Murli du jour du jeudi 20 mars 2025

20-03-2025 praatahmurli om shanti "baapdaada"' madhuban

“meethe bachche - is puraani duniya mein alpakaal kshan bhangur sukh hai, yeh saath nahin chal sakta, saath mein avinaashi gyaan ratna chalte hain, isliye avinaashi kamaai jama karo''

prashn:- baap ki padhaai mein tumhein kaun-si vidya nahin sikhaai jaati hai?

uttar:- bhoot vidya। kisi ke sankalpon ko read karna, yeh bhoot vidya hai, tumhein yeh vidya nahin sikhaai jaati। baap koi thought reader nahin hai। woh jaani jaananhaar arthaat knowledgeful hai। baap aate hain tumhein roohaani padhaai padhaane, jis padhaai se tumhein 21 janmon ke liye vishwa ki raajaai milti hai।

om shanti। bhaarat mein bhaaratvaasi gaate hain aatmaayen aur paramatma alag rahe bahukaal… ab bachche jaante hain ham aatmaon ka baap parampita paramatma hamko raajayog sikhla rahe hain। apna parichay de rahe hain aur srishti ke aadi-madhya-ant ka bhi parichay de rahe hain। koi to pakke nishchaybuddhi hain, koi kam samajhte hain, nambarvaar to hain na। bachche jaante hain ham jeev aatmaayen parampita paramatma ke sammukh baithe hain। gaaya jaata hai aatmaayen paramatma alag rahe bahukaal। ab mool vatan mein jab aatmaayen hain to alag hone ki baat nahin uthti। yahaan aane se jab jeev aatma bante hain to paramatma baap se sabhi aatmaayen alag hoti hain। parampita paramatma se alag hokar yahaan part bajaane aate hain। aage to bigar arth aise hi gaate the। abhi to baap baith samjhaate hain। bachche jaante hain parampita paramatma se ham alag ho yahaan part bajaane aate hain। tum hi pahle-pahle bichhude ho to shivbaaba bhi pahle-pahle tumse hi milte hain। tumhaare khaatir baap ko aana padta hai। kalpa pahle bhi in bachchon ko hi padhaaya tha jo phir svarga ke maalik banen। us samay aur koi khanda nahin tha। bachche jaante hain ham aadi sanaatan devi-devta dharma ke the jisko deity religion, deity dynasty bhi kehte hain। har ek ko apna religion hota hai। religion is might kaha jaata hai। dharma mein taakat rehti hai। tum bachche jaante ho yeh lakshmi-naaraayan kitni taakat vaale the। bhaaratvaasi apne dharma ko hi nahin jaante। kiski bhi buddhi mein nahin aata barobar bhaarat mein inka hi dharma tha। dharma ko na jaanne ke kaaran irreligious ban gaye hain। religion mein aane se tumhaare mein kitni taakat rehti hai। tum iron aged pahaad ko uthaae golden aged bana dete ho। bhaarat ko sone ka pahaad bana dete ho। vahaan to khaaniyon mein dher sona bhara rehta hai। sone ke pahaad honge jo phir woh khulenge। sone ko galaakar unki eeten banaai jaati hain। makaan to badi eeton ka hi banaayenge na। maaya machhandar ka khel bhi dikhaate hain na। woh sab hain kahaaniyaan। baap kehte hain in sabka saar main tumko sunaata hoon। dikhaate hain dhyaan mein dekha ham jholi bharkar le jaate hain, dhyaan se neeche utra, to kuchh nahin raha। jaise tumhaara bhi hota hai। isko kaha jaata hai divya drishti। ismen kuchh rakha nahin hai। naudha bhakti bahut karte hain। woh bhakta maala hi alag hai, yeh gyaan maala alag hai। roodra maala aur vishnu ki maala hai na। woh phir hai bhakti ki maala। abhi tum padh rahe ho raajaai ke liye। tumhaara buddhiyog hai teacher ke saath aur raajaai ke saath। jaise college mein padhte hain to buddhiyog teacher ke saath rehta hai। barrister khud padhaakar aap samaan banaate hain। yeh baba khud to bante nahin। yeh wonder hai yahaan। tumhaari yeh hai roohaani padhaai। tumhaara buddhiyog shivbaaba ke saath hai, unko hi knowledgeful gyaan ka saagar kaha jaata hai। jaani-jaananhaar ka yeh matlab nahin hai ki woh sabke dilon ko baith jaanega ki inke andar kya chal raha hai। woh jo thought reader hote hain vo sab sunaate hain। usko bhoot vidya kaha jaata hai। yahaan to baap padhaate hain, manushya se devta banaane। gaayan bhi hai manushya se devta. . . abhi tum bachche samajhte ho ham abhi brahman bane hain phir doosre janma mein devta banenge। aadi sanaatan devi-devta hi gaaye jaate hain। shaastron mein to dher kahaaniyaan likh di hain। yeh to baap direct baith padhaate hain।

