Murli du jour du jeudi 27 février 2025

27-02-2025 praatahmurli om shanti "baapdaada"' madhuban

“meethe bachche - sat ka sang gyaan maarga mein hi hota hai, abhi tum sat baap ke sang mein baithe ho, baap ki yaad mein rehna maana satsang karna''

prashn:- satsang ki aavashyakta tum bachchon ko abhi hi hai - kyon?

uttar:- kyonki tamopradhaan aatma ek sat baap, sat shikshak aur satguru ke sang se hi satopradhaan arthaat kaale se gori ban sakti hai। bina satsang ke nirbal aatma balvaan nahin ban sakti। baap ke sang se aatma mein pavitrata ka bal aa jaata hai, 21 janma ke liye uska beda paar ho jaata hai।

om shanti। bachche satsang mein baithe ho, is sat ke sang mein kalpa-kalpa sangam par hi bachche baithte hain। duniya to yeh nahin jaanti ki sat ka sang kisko kaha jaata hai। satsang naam yeh avinaashi chala aata hai। bhakti maarga mein bhi kehte hain ham phalaane satsang mein jaate hain। ab vaastav mein bhakti maarga mein koi satsang mein jaate nahin। satsang hota hi gyaan maarga mein hai। ab tum sat ke sang mein baithe ho। aatmaayen sat baap ke sang mein baithi hain। aur koi jagah aatmaayen parampita paramatma ke sang mein nahin baithti। baap ko jaante nahin। bhal kehte hain ham satsang mein jaate hain parantu woh deh-abhimaan mein aa jaate hain। tum deh-abhimaan mein nahin aayenge। tum samajhte ho ham aatma hain, sat baba ke sang baithe hain। aur koi bhi manushya sat ke sang mein baith nahin sakta। sat ka sang - yeh naam bhi abhi hi hai। sat ka sang - iska yathaartha reeti arth baap baith samjhaate hain। tum aatmaayen ab paramatma baap jo satya hai, unke saath baithi ho। woh sat baap, sat teacher, satguru hai। to goya tum satsang mein baithe ho। phir bhal yahaan va ghar mein baithe ho parantu apne ko aatma samajh yaad baap ko karte ho। ham aatma ab sat baap ko yaad kar rahe hain arthaat sat ke sang mein hain। baap madhuban mein baithe hain। baap ko yaad karne ki yuktiyaan bhi anek prakaar ki milti hain। yaad se hi vikarma vinaash honge। yeh bhi bachche jaante hain - ham 16 kala sampoorn bante hain phir utarte-utarte kala kam hoti jaati hain। bhakti bhi pahle avyabhichaari hai phir girte-girte vyabhichaari bhakti hone se tamopradhaan ban jaate hain phir unko sat ka sang zaroor chaahiye। nahin to pavitra kaise banen? to ab tum aatmaon ko sat baap ka sang mila hai। aatma jaanti hai hamko baba ko yaad karna hai, unka hi sang hai। yaad ko bhi sang kahenge। yeh hai sat ka sang। yeh deh hote hue bhi tum aatma mujhe yaad karo, yeh hai sat ka sang। jaise kehte hain na inko bade aadmi ka sang laga hua hai, isliye deh-abhimaani ban pada hai। abhi tumhaara sang hua hai sat baap ke saath, jisse tum tamopradhaan se satopradhaan ban jaate ho। baap kehte hain main ek hi baar aata hoon। abhi aatma ka paramatma se sang hone se tum 21 janma ke liye paar ho jaate ho। phir tumko sang lagta hai deh ka। yeh bhi drama bana hua hai। baap kehte hain mere saath tum bachchon ka sang hone se tum satopradhaan ban jaate ho, jisko golden aged kaha jaata hai।

saadhu-santa aadi to samajhte hain aatma nirlep hai, sabhi paramatma hi paramatma hai। to iska matlab paramatma mein khaad padi hai। paramatma mein to khaad pad nahin sakti। baap kehte hain kya mujh paramatma mein khaad padti hai? nahin। main to sadaiv paramdham mein rehta hoon kyonki mujhe to janma-maran mein aana nahin hai। yeh tum bachche jaante ho, tumhaare mein bhi koi ka sang jaasti hai, koi ka kam hai। koi to achhi reeti purooshaartha kar yog mein rehte hain, jitna samay aatma baap ka sang karegi utna phaayda hai। vikarma vinaash honge। baap kehte hain - he aatmaayen, mujh baap ko yaad karo, mera sang karo। mujhe yeh shareer ka aadhaar to lena padta hai। nahin to paramatma bole kaise? aatma sune kaise? abhi tum bachchon ka sang hai sat ke saath। sat baap ko nirantar yaad karna hai। aatma ko sat ka sang karna hai। aatma bhi wonderful hai, paramatma bhi wonderful hai, duniya bhi wonderful hai। yeh duniya kaise chakra lagaati hai, wonder hai। tum saare drama mein all-round part bajaate ho। tumhaari aatma mein 84 janmon ka part noondha hua hai - wonder hai। satayugi aatmaayen aur aajkal ki aatmaayen। usmein bhi tumhaari aatma sabse jaasti all-rounder hai। naatak mein koi ka shuru se part hota hai, koi ka beech se, koi ka pichhaadi mein part hota hai। woh hain sab had ke drama, woh bhi abhi nikle hain। ab science ka itna jor hai। satayug mein kitna unka bal rahega। nai duniya kitna jaldi banti hogi। vahaan pavitrata ka bal hai mukhya। abhi hain nirbal। vahaan hain balvaan। yeh lakshmi-naaraayan balvaan hain na। abhi raavan ne bal chheen liya hai phir tum us raavan par jeet paakar kitna balvaan bante ho। jitna sat ka sang karenge arthaat aatma jitna sat baap ko yaad karti hai utna balvaan banti hai। padhaai mein bhi bal to milta hai na। tumko bhi bal milta hai, saare vishwa par tum hukm chalaate ho। aatma ka sat ke saath yog sangam par hi hota hai। baap kehte hain aatma ko mera sang milne se aatma bahut balvaan ban jaati hai। baap world almighty authority hai na, un dvaara bal milta hai। ismen sab vedon-shaastron ke aadi-madhya-ant ka gyaan aa jaata hai।

