Murli du jour du lundi 27 janvier 2025

27-01-2025 praatahmurli om shanti "baapdaada"' madhuban

“meethe bachche - tumhaari jab karmaateet avastha hogi tab vishnupuri mein jaayenge, paas with honour hone vaale bachche hi karmaateet bante hain''

prashn:- tum bachchon par donon baap kaun-si mehnat karte hain?

uttar:- bachche svarga ke laayak banen। sarvagun sampanna, 16 kala sampoorn banaane ki mehnat baapdaada donon karte hain। yeh jaise tumhein double engine mili hai। aisi wonderful padhaai padhaate hain jisse tum 21 janma ki baadshaahi pa lete ho।

geet:- bachpan ke din bhula na dena…

om shanti। meethe-meethe sikeeldhe bachchon ne geet suna। drama plan anusaar aise-aise geet select kiye hue hain। manushya chakrit hote hain ki yeh kya naatak ke record par vaani chalaate hain। yeh phir kis prakaar ka gyaan hai! shaastra, ved, upnishad aadi chhod diye, ab record ke oopar vaani chalti hai! yeh bhi tum bachchon ki buddhi mein hai ki ham behad ke baap ke bane hain, jisse ateendriy sukh milta hai aise baap ko bhoolna nahin hai। baap ki yaad se hi janma-janmaantar ke paap dagdha hote hain। aise na ho jo yaad ko chhod do aur paap rah jaaen। phir pad bhi kam ho jaayega। aise baap ko to achhi reeti yaad karne ka purooshaartha karna chaahiye। jaise sagaai hoti hai to phir ek-do ko yaad karte hain। tumhaari bhi sagaai hui hai phir jab tum karmaateet avastha ko paate ho tab vishnupuri mein jaayenge। abhi shivbaaba bhi hai। prajaapita brahma baba bhi hai। do engine mili hain - ek niraakaari, doosri saakaari। donon hi mehnat karte hain ki bachche svarga ke laayak ban jaaen। sarvagun sampanna 16 kala sampoorn banna hai। yahaan imtahaan paas karna hai। yeh baaten koi shaastron mein nahin hain। yeh padhaai badi wonderful hai - bhavishya 21janmon ke liye। aur padhaai hoti hain mrityulok ke liye, yeh padhaai hai amarlok ke liye। uske liye padhna to yahaan hai na। jab tak aatma pavitra na bane tab tak satayug mein ja na sake isliye baap sangam par hi aate hain, isko hi purooshottam kalyaankaari yug kaha jaata hai। jabki tum kaudi se heere jaisa bante ho isliye shreemat par chalte raho। shri shri shivbaaba ko hi kaha jaata hai। maala ka arth bhi bachchon ko samjhaaya hai। oopar mein phool hai shivbaaba, phir hai yugal meru। pravritti maarga hai na। phir hain daane, jo vijay paane vaale hain, unki hi roodra maala phir vishnu ki maala banti hai। is maala ka arth koi bhi nahin jaante। baap baith samjhaate hain tum bachchon ko kaudi se heere jaisa banna hai। 63 janma tum baap ko yaad karte aaye ho। tum ab aashik ho ek maashuk ke। sab bhakta hain ek bhagwan ke। patiyon ka pati, baapon ka baap woh ek hi hai। tum bachchon ko raajaaon ka raaja banaate hain। khud nahin bante hain। baap baar-baar samjhaate hain - baap ki yaad se hi tumhaare janma-janmaantar ke paap bhasma honge। saadhu santa to kah dete aatma nirlep hai। baap samjhaate hain sanskaar achhe va bure aatma hi le jaati hai। woh kah dete bas jidhar dekhta hoon sab bhagwan hi bhagwan hain। bhagwan ki hi yeh sab leela hai। bilkul hi vaam maarga mein gande ban jaate hain। aise-aise ki mat par bhi laakhon manushya chal rahe hain। yeh bhi drama mein noondh hai। hamesha buddhi mein teen dhaam yaad rakho - shantidham jahaan aatmaayen rehti hain, sukhdhaam jahaan ke liye tum purooshaartha kar rahe ho, duhkhadhaam shuru hota hai aadhaakalpa ke baad। bhagwan ko kaha jaata hai heavenly god father। woh koi hell sthaapan nahin karte hain। baap kehte hain main to sukhdhaam hi sthaapan karta hoon। baaki yeh haar aur jeet ka khel hai। tum bachche shreemat par chalkar abhi maaya roopi raavan par jeet paate ho। phir aadhaakalpa baad raavan raajya shuru hota hai। tum bachche abhi yuddha ke maidaan par ho। yeh buddhi mein dhaaran karna hai phir doosron ko samjhaana hai। andhon ki laathi ban ghar ka raasta bataana hai kyonki sab us ghar ko bhool gaye hain। kehte bhi hain ki yeh ek naatak hai। parantu iski aayu laakhon hazaaron varsha kah dete hain। baap samjhaate hain raavan ne tumko kitna andha (gyaan nainheen) bana diya hai। abhi baap sab baaten samjha rahe hain। baap ko hi knowledgeful kaha jaata hai। iska arth yeh nahin ki har ek ke andar ko jaanne vaale hain। woh to riddhi-siddhi vaale seekhte hain jo tumhaare andar ki baaten suna lete hain। knowledgeful ka arth yeh nahin hai। yeh to baap ki hi mahima hai। woh gyaan ka saagar, aanand ka saagar hai। manushya to kah dete ki woh antaryaami hai। abhi tum bachche samajhte ho ki woh to teacher hai, hamko padhaate hain। woh roohaani baap bhi hai, roohaani satguru bhi hai। woh jismaani teacher guru hote hain, so bhi alag-alag hote hain, teenon ek ho na sake। karke koi-koi baap teacher bhi hota hai। guru to ho na sake। woh to phir bhi manushya hai। yahaan to woh supreme rooh parampita paramatma padhaate hain। aatma ko paramatma nahin kaha jaata। yeh bhi koi samajhte nahin। kehte hain paramatma ne arjun ko saakshaatkaar karaaya to usne kaha bas karo, bas karo ham itna tej sahan nahin kar sakte। yeh jo sab suna hai to samajhte hain paramatma itna tejomay hai। aage baba ke paas aate the to saakshaatkaar mein chale jaate the। kehte the bas karo, bahut tej hai, ham sahan nahin kar sakte। jo suna hua hai vahi buddhi mein bhaavna rehti hai। baap kehte hain jo jis bhaavna se yaad karte hain, main unki bhaavna poori kar sakta hoon। koi ganesh ka pujaari hoga to unko ganesh ka saakshaatkaar karaayenge। saakshaatkaar hone se samajhte hain bas muktidhaam mein pahunch gaya। parantu nahin, muktidhaam mein koi ja na sake। naarad ka bhi misaal hai। woh shiromni bhakta gaaya hua hai। usne poochha ham lakshmi ko var sakte hain to kaha apni shakla to dekho। bhakta maala bhi hoti hai। females mein meera aur males mein naarad mukhya gaaye hue hain। yahaan phir gyaan mein mukhya shiromni hai sarasvati। nambarvaar to hote hain na।

