Murli du jour du samedi 11 janvier 2025

11-01-2025 praatahmurli om shanti "baapdaada"' madhuban

“meethe bachche - yog, agni ke samaan hai, jismen tumhaare paap jal jaate hain, aatma satopradhaan ban jaati hai isliye ek baap ki yaad mein (yog mein) raho''

prashn:- punya aatma banne vaale bachchon ko kis baat ka bahut-bahut dhyaan rakhna hai?

uttar:- paisa daan kise dena hai, is baat par poora dhyaan rakhna hai। agar kisko paisa diya aur usne jaakar sharaab aadi piya, bure karma kiye to uska paap tumhaare oopar aa jaayega। tumhein paap aatmaon se ab len-den nahin karni hai। yahaan to tumhein punya aatma banna hai।

geet:- na woh hamse juda honge…

om shanti। isko kaha jaata hai yaad ki aag। yog agni maana yaad ki aag। aag akshar kyon kaha hai? kyonki ismen paap jal jaate hain। yeh sirf tum bachche hi jaante ho - kaise ham tamopradhaan se satopradhaan bante hain। satopradhaan ka arth hi hai punya aatma aur tamopradhaan ka arth hi hai paap aatma। kaha bhi jaata hai yeh bahut punya aatma hai, yeh paap aatma hai। isse siddha hota hai aatma hi satopradhaan banti hai phir punarjanma lete-lete tamopradhaan banti hai isliye inko paap aatma kaha jaata hai। patit-paavan baap ko bhi isliye yaad karte hain ki aakar paavan aatma banaao। patit aatma kisne banaaya? yeh kisko bhi pata nahin। tum jaante ho jab paavan aatma the to unko raamraajya kaha jaata tha। abhi patit aatmaayen hain isliye inko raavan raajya kaha jaata hai। bhaarat hi paavan, bhaarat hi patit banta hai। baap hi aakar bhaarat ko paavan banaate hain। baaki sab aatmaayen paavan ban shantidham mein chali jaati hain। abhi hai duhkhadhaam। itni sahaj baat bhi buddhi mein baithti nahin hai। jab dil se samjhen tab sachcha brahman banen। brahman banne bigar baap se varsa mil na sake।

ab yeh hai sangamayug ka yagya। yagya ke liye to brahman zaroor chaahiye। abhi tum brahman bane ho। jaante ho mrityulok ka yeh antim yagya hai। mrityulok mein hi yagya hote hain। amarlok mein yagya hote nahin। bhakton ki buddhi mein yeh baaten baith na saken। bhakti bilkul alag hai, gyaan alag hai। manushya phir vedon-shaastron ko hi gyaan samajh lete hain। agar unmein gyaan hota to phir manushya vaapas chale jaate। parantu drama anusaar vaapis koi bhi jaata nahin। baba ne samjhaaya hai pahle number ko hi sato, rajo, tamo mein aana hai to doosre phir sirf sato ka part bajaae vaapis kaise ja sakte? unko to phir tamopradhaan mein aana hi hai, part bajaana hi hai। har ek actor ki taakat apni-apni hoti hai na। bade-bade actors kitne naami-graami hote hain। sabse mukhya creator, director aur mukhya actor kaun hai? abhi tum samajhte ho god father hai mukhya, peechhe phir jagat amba, jagatpita। jagat ke maalik, vishwa ke maalik bante hain, inka part zaroor ooncha hai। to unki pay (pagaar) bhi oonchi hai। pagaar dete hain baap, jo sabse oonch hai। kehte hain tum mujhe itni madad karte ho to tumko pagaar bhi zaroor itni milegi। barrister padhaayega to kahega na, itna oonch pad praapta karaata hoon to is padhaai par bachchon ko kitna attention dena chaahiye। grihastha mein bhi rehna hai, karmayog sannyaas hai na। grihastha vyavhaar mein rehte, sab kuchh karte hue baap se varsa paane ka purushaartha kar sakte hain, ismen koi takleeph nahin hai। kaamkaaj karte shivbaaba ki yaad mein rehna hai। knowledge to badi sahaj hai। gaate bhi hain - he patit-paavan aao, aakar hamko paavan banaao। paavan duniya mein to raajdhaani hai to baap us raajdhaani ka bhi laayak banaate hain।

