Murli du jour du jeudi 6 mars 2025

06-03-2025 praatahmurli om shanti "baapdaada"' madhuban

“meethe bachche - jaise tum aatmaon ko yeh shareer roopi sinhaasan mila hai, aise baap bhi is daada ke sinhaasan par viraajmaan hain, unhein apna sinhaasan nahin''

prashn:- jin bachchon ko eeshvareey santaan ki smriti rehti hai unki nishaani kya hogi?

uttar:- unka sachcha lav ek baap se hoga। eeshvareey santaan kabhi bhi ladenge, jhagdenge nahin। unki kudrishti kabhi nahin ho sakti। jab brahmaakumaar-kumaari arthaat behen-bhaai bane to gandi drishti ja nahin sakti।

geet:- chhod bhi de aakaash sinhaasan…

om shanti। ab bachche jaante hain baba ne aakaash sinhaasan chhodkar ab daada ke tan ko apna sinhaasan banaaya hai, woh chhodkar yahaan aakar baithe hain। yeh aakaash tatva to hai jeev aatmaon ka sinhaasan। aatmaon ka sinhaasan hai woh mahtatva, jahaan tum aatmaayen bigar shareer rehti thi। jaise aakaash mein sitaare khade hain na, vaise tum aatmaayen bhi bahut chhoti-chhoti vahaan rehti ho। aatma ko divya drishti bigar dekha nahin ja sakta। tum bachchon ko abhi yeh gyaan hai, jaise star kitna chhota hai, vaise aatmaayen bhi bindi misal hain। ab baap ne sinhaasan to chhod diya hai। baap kehte hain tum aatmaayen bhi sinhaasan chhodkar yahaan is shareer ko apna sinhaasan banaati ho। mujhe bhi zaroor shareer chaahiye। mujhe bulaate hi hain puraani duniya mein। geet hai na - doordesh ka rahne vaala.......। tum aatmaayen jahaan rehti ho woh hai tum aatmaon aur baba ka desh। phir tum svarga mein jaate ho, jiski baba sthaapna karaate hain। baap khud us svarga mein nahin aate। khud to vaani se pare vaanaprastha mein jaakar rehte hain। svarga mein unki darkaar nahin। woh to duhkh-sukh se nyaare hain na। tum to sukh mein aate ho, to duhkh mein bhi aate ho।

abhi tum jaante ho, ham brahmaakumaar-kumaariyaan behen-bhaai hain। ek-do mein kudrishti ka khyaal bhi nahin aana chaahiye। yahaan to tum baap ke sammukh baithe ho, aapas mein behen-bhaai ho। pavitra rahne ki yukti dekho kaisi hai। yeh baaten koi shaastron mein nahin hain। sabhi ka baba ek hai, to sabhi bachche ho gaye na। bachchon ko aapas mein ladna-jhagadna bhi nahin chaahiye। is samay tum jaante ho ham eeshvareey santaan hain, pahle aasuri santaan the, phir ab sangam par eeshvareey santaan bane hain, phir satayug mein daivi santaan honge। yeh chakra ka bachchon ko maaloom pada hai। tum brahmaakumaar-kumaariyaan ho phir kabhi kudrishti jaayegi nahin। satayug mein kudrishti hoti nahin। kudrishti raavan raajya mein hoti hai। tum bachchon ko sivaae ek baap ke aur koi ki yaad nahin rahni chaahiye। sabse jaasti ek baap se love ho jaae। mera to ek shivbaaba doosra na koi। baap kehte hain - bachche, abhi tumko shivaalay mein chalna hai। shivbaaba svarga ki sthaapna kar rahe hain। aadhaakalpa raavanraajya chala hai, jisse durgati ko paaya hai। raavan kya hai, usko jalaate kyon hain, yeh bhi koi nahin jaante। shivbaaba ko bhi nahin jaante। jaise deviyon ko saja karke, pooja karke dubote hain, shivbaaba ka bhi mitti ka ling banaae pooja aadi kar phir mitti, mitti mein mila dete hain, vaise raavan ko bhi banaakar phir jala dete hain। samajhte kuchh bhi nahin। kehte bhi hain abhi raavanraajya hai, raamraajya sthaapan hona hai। gaandhi bhi raamraajya chaahte the, to iska matlab raavanraajya hai na। jo bachche is raavan raajya mein kaam chita par baith jal gaye the, baap aakar phir se un par gyaan varsha karte hain, sabka kalyaan karte hain। jaise sookhi jameen par barsaat padne se ghaas nikal aata hai na, tumhaare par bhi gyaan ki varsha na hone se kitne kangaal ban gaye the। abhi phir gyaan varsha hoti hai jisse tum vishwa ke maalik ban jaayenge। bhal tum bachche grihastha vyavhaar mein rehte ho parantu andar mein bahut khushi rahni chaahiye। jaise koi gareeb ke bachche padhte hain to padhaai se barrister aadi ban jaate hain। vo bhi badon-badon ke saath baithte hain, khaate peete hain। bheelni ki baat bhi shaastron mein hai na।