baap samjhaate hain maaya se bada khabardaar rehna hai। maaya aisa ulta kaam kara legi। phir ant mein bahut rona, pachhtaana padega - bhagwan aaya aur ham varsa le na sake! phir praja mein bhi daas-daasi jaakar banenge। peechhe padhaai to poori ho jaati hai, phir bahut pachhtaana padta hai isliye baap pahle se hi samjha dete hain ki phir pachhtaana na pade। jitna baap ko yaad karte rahenge to yog agni se paap bhasma honge। aatma satopradhaan thi phir usmein khaad padte-padte tamopradhaan bani hai। golden, silver, copper, iron... naam bhi hai। abhi iron ej se phir tumko golden ej mein jaana hai। pavitra banne bigar aatmaayen ja na saken। satayug mein purity thi to pees, prosperity bhi thi। yahaan purity nahin to pees prosperity bhi nahin। raat-din ka pharka hai। to baap samjhaate hain yeh bachpan ke din bhool na jaana। baap ne adopt kiya hai na। brahma dvaara adopt karte hain, yeh adoption hai। stri ko adopt kiya jaata hai। baaki bachchon ko phir create kiya jaata hai। stri ko rachna nahin kahenge। yeh baap bhi adopt karte hain ki tum hamaare vahi bachche ho jinko kalpa pahle adopt kiya tha। adopted bachchon ko hi baap se varsa milta hai। oonch te oonch baap se oonch te oonch varsa milta hai। woh hai hi bhagwan phir second number mein hain lakshmi-naaraayan satayug ke maalik। abhi tum satayug ke maalik ban rahe ho। abhi sampoorn nahin bane ho, ban rahe ho।

paavan bankar paavan banaana, yahi roohaani sachchi seva hai। tum abhi roohaani seva karte ho isliye tum bahut oonche ho। shivbaaba patiton ko paavan banaate hain। tum bhi paavan banaate ho। raavan ne kitna tuchchha buddhi bana diya hai। abhi baap phir laayak banaae vishwa ka maalik banaate hain। aise baap ko phir patthar thikkar mein kaise kah sakte? baap kehte hain yeh khel bana hua hai। kalpa baad phir aisa hoga। ab drama plan anusaar main aaya hoon tumko samjhaane। ismen zara bhi pharka nahin pad sakta। baap ek second ki deri nahin kar sakte। jaise baba ka reincarnation hota hai, vaise tum bachchon ka bhi reincarnation hota hai, tum avatrit ho। aatma yahaan aakar phir saakaar mein part bajaati hai, isko kaha jaata hai avatran। oopar se neeche aaya part bajaane। baap ka bhi divya, alaukik janma hai। baap khud kehte hain mujhe prakriti ka aadhaar lena padta hai। main is tan mein pravesh karta hoon। yeh mera mukrar tan hai। yeh bahut bada wonderful khel hai। is naatak mein har ek ka part noondha hua hai jo bajaate hi rehte hain। 21 janmon ka part phir aise hi bajaayenge। tumko clear knowledge mili hai so bhi nambarvaar purooshaartha anusaar। mahaarthiyon ki baba mahima to karte hain na। yeh jo dikhaate hain paandav aur kaurvon ki yuddha hui, yeh sab hain banaavti baaten। abhi tum samajhte ho woh hai jismaani double hinsak, tum ho roohaani double ahinsak। baadshaahi lene ke liye dekho tum baithe kaise ho। jaante ho baap ki yaad se vikarma vinaash honge। yahi phurna laga hua hai। mehnat saari yaad karne mein hi hai isliye bhaarat ka praacheen yog gaaya hua hai। woh baahar vaale bhi yeh bhaarat ka praacheen yog seekhna chaahte hain। samajhte hain ki sannyaasi log hamko yeh yog sikhlaayenge। vaastav mein woh sikhlaate kuchh bhi nahin hain। unhon ka sannyaas hai hi hathayog ka। tum ho pravritti maarga vaale। tumhaari shuru mein hi kingdom thi। abhi hai ant। abhi to panchaayti raajya hai। duniya mein andhakaar to bahut hai। tum jaante ho abhi to khoone naahek khel hona hai। yeh bhi ek khel dikhaate hain, yeh to behad ki baat hai, kitne khoon honge। natural calamities hongi। sabka maut hoga। inko khoone naahek kaha jaata hai। ismen dekhne ki badi himmat chaahiye। darpok to jhat behosh ho jaayenge, ismen nidrapna bahut chaahiye। tum to shiv shaktiyaan ho na। shivbaaba hai sarvashaktimaan, ham unse shakti lete hain, patit se paavan banne ki yukti baap hi batlaate hain। baap bilkul simple raay dete hain - bachche, tum satopradhaan the, ab tamopradhaan bane ho, ab baap kehte hain mujhe yaad karo to tum patit se paavan satopradhaan ban jaayenge। aatma ko baap ke saath yog lagaana hai to paap bhasma ho jaaen। authority bhi baap hi hai। chitron mein dikhaate hain - vishnu ki naabhi se brahma nikla। un dvaara baith sab shaastron vedon ka raaz samjhaaya। abhi tum jaante ho brahma so vishnu, vishnu so brahma bante hain। brahma dvaara sthaapna karte phir jo sthaapna hui unki paalna bhi zaroor karenge na। yeh sab achhi reeti samjhaaya jaata hai, jo samajhte hain unko yeh khyaal rahega ki yeh roohaani knowledge kaise sabko milni chaahiye। hamaare paas dhan hai to kyon nahin centres kholen। baap kehte hain achha kiraaye par hi makaan le lo, usmein hospital kam university kholo। yog se hai mukti, gyaan se hai jeevanmukti। do varse milte hain। ismen sirf 3 pair prithvi ke chaahiye, aur kuchh nahin। god fatherly university kholo। vishwa vidyaalay va university, baat to ek hi hui। yeh manushya se devta banne ki kitni badi university hai। poochhenge, aapka kharcha kaise chalta hai? are, bi.ke. ke baap ko itne dher bachche hain, tum poochhne aaye ho! board par dekho kya likha hua hai? badi wonderful knowledge hai। baap bhi wonderful hai na। vishwa ke maalik tum kaise bante ho? shivbaaba ko kahenge shri shri kyonki oonch te oonch hai na। lakshmi-naaraayan ko kahenge shri lakshmi, shri naaraayan। yeh sab achhi reeti dhaaran karne ki baaten hain। baap kehte hain main tumko raajayog sikhlaata hoon। yeh hai sachchi-sachchi amraktha। sirf ek paarvati ko thode hi amar katha sunaai hogi। kitne dher manushya amarnaath par jaate hain। tum bachche baap ke paas aaye ho refresh hone। phir sabko samjhaana hai, jaakar refresh karna hai, centre kholna hai। baap kehte hain sirf 3 pair prithvi ka lekar hospital kam university kholte jaao to bahuton ka kalyaan hoga। ismen kharcha to kuchh bhi nahin hai। health, wealth aur happiness ek second mein mil jaati hai। bachcha janma aur vaaris hua। tumko bhi nishchay hua aur vishwa ke maalik banen। phir hai purooshaartha par madaar। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) antim khoone naahek scene dekhne ke liye bahut-bahut nirbhay, shiv shakti banna hai। sarvashaktimaan baap ki yaad se shakti leni hai।

2) paavan bankar, paavan banaane ki roohaani sachchi seva karni hai। double ahinsak banna hai। andhon ki laathi ban sabko ghar ka raasta bataana hai।

vardaan:- main aur mere pan ko samaapta kar samaanta va sampoornata ka anubhav karne vaale sachche tyaagi bhav

har second, har sankalp mein baba-baba yaad rahe, main pan samaapta ho jaae, jab main nahin to mera bhi nahin। mera svabhaav, mere sanskaar, meri nature, mera kaam ya duty, mera naam, meri shaan....jab yeh main aur mera pan samaapta ho jaata to yahi samaanta aur sampoornata hai। yeh main aur mere pan ka tyaag hi bade se bada sookshm tyaag hai। is main pan ke ashva ko ashvamedh yagya mein svaaha karo tab antim aahuti padegi aur vijay ke nagaade bajenge।

slogan:- haan ji kar sahayog ka haath badhaana arthaat duaaon ki maalaayen pahanna।

apni shaktishaali mansa dvaara sakaash dene ki seva karo

mansa dvaara sakaash tab de sakenge jab nirantar ekras sthiti mein sthit hone ka abhyaas hoga। iske liye pahle vyartha sankalpon ko shuddh sankalpon mein parivartan karo। phir maaya dvaara aane vaale anek prakaar ke vighnon ko eeshvareey lagan ke aadhaar se samaapta karo। ek baap doosra na koi is paath dvaara ekaagrata ki shakti ko badhaao।