is gyaan ki mukhya do subject hain - alaph aur be। svadarshan chakradhaari bano aur baap ko yaad karo to tum ever healthy aur wealthy banenge। baap kehte hain mujhe vahaan yaad karo। ghar ko bhi yaad karo, mujhe yaad karne se tum ghar chale jaayenge। svadarshan chakradhaari banne se tum chakravarti raaja banenge। yeh buddhi mein achhi reeti rehna chaahiye। is samay to sab tamopradhaan hain। sukhdhaam mein sukh, shanti, sampatti sab milta hai। vahaan ek dharma hota hai। abhi to dekho ghar-ghar mein ashaanti hai। student log dekho kitna hangaama karte hain। apna new blood dikhaate hain। yeh hai tamopradhaan duniya, satayug hai nai duniya। baap sangam par aaya hua hai। mahaabhaarat ladaai bhi sangam ki hi hai। abhi yeh duniya badalni hai। baap bhi kehte hain main nai duniya ki sthaapna karne sangam par aata hoon, inko hi purushottam sangamayug kehte hain। purushottam maas, purushottam sanvat bhi manaate hain। parantu yeh purushottam sangam ka kisko pata nahin hai। sangam par hi baap aakar tumko heere jaisa banaate hain। phir inmen bhi nambarvaar to hote hi hain। heere jaisa raaja ban jaate hain, baaki sone jaisi praja ban jaati hai। bachche ne janma liya aur varse ka hakdaar bana। abhi tum paavan duniya ke hakdaar ban jaate ho। phir usmein oonch pad paane ke liye purushaartha karna hai। is samay ka tumhaara purushaartha kalpa-kalpa ka purushaartha hoga। samjha jaata hai yeh kalpa-kalpa aisa hi purushaartha karenge। inse jaasti purushaartha hoga hi nahin। janma-janmaantar, kalpa-kalpaantar yeh praja mein hi aayenge। yeh saahookaar praja mein daas-daasiyaan banenge। nambarvaar to hote hain na। padhaai ke aadhaar se sab maaloom pad jaata hai। baba jhat bata sakte hain is haalat mein tumhaara kal shareer chhoot jaaye to kya banenge? din-pratidin time thoda hota jaata hai। agar koi shareer chhodenge phir to padh nahin sakenge, haan thoda sirf buddhi mein aayega। shivbaaba ko yaad karenge। jaise chhote bachche ko bhi tum yaad karaate ho to shivbaaba-shivbaaba kehta rehta hai। to unka bhi kuchh mil sakta hai। chhota bachcha to mahaatma misal hai, vikaaron ka pata nahin। jitna bada hota jaayega, vikaaron ka asar hota jaayega, krodh hoga, moh hoga.......। abhi tumko to samjhaaya jaata hai is duniya mein in okhon se jo kuchh dekhte ho unse mamatva mita dena hai। aatma jaanti hai yeh to sab kabradaakhil hone hain। tamopradhaan cheejen hain। manushya marte hain to puraani cheezen karneeghor ko de dete hain। baap to phir behad ka karneeghor hai, dhobi bhi hai। tumse lete kya hain aur dete kya hain? tum jo kuchh thoda dhan bhi dete ho woh to khatma hona hi hai। phir bhi baap kehte hain yeh dhan rakho apne paas। sirf inse mamatva mita do। hisaab-kitaab baap ko dete raho। phir direction milte rahenge। tumhaara yeh kakhpan jo hai, university mein aur hospital mein health aur wealth ke liye laga dete hain। hospital hoti hai beemaar ke liye, university hoti hai padhaane ke liye। yeh to college aur hospital donon ikatthi hain। inke liye to sirf teen pair prithvi ke chaahiye। bas jinke paas aur kuchh nahin hai woh sirf 3 pair jameen ke de deven। usmein class laga den। 3 pair prithvi ke, woh to sirf baithne ki jagah hui na। aasan 3 pair ka hi hota hai। 3 pair prithvi par koi bhi aayega, achhi reeti samajhkar jaayega। koi aaya, aasan par bithaaya aur baap ka parichay diya। badges bhi bahut banva rahe hain service ke liye, yeh hai bahut simple। chitra bhi achhe hain, likhat bhi poori hai। inse tumhaari bahut service hogi। din-pratidin jitni aaphten aati rahengi to manushyon ko bhi vairaagya aayega aur baap ko yaad karne lag padenge - ham aatma avinaashi hain, apne avinaashi baap ko yaad karen। baap khud kehte hain mujhe yaad karo to tumhaare janma-janmaantar ke paap utar jaayen। apne ko aatma samajh aur baap se poora lav rakhna hai। deh-abhimaan mein na aao। haan, baahar ka pyaar bhal bachchon aadi se rakho। parantu aatma ka sachcha pyaar roohaani baap se ho। unki yaad se hi vikarma vinaash honge। mitra-sambandhiyon, bachchon aadi ko dekhte hue bhi buddhi baap ki yaad mein latki rahe। tum bachche jaise yaad ki phaansi par latke hue ho। aatma ko apne baap paramatma ko hi yaad karna hai। buddhi oopar latki rahe। baap ka ghar bhi oopar hai na। mool vatan, sookshm vatan aur yeh hai sthoolavtan। ab phir vaapis jaana hai।