tum bachche jaante ho jinhonne sabse jaasti bhakti ki hai vahi sabse jaasti gyaan aakar lenge। sabse jaasti shuru se lekar to hamne bhakti ki hai। phir hamko hi baba svarga mein pahle-pahle bhej dete hain। yeh hai gyaan yukta yathaartha baat। barobar ham hi so poojya the phir so pujaari bante hain। neeche utarte jaate hain। bachchon ko saara gyaan samjhaaya jaata hai। is samay yeh saari duniya naastik hai, baap ko nahin jaante। neti-neti kah dete hain। aage chalkar yeh sannyaasi aadi sab aakar aastik zaroor banenge। koi ek sannyaasi aa jaae to bhi un par sabhi vishvaas thode hi karenge। kahenge in par bi.ke. ne jaadu lagaaya hai। unke chele ko gaddi par bithaae unko uda denge। aise bahut sannyaasi tumhaare paas aaye hain, phir gum ho jaate hain। yeh hai bada wonderful drama। abhi tum bachche aadi se lekar ant tak sab jaante ho। tumhaare mein bhi nambarvaar purooshaartha anusaar dhaaran kar sakte hain। baap ke paas saara gyaan hai, tumhaare paas bhi hona chaahiye। din-pratidin kitne centres khulte rehte hain। bachchon ko bahut merciful banna hai। baap kehte hain apne oopar bhi merciful bano। berahmi nahin bano। apne oopar raham karna hai। kaise? woh bhi samjhaate rehte hain। baap ko yaad kar patit se paavan banna hai। phir kabhi patit banne ka purooshaartha nahin karna hai। drishti badi achhi chaahiye। ham brahman eeshvareey santaan hain। eeshvar ne hamko adopt kiya hai na। ab manushya se devta banna hai। pahle sookshm-vatanvaasi pharishta banenge। abhi tum pharishte ban rahe ho। sookshm vatan ka bhi raaz bachchon ko samjhaaya hai। yahaan hai talkie, sookshm-vatan mein hai movie, mool vatan mein hai silence। sookshm vatan hai pharishton ka। jaise ghost ko chhaaya ka shareer hota hai na। aatma ko shareer nahin milta hai to bhatakti rehti hai, unko ghost kaha jaata hai। unko in aankhon se bhi dekh sakte hain। yeh phir hain sookshmavtanvaasi pharishte। yeh sab baaten bahut samajhne ki hain। mool vatan, sookshm vatan, sthoolavtan - inka tumko gyaan hai। chalte phirte buddhi mein yeh saara gyaan rehna chaahiye। ham asul mool vatan ke rahvaasi hain। abhi ham vahaan jaayenge via sookshm vatan। baba sookshm vatan is samay hi rachte hain। pahle sookshm phir sthool chaahiye। abhi yeh hai sangamayug। inko eeshvareey yug kahenge, unko daivi yug kahenge। tum bachchon ko kitni khushi honi chaahiye। kudrishti jaati hai phir oonch pad pa na saken। abhi tum brahman-braahmaniyaan ho na। phir ghar jaane se bhool nahin jaana chaahiye। tum sangadosh mein aakar bhool jaate ho। tum hans eeshvareey santaan ho। tumhaari kisi mein bhi aantarik rag nahin jaani chaahiye। agar rag jaati hai to kahenge moh ki bandari।

