Murli du jour du lundi 24 mars 2025

24-03-2025 praatahmurli om shanti "baapdaada"' madhuban

“meethe bachche - yeh gyaan tumhein sheetal banaata hai, is gyaan se kaam-krodh ki aag khatma ho jaati hai, bhakti se woh aag khatma nahin hoti''

prashn:- yaad mein mukhya mehnat kaun si hai?

uttar:- baap ki yaad mein baithte samay deh bhi yaad na aaye। aatma-abhimaani ban baap ko yaad karo, yahi mehnat hai, ismen hi vighna padta hai kyonki aadhaakalpa deh-abhimaani rahe ho। bhakti maana hi deh ki yaad।

om shanti। tum bachche jaante ho yaad ke liye ekaanta ki bahut jaroorat hai। jitna tum ekaanta va shant mein baap ki yaad mein rah sakte ho utna jhunda mein nahin rah sakte ho। school mein bhi bachche padhte hain to ekaanta mein jaakar study karte hain। ismen bhi ekaanta chaahiye। ghoomne jaate ho to usmein bhi yaad ki yaatra mukhya hai। padhaai to bilkul sahaj hai kyonki aadhaakalpa maaya ka raajya aane se hi tum deh-abhimaani bante ho। pahla-pahla shatru hai deh-abhimaan। baap ko yaad karne ke badle deh ko yaad kar lete hain। isko deh ka ahankaar kaha jaata hai। yahaan tum bachchon ko kaha jaata hai aatma-abhimaani bano, ismen hi mehnat lagti hai। ab bhakti to chhooti। bhakti hoti hi hai shareer ke saath। teerthon aadi par shareer ko le jaana padta hai। darshan karna hai, yeh karna hai। shareer ko jaana pade। yahaan tumko yahi chintan karna hai ki ham aatma hain, hamko parampita paramatma baap ko yaad karna hai। bas jitna yaad karenge to paap kat jaayenge। bhakti maarga mein to kabhi paap katte nahin hain। koi budhe aadi hote hain to andar mein yeh vaham hota hai - ham bhakti nahin karenge to nuksaan hoga, naastik ban jaayenge। bhakti ki jaise aag lagi hui hai aur gyaan mein hai sheetalta। ismen kaam krodh ki aag khatma ho jaati hai। bhakti maarga mein manushya kitni bhaavna rakhte hain, mehnat karte hain। samjho badreenaath par gaye, moorti ka saakshaatkaar hua phir kya! jhat bhaavna ban jaati hai, phir badri-naath ke sivaae aur koi ki yaad buddhi mein nahin rehti। aage to paidal jaate the। baap kehte hain main alpakaal ke liye manokaamna poori kar deta hoon, saakshaatkaar karaata hoon। baaki main inse milta nahin hoon। mere bigar varsa thode hi milega। varsa to tumko mere se hi milna hai na। yeh to sabhi dehdhaari hain। varsa ek hi baap rachta se milta hai, baaki jo bhi hain jad athva chaitanya woh saari hai rachna। rachna se kabhi varsa mil na sake। patit-paavan ek hi baap hai। kumaariyon ko to sangadosh se bahut bachna hai। baap kehte hain is patitapne se tum aadi-madhya-ant duhkh paate ho। abhi sab hain patit। tumhein abhi paavan banna hai। niraakaar baap hi aakar tumko padhaate hain। aise kabhi nahin samjho ki brahma padhaate hain। sabki buddhi shivbaaba taraph rahni chaahiye। shivbaaba in dvaara padhaate hain। tum daadiyon ko bhi padhaane vaala shivbaaba hai। unki kya khaatiri karenge! tum shivbaaba ke liye angoor aam le aate ho, shivbaaba kehte hain - main to abhokta hoon। tum bachchon ke liye hi sab kuchh hai। bhakton ne bhog lagaaya aur baantakar khaaya। main thode hi khaata hoon। baap kehte hain main to aata hi hoon tum bachchon ko padhaakar paavan banaane। paavan bankar tum itna oonch pad paayenge। mera dhandha yeh hai। kehte hi hain shiv bhagvaanuvaach। brahma bhagvaanuvaach to kehte nahin hain। brahma vaach bhi nahin kehte hain। bhal yeh bhi murli chalaate hain parantu hamesha samjho shivbaaba chalaate hain। kisi bachche ko achha teer lagaana hoga to khud pravesh kar lenge। gyaan ka teer teekha gaaya jaata hai na। science mein bhi kitni power hai। bombs aadi ka kitna dhamaaka hota hai। tum kitni silence mein rehte ho। science par silence vijay paati hai।

