Murli du jour du mardi 18 mars 2025

18-03-2025 praatahmurli om shanti "baapdaada"' madhuban

“meethe bachche - is samay tumhaari yeh jeevan bahut-bahut amoolya hai kyonki tum had se nikal behad mein aaye ho, tum jaante ho ham is jagat ka kalyaan karne vaale hain''

prashn:- baap ke varse ka adhikaar kis purooshaartha se praapta hota hai?

uttar:- sada bhaai-bhaai ki drishti rahe। stri-purush ka jo bhaan hai woh nikal jaae, tab baap ke varse ka poora adhikaar praapta ho। parantu stri-puroosh ka bhaan va yeh drishti nikalna bada mushkil hai। iske liye dehi-abhimaani banne ka abhyaas chaahiye। jab baap ke bachche banenge tab varsa milega। ek baap ki yaad se satopradhaan banne vaale hi mukti-jeevanmukti ka varsa paate hain।

geet:- aakhir woh din aaya aaj …

om shanti। bachche yeh jaante hain om maana aham aatma mam shareer। abhi tum is drama ko, srishti chakra ko aur is srishti chakra ke jaanne vaale baap ko jaan gaye ho kyonki chakra ko jaanne vaale ko rachta hi kahenge। rachta aur rachna ko aur koi bhi nahin jaante hain। bhal padhe-likhe bade-bade vidvaan-pandit aadi hain। unhein apna ghamanda to rehta hai na। parantu unko yeh pata nahin hai, kehte bhi hain gyaan, bhakti aur vairaagya। ab yeh 3 cheejen ho jaati hain, inka bhi arth nahin samajhte। sannyaasiyon ko vairaagya aata hai ghar se। unhon ko bhi oonch aur neench ki eershya rehti hai। yeh oonch kul ka hai, yeh madhyam kul ka hai - is par unhon ka bahut chalta hai। kumbha ke mele mein bhi unhon ka bahut jhagda ho padta hai ki pahle kiski savaari chale। is par bahut ladte hain phir pulis aakar chhudaati hai। to yeh bhi deh-abhimaan hua na। duniya mein jo bhi manushya maatra hain, sab hain deh-abhimaani। tumko to ab dehi-abhimaani banna hai। baap kehte hain deh-abhimaan chhodo, apne ko aatma samjho। aatma hi patit bani hai, usmein khaad padi hai। aatma hi satopradhaan, tamopradhaan banti hai। jaisi aatma vaisa shareer milta hai। shreekrishna ki aatma sundar hai to shareer bhi bahut sundar hota hai, unke shareer mein bahut kashish hoti hai। pavitra aatma hi kashish karti hai। lakshmi-naaraayan ki itni mahima nahin hai, jaise shreekrishna ki hai kyonki shreekrishna to pavitra chhota bachcha hai। yahaan bhi kehte hain chhota bachcha aur mahaatma ek samaan hai। mahaatmaayen to phir bhi jeevan ka anubhav kar phir vikaaron ko chhodte hain। ghrina aati hai, bachcha to hai hi pavitra। unko oonch mahaatma samajhte hain। to baap ne samjhaaya hai yeh nivritti maarga vaale sannyaasi bhi kuchh thamaate hain। jaise makaan aadha puraana hota hai to phir marammat ki jaati hai। sannyaasi bhi marammat karte hain, pavitra hone se bhaarat thama rehta hai। bhaarat jaisa pavitra aur dhanvaan khanda aur koi ho nahin sakta। ab baap tumko rachta aur rachna ke aadi-madhya-ant ki smriti dilaate hain kyonki yeh baap bhi hai, teacher bhi hai, guru bhi hai। geeta mein shreekrishna bhagvaanuvaach likh diya hai, unko kabhi baba kahenge kya! athva patit-paavan kahenge kya! jab manushya patit-paavan kehte hain to shreekrishna ko yaad nahin karte woh to bhagwan ko yaad karte hain, phir kah dete patit-paavan seetaaraam, raghupti raaghav raaja raam। kitna munjhaara hai। baap kehte hain main tum bachchon ko aakar yathaartha reeti sabhi vedon-shaastron aadi ka saar bataata hoon। pahli-pahli mukhya baat samjhaate hain ki tum apne ko aatma samjho aur baap ko yaad karo to tum paavan banenge। tum ho bhaai-bhaai, phir brahma ki santaan kumaar-kumaariyaan to bhaai-behen ho gaye। yeh buddhi mein yaad rahe। asul mein aatmaayen bhaai-bhaai hain, phir yahaan shareer mein aane se bhaai-behen ho jaate hain। itni bhi buddhi nahin hai samajhne ki। woh ham