tumhaara dhandha hi hai sabko paavan banaana। tum ho vishwa ko svarga banaane vaale। kahaan woh raavan ki aasuri santaan, kahaan tum eeshvareey santaan। tum bachchon ko apni avastha ekras banaane ke liye sab kuchh dekhte hue jaise ki dekhte hi nahin hain, yeh abhyaas karna hai। ismen buddhi ko ekras rakhna himmat ki baat hai। perfect hone mein mehnat lagti hai। sampoorn banne mein time chaahiye। jab karmaateet avastha ho tab woh drishti baithe, tab tak kuchh na kuchh kheench hoti rahegi। ismen bilkul upraam hona padta hai। line clear chaahiye। dekhte hue jaise tum dekhte hi nahin ho, aisa abhyaas jiska hoga vahi oonch pad paayenge। abhi woh avastha thode hi hai। sannyaasi to in baaton ko samajhte bhi nahin hain। yahaan to badi mehnat lagti hai। tum jaante ho ham bhi is puraani duniya ka sannyaas kar baithe hain। bas hamko to ab sweet silence hom mein jaana hai। aur koi ki buddhi mein nahin hai jitna tumhaari buddhi mein hai। tum hi jaante ho ab vaapis jaana hai। shiv bhagvaanuvaach bhi hai - woh patit-paavan, liberator, guide hai। krishna koi guide nahin। is samay tum bhi sabko raasta bataana seekhte ho, isliye tumhaara naam paandav rakha hai। tum paandavon ki sena hai। abhi tum dehi-abhimaani bane ho। jaante ho ab vaapis jaana hai, yeh puraana shareer chhodna hai। sarpa ka misaal, bhramri ka misaal, yeh sab hain tumhaare is samay ke। tum abhi practical mein ho। woh to yeh dhandha kar na saken। tum jaante ho yeh kabristaan hai, ab phir paristaan banna hai।

tumhaare liye sab din lucky hain। tum bachche sadaiv lucky ho। guroovaar ke din bachchon ko school mein bithaate hain। yeh rasma chali aati hai। tumko abhi vrikshapti padhaate hain। yeh brihaspati ki dasha tumhaari janma-janmaantar chalti hai। yeh hai behad ki dasha। bhakti maarga mein had ki dashaayen chalti hain, abhi hai behad ki dasha। to poori reeti mehnat karni chaahiye। lakshmi-naaraayan koi ek to nahin hai na। unhon ki to dynasty hogi na। zaroor bahut raajya karte honge। lakshmi-naaraayan ki sooryavanshi dynasty ka raajya chala hai, yeh baaten bhi tumhaari buddhi mein hain। tum bachchon ko yeh bhi saakshaatkaar hua hai ki kaise raajtilak dete hain। sooryavanshi phir chandravanshi ko kaise raajya dete hain। maa-baap bachche ka paanv dhokar raaj-tilak dete hain, raajya-bhaagya dete hain। yeh saakshaatkaar aadi sab drama mein noondh hai, ismen tum bachchon ko moonjhane ki darkaar nahin hai। tum baap ko yaad karo, svadarshan chakradhaari bano aur doosron ko bhi banaao। tum ho brahma mukh vanshaavli svadarshan chakradhaari sachche brahman, shaastron mein svadarshan chakra se kitni hinsaayen dikhaai hain। abhi baap tum bachchon ko sachchi geeta sunaate hain। yeh to kantha kar leni chaahiye। kitna sahaj hai। tumhaara saara connection hai hi geeta ke saath। geeta mein gyaan bhi hai to yog bhi hai। tumko bhi ek hi kitaab banaana chaahiye। yog ka kitaab alag kyon banaana chaahiye। parantu aajkal yog ka bahut naamaachaar hai isliye naam rakhte hain taaki manushya aakar samjhen। aakhreen yeh bhi samjhenge ki yog ek baap se lagaana hai। jo sunenge woh phir apne dharma mein aakar oonch pad paayenge। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apne oopar aapehi raham karna hai, apni drishti bahut achhi pavitra rakhni hai। eeshvar ne manushya se devta banaane ke liye adopt kiya hai isliye patit banne ka kabhi khyaal bhi na aaye।

