Murli du jour du mardi 4 mars 2025

04-03-2025 praatahmurli om shanti "baapdaada"' madhuban

“meethe bachche - jinhonne shuru se bhakti ki hai, 84 janma liye hain, woh tumhaare gyaan ko badi roochi se sunenge, ishaare se samajh jaayenge''

prashn:- devi-devta gharaane ke najdeek vaali aatma hai ya door vaali, uski parakh kya hogi?

uttar:- jo tumhaare devta gharaane ki aatmaayen hongi, unhein gyaan ki sab baaten sunte hi janch jaayengi, woh moojhenge nahin। jitna bahut bhakti ki hogi utna jaasti sunne ki koshish karenge। to bachchon ko nabja dekhkar seva karni chaahiye।

om shanti। roohaani baap baith roohaani bachchon ko samjhaate hain। yeh to bachche samajh gaye roohaani baap hai niraakaar, is shareer dvaara baith samjhaate hain, ham aatma bhi niraakaar hain, is shareer se sunte hain। to ab do baap ikatthe hain na। bachche jaante hain donon baba yahaan hain। teesre baap ko jaante ho parantu unse phir bhi yeh achha hai, inse phir woh achha, nambarvaar hain na। to us laukik se sambandh nikal baaki in donon se sambandh ho jaata hai। baap baith samjhaate hain, manushyon ko kaise samjhaana chaahiye। tumhaare paas mela pradarshani mein to bahut aate hain। yeh bhi tum jaante ho 84 janma koi sab to nahin lete honge। yeh kaise pata pade yeh 84 janma lene vaala hai ya 10 janma lene vaala hai va 20 janma lene vaala hai? ab tum bachche yeh to samajhte ho ki jisne bahut bhakti ki hogi shuru se lekar, to unko phal bhi itna hi jaldi aur achha milega। thodi bhakti ki hogi aur deri se ki hogi to phal bhi itna thoda aur deri se milega। yeh baba service karne vaale bachchon ke liye samjhaate hain। bolo, tum bhaaratvaasi ho to bataao devi-devtaaon ko maante ho? bhaarat mein in lakshmi-naaraayan ka raajya tha na। jo 84 janma lene vaala hoga, shuru se bhakti ki hogi woh jhat samajh jaayega - barobar aadi sanaatan devi-devta dharma tha, roochi se sunne lag padenge। koi to aise hi dekhkar chale jaate hain, kuchh poochhte bhi nahin jaise ki buddhi mein baithta nahin। to unke liye samajhna chaahiye yeh abhi tak yahaan ka nahin hai। aage chal samajh bhi leven। koi ka samjhaane se jhat kaandh hilega। barobar is hisaab se to 84 janma theek hain। agar kehte hain ham kaise samjhen ki poore 84 janma liye hain? achha, 84 nahin to 82, devta dharma mein to aaye honge। dekho itna buddhi mein janchata nahin hai to samjho yeh 84 janma lene vaala nahin hai। door vaale kam sunenge। jitna bahut bhakti ki hui hogi woh jaasti sunne ki koshish karenge। jhat samajh jaayenge। kam samajhta hai to samjho yeh deri se aane vaala hai। bhakti bhi deri se ki hogi। bahut bhakti karne vaala ishaare se samajh jaayega। drama repeat to hota hai na। saara bhakti par madaar hai। is (baba) ne sabse number one bhakti ki hai na। kam bhakti ki hogi to phal bhi kam milega। yeh sab samajhne ki baaten hain। moti buddhi vaale dhaarna kar nahin sakenge। yeh mele-pradarshaniyaan to hoti rahengi। sab bhaashaaon mein niklengi। saari duniya ko samjhaana hai na। tum ho sachche-sachche paigambar aur messenger। woh dharma sthaapak to kuchh bhi nahin karte। na woh guru hain। guru kehte hain parantu woh koi sadgati daata thode hi hain। woh jab aate hain, unki sanstha hi nahin to sadgati kiski karenge। guru woh jo sadgati de, duhkh ki duniya se shantidham le jaaye। Christ aadi guru nahin, woh sirf dharma sthaapak hain। unhon ka aur koi position nahin hai। position to unhon ka hai, jo pahle-pahle satopradhaan mein phir sato, rajo, tamo mein aate hain। woh to sirf apna dharma sthaapan kar punarjanma lete rahenge। jab phir sabki tamopradhaan avastha hoti hai to baap aakar sabko pavitra banaae le jaate hain। paavan bana to phir patit duniya mein nahin rah sakte। pavitra aatmaayen chali jaayengi mukti mein, phir jeevanmukti mein aayengi। kehte bhi hain woh liberator hai, guide hai parantu iska bhi arth nahin samajhte। arth samajh jaaen to unko jaan jaaen। satayug mein bhakti maarga ke akshar bhi banda ho jaate hain।