tum is srishti ko paavan banaate ho। pahle to apne ko paavan banaana hai। drama anusaar paavan bhi banna hi hai, isliye vinaash bhi noondha hua hai। drama ko samajh kar bahut harshit rehna chaahiye। abhi hamko jaana hai shantidham। baap kehte hain woh tumhaara ghar hai। ghar mein to khushi se jaana chaahiye na। ismen dehi-abhimaani banne ki bahut mehnat karni hai। is yaad ki yaatra par hi baba bahut jor dete hain, ismen hi mehnat hai। baap poochhte hain chalte phirte yaad karna sahaj hai ya ek jagah baithkar yaad karna sahaj hai? bhakti maarga mein bhi kitni maala pherte hain, raam-raam japte rehte hain। phaayda to kuchh bhi nahin। baap to tum bachchon ko bilkul sahaj yukti batlaate hain - bhojan banaao, kuchh bhi karo, baap ko yaad karo। bhakti maarga mein shreenaath dvaare mein bhog banaate hain, munh ko patti baandh dete hain। zara bhi aavaaz na ho। woh hai bhakti maarga। tumko to baap ko yaad karna hai। vo log itna bhog lagaate hain phir woh koi khaate thode hi hain। pande logon ke kutumba hote hain, woh khaate hain। tum yahaan jaante ho hamko shivbaaba padhaate hain। bhakti mein thode hi yeh samajhte hain ki hamko shivbaaba padhaate hain। bhal shiv puraan banaaya hai parantu unmein shiv-paarvati, shiv-shankar sab mila diya hai, woh padhne se koi phaayda nahin hota hai। har ek ko apna shaastra padhna chaahiye। bhaaratvaasiyon ki hai ek geeta। Christian ka Bible ek hota hai। devi-devta dharma ka shaastra hai geeta। usmein hi knowledge hai। knowledge hi padhi jaati hai। tumko knowledge padhni hai। ladaai aadi ki baaten jin kitaabon mein hain, usse tumhaara koi kaam hi nahin hai। ham hain yogbal vaale phir baahubal vaalon ki kahaaniyaan kyon sunen! tumhaari vaastav mein ladaai hai nahin। tum yogbal se 5 vikaaron par vijay paate ho। tumhaari ladaai hai 5 vikaaron se। woh to manushya, manushya se ladaai karte hain। tum apne vikaaron se ladaai ladte ho। yeh baaten sannyaasi aadi samjha na saken। tumko koi drill aadi bhi nahin sikhlaai jaati hai। tumhaari drill hai hi ek। tumhaara hai hi yogbal। yaad ke bal se 5 vikaaron par jeet paate ho। yeh 5 vikaar dushman hain। unmein bhi number one hai deh-abhimaan। baap kehte hain tum to aatma ho na। tum aatma aati ho, aakar garbha mein pravesh karti ho। main to is shareer mein viraajmaan hua hoon। main koi garbha mein thode hi jaata hoon। satayug mein tum garbha mahal mein rehte ho। phir raavan raajya mein garbha jel mein jaate ho। main to pravesh karta hoon। isko divya janma kaha jaata hai। drama anusaar mujhe ismen aana padta hai। inka naam brahma rakhta hoon kyonki mera bana hai na। adopt hote hain to naam kitne achhe-achhe rakhte hain। tumhaare bhi bahut achhe-achhe naam rakhe। list badi wonderful aai thi, sandeshi dvaara। baba ko sab naam thode hi yaad hain। naam se to koi kaam nahin। shareer par naam rakha jaata hai na। ab to baap kehte hain apne ko aatma samjho, baap ko yaad karo। bas। tum jaante ho ham poojya devta bante hain phir raajya karenge। phir bhakti maarga mein hamaare hi chitra banaayenge। deviyon ke bahut chitra banaate hain। aatmaon ki bhi pooja hoti hai। mitti ke saaligraam banaate hain phir raat ko tod daalte hain। deviyon ko bhi sazaakar, pooja kar phir samudra mein daal dete hain। baap kehte hain mera bhi roop banaakar, khila pilaakar phir mujhe kah dete thikkar-bhittar mein hai। sabse durdasha to meri karte hain। tum kitne gareeb ban gaye ho। gareeb hi phir oonch pad paate hain। saahookaar mushkil uthaate hain। baba bhi saahookaaron se itna lekar kya karenge! yahaan to bachchon ke boond-boond se yeh makaan aadi bante hain। kehte hain baba hamaari ek eet laga do। samajhte hain return mein hamko sone-chaandi ke mahal milenge। vahaan to sona dher rehta hai। sone ki eeten hogi tab to makaan banenge। to baap bahut pyaar se kehte hain - meethe-meethe bachchon, ab mujhe yaad karo, ab naatak poora hota hai।