aatmaon ka father hai to ham brothers thahre na। phir sarvavyaapi kaise kehte hain। varsa to bachche ko hi milega, father ko to nahin milta। baap se bachche ko varsa milta hai। brahma bhi shivbaaba ka bachcha hai na, inko bhi varsa unse milta hai। tum ho jaate potre-potriyaan। tumko bhi hak hai। to aatma ke roop mein sab bachche ho phir shareer mein aate ho to bhaai-behen kehte ho। aur koi naata nahin। sada bhaai-bhaai ki drishti rahe, stri-puroosh ka bhaan bhi nikal jaae। jab mel-female donon hi kehte ho O god father to bhaai-behen hue na। bhaai-behen tab hote hain jab baap sangam par aakar rachna rachte hain। parantu stri-puroosh ki drishti bada mushkil nikalti hai। baap kehte hain tumko dehi-abhimaani banna hai। baap ke bachche banenge tab hi varsa milega। maamekam yaad karo to satopradhaan banenge। satopradhaan banne bigar tum vaapis mukti-jeevanmukti mein ja nahin sakenge। yeh yukti sannyaasi aadi kabhi nahin bataayenge। woh aise kabhi kahenge nahin ki apne ko aatma samajh baap ko yaad karo। baap ko kaha jaata hai parampita param aatma, supreme। aatma to sabko kaha jaata hai parantu unko param aatma kaha jaata hai। woh baap kehte hain - bachchon, main aaya hoon tum bachchon ke paas। hamko bolne ke liye mukh to chaahiye na। aajkal dekho jahaan-tahaan gau-mukh zaroor rakhte hain। phir kehte hain gau-mukh se amrit nikalta hai। vaastav mein amrit to kaha jaata hai gyaan ko। gyaan amrit mukh se hi nikalta hai। paani ki to ismen baat nahin। yeh gau maata bhi hai। baba inmen pravesh hua hai। baap ne in dvaara tumko apna banaaya hai, inse gyaan nikalta hai। unhonne to patthar ka banaakar usmein mukh bana diya hai, jahaan se paani nikalta hai। woh to bhakti ki rasma ho gai na। yathaartha baaten tum jaante ho। bheeshma pitaamah aadi ko tum kumaariyon ne baan lagaaye hain। tum to brahmaakumaar-kumaariyaan ho। to kumaari kiski hogi na। adharkumaari aur kumaari donon ke mandir hain। practical mein tumhaara yaadgaar mandir hai na। ab baap baith samjhaate hain tum jabki brahmaakumaar-kumaariyaan ho to criminal assault ho na sake। nahin to bahut kadi saza ho jaae। deh-abhimaan mein aane se yeh bhool jaata hai ki ham bhaai-behen hain। yeh bhi bi.ke. hain, ham bhi bi.ke.hain to vikaar ki drishti ja na sake। parantu aasuri sampradaay ke manushya vikaar ke bigar rah nahin sakte to vighna daalte hain। abhi tum brahmaakumaar-kumaariyon ko baap se varsa milta hai। baap ki shreemat par chalna hai, pavitra banna hai। yeh hai is vikaari mrityulok ka antim janma। yeh bhi koi jaante nahin। amar-lok mein vikaar koi hote nahin। unhon ko kaha hi jaata hai satopradhaan sampoorn nirvikaari। yahaan hain tamopradhaan sampoorn vikaari। gaate bhi hain woh sampoorn nirvikaari, ham vikaari, paapi hain। sampoorn nirvikaariyon ki pooja karte hain। baap ne samjhaaya hai tum bhaaratvaasi hi poojya so phir pujaari bante ho। is samay bhakti ka prabhaav bahut hai। bhakta bhagwan ko yaad karte hain ki aakar bhakti ka phal do। bhakti mein kya haal ho gaya hai। baap ne samjhaaya hai mukhya dharma shaastra 4 hain। ek to hai Deityism, ismen brahman devta kshatriy teenon hi aa jaate hain। baap brahman dharma sthaapan karte hain। braahmanon ki choti hai sangamayug ki। tum brahman abhi purooshottam ban rahe ho। brahman bane phir devta bante ho। woh brahman bhi hain vikaari। woh bhi in braahmanon ke aage namaste karte hain। brahman devi-devta namah kehte hain kyonki samajhte hain woh brahma ki santaan the, ham to brahma ki santaan nahin hain। abhi tum brahma ki santaan ho। tumko sab namah karenge। tum phir devi-devta bante ho। abhi tum brahmaakumaar-kumaariyaan bane ho phir banenge daivi kumaar-kumaariyaan।

