukh denge। jahaan bhi jaayenge, jo bhi karenge woh sukhdaayi hoga। to jo bhi sambandh-samparka mein aaye woh sukh ki anubhooti kare isliye aap brahman aatmaon ka gaayan hai - sukh ke saagar ke bachche sukh swaroop, sukh-deva। to sabko sukh dete aur sukh lete chalo। koi aapko duhkh de to lena nahin।

slogan:- sabse bade gyaani woh hain jo aatma-abhimaani rehte hain।