baap gareeb bachchon ko saahookaar banne ki yukti bataate hain - meethe bachche, tumhaare paas jo kuchh bhi hai transfer kar do। yahaan to kuchh bhi rehna nahin hai। yahaan jo transfer karenge woh nai duniya mein tumko sau guna hokar milega। baba kuchh maangate nahin hain। woh to daata hai, yeh yukti bataai jaati hai। yahaan to sab mitti mein mil jaana hai। kuchh transfer kar denge to tumko nai duniya mein milega। is puraani duniya ke vinaash ka samay hai। yeh kuchh bhi kaam mein nahin aayega isliye baba kehte hain ghar-ghar mein university kam hospital kholo jisse health aur wealth milegi। yahi mukhya hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

raatri class 12-3-68

is samay tum gareeb saadhaaran maataayen purushaartha karke oonch pad pa leti ho। yagya mein madad aadi bhi maataayen bahut karti hain, purush bahut thode hain jo madadgaar bante hain। maataaon ko vaarisapne ka nasha nahin rehta। woh beej boti rehti, apna jeevan banaati rehti। tumhaara gyaan hai yathaartha, baaki hai bhakti। roohaani baap hi aakar gyaan dete hain। baap ko samjhen to baap se varsa zaroor leven। tumko baap purushaartha karaate rehte hain, samjhaate rehte hain। time vesta mat karo। baap jaante hain koi achhe purushaarthi hain koi medium, koi third। baba se poochhen to baba jhat bata de - tum first ho ya second ho ya third ho। kisko gyaan nahin dete ho to third class thahre। saboot nahin dete to baba zaroor kahenge na। bhagwan aakar jo gyaan sikhlaate hain vo phir praayahlop ho jaata hai। yeh kisko bhi pata nahin hai। drama ke plan anusaar yeh bhakti maarga hai, inse koi mujhe praapta kar nahin sakta। satayug mein koi ja nahin sakta। abhi tum bachche purushaartha kar rahe ho। kalpa pahle misal jitna jisne purushaartha kiya hai, utna karte rehte hain। baap samajh sakte hain apna kalyaan kaun kar rahe hain। baap to kahenge roz in lakshmi naaraayan ke chitra ke aage aakar baitho। baba aapki shreemat par yeh varsa ham zaroor lenge। aap samaan banaane ki service ka shauk zaroor chaahiye। centres vaalon ko bhi likhta hoon, itne varsha padhe ho kisko padha nahin sakte ho to baaki padhe kya ho! bachchon ki unnati to karni chaahiye na। buddhi mein saara din service ke khyaal chalne chaahiye।