yeh bhi drama mein noondh hai jo sab apna-apna part bajaate rehte hain। sadgati ko ek bhi pa na sake। abhi tumko yeh gyaan mil raha hai। baap bhi kehte hain main kalpa-kalpa, kalpa ke sangamayuge aata hoon। inko kaha jaata hai kalyaankaari sangamayug, aur koi yug kalyaankaari nahin hai। satayug aur treta ke sangam ka koi mahatva nahin। sooryavanshi past hue phir chandravanshi raajya chalta hai। phir chandravanshi se vaishyavanshi banenge to chandravanshi past ho gaye। unke baad kya banen, woh pata hi nahin rehta hai। chitra aadi rehte hain to samjhenge yeh sooryavanshi hamaare bade the, yeh chandravanshi the। woh mahaaraaja, woh raaja, woh bade dhanvaan the। woh phir bhi naapaas to hue na। yeh baaten koi shaastron aadi mein nahin hain। ab baap baith samjhaate hain। sabhi kehte hain hamko liberate karo, patit se paavan banaao। sukh ke liye nahin kahenge kyonki sukh ke liye ninda kar di hai shaastron mein। sab kahenge man ki shanti kaise mile? abhi tum bachche samajhte ho tumko sukh-shanti donon milte hain, jahaan shanti hai vahaan sukh hai। jahaan ashaanti hai, vahaan duhkh hai। satayug mein sukh-shanti hai, yahaan duhkh-ashaanti hai। yeh baap baith samjhaate hain। tumko maaya raavan ne kitna tuchchha buddhi banaaya hai, yeh bhi drama bana hua hai। baap kehte hain main bhi drama ke bandhan mein baandha hua hoon। mera part hi abhi hai jo baja raha hoon। kehte bhi hain baba kalpa-kalpa aap hi aakar bhrashtaachaari patit se shreshthaachaari paavan banaate ho। bhrashtaachaari bane ho raavan dvaara। ab baap aakar manushya se devta banaate hain। yeh jo gaayan hai unka arth baap hi aakar samjhaate hain। us akaal takhta par baithne vaale bhi iska arth nahin samajhte। baba ne tumko samjhaaya hai - aatmaayen akaal moorta hain। aatma ka yeh shareer hai rath, is par akaal arthaat jisko kaal nahin khaata, woh aatma viraajmaan hai। satayug mein tumko kaal nahin khaayega। akaale mrityu kabhi nahin hogi। woh hai hi amarlok, yeh hai mrityulok। amarlok, mrityulok ka bhi arth koi nahin samajhte hain। baap kehte hain main tumko bahut simple samjhaata hoon - sirf maamekam yaad karo to tum paavan ban jaayenge। saadhu-santa aadi bhi gaate hain patit-paavan… patit-paavan baap ko bulaate hain, kahaan bhi jaao to yeh zaroor kahenge patit-paavan....... sach to kabhi chhip nahin sakta। tum jaante ho abhi patit-paavan baap aaya hua hai। humein raasta bata rahe hain। kalpa pahle bhi kaha tha apne ko aatma samajh maamekam yaad karo to tum satopradhaan ban jaayenge। tum sab aashik ho mujh maashuk ke। woh aashik-maashook to ek janma ke liye hote hain, tum janma-janmaantar ke aashik ho। yaad karte aaye ho he prabhu। dene vaala to ek hi baap hai na। bachche sab baap se hi maagenge। aatma jab duhkhi hoti hai to baap ko yaad karti hai। sukh mein koi yaad nahin karte, duhkh mein yaad karte hain - baba aakar sadgati do। jaise guru ke paas jaate hain, hamko bachcha do। achha, bachcha mil gaya to bahut khushi hogi। bachcha nahin hua to kahenge eeshvar ki bhaavi। drama ko to woh samajhte hi nahin। agar woh drama kahe to phir saara maaloom hona chaahiye। tum drama ko jaante ho, aur koi nahin jaante। na koi shaastron mein hi hai। drama maana drama। unke aadi-madhya-ant ka pata hona chaahiye। baap kehte hain main 5-5 hazaar varsha baad aata hoon। yeh 4 yug bilkul equal hain। svaastika ka bhi mahatva hai na। khaata jo banaate hain to usmein svaastika banaate hain। yeh bhi khaata hai na। hamaara phaayda kaise hota hai, phir ghaata kaise padta hai। ghaata padte-padte abhi poora ghaata pad gaya hai। yeh haar-jeet ka khel hai। paisa hai aur health bhi hai to sukh hai, paisa hai health nahin to sukh nahin। tumko health-wealth donon deta hoon। to happiness hai hi।