ab tumhaari musaaphiri poori hui hai। tum ab musaaphiri se laut rahe ho। to apna ghar kitna pyaara lagta hai। woh hai behad ka ghar। vaapis apne ghar jaana hai। manushya bhakti karte hain - ghar jaane ke liye, parantu gyaan poora nahin hai to ghar ja nahin sakte। bhagwan paas jaane ke liye athva nivaarnadhaam mein jaane ke liye kitni teertha yaatraayen aadi karte hain, mehnat karte hain। sannyaasi log sirf shanti ka raasta hi bataate hain। sukhdhaam ko to jaante hi nahin। sukhdhaam ka raasta sirf baap hi batlaate hain। pahle zaroor nivaarnadhaam, vaanaprastha mein jaana hai jisko brahmaanda bhi kehte hain। woh phir brahm ko eeshvar samajh baithe hain। ham aatma bindi hain। hamaara rahne ka sthaan hai brahmaanda। tumhaari bhi pooja to hoti hai na। ab bindi ki pooja kya karenge। jab pooja karte hain to saaligraam banaae ek-ek aatma ko poojte hain। bindi ki pooja kaise ho - isliye bade-bade banaate hain। baap ko bhi apna shareer to hai nahin। yeh baaten abhi tum jaante ho। chitron mein bhi tumko bada roop dikhaana pade। bindi se kaise samjhenge? yoon banaana chaahiye star। aise bahut tilak bhi maataayen lagaati hain, taiyaar milte hain saphed। aatma bhi saphed hoti hai na, star misal। yeh bhi ek nishaani hai। bhrikuti ke beech aatma rehti hai। baaki arth ka kisko pata bhi nahin hai। yeh baap samjhaate hain itni chhoti aatma mein kitna gyaan hai। itne bombs aadi banaate rehte hain। wonder hai, aatma mein itna part bhara hua hai। yeh badi guhya baaten hain। itni chhoti aatma shareer se kitna kaam karti hai। aatma avinaashi hai, unka part kabhi vinaash nahi hota hai, na act badalti hai। abhi bahut bada jhaad hai। satayug mein kitna chhota jhaad hota hai। puraana to hota nahin। meethe chhote jhaad ka kalam abhi lag raha hai। tum patit bane the ab phir paavan ban rahe ho। chhoti-si aatma mein kitna part hai। kudrat yeh hai, avinaashi part chalta rehta hai। yeh kabhi banda nahin hota, avinaashi cheez hai, usmein avinaashi part bhara hua hai। yeh wonder hai na। baap samjhaate hain - bachche, dehi-abhimaani banna hai। apne ko aatma samajh baap ko yaad karo, ismen hai mehnat, jaasti part tumhaara hai। baba ka itna part nahin, jitna tumhaara।

