Murli du jour du vendredi 4 avril 2025

04-04-2025 praatahmurli om shanti "baapdaada"' madhuban

“meethe bachche - abhi tum purushottam banne ka purushaartha karte ho, purushottam hain devtaayen, kyonki woh hain paavan, tum paavan ban rahe ho''

prashn:- behad ke baap ne tum bachchon ko sharan kyon di hai?

uttar:- kyonki ham sab refuse ke (kichde ke) dibbe mein pade hue the। baap humein kichde ke dibbe se nikaal gul-gul banaate hain। aasuri gun vaalon ko daivi gunvaan banaate hain। drama anusaar baap ne aakar humein kichde se nikaal adopt kar apna banaaya hai।

geet:- yeh kaun aaya aaj savere-savere…

om shanti। raat ko din banaane ke liye baap ko aana pade। abhi tum bachche jaante ho ki baap aaya hua hai। pahle ham shoodra varna ke the, shoodra buddhi the। varnon vaala chitra bhi samjhaane ke liye bahut achha hai। bachche jaante hain ham in varnon mein kaise chakra lagaate hain। abhi hamko parampita paramatma ne shoodra se brahman banaaya hai। kalpa-kalpa, kalpa ke sangamayuge ham brahman bante hain। braahmanon ko purushottam nahin kahenge। purushottam to devtaaon ko kahenge। brahman yahaan purushaartha karte hain purushottam banne ke liye। patit se paavan banne liye hi baap ko bulaate hain। to apne se poochhna chaahiye ham paavan kahaan tak ban rahe hain? student bhi padhaai ke liye vichaar saagar manthan karte hain na। samajhte hain is padhaai se ham yeh banenge। tum bachchon ki buddhi mein hai ki abhi ham brahman bane hain devta banne ke liye। yeh hai amoolya jeevan kyonki tum eeshvareey santaan ho। eeshvar tumko raajayog sikhla rahe hain, patit se paavan bana rahe hain। paavan devta bante hain। varnon par samjhaana bahut achha hai। sannyaasi aadi in baaton par nahin thahrenge। baaki 84 janmon ka hisaab samajh sakte hain। yeh bhi samajh sakte hain ki ham sannyaas dharma vaale 84 janma nahin lete hain। islaami bauddhi aadi bhi samjhenge ham 84 janma nahin lete hain। haan punarjanma lete hain। parantu kam। tumhaare samjhaane se jhat samajh jaayenge। samjhaane ki bhi yukti chaahiye। tum bachche yahaan sammukh baithe ho to baba buddhi ko refresh karte hain jaise aur bachche bhi yahaan aate hain refresh hone ke liye। tumko to roz baba refresh karte hain ki yeh dhaarna karo। buddhi mein yahi khyaal chalte rahen, ham 84 janma kaise lete hain? kaise shoodra se brahman bane hain? brahma ki santaan brahman। ab brahma kahaan se aaye? baap baith samjhaate hain ham inka naam brahma rakhte hain। yeh jo brahmaakumaar-kumaariyaan hain yeh family ho gaye। to zaroor adopted hain। baap hi adopt karenge। unko baap kaha jaata hai, daada nahin kahenge। baap ko baap hi kaha jaata hai। milkiyat milti hi baap se hai। koi chaacha, maama va biraadri vaala bhi adopt karte hain। jaise baap ne sunaaya tha ek bachchi kichde ke dibbe mein padi thi, woh koi ne uthaae jaakar kisko god mein di kyonki unko apna bachcha nahin tha। to bachchi jinki god mein gai unko hi mama-baba kahne lag padegi na। yeh phir hai behad ki baat। tum bachche bhi jaise behad ke kichde ke dibbe mein pade the। vishay vaitarni nadi mein pade the। kitne gande hue pade the। drama anusaar baap ne aakar us kichde se nikaal tumko adopt kiya hai। tamopradhaan ko kichda hi kahenge na। aasuri gun vaale manushya hain deh-abhimaani। kaam, krodh bhi bade vikaar hain na। to tum raavan ke bade refuse mein pade the। vaastav mein refugee bhi ho। ab tumne behad ke baap ki sharan li hai, refuse se nikal gul-gul devta banne। is samay saari duniya refuse ke bade dibbe mein padi hai। baap aakar tum bachchon ko kichde se nikaal apna banaate hain। parantu kichde ke rahne vaale aise hire hue hain, jo