jab koi shareer chhodta hai to mukh se to kehte hain phalaana svarga padhaara। lekin andar duhkhi hote rehte hain। ismen to aur hi khush hona chaahiye phir unki aatma ko narka mein kyon bulaate ho? kuchh bhi samajh nahin hai। abhi baap aakar yeh sab baaten samjhaate hain। beej aur jhaad ka raaz samjhaate hain। aise jhaad aur koi bana na sake। yeh koi isne nahin banaaya hai। inka koi guru nahin tha। agar hota to unke aur bhi shishya hote na। manushya samajhte hain inko koi guru ne sikhaaya hai ya to kehte paramatma ki shakti pravesh karti hai। are, paramatma ki shakti kaise pravesh karegi! bichaare kuchh bhi nahin jaante। baap khud baith bataate hain mainne kaha tha main saadhaaran boodhe tan mein aata hoon, aakar tumko padhaata hoon। yeh bhi sunte hain, attention to hamaare oopar hai। yeh bhi student hai। yeh apne ko aur kuchh nahin kehte। prajaapita so bhi student hai। bhal isne vinaash bhi dekha parantu samjha kuchh bhi nahin। aahiste-aahiste samajhte gaye। jaise tum samajhte jaate ho। baap tumko samjhaate hain, beech mein yeh bhi samajhte jaate hain, padhte rehte hain। har ek student purooshaartha karenge padhne ka। brahma-vishnu-shankar to hain sookshmavtanvaasi। unhon ka kya part hai, yeh bhi koi nahin jaante। baap har ek baat aapehi samjhaate hain। tum prashn koi poochh nahin sakte। oopar mein hai shiv paramatma phir devtaayen, unko mila kaise sakte। abhi tum bachche jaante ho baap ismen aakar pravesh karte hain isliye kaha jaata hai baapdaada। baap alag hai, daada alag hai। baap shiv, daada brahma hai। varsa shiv se milta hai in dvaara। brahman ho gaye brahma ke bachche। baap ne adopt kiya hai drama ke plan anusaar। baap kehte hain number one bhakta yeh hai। 84 janma bhi isne liye hain। saanvara aur gora bhi inko kehte hain। shreekrishna satayug mein gora tha, kaliyug mein saanvara hai। patit hai na phir paavan bante hain। tum bhi aise bante ho। yeh hai iron aged world, woh hai golden aged world। seedhi ka kisko pata nahin hai, jo peechhe aate hain woh 84 janma thode hi lete honge। woh zaroor kam janma lenge phir unko seedhi mein dikha kaise sakte। baba ne samjhaaya hai - sabse jaasti janma kaun lenge? sabse kam janma kaun lenge? yeh hai knowledge। baap hi knowledgeful, patit-paavan hai। aadi-madhya-ant ki knowledge suna rahe hain। woh sab neti-neti karte aaye hain। apni aatma ko hi nahin jaante to baap ko phir kaise jaanenge? sirf kahne maatra kah dete hain, aatma kya cheez hai, kuchh bhi nahin jaante। tum abhi jaante ho aatma avinaashi hai, usmein 84 janmon ka avinaashi part noondha hua hai। itni chhoti si aatma mein kitna part noondha hua hai, jo achhi reeti sunte aur samajhte hain to samjha jaata hai yeh najdeek vaala hai। buddhi mein nahin baithta hai to deri se aane vaala hoga। sunaane ke samay nabja dekhi jaati hai। samjhaane vaale bhi nambarvaar hain na। tumhaari yeh padhaai hai, raajdhaani sthaapan ho rahi hai। koi to oonch se oonch raajaai pad paate hain, koi to praja mein naukar chaakar bante hain। baaki haan, itna hai ki satayug mein koi duhkh nahin hota। unko kaha hi jaata hai sukhdhaam, bahishta। past ho gaya hai tab to yaad karte hain na। manushya samajhte hain svarga koi oopar chhat mein hoga। delvaada mandir mein tumhaara poora yaadgaar khada hai। aadi dev aadi devi aur bachche neeche yog mein baithe hain। oopar mein raajaai khadi hai। manushya to darshan karenge, paisa rakhenge। samjhenge kuchh bhi nahin। tum bachchon ko gyaan ka teesra netra mila hai, tum sabse pahle to baap ki biography ko jaan gaye to aur kya chaahiye। baap ko jaanne se hi sab kuchh samajh mein aa jaata hai। to khushi honi chaahiye। tum jaante ho abhi ham satayug mein jaakar sone ke mahal banaayenge, raajya karenge। jo serviceable bachche hain unhon ki buddhi mein rahega yeh spiritual knowledge spiritual father dete hain। spiritual father kaha jaata hai aatmaon ke baap ko। vahi sadgati daata hai। sukh-shanti ka varsa dete hain। tum samjha sakte ho yeh seedhi hai bhaaratvaasiyon ki, jo 84 janma lete hain। tum aate hi aadhe mein ho, to tumhaare 84 janma kaise honge? sabse jaasti janma ham lete hain। yeh badi samajhne ki baaten hain। mukhya baat hi hai patit se paavan banne liye buddhiyog lagaana hai। paavan banne ki pratigya kar phir agar patit bante hain to hadgud ekdam toot padti hain, jaise ki 5 manzil se girte hain। buddhi hi malechchha ki ho jaayegi, dil andar khaata rahega। mukh se kuchh niklega nahin isliye baap kehte hain khabardaar raho। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is drama ko yathaartha reeti samajh maaya ke bandhanon se mukta hona hai। svayan ko akaalmoorta aatma samajh baap ko yaad kar paavan banna hai।