jaise baap almighty hai, tum bhi almighty bante ho। vishwa par tum raajya karte ho। tum se koi chheen nahin sakta। tumko mere dvaara kitna bal milta hai, inko bhi bal milta hai, jitna baap ko yaad karenge utna bal milega। baap aur koi takleeph nahin dete hain। sirf yaad karna hai, bas। 84 janmon ka chakra ab poora hua hai, ab vaapis jaana hai। yeh samajhna koi badi baat nahin hai। jaasti rezgaari mein jaane ki to darkaar nahin hai। beej ko jaanne se samajh jaate hain, inse yeh saara jhaad aise nikalta hai। nutshell mein buddhi mein aa jaata hai। yeh badi vichitra baaten hain। bhakti maarga mein manushya kitne dhakke khaate hain। mehnat karte hain, milta kuchh bhi nahin। phir bhi baap aakar tumko vishwa ka maalik banaate hain। ham yogbal se vishwa ka maalik bante hain, yahi purooshaartha karna hai। bhaarat ka yog mashhoor hai। yog se tumhaari aayu kitni badi ho jaati hai। sat ke sang se kitna faayda hota hai, aayu bhi badi aur kaaya bhi nirogi ban jaati hai। yeh sab baaten tum bachchon ki buddhi mein hi bithaai jaati hain। aur koi ka bhi sat ke saath sang nahin hai sivaae tum braahmanon ke। tum prajaapita brahma ki santaan ho, daade potre ho। to itni khushi honi chaahiye na ki ham daade potre hain। varsa bhi daade se milta hai, yahi yaad ki yaatra hai। buddhi mein yahi simran rehna chaahiye। un satsangon mein to ek jagah jaakar baithte hain, yahaan woh baat nahin। aise nahin ki ek jagah baithne se hi sat ka sang hoga। nahin, uthte-baithte, chalte-phirte ham sat ke sang mein hain। agar unko yaad karte hain to। yaad nahin karte hain to deh-abhimaan mein hain, deh to asat cheez hai na। deh ko sat nahin kahenge। shareer to jad hai, 5 tatvon ka bana hua, unmein aatma nahin hoti to churpur na ho। manushya ke shareer ki to value hai nahin, aur sabke shareer ki value hai। saubhaagya to aatma ko milna hai, main phalaana hoon, aatma kehti hai na। baap kehte hain aatma kaisi ho gai hai, ande, kachchha, machchha sab kha jaati hai। har ek bhasmaasur hai, apne ko aapehi bhasma karte hai। kaise? kaam chita par baith har ek apne ko bhasma kar rahe hain to bhasmaasur thahre na। abhi tum gyaan chita par baith devta bante ho। saari duniya kaam chita par baith bhasma ho gai hai, tamopradhaan kaali ho gai hai। baap aate hain bachchon ko kaale se gora banaane। to baap bachchon ko samjhaate hain deh-abhimaan chhod apne ko aatma samjho। bachche school mein padhte hain phir padhaai to ghar mein rehte bhi buddhi mein rehti hai na। yeh bhi tumhaari buddhi mein rahni chaahiye। yeh hai tumhaari student life। em object saamne khadi hai। uthte, baithte, chalte buddhi mein yeh knowledge rahni chaahiye।