nikaalte hain phir bhi kichda hi achha lagta hai। baap aakar behad ke kichde se nikaalte hain। bulaate bhi hain ki baba aakar hamko gul-gul banaao। kaanton ke jangal se nikaal flower banaao। khudaai bageeche mein bithaao। ab asuron ke jangal mein pade hain। baap tum bachchon ko garden mein le chalte hain। shudra se brahman bane hain phir devta banenge। yeh devtaaon ki raajdhaani hai। braahmanon ki raajaai hai nahin। bhal paandav naam hai parantu paandavon ko raajaai nahin hai। raajaai praapta karne ke liye baap ke saath baithe hain। behad ki raat ab poori ho behad ka din shuru hota hai। geet suna na - kaun aaya savere-savere....... savere-savere aate hain raat ko mitaae din banaane arthaat svarga ki sthaapna, narka ka vinaash karaane। yeh bhi buddhi mein rahe to khushi ho। jo nai duniya mein oonch pad paane vaale hain woh kabhi apna aasuri svabhaav nahin dikhaayenge। jis yagya se itna oonch bante hain, us yagya ki bahut pyaar se seva karenge। aise yagya mein to haddiyaan bhi de deni chaahiye। apne ko dekhna chaahiye - is chalan se ham oonch pad kaise paayenge! besmajh chhote bachche to nahin hain na। samajh sakte hain - raaja kaise, praja kaise bante hain? baba ne rath bhi anubhvi liya hai। jo raajaaon aadi ko achhi reeti jaante hain। raajaaon ke daas-daasiyon ko bhi bahut sukh milta hai। woh to raajaaon ke saath hi rehte hain। parantu kahlaayenge to daas-daasi। sukh to hai na। jo raaja-raani khaaye woh unko mile। baahar vaale thode hi kha sakte hain। daasiyon mein bhi nambarvaar hoti hain। koi shrringaar karne vaali, koi bachchon ko sambhaalne vaali, koi jhaadu aadi lagaane vaali। yahaan ke raajaaon ko itne daas-daasiyaan hain, to vahaan kitne dher honge। sab par alag-alag apni charge hoti hai। rahne ka sthaan alag hoga। woh koi raaja-raani jaise sajaaya hua nahin hoga। jaise servant quarters hote hain na। andar aayenge zaroor parantu rehte servant quarters mein hain। to baap achhi reeti samjhaate hain apne par raham karo। ham oonche te oonch banen। ham abhi shoodra se brahman bane hain। aho saubhaagya। phir devta banenge। yeh sangamayug bahut kalyaankaari hai। tumhaari har baat mein kalyaan bhara hua hai। bhandaare mein bhi yog mein rah bhojan banaayen to bahuton ka kalyaan bhara hua hai। shreenaath dvaare mein bhojan banaate hain bilkul hi silence mein। shreenaath hi yaad rehta hai। bhakta apni bhakti mein bahut masta rehte hain। tumko phir gyaan mein masta rehna chaahiye। shreekrishna ki aisi bhakti hoti hai, baat mat poochho। vrindaavan mein do bachchiyaan hain, poori bhaktin hain, kehti hain bas ham yahaan hi rahengi। yahaan hi shareer chhodengi, shreekrishna ki yaad mein। unko bahut kehte hain achhe makaan mein chalkar raho, gyaan lo, bolti hain ham to yahaan hi rahengi। to usko kahenge bhakta shiromni। shreekrishna par kitna nyochhaavar jaate hain। abhi tumko baap par nyochhaavar hona hai। pahle-pahle shuru mein shivbaaba par kitne nyochhaavar hue। dher ke dher aaye। jab India mein aaye to bahuton ko apna gharbaar yaad padne laga। kitne chale gaye। grahchaari to bahuton par aati hai na। kabhi kaisi dasha, kabhi kaisi dasha baithti hai। baba ne samjhaaya hai koi bhi aate hain to bolo kahaan aaye ho? baahar mein board dekha - brahmaakumaar-kumaariyaan। yeh to parivaar hai na। ek hai niraakaar parampita paramatma। doosra phir prajaapita brahma bhi gaaya hua hai। yeh sab unke bachche hain, daada hai shivbaaba। varsa unse milta hai। woh raay dete hain mujhe yaad karo to tum patit se paavan ban jaayenge। kalpa pahle bhi aisi raay di thi। kitni oonchi padhaai hai। yeh bhi tumhaari buddhi mein hai ham baap se varsa le rahe hain।