2) sampoorn, karmaateet avastha ko praapta karne ke liye sada upraam rahne ka abhyaas karna hai। is duniya mein sab kuchh dekhte hue bhi nahin dekhna hai। isi abhyaas se avastha ekras banaani hai।

vardaan:- har kadam mein padmon ki kamaai jama karne vaale sarva khajaanon se sampanna va tripta aatma bhav

jo bachche baap ki yaad mein rahkar har kadam uthaate hain woh kadam-kadam mein padmon ki kamaai jama karte hain। is sangam par hi padmon ke kamaai ki khaan milti hai। sangamayug hai jama karne ka yug। abhi jitna jama karna chaaho utna kar sakte ho। ek kadam arthaat ek second bhi bina jama ke na jaae arthaat vyartha na ho। sada bhandaara bharpoor ho। apraapta nahin koi vastu...aise sanskaar hon। jab abhi aisi tripta va sampanna aatma banenge tab bhavishya mein akhut khajaanon ke maalik honge।

slogan:- koi bhi baat mein upset hone ke bajaae knowledgeful ki seat par set raho।

maateshvari ji ke anmol mahaavaakya

“aadha kalpa gyaan brahma ka din aur aadha kalpa bhakti maarga brahma ki raat''

aadhaakalpa hai brahma ka din, aadhaakalpa hai brahma ki raat, ab raat poori ho savera aana hai। ab paramatma aakar andhiyaare ki ant kar sojhre ki aadi karta hai, gyaan se hai roshni, bhakti se hai andhiyaara। geet mein bhi kehte hain is paap ki duniya se door kahin le chal, chit chain jahaan paave... yeh hai bechain duniya, jahaan chain nahin hai। mukti mein na hai chain, na hai bechain। satayug treta hai chain ki duniya, jis sukhdhaam ko sabhi yaad karte hain। to ab tum chain ki duniya mein chal rahe ho, vahaan koi apvitra aatma ja nahin sakti, woh ant mein dharmaraaz ke dande khaae karma-bandhan se mukta ho shuddh sanskaar le jaate hain kyonki vahaan na ashuddha sanskaar hote, na paap hota hai। jab aatma apne asli baap ko bhool jaati hai to yeh bhool bhoolaiya ka anaadi khel haar jeet ka bana hua hai isliye apan is sarvashaktivaan paramatma dvaara shakti le vikaaron ke oopar vijay pahan 21 janmon ke liye raajya bhaagya le rahe hain। achha। om shanti।

avyakt ishaare - satyata aur sabhyata roopi culture ko apnaao

aapke bol mein sneh bhi ho, madhurta aur mahaanta bhi ho, satyata bhi ho lekin swaroop ki namrata bhi ho। nirbhay hokar authority se bolo lekin bol maryaada ke andar hon - donon baaton ka balance ho, jahaan balance hota hai vahaan kamaal dikhaai deti hai aur woh shabd kade nahin, meethe lagte hain to authority aur namrata donon ke balance ki kamaal dikhaao। yahi hai baap ki pratyakshata ka saadhan।