bhagvaanuvaach - bhagwan hi gyaan ka saagar, sukh ka saagar, shanti ka saagar hai। tum bachchon ko varsa dete hain। yeh padhaai hai tumhaari 21 janmon ke liye। to kitna achhi reeti padhna chaahiye। yeh roohaani padhaai baap ek hi baar aakar padhaate hain, nai duniya ki sthaapna karne liye। nai duniya mein in devi-devtaaon ka raajya tha। baap kehte hain main brahma dvaara aadi sanaatan devi-devta dharma ki sthaapna kar raha hoon। jab yeh dharma tha to aur koi dharma nahin the। abhi aur sab dharma hain isliye trimoorti par bhi tum samjhaate ho - brahma dvaara sthaapna ek dharma ki। abhi woh dharma hai nahin। gaate bhi hain main nirgun haare mein koi gun naahi, aapehi taras paroi . . . hamaare mein koi gun nahin kehte to buddhi god father ki taraph hi jaati hai, unko hi merciful kaha jaata hai। baap aate hi hain bachchon ke sab duhkhon ko khalaas kar 100 pratishat sukh dene। kitna raham karte hain। tum samajhte ho baba ke paas ham aaye hain to baap se poora sukh lena hai। woh hai hi sukhdhaam, yeh hai duhkhadhaam। is chakra ko bhi achhi reeti samajhna hai। shantidham, sukhdhaam ko yaad karo to ant mati so gati ho jaayegi। shantidham ko yaad karenge to zaroor shareer chhodna pade tab aatmaayen shantidham mein jaayengi। ek baap ke sivaae aur koi ki yaad na aaye। ekdam line clear chaahiye। ek baap ko yaad karne se andar khushi ka paara chadhta hai। is puraani duniya mein to alpakaal kshan bhangur sukh hai। yeh saath nahin chal sakta। saath yeh avinaashi gyaan ratna hi chalte hain। yaani yeh gyaan ratnon ki kamaai hi saath chalti hai jo phir tum 21 janma praalabdha bhogenge। haan, vinaashi dhan bhi saath unka jaata hai jo baap ko madad karte hain। baba hamaari bhi kaudiyaan le vahaan mahal de dena। baap kaudiyon ke badle kitne ratna dete hain। jaise American log hote hain, bahut paise kharcha kar puraani-puraani cheezen khareed karte hain। puraani cheez ka manushya bahut daam le lete hain। American logon se paai ki cheez ka hazaar le lenge। baba bhi kitna achha graahak hai। bholaanaath gaaya hua hai na। manushyon ko yeh bhi pata nahin hai, vo to shiv-shankar ek kah dete hain। unke liye kehte bhar do jholi। abhi tum bachche samajhte ho hamko gyaan ratna milte hain, jisse hamaari jholi bharti hai। yeh hai behad ka baap। woh phir shankar ke liye kah dete aur phir dikhaate hain - dhatoora khaate the, bhaang peete the। kya-kya baaten baith banaai hain! tum bachche abhi sadgati ke liye padhaai padh rahe ho। yeh padhaai hai hi bilkul shant mein rahne ki। yeh battiyaan aadi jo jalaate hain, show karte hain, woh bhi isliye ki manushya aakar poochhen aap shiv jayanti itni kyon manaate ho? shiv hi bhaarat ko dhanvaan banaate hain na। in lakshmi-naaraayan ko svarga ka maalik kisne banaaya - yeh tum jaante ho। yeh lakshmi-naaraayan aage janma mein kaun the? yeh aage janma mein jagat amba gyaan-gyaaneshvari thi jo phir raaj-raajeshvari banti hai। ab pad kiska bada hai? dekhne mein to yeh svarga ke maalik hain। jagat amba kahaan ki maalik thi? inke paas kyon jaate hain? brahma ko bhi 100 bhuja vaala, 200 bhuja vaala, 1000 bhuja vaala dikhaate hain na। jitne bachche hote jaate hain, bhujaayen badhti jaati hain। jagdamba ko bhi lakshmi se jaasti bhujaayen di hain, unke paas hi jaakar sab kuchh maangate hain। bahut aashaayen le jaate hain - bachcha chaahiye, yeh chaahiye. . . lakshmi ke paas kabhi aisi aashaayen nahin le jaayenge। woh to sirf dhanvaan hai। jagat amba se to svarga ki baadshaahi milti hai। yeh bhi kisko pata nahin - jagat amba se kya maangana chaahiye! yeh to padhaai hai na। jagat amba kya padhaati hai? raajayog। isko kaha hi jaata hai buddhiyog। tumhaari aur sab taraph se buddhi nikal ek baap se lag jaati hai। buddhi to anek taraph bhaagti hai na। ab baap kehte hain mere saath buddhiyog lagaao, nahin to vikarma vinaash nahin honge isliye baba photo nikaalne ki bhi mana karte hain। yeh to inki deh hai na।