tum bachche manushya se devta banne ki padhaai padh rahe ho। tumhein zaroor daiveegun dhaaran karne hain। tumhaara khaan paan, bol-chaal kitna royal hona chaahiye। devtaayen kitna thoda khaate hain। unmein koi laalach thode hi rehti hai। 36 prakaar ke bhojan bante hain, khaate kitna thoda hain। khaan-paan ki laalach rakhna - isko bhi aasuri chalan kaha jaata hai। daiveegun dhaaran karne hain to khaan paan bada shuddh aur saadhaaran hona chaahiye। parantu maaya aisi hai jo ekdam patthar buddhi bana deti hai to phir pad bhi aisa milega। baap kehte hain apna kalyaan karne ke liye daiveegun dhaaran karo। achhi reeti padhenge, padhaayenge to tumko hi izaapha milega। baap nahin dete hain, tum apne purushaartha se paate ho। apne ko dekhna chaahiye kahaan tak ham service karte hain? ham kya banenge? is samay shareer chhoot jaae to kya milega? baba se koi poochhe to baba jhat bata den ki is activity se samjha jaata hai yeh phalaana pad paayenge। purooshaartha hi nahin karte to kalpa-kalpaantar ke liye apne ko ghaata daalte hain। achhi service karne vaale zaroor achha pad paayenge। andar mein maaloom rehta hai yeh daas-daasi jaakar banenge। baahar se kah nahin sakte। school mein bhi student samajhte hain ham senior banenge va junior? yahaan bhi aise hain। senior jo honge woh raaja-raani banenge, junior kam pad paayenge। saahookaaron mein bhi senior aur junior honge। daas-daasiyon mein bhi senior aur junior honge। senior vaalon ka darja oonch hota hai। jhaadu lagaane vaali daasi ko kabhi andar mahal mein aane ka hukm nahin rehta। in sab baaton ko tum bachche achhi reeti samajh sakte ho। pichhaadi mein aur bhi samajhte jaayenge। oonch banaane vaalon ka phir regard bhi rakhna hota hai। dekho kumaarka hai, woh senior hai to regard rakhna chaahiye।