is samay tumhaari yeh jeevan bahut-bahut amoolya hai kyonki tum jagat ki maataayen gaai hui ho। tum had se nikal behad mein aaye ho। tum jaante ho ham is jagat ka kalyaan karne vaale hain। to har ek jagat amba jagatpita thahre। is narka mein manushya bade duhkhi hain, ham unki roohaani seva karne aaye hain। ham unhon ko svargavaasi banaakar hi chhodenge। tum ho sena, inko yuddha-sthal bhi kaha jaata hai। yaadav, kaurav aur paandav ikatthe rehte hain। bhaai-bhaai hain na। ab tumhaari yuddha bhaai-bahnon se nahin, tumhaari yuddha hai raavan se। bhaai-bahinon ko tum samjhaate ho, manushya se devta banaane liye। to baap samjhaate hain deh sahit deh ke sab sambandh chhodne hain। yeh hai puraani duniya। kitne bade-bade dam, canals aadi banaate hain, kyonki paani nahin hai। praja bahut badh gai hai। vahaan to tum rehte hi bahut thode ho। nadiyon mein paani bhi dher rehta hai, anaaj bhi bahut hota hai। yahaan to is dharti par karodon manushya hain। vahaan saari dharni par shuru mein 9-10 laakh hote hain, aur koi khanda hota hi nahin। tum thode se hi vahaan rehte ho। tumko kahaan jaane ki bhi darkaar nahin rehti। vahaan hai hi bahaari mausam। 5 tatva bhi koi takleeph nahin dete hain, order mein rehte hain। duhkh ka naam nahin। woh hai hi bahishta। abhi hai dozak। yeh shuru hota hai beech se। devtaayen vaam maarga mein girte hain to phir raavan ka raajya shuru ho jaata hai। tum samajh gaye ho - ham double sirtaaj poojya bante hain phir single taaj vaale bante hain। satayug mein pavitrata ki bhi nishaani hai। devtaayen to sab hain pavitra। yahaan pavitra koi hai nahin। janma to phir bhi vikaar se lete hain na isliye ise bhrashtaachaari duniya kaha jaata hai। satayug hai shreshthaachaari। vikaar ko hi bhrashtaachaar kaha jaata hai। bachche jaante hain satayug mein pavitra pravritti maarga tha, ab apvitra ho gaye hain। ab phir pavitra shreshthaachaari duniya banti hai। srishti ka chakra phirta hai na। parampita paramatma ko hi patit-paavan kaha jaata hai। manushya kah dete hain bhagwan prerna karta hai, ab prerna maana vichaar, ismen prerna ki to baat hi nahin। woh khud kehte hain hamko shareer ka aadhaar lena padta hai। main bigar mukh ke shiksha kaise doon। prerna se koi shiksha di jaati hai kya! bhagwan prerna se kuchh bhi nahin karte hain। baap to bachchon ko padhaate hain। prerna se padhaai thode hi ho sakti। sivaae baap ke srishti ke aadi, madhya, ant ka raaz koi bhi bata na sake। baap ko hi nahin jaante hain। koi kehte ling hai, koi kehte akhanda jyoti hai। koi kehte brahm hi eeshvar hai। tatva gyaani brahm gyaani bhi hain na। shaastron mein dikha diya hai 84 laakh yoniyaan। ab agar 84 laakh janma hote to kalpa bahut bada chaahiye। koi hisaab hi nikaal na sake। woh to satayug ko hi laakhon varsha kah dete hain। baap kehte hain saara srishti chakra hi 5 hazaar varsha ka hai। 84 laakh janmon ke liye to time bhi itna chaahiye na। yeh shaastra sab hain bhakti maarga ke। baap kehte hain main aakar tumko in sab shaastron ka saar samjhaata hoon। yeh sab bhakti maarga ki saamagri hai, inse koi bhi mere ko praapta nahin karte। main jab aata hoon tab hi sabko le jaata hoon। mujhe bulaate hi hain - he patit-paavan aao। paavan banaakar hamko paavan duniya mein le chalo। phir dhoondhane ke liye dhakke kyon khaate ho? kitna door-door pahaadon aadi par jaate hain। aajkal to kitne mandir khaali pade hain, koi jaata nahin hai। abhi tum bachche oonch te oonch baap ki biography ko bhi jaan gaye ho। baap bachchon ko sab kuchh dekar phir 60 varsha baad vaanaprastha mein baith jaate hain। yeh rasma bhi ab ki hai, tyohaar bhi sab is samay ke hain।