baap khud dalaal ban kehte hain abhi tumhaara woh hathiyaala cancel hai। kaam chita se utar ab gyaan chita par baitho। kaam chita se utro। apne ko aatma samajh mujh baap ko yaad karo to vikarma vinaash honge। aur koi manushya aise kah na saken। manushya ko bhagwan bhi nahin kaha ja sakta। tum bachche jaante ho baap hi patit-paavan hai। vahi aakar kaam chita se utaar gyaan chita par bithaate hain। woh hai roohaani baap। woh inmen baith kehte hain tum bhi aatma ho, auron ko bhi yahi samjhaate raho। baap kehte hain - manamnaabhav। manamnaabhav kahne se hi smriti aa jaayegi। is puraani duniya ka vinaash bhi saamne khada hai। baap samjhaate hain yeh hai mahaabhaari mahaabhaarat ladaai। kahenge ladaai to vilaayat mein bhi hoti hai phir isko mahaabhaarat ladaai kyon kehte hain? bhaarat mein hi yagya racha hua hai, inse hi vinaash jvaala nikli hai। tumhaare liye nai duniya chaahiye to meethe bachche puraani duniya ka zaroor vinaash hona chaahiye। to is ladaai ki jad yahaan se nikalti hai। is rudra gyaan yagya se mahaabhaari ladaai, vinaash jvaala prajjavlit hui। bhal shaastron mein likha hua hai parantu kisne kaha hai yeh nahin jaante। abhi baap samjha rahe hain nai duniya ke liye। abhi tum raajaai lete ho, tum devi-devta bante ho। tumhaare raajya mein aur koi bhi hona nahin chaahiye। devil world vinaash hota hai। buddhi mein yaad rehna chaahiye - kal hamne raajya kiya tha। baap ne raajya diya tha phir 84 janma lete aaye। abhi phir baba aaya hua hai। tum bachchon mein yeh to gyaan hai na। baap ne yeh gyaan diya hai। jab deity dharma ki sthaapna hoti hai to baaki saare devil world ka vinaash hota hai। yeh baap baith brahma dvaara sab baaten samjhaate hain। brahma bhi shiv ka bachcha hai, vishnu ka bhi raaz samjhaaya hai ki brahma so vishnu, vishnu so brahma banta hai। abhi tum samajh gaye ho ham brahman hain phir devta banenge phir 84 janma lenge। yeh knowledge dene vaala ek hi baap hai to phir koi manushya se yeh knowledge mil kaise sakti? ismen saari buddhi ki baat hai। baap kehte hain ki aur sab taraph se buddhi todo। buddhi hi bigadti hai। baap kehte hain ki mujhe yaad karo to vikarma vinaash honge। grihastha vyavhaar mein bhal raho। em object to saamne khadi hai। jaante ho ham padhkar yeh banenge। tumhaari padhaai hai hi sangamayug ki। abhi tum na is taraph ho, na us taraph। tum baahar ho। baap ko khivaiya bhi kehte hain, gaate bhi hain hamaari naeeya paar le jaao। is par ek kahaani bhi bani hui hai। koi chal padte hain, koi ruk jaate hain। ab baap kehte hain - main is brahma ke mukh dvaara baith sunaata hoon। brahma kahaan se aaya? prajaapita to zaroor yahaan chaahiye na। main inko adopt karta hoon, inka bhi naam rakhta hoon। tum bhi brahma mukh vanshaavli brahman ho, jo kaliyug ant mein hain, phir vahi satayug aadi mein jaayenge। tum hi pahle-pahle baap se alag ho part bajaane aaye ho। hamaare mein bhi sab to nahin kahenge na। yeh bhi maaloom pad jaayega kaun poore 84 janma lete hain! in lakshmi-naaraayan ki to guarantee hai na। inke liye hi gaayan hai shyaam-sundar। devi-devta sundar the, saanvare se sundar bane hain। gaanvade ke chhore se badal sundar ban jaate hain, is samay sab chhore-chhoriyaan hain। yeh behad ki baat hai, unko koi jaante nahin। kitni achhi-achhi samjhaani di jaati hai। har ek ke liye surgeon ek hi hai। yeh hai avinaashi surgeon।