tum vaanaprasthi ho na। vaanaprasthiyon ke bhi aashram hote hain। vaanaprasthiyon ke paas jaana chaahiye, marne ke pahle lakshya to bata do। vaani se pare tumhaari aatma jaayegi kaise! patit aatma to ja na sake। bhagvaanuvaach maamekam yaad karo to tum vaanaprastha mein chale jaayenge। banaaras mein bhi service dher hai। bahut saadhu log kaasheevaas ke liye vahaan rehte hain, saara din kehte rehte hain shiv kaashi vishvanaath ganga। tumhaare andar mein sadaiv khushi ki taali bajti rahni chaahiye। student ho na! service bhi karte hain, padhte bhi hain। baap ko yaad karna hai, varsa lena hai। ham ab shivbaaba ke paas jaate hain। yeh manmanaabhav hai। parantu bahuton ko yaad rehti nahin hai। jharmui jhagmui karte rehte। mool baat hai yaad ki। yaad hi khushi mein laayegi। sabhi chaahte to hain ki vishwa mein shanti ho। baba bhi kehte hain unhein samjhaao ki vishwa mein shanti ab sthaapan ho rahi hai, isliye baba lakshmi-naaraayan ke chitra ko jaasti mahatva dete hain। bolo, yeh duniya sthaapan ho rahi hai, jahaan sukh-shanti, pavitrata sab tha। sabhi kehte hain vishwa mein shanti ho। prize bhi bahuton ko milti rehti hai। world mein pees sthaapan karne vaala to maalik hoga na। inhon ke raajya mein vishwa mein shanti thi। ek bhaasha, ek raajya, ek dharma tha। baaki sabhi aatmaayen niraakaari duniya mein thi। aisi duniya kisne sthaapan ki thi! pees kisne sthaapan ki thi! foreigners bhi samjhenge yeh paradise tha, inhon ka raajya tha। world mein pees to ab sthaapan ho rahi hai। baba ne samjhaaya tha prabhaat pheri mein bhi yeh lakshmi-naaraayan ka chitra nikaalo। jo sabhi ke kaanon mein aavaaj pade ki yeh raajya sthaapan ho raha hai। narka ka vinaash saamne khada hai। yeh to jaante hain drama anusaar shaayad deri hai। bado-badon ke takdeer mein abhi nahin hai। phir bhi baba purushaartha karaate rehte hain। drama anusaar service chal rahi hai। achha। goodnight।

dhaarna ke liye mukhya saar:-

1) sangadosh se apni bahut-bahut sambhaal karni hai। kabhi patiton ke sang mein nahin aana hai। silence bal se is srishti ko paavan banaane ki seva karni hai।

2) drama ko achhi tarah samajhkar harshit rehna hai। apna sab kuchh nai duniya ke liye transfer karna hai।

vardaan:- baap dvaara saphalta ka tilak praapta karne vaale sada aagyaakaari, diltakhta nasheen bhav

bhaagya vidhaata baap roz amritvele apne aagyaakaari bachchon ko saphalta ka tilak lagaate hain। aagyaakaari brahman bachche kabhi mehnat va mushkil shabd mukh se to kya sankalp mein bhi nahin la sakte hain। woh sahajyogi ban jaate hain isliye kabhi bhi dilshikasta nahin bano lekin sada diltakhtansheen bano, merciful bano। aham bhaav aur vaham bhaav ko samaapta karo।

slogan:- vishwa parivartan ki date nahin socho, svayan ke parivartan ki ghadi nishchit karo।

avyakt ishaare - satyata aur sabhyata roopi culture ko apnaao

jo purity ki personality se sampanna royal aatmaayen hain unhein sabhyata ki devi kaha jaata hai। unmein krodh vikaar ki impurity bhi nahin ho sakti। krodh ka sookshm roop eershya, dvesh, ghrina bhi agar andar mein hai to woh bhi agni hai jo andar hi andar jalaati hai। baahar se laal, peela nahin hota, lekin kaala hota hai। to ab is kaalepan ko samaapta kar sachche aur saaph bano।