2) sachcha-sachcha paigambar aur messenger ban sabko shantidham, sukhdhaam ka raasta bataana hai। is kalyaankaari sangamayug par sabhi aatmaon ka kalyaan karna hai।

vardaan:- baap aur seva ki smriti se ekras sthiti ka anubhav karne vaale sarva aakarshanmukta bhav

jaise servant ko sada seva aur master yaad rehta hai। aise world servant, sachche sevaadhaari bachchon ko bhi baap aur seva ke sivaae kuchh bhi yaad nahin rehta, isse hi ekras sthiti mein rahne ka anubhav hota hai। unhein ek baap ke ras ke sivaae sab ras neeras lagte hain। ek baap ke ras ka anubhav hone ke kaaran kahaan bhi aakarshan nahin ja sakti, yeh ekras sthiti ka teevra purooshaartha hi sarva aakarshanon se mukta bana deta hai। yahi shreshtha manzil hai।

slogan:- naazuk paristhitiyon ke paper mein paas hona hai to apni nature ko shaktishaali banaao।

avyakt ishaare - satyata aur sabhyata roopi culture ko apnaao

jab bhi koi asatya baat dekhte ho, sunte ho to asatya vaayumandal nahin phailaao। kai kehte hain yeh paap karma hai na, paap karma dekha nahin jaata lekin vaayumandal mein asatyata ki baaten phailaana, yeh bhi to paap hai। laukik parivaar mein bhi agar koi aisi baat dekhi va suni jaati hai to use phailaaya nahin jaata। kaan mein suna aur dil mein chhipaaya। yadi koi vyartha baaton ka phailaav karta hai to yeh chhote-chhote paap udti kala ke anubhav ko samaapta kar dete hain, isliye is karmo ki gahan gati ko samajhkar yathaartha roop mein satyata ki shakti dhaaran karo।