tum jaante ho abhi ham sangam par khade hain। raat ke baad phir din hoga। ab to ghor andhiyaara hai। gaate bhi hai gyaan soorya pragta....... tum baap ko aur rachna ke aadi-madhya-ant ko ab jaante ho। jaise baap knowledgeful hai, tum bhi master knowledgeful ho gaye। tum bachchon ko baap se varsa milta hai behad ke sukh ka। laukik baap se to had ka varsa milta hai, jisse alpakaal ka sukh milta hai, jinko sannyaasi kaag vishta samaan sukh kah dete hain। woh phir yahaan aakar sukh ke liye purooshaartha kar na sake। woh hain hi hathayogi, tum ho raajayogi। tumhaara yog hai baap ke saath, unhon ka hai tatva ke saath। yeh bhi drama bana hua hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) paavan banne ke liye ham aatma bhaai-bhaai hain, phir brahma baap ki santaan bhaai-behen hain, yeh drishti pakki karni hai। aatma aur shareer donon ko hi paavan satopradhaan banaana hai। deh-abhimaan chhod dena hai।

2) master knowledgeful ban sabhi ko rachta aur rachna ka gyaan sunaakar ghor andhiyaare se nikaalna hai। narkavaasi manushyon ki roohaani seva kar svargavaasi banaana hai।

vardaan:- master gyaan saagar ban gyaan ki gahraai mein jaane vaale anubhav roopi ratnon se sampanna bhav

jo bachche gyaan ki gahraai mein jaate hain ve anubhav roopi ratnon se sampanna bante hain। ek hai gyaan sunna aur sunaana, doosra hai anubhvi moorta banna। anubhvi sada avinaashi aur nirvighna rehte hain। unhein koi bhi hila nahin sakta। anubhvi ke aage maaya ki koi bhi koshish saphal nahin hoti। anubhvi kabhi dhokha nahin kha sakte। isliye anubhvon ko badhaate hue har gun ke anubhvi moorta bano। manan shakti dvaara shuddh sankalpon ka stock jama karo।

slogan:- pharishta woh hai jo deh ke sookshm abhimaan ke sambandh se bhi nyaara hai।

avyakt ishaare - satyata aur sabhyata roopi culture ko apnaao

sampoorn satyata bhi pavitrata ke aadhaar par hoti hai। pavitrata nahin to sada satyata rah nahin sakti hai। sirf kaam vikaar apvitrata nahin hai, lekin uske aur bhi saathi hain। to mahaan pavitra arthaat apvitrata ka naam-nishaan na ho tab parmaatma pratyakshata ke nimitta ban sakenge।