yog ko agni kaha jaata hai kyonki yog se hi aatma ki alloy (khaad) nikalti hai। yog agni se tamopradhaan aatma satopradhaan banti hai। yadi aag thandi hogi to alloy niklegi nahin। yaad ko yog agni kaha jaata hai, jisse vikarma vinaash hote hain। to baap kehte hain tumko kitna samjhaata rehta hoon। dhaarna bhi ho na। achha manamnaabhav। ismen to thakna nahin chaahiye na। baap ko yaad karna bhi bhool jaate hain। yeh patiyon ka pati tumhaara gyaan se kitna shrringaar karte hain। niraakaar baap kehte hain aur sabse buddhiyog tod mujh apne baap ko yaad karo। baap sabhi ka ek hi hai। tumhaari ab chadhti kala hoti hai। kehte hain na - tere bhaane sarva ka bhala। baap aaye hain sarva ka bhala karne। raavan to sabko durgati mein le jaate hain, raam sabko sadgati mein le jaate hain। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ki yaad se apaar sukhon ka anubhav karne ke liye buddhi ki line clear chaahiye। yaad jab agni ka roop le tab aatma satopradhaan banen।

2) baap kaudiyon ke badle ratna dete hain। aise bholaanaath baap se apni jholi bharni hai। shant mein rahne ki padhaai padh sadgati ko praapta karna hai।

vardaan:- maaya ke bandhanon se sada nirbandhan rahne vaale yogayukta, bandhanmukta bhav

bandhanmukta ki nishaani hai sada yogayukta। yogayukta bachche jimmevaariyon ke bandhan va maaya ke bandhan se mukta honge। man ka bhi bandhan na ho। laukik jimmevaari to khel hain, isliye direction pramaan khel ki reeti se hansakar khelo to kabhi chhoti-chhoti baaton mein thakenge nahin। agar bandhan samajhte ho to tang hote ho। kya, kyon ka prashn uthta hai। lekin jimmevaar baap hai aap nimitta ho। is smriti se bandhanmukta bano to yogayukta ban jaayenge।

slogan:- karnakraavanhaar ki smriti se bhaan aur abhimaan ko samaapta karo।

avyakt ishaare - satyata aur sabhyata roopi culture ko apnaao

apvitrata sirf kisko duhkh dena ya paap karma karna nahin hai lekin svayan mein satyata, svachchhata vidhipoorvak agar anubhav karte ho to pavitra ho। jaise kahaavat hai satya ki naanv doobti nahin hai lekin dagmag hoti hai। to vishvaas ki naanv satyata hai, honesty hai jo dagmag hogi lekin doobegi nahin isliye satyata ki himmat se parmaatma pratyakshata ke nimitta bano।