baap bachchon ka dhyaan khinchavaate hain - jo bachche mahaarthi hain, unka regard rakho। regard nahin rakhte to apne oopar paap ka bojha chadhaate hain। yeh sab baaten baap dhyaan mein dete hain। badi khabardaari chaahiye। nambarvaar kiska regard kaise rakhna chaahiye, baba to har ek ko jaante hain na। kisko kahen to traitor banne mein deri na karen। phir kumaariyon, maataaon aadi par bhi bandhan aa jaate hain। sitam sahan karne padte hain। bahut karke maataayen hi likhti hain - baba hamko yeh bahut tang karte hain, ham kya karen? are, tum koi jaanvar thode hi ho jo jabardasti karenge। andar mein dil hai tab poochhti ho kya karoon! ismen to poochhne ki bhi baat nahin hai। aatma apna mitra hai, apna hi shatru hai। jo chaahe so kare। poochhna maana dil hai। mukhya baat hai yaad ki। yaad se hi tum paavan bante ho। yeh lakshmi-naaraayan number one paavan hain na। mama kitni service karti thi। aisa to koi kah na sake ham mama se bhi hoshiyaar hain। mama gyaan mein sabse teekhi thi। yog ki kami bahuton mein hai। yaad mein rah nahin sakte hain। yaad nahin karenge to vikarma vinaash kaise honge! law kehta hai pichhaadi mein yaad mein hi shareer chhodna hai। shivbaaba ki yaad mein hi praan tan se niklen। ek baap ke sivaae aur koi yaad na aaye। kahaan bhi aasakti na ho। yeh practice karni hoti hai, ham ashareeri aaye the phir ashareeri hokar jaana hai। bachchon ko baar-baar samjhaate rehte hain। bahut meetha banna hai। daiveegun bhi hone chaahiye। deh-abhimaan ka bhoot hota hai na। apne par bahut dhyaan rakhna hai। bahut pyaar se chalna hai। baap ko yaad karo aur chakra ko yaad karo। chakra ka raaz kisko samjhaaya to bhi wonder khaayenge। 84 janmon ki hi kisko yaad nahin rehti hai to 84 laakh phir kaise koi yaad kar sake? khyaal mein bhi aa na sake, is chakra ko hi buddhi mein yaad rakho to bhi aho saubhaagya। abhi yeh naatak poora hota hai। puraani duniya se vairaagya hona chaahiye, buddhiyog shantidham-sukhdhaam mein rahe। geeta mein bhi hai manamnaabhav। koi bhi geetaapaathi manamnaabhav ka arth nahin jaante hain। tum bachche jaante ho - bhagvaanuvaach, deh ke sabhi sambandh chhod apne ko aatma samjho। kisne kaha? svayan baap ne। koi phir kehte ham to shaastron ko hi maante hain, bhal bhagwan aaye to bhi nahin maanenge। barobar shaastra padhte rehte hain। bhagwan aaye hain raajayog sikhla rahe hain, sthaapna ho rahi hai, yeh shaastra aadi sab hain hi bhaktimaarga ke। bhagwan ka nishchay ho to varsa lene lag pade, phir bhakti bhi ud jaae। parantu jab nishchay ho na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) devta banne ke liye bahut royal sanskaar dhaaran karne hain। khaan-paan bahut shuddh aur saadhaaran rakhna hai। laalach nahin karni hai। apna kalyaan karne ke liye daiveegun dhaaran karne hain।

2) apne oopar dhyaan rakhte, sabke saath bahut pyaar se chalna hai। apne se jo senior hain, unka regard zaroor rakhna hai। bahut-bahut meetha banna hai। deh-abhimaan mein nahin aana hai।

vardaan:- beeti hui baaton ko merciful ban samaane vaale shubh chintak bhav

yadi kisi ki beeti hui kamjori ki baaten koi sunaaye to shubh bhaavna se kinaara kar lo। vyartha chintan ya kamjori ki baaten aapas mein nahin chalni chaahiye। beeti hui baaton ko merciful bankar sama lo। samaakar shubh bhaavna se us aatma ke prati mansa seva karte raho। bhale sanskaaron ke vash koi ulta kehta, karta ya sunta hai to use parivartan karo। ek se do tak, do se teen tak aise vyartha baaton ki maala na ho jaae। aisa attention rakhna arthaat shubh chintak banna।

slogan:- santushta mani bano to prabhu priy, lokapriy aur svayampriy ban jaayenge।

avyakt ishaare - “combined roop ki smriti se sada vijayi bano''

jaise shareer aur aatma combined hai to jeevan hai। yadi aatma shareer se alag ho jaae to jeevan samaapta ho jaata। aise karmayogi jeevan arthaat karma yog ke bina nahin, yog karma ke bina nahin। sada combined ho to saphalta milti rahegi।