baap kehte hain tum svarga mein sukhi ban jaate ho to main vishraam mein baith jaata hoon। hamaara koi part nahin। is samay itni service karta hoon na। yeh knowledge itni wonderful hai, tumhaare sivaae zara bhi koi nahin jaante hain। baap ki yaad mein rahne bigar dhaarna bhi nahin hogi। khaan-paan aadi ka bhi farka padne se dhaarna mein farka pad jaata hai, ismen purity badi achhi chaahiye। baap ko yaad karna bahut sahaj hai। baap ko yaad karna hai aur varsa paana hai isliye baba ne kaha tha tum apne paas bhi chitra rakh do। yog ka aur varse ka chitra banaao to nasha rahega। ham brahman so devta ban rahe hain। phir ham devta so kshatriy banenge। brahman hain purushottam sangamayugi। tum purushottam bante ho na। manushyon ko yeh baaten buddhi mein bithaane ke liye kitni mehnat karni padti hai। din-pratidin jitna knowledge ko samajhte jaate hain to khushi bhi badhegi।

tum bachche jaante ho baba hamaara bahut kalyaan karte hain। kalpa-kalpa hamaari chadhti kala hoti hai। yahaan rehte shareer nirvaah arth bhi sab-kuchh karna padta hai। buddhi mein rahe ham shivbaaba ke bhandaare se khaate hain, shivbaaba ko yaad karte rahenge to kaal kantak sab door ho jaayenge। phir yeh puraana shareer chhod chale jaayenge। bachche samajhte hain - baba kuchh bhi lete nahin hain। woh to daata hai। baap kehte hain hamaari shreemat par chalo। tumhein paise ka daan kise karna hai, is baat par poora dhyaan dena hai। agar kisko paisa diya aur usne jaakar sharaab aadi piya, bure kaam kiye to uska paap tumhaare oopar aa jaayega। paap aatmaon se len-den karte paap aatma ban jaate hain। kitna farka hai। paap aatma, paap aatma se hi len-den kar paap aatma ban jaate hain। yahaan to tumko punya aatma banna hai isliye paap aatmaon se len-den nahin karni hai। baap kehte hain koi ko bhi duhkh nahin dena hai, koi mein moh nahin rakhna hai। baap bhi saccharin bankar aate hain। puraana kakhpan lete hain, dete dekho kitna byaaj hain। bada bhaari byaaj milta hai। kitna bhola hai, do mutthi ke badle mahal de dete hain। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ab musaaphiri poori hui, vaapas ghar jaana hai isliye is puraani duniya se behad ka vairaagya rakh buddhiyog baap ki yaad mein oopar latkaana hai।

2) sangamayug par baap ne jo yagya racha hai, is yagya ki sambhaal karne ke liye sachcha-sachcha pavitra brahman banna hai। kaam kaaj karte baap ki yaad mein rehna hai।

vardaan:- aadi ratna ki smriti se apne jeevan ka moolya jaanne vaale sada samartha bhav

jaise brahma aadi dev hai, aise brahmaakumaar, kumaariyaan bhi aadi ratna hain। aadi dev ke bachche master aadi dev hain। aadi ratna samajhne se hi apne jeevan ke moolya ko jaan sakenge kyonki aadi ratna arthaat prabhu ke ratna, eeshvareey ratna-to kitni value ho gai isliye sada apne ko aadi dev ke bachche master aadi dev, aadi ratna samajhkar har kaarya karo to samartha bhav ka vardaan mil jaayega। kuchh bhi vyartha ja nahin sakta।

slogan:- gyaani tu aatma woh hai jo dhokha khaane se pahle parakhkar svayan ko bacha le।

apni shaktishaali mansa dvaara sakaash dene ki seva karo

abhi seva mein sakaash de, buddhiyon ko parivartan karne ki seva add karo। phir dekho saphalta aapke saamne svayan jhukegi। seva mein jo vighna aate hain, us vighnon ke parde ke andar kalyaan ka drishya chhipa hua hai। sirf mansa-vaacha ki shakti se vighna ka parda hata do to andar kalyaan ka drishya dikhaai dega।