yahaan bachche aate hain refresh hote hain, yuktiyaan samjhaai jaati hai ki aise-aise samjhaao। duniya mein dher ke dher satsang hote hain। kitne manushya aakar ikatthe hote hain। vaastav mein woh sat ka sang to hai nahin। sat ka sang to abhi tum bachchon ko hi milta hai। baap hi aakar satayug sthaapan karte hain। tum maalik ban jaate ho। deh-abhimaan athva jhoothe abhimaan se tum gir padte ho aur sat ke sang se tum chadh jaate ho। aadhaakalpa tum praalabdha bhogte ho। aise nahin ki vahaan bhi tumko sat ka sang hai। nahin, sat ka sang aur jhooth ka sang tab kehte hain jab donon haajir hain। sat baap jab aate hain, vahi aakar sab baaten samjhaate hain। jab tak woh sat baap nahin aaye tab tak koi jaante bhi nahin hain। ab baap tum bachchon ko kehte hain - he aatmaayen, mere saath sang rakho। deh ka jo sang mila hai, unse upraam ho jaao। deh ka sang bhal satayug mein bhi hoga parantu vahaan tum ho hi paavan। abhi tum sat ke sang se patit se paavan bante ho phir shareer bhi satopradhaan milega। aatma bhi satopradhaan rahegi। abhi to duniya bhi tamopradhaan hai। duniya nai aur puraani hoti hai। nai duniya mein barobar aadi sanaatan devi-devta dharma tha। aaj us dharma ko gum kar aadi sanaatan hindu dharma kah dete hain, moonjh pade hain। abhi tum bhaaratvaasi samajhte ho ki ham praacheen devi-devta dharma ke the। satayug ke maalik the। parantu woh nasha kahaan? kalpa ki aayu hi lambi likh di hai। sab baaten bhool gaye hain। inka naam hi hai bhool bhulaiya ka khel। abhi sat baap dvaara tum saari knowledge jaanne se oonch pad paate ho phir aadhaakalpa baad neeche girte ho kyonki raavan raajya shuru hota hai। duniya puraani to hogi na। tum samajhte ho ham nai duniya ke maalik the, abhi puraani duniya mein hain। koi-koi ko yeh bhi yaad nahin padta hai। baba hamko svargavaasi banaate hain। aadhaakalpa ham svargavaasi rahenge phir aadhaakalpa baad neeche girte ho kyonki raavan raajya shuru hota hai। duniya puraani to hogi na। tum samajhte ho baba hamko svargavaasi banaate hain। aadhaakalpa ham svargavaasi rahenge phir narkavaasi banenge। tum bhi master almighty bane ho nambarvaar purooshaartha anusaar। yeh hai gyaan amrit ka dose। shivbaaba ko organs mile hain puraane। naya organs to milta nahin। puraana baaja milta hai। baap aate bhi vaanaprastha mein hi hain। bachchon ko khushi hoti hai to baap bhi khush hote hain। baap kehte hain ham jaate hain bachchon ko knowledge de raavan se chhudaane। part to khushi se bajaaya jaata hai na। baap bahut khushi se part bajaate hain। baap ko kalpa-kalpa aana padta hai। yeh part kabhi banda nahin hota hai। bachchon ko bahut khushi rahni chaahiye। jitna sat ka sang karenge utna khushi hogi, yaad kam karte hain isliye itni khushi nahin rehti hai। baap bachchon ko milkiyat dete hain। jo bachche sachchi dil vaale hain, un par baap ka bahut pyaar rehta hai। sachchi dil par saaheb raazi rehte hain। andar baahar jo sachche rehte hain, baap ke madadgaar bante hain, service par tatpar rehte hain vahi baap ko priy lagte hain। apni dil se poochhna hai - ham sachchi-sachchi service karte hain? sachche baba ke saath sang rakhte hain? agar sat baba ke saath sang nahin rakhenge to kya gati hogi? bahuton ko raasta bataate rahenge to oonch pad bhi paayenge। sat baap se hamne kya varsa paaya hai, apne andar dekhna hai। yeh to jaante hain nambarvaar hain। koi kitna varsa paate hain, koi kitna paate hain। raat-din ka farka rehta hai। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) tumhein jo is deh ka sang mila hai, is sang se upraam rehna hai। sat ke sang se paavan banna hai।

2) is student life mein chalte phirte buddhi mein knowledge ghoomti rahe। em object ko saamne rakh purooshaartha karna hai। sachchi dil se baap ka madadgaar banna hai।

vardaan:- avyabhichaari aur nirvighna sthiti dvaara first janma ki praalabdha praapta karne vaale sameep aur samaan bhav

jo bachche yahaan baap ke gun aur sanskaaron ke sameep hain, sarva sambandhon se baap ke saath ka va samaanta ka anubhav karte hain vahi vahaan royal kul mein first janma ke sambandh mein sameep aate hain। 2- first mein vahi aayenge jo aadi se ab tak avyabhichaari aur nirvighna rahe hain। nirvighna ka arth yeh nahin hai ki vighna aaye hi nahin lekin vighna-vinaashak va vighnon ke oopar sada vijayi rahen। yeh donon baaten yadi aadi se ant tak theek hain to first janma mein saathi banenge।

slogan:- silence ki power se negative ko positive mein parivartan karo।

avyakt ishaare:- ekaantapriy bano ekta aur ekaagrata ko apnaao

ekaantavaasi arthaat sada sthool ekaanta ke saath-saath ek ke ant mein rehna। ekaagrata ki shakti se kisi bhi aatma ka message us aatma tak pahuncha sakte ho। kisi bhi aatma ka aahvaan kar sakte ho। kisi bhi aatma ki aavaaj ko catch kar sakte ho। kisi bhi aatma ko door baithe